“Pa Nan Tur Por Ta Un”

E orashon sumosaserdotal ta ser dividí den tres parti. Promé, Hesus ta hasi orashon pa Su mes (Juan 17:1-5), despues pa Su disipelnan (Juan 17:6-19), i finalmente pa esnan ku mas despues lo kere den djE (Juan 17:20-26).

Lesa Juan 17:1-5. Kiko ta e esensia di Su orashon, i kiko e ta nifiká pa nos?

Hesus ta intersedé promé pa E mes. Den eventonan anterior den e Evangelio di Juan, Hesus a indiká ku Su ora no a yega ainda (Juan 2:4, 7:30, 8:20). Pero awor E sa ku e ora di Su sakrifisio a yega. E momentu pa e konklushon dramátiko di Su bida terenal a yega, i e tin mester di forsa pa kompletá Su mishon. Ta tempu pa orashon.

Hesus lo glorifiká Su Tata dor di hasi Su boluntat, asta si esei ta nifiká ku E mester soportá e Krus. Su aseptashon di e Krus no ta un tipo di fatalismo; mas bien, e ta de echo kon E ta ehersé e outoridat ku e Tata a dun’E. E no a muri un morto di mártir ma boluntariamente a glorifiká Su Tata dor di kumpli ku e rason pa Su enkarnashon; Su morto di sakrifisio riba e krus pa e pikánan di mundu.

Kiko ta bida eterno di akuerdo ku Juan 17:3? Kiko ta nifiká konosé Dios?

Promé ku tur kos, Hesus ta bisa nos ku bida eterno ta konsistí den nos konosementu personal di Dios. Esaki no ta salbashon pa obra òf pa konosementu, ma mas bien e ta e eksperensia di konosé Señor pa motibu di loke Hesus a hasi pa nos na e Krus. E konosementu aki ta ser kanalisá atraves di un relashon personal ku e Tata. Nos tendensia humano ta pa limitá konosementu na echonan i detayenan, pero aki Hesus ta apuntá algu mas profundo i mas satisfaktorio: un relashon personal ku Dios. E promé binida di Hesus tabata tambe pa e propósito di guia humanidat den su búskeda pa un konosementu mas signifikante i salbador di Dios i e unidat un ku otro ku un konosementu asina lo hiba na dje.

Lesa Juan 17:9-19. Tokante kiko Hesus ta hasiendo orashon spesífikamente enkuanto di Su disipelnan?

Despues Hesus ta hasi orashon pa Su disipelnan, ku ta den peliger grave di pèrdè nan fe den djE den e dianan benidero, ora E, Hesus, lo no ta huntu ku nan mas den karni. Asina, E ta konsagrá nan na e kuido di Su Tata.

E orashon di Hesus ta pa nan protekshon den e mundu. Komo tal, Hesus no ta hasi orashon pa e mundu, pasobra E sa ku e ta básikamente kontrali na e boluntat di e Tata (Juan 5:19). Pero pasobra e mundu ta e lugá kaminda e disipelnan lo hasi nan servisio, Hesus ta hasi orashon pa nan por ser preservá for di e maldat den mundu. Hesus ta preokupá pa e mundu; enbèrdat, E ta su Salbador. Pero e plamamentu di e Evangelio ta mará na e testimonio di esnan ku lo bai i prediká e bon notisia. Ta p’esei Hesus mester intersedé pa nan pa esun maligno no derotá nan (Mat. 6:13).

Un disipel, sinembargo, a ser derotá. Mas trempan e anochi ei Hesus a menshoná ku un di nan a disidí di traishon’E (Juan 13:18-30). Ounke Hesus ta referí na e echo ku Skritura a predesí e traishon di Hudas (Salmo 41:9), Hudas no tabata víktima di destino. Durante e Santa Sena, Hesus a apelá na dje den un gesto di amor i amistat (Juan 13:26-30). “Na e sena di Pasku Hesus a proba Su divinidat dor di revelá e propósito di e traidor. Tiernamente E a inkluí Hudas den e ministerio na e disipelnan. Pero e último apelashon di amor no a ser skuchá.” - Ellen G. White, The Desire of Ages, p. 720.

Sabiendo ku envidia i yalusí por a dividí e disipelnan, manera e a hasi na okashonnan anterior, Hesus ta hasi orashon pa nan unidat. “Tata Santu, warda atraves di Bo nòmber esnan ku Bo a duna Mi, pa nan por ta un manera Nos ta” (Juan 17:11, NKJV). Un unidat asina ta mas aya di logro humano. E por ta e resultado i regalo di grasia divino so. Nan unidat ta fundá den e unidat di e Tata i Yu, i e unidat aki ta un prerekisito indispensabel pa servisio efektivo den futuro.

Nan santifikashon òf konsagrashon den e bèrdat ta tambe indispensabel pa servisio. E obra di e grasia di Dios riba kurason di e disipelnan lo transformá nan. Pero sin an mester testifiká pa e bèrdat di Dios, nan mes mester ser transformá dor di e bèrdat ei.

Despues ku Hesus a hasi orashon pa Su disipelnan, E a amplia Su orashon pa inkluí “esnan ku lo kere den Mi atraves di nan palabra” (Juan 17:20, NKJV).

Lesa Juan 17:20-26. Kiko tabata e deseo di mas grandi di Hesus pa esnan ku mas despues lo a kere den e mensahe di e Evangelio? Dikon ta asina importante ku e orashon aki ser kumplí?

Komo ku e Tata i Yu ta unu, Hesus a hasi orashon pa futuro kreyentenan tambe lo tabata unu. Den algun lugá den e Evangelio di Juan, Hesus a referí na e unidat di e Tata i Yu. Nunka nan ta aktua independientemente for di otro, sino semper nan ta uní den tur loke nan ta hasi (Juan 5:20-23). Nan ta kompartí un amor komun pa humanidat kaí te na e punto ku e tata tabata dispuesto pa duna Su Yu pa e mundu, i e Yu tabata dispuesto pa duna Su bida p’e tambe (Juan 3:16, 10:15).

E unidat ku Hesus ta referí na dje den Su orashon ta un unidat di amor i propósito manera e ta entre Tata i Yu. “Pa medio di esaki tur lo sa ku boso ta Mi disipelnan, si boso tin amor un pa otro” (Juan 13:35, NKJV). Manifestando e unidat aki den amor lo duna konfirmashon públiko, tantu di nan relashon ku Hesus komo ku e Tata. “E ekshibishon di nan unidat genuino mester proveé un testimonio konvinsente na e bèrdat di e Evangelio.” - Andreas J. Köstenberger, John, Baker Exegetical Commentary on the New Testament (Grand Rapids: Baker Academic, 2004), p. 498. Asin’aki e mundu lo sa ku Hesus ta e Salbador. Den otro palabra, e unidat aki ku Hesus a hasi orashon p’e no por ta invisibel. Kon e mundu por ser konvensé di e verasidat di e Evangelio si e no por mira amor i unidat entre e pueblo di Dios?

“Dios ta guiando un pueblo pa para den unidat perfekto riba e plataforma di bèrdat eterno. … Dios ta designá pa Su pueblo tur yega na e unidat di fe. E orashon di Kristu djis promé ku Su krusifikashon tabata pa Su disipelnan por ta unu, meskos ku E tabata un ku e Tata, pa e mundu lo por kere ku e Tata a mand’E. E orashon aki di mas konmovedor i maravioso ta ekstendé atraves di siglonan te na nos tempu; pasobra Su palabranan tabata: ‘Tampoko mi ta hasi orashon pa esakinan so, ma pa esnan tambe ku lo kere den mi dor di nan palabra.’ ”

“Kon sinseramente esnan ku ta profesá di ta siguidónan di Kristu mester trata na kontestá e orashon aki den nan bida.” - Ellen G. White, Testimonies for the Church, tomo 4, p. 17.

Lesa Marko 9:38-41 i Juan 10:16. Kiko e kontesta di Hesus na apòstel Juan ta siña nos tokante eksklusivismo i prehuisio tokante ken ta un berdadero siguidó d Hesus?

Atventistanan di e di Shete Dia tabata inkliná pa komprondé ku e orashon di Hesus den Juan 17 ta aplikando direktamente na e unidat di nan denominashon di iglesia. Nos mester ta uní komo un iglesia pa kumpli ku nos mishon pa kompartí e mensahenan di e tres angelnan na e mundu. Den e aspekto aki, tin tiki diskushon.

Pero ke tal di unidat ku otro Kristiannan? Kon nos mester relashoná nos mes ku nan den lus di loke Hesus a hasi orashon p’e?

No tin duda, nos ta kere ku Dios tin hendenan fiel den otro iglesianan ademas di esun di nos. Ademas, Beibel ta aklará ku Dios tin su fielnan, asta den babilonia: “Sali for di dje, Mi pueblo, pa bo no kompartí den su pikánan, i pa bo no risibí di su plaganan” (Rev. 18:4, NKJV).

Na mes momentu nos sa ku, di akuerdo ku e buki di Revelashon, tin un gran apostasia entre esnan ku ta profesá e nòmber di Kristu, i ku den e último dianan hopi Kristiannan falsu lo uni ku otro i ku e estado pa provoká e persekushon deskribí gráfikamente den Revelashon 13:1-17. P’esei Atventistanan di e di Shete Dia semper tabata masha kuidadoso tokante bira envolví den yamadanan pa unidat ku otro iglesianan, manera ta ser mirá den e movementu ekuméniko.

Kon, anto, nos mester relashoná ku otro denominashonnan? Ellen G. White a skirbi lo siguiente enkuanto di Iglesia Atventista di e di Shete Dia trahando huntu ku otro Kristiannan, a lo ménos riba e tema spesífiko: “Ora e agente humano someté su boluntat na e boluntat di Dios, Spiritu Santu lo hasi impreshon riba e kurason di esnan na ken e ta ministrá. Mi a ser mustrá ku nos no mester evitá e obreronan di e Union Pro Temperansia di Muhénan Kristian. Dor di uni ku nan na interes di apstinensia total nos no ta kambia nos posishon enkuanto di opservansia di e di shete dia, i nos por mustra nos apresio di nan posishon enkuanto di e tema di temperansia. Dor di habri porta i invitá nan pa uni ku nos riba e kuestion di temperansia, nos ta sigurá nan ayudo pa loke ta trata liñanan di temperansia; i nan, dor di uni ku nos, lo tende bèrdatnan nobo kua Spiritu Santu ta warda pa impreshoná riba kurasonnan.” - Welfare Ministry, p. 163.

Ounke e tabata tratando ku un asuntu spesífiko na un momentu spesífiko, e ta duna prinsipionan ku nos por sigui enkuanto di kon nos ta relashoná ku otro Kristiannan, spesialmente riba e kuestion di uni rondó di un kousa.

Na promé lugá, nos por traha ku nan riba interesnan sosial komun. Na di dos lugá, si nos uni ku nan, nos mester hasi esaki den un forma ku lo no komprometé nos kreensianan òf práktikanan. Na di tres lugá, nos por i mester uza e “unidat” aki pa kompartí ku otronan e bèrdatnan presioso ku kua nos a ser bendishoná.

Den Juan 17:3, Hesus a bisa ku bida eterno ta konosé Dios. Lesa 1 Juan 2:3-6. Kiko ta nifiká konosé Dios? Kon nos ta demostrá nos konosementu di Dios den nos bida diario?

Generalmente, miéntras hendenan den sosiedat awendia ta deseá di yama su mes siudadanonan ku ta respetá lei, e mesun hendenan aki hopi biaha lo minimisá e obligashon bíbliko pa warda e mandamentunan di Dios. Algu asta ta argumentá ku e grasia di Dios ta eliminá e mandamentunan di Dios. Pero esei no ta e siñansa bíbliko: “Warda e mandamentunan no ta un kondishon pa konosé Dios ma un señal ku nos konosé Dios/Hesus i ta stim’E. P’esei, konosementu di Dios no ta solamente konosementu teorétiko ma ta hiba na akshon.” - Ekkehardt Mueller, The Letters of John (Nampa, Idaho: Pacific Press, 2009), p. 39. Hesus Mes a enfatisá: “Si boso ta stima Mi, warda Mi mandamentunan.” “Esun ku tin Mi mandamentunan i ta warda nan, ta e ta stima Mi” (Juan 14:15, 21, NKJV). “Na esaki nos sa ku nos ta stima e yunan di Dios, ora nos ta stima Dios i ta warda Su mandamentunan. Pasobra esaki ta e amor di Dios, ku nos ta warda Su mandamentunan. I Su mandamentunan no ta pisá” (1 Juan 5:2, 3, NKJV).

Lesa Juan 13:34, 35. Ki mandamentu nobo Hesus a duna Su disipelnan, i kon esaki ta relashoná ku e idea di unidat entre e siguidónan di Hesus?

E mandamentu pa stima un hende su próhimo no tabata nobo den su mes; e por ser hañá den e instrukshonnan ku Dios a duna Moises (Lev. 19:18). Loke ta nobo ta e mandato di Hesus pa Su disipelnan un stima otro manera E a stima nan. E ehèmpel di Hesus di amor apnegá ta e étika nobo pa e komunidat Kristian.

Ki un norma maravioso a ser presentá nos dilanti! E bida di Hesus tabata un demostrashon práktiko di amor den akshon. Henter e obra di grasia ta un servisio kontinuo di amor, di esfuerso altruista i generoso. Nos por imaginá nos mes ku e bida di Kristu tabata un manifestashon insesante di amor i generosidat pa e bon di otronan. E prinsipio ku a animá Kristu mester animá Su pueblo den tur nan tratamentu un ku otro. Ki un testimonio poderoso un amor asina lo tabata na e mundu. I ki un forsa poderoso pa unidat entre nos un amor asina lo a proveé tambe.

Ellen G. White, “God’s Law Immutable”, p. 443-446, den The Great Controversy. Lesa e artíkulonan “Denominations, Relations to Other”, pp. 763, 764, i “Roman Catholic Church”, p. 1110, den The Ellen G. White Encyclopedia.

“Ounke Iglesia Atventista di e di Shete Dia ta un iglesia mundial ku hopi iglesia lokal, Atventistanan no ta pretendé di ta e iglesia universal di Kristu. E iglesia universal ta mas amplio ku kualke denominashon. E ta visibel i invisibel debí ku e ta konsistí di esnan ku ta kere den Hesus i ta siguiE. E kuestion teológiko partikular aki ta ser intensifiká si nos tuma na konsiderashon apostasia entre Kristiannan, tratá di forma konmovedor den e Buki di Revelashon. E iglesia puru di revelashon 12 ta ser kontrastá ku e ‘prostituta’ di Revelashon 17, Babilonia e gran stat, kua na su turno ta ser kontrastá ku e brùit di e Lamchi, e stat santu òf e Yerusalèm Nobo di revelashon 21 i 22. Den siglo 1, e iglesia universal por tabata bastante visibel; e ta muchu mas difísil i kompleho pa mir’é, por ehèmpel, durante Edat Media.

Pa e motibu ei, Atventistanan no ta limitá e konsepto di e berdadero iglesia di Dios na nan propio denominashon, ni nan ta ekstend’é outomátikamente na otro iglesianan Kristian. E berdadero iglesia di Dios ta konsistí di e individuonan ei ku realmente ta kere den djE. Dios konosé nan. Atventistanan, na otro banda, ta sostené ku nan ta e remanente visibel i spesial di Dios di e tempu di fin di revelashon 12:17 i kapítulonan 12-14. E remanente aki tin un karakter tantu lokal komo universal (Rev. 2:24 i 12:17).” - Ekkehardt Mueller, “The Universality of the Church in the New Testament”, den Ángel Manuel Rodríguez, ed., i Message, Mission, and Unity of the Church (Silver Spring, Md.: Biblical Research Institute, General Conference of Seventh-day Adventists, 2013), p. 37.