E Klave na Unidat

Lesa Efesionan 1:3-14. Kiko, di akuerdo ku Pablo aki, nos a ser duná den Kristu?

E siguidónan di Hesus tin hopi pa kua alabá Dios. Den Kristu, Dios a skohe pa adoptá nos komo yunan hòmber i muhé pa represent’E na e mundu. Pablo ta uza hopi imágen pa deskribí nos relashon nobo ku Dios den Kristu. Di e imágennan aki, e imágen di adopshon ta abarká e tema di unidat di e lès aki. Den Kristu, nos a ser adoptá, i nos ta pertenesé na e famia di Dios. E imágen di famia aki ta tambe un referensia na e pakto di Dios ku e yunan di Israel. Den konteksto di e epestel di Pablo, Paganonan ku aseptá Hesus komo e Mesias tambe ta yunan di Dios, herederonan di e promesanan hasí na Israel (Rom. 8:17, Gal. 4:7). E benefishi di e relashon aki ku Kristu, pa ta den Kristu, ta fundamental na henter e unidat Kristian. E pasashi aki tambe ta bisa nos ku tabata deseo di Dios tur tempu pa uni henter humanidat di nobo den Kristu. I, den e famia di Dios, konosé Hesus no ta proveé ningun status spesial: nos tur ta yunan di Dios, igualmente stimá i apresiá.

Algun hende ta bira konfundí ora, den e pasashi aki, nos ta lesa tokante predestinashon (Efe. 1:5, 11). E promesa ku Dios a skohe nos pa ser salbá parse ta impliká tambe ku Dios a skohe algun pa bai pèrdí. Pero esei no ta e siñansa bíbliko. Mas bien, Dios a prepará e plan di salbashon promé ku fundashon di mundu pa asina tur hende lo por bai salbá. “Pasobra Dios a stima mundu asina tantu ku E a duna Su úniko Yu, pa ken sea kere den djE lo no peresé ma tin bida eterno” (Juan 3:16, NKJV; lesa tambe 1 Tim. 2:6, 2 Pe. 3:9). Dios sa di antemano ken lo aseptá Su oferta di salbashon, pero esei no ta meskos ku determiná adelantá un hende su desishon. Salbashon ta ser ofresé na henter humanidat pa motibu di loke Kristu a hasi pa nos. E pregunta ta: Kon nos ta respondé riba e oferta aki? Dios no ta uza intimidashon pa salba niun hende.

“Den e konsilio di shelu, provishon a ser hasí ku hende, ounke transgresornan, no mester a peresé den nan desobedensia, ma, pa medio di fe den Kristu komo nan sustituto i garantia, lo por a bira e skohínan di Dios, predestiná pa e adopshon di yunan dor di Hesukristu na Su mes di akuerdo ku e bon intenshon di Su boluntat. Dios ta deseá pa tur hende bai salbá; pasobra amplio provishon a ser hasí, dor di duna Su úniko Yu pa paga e reskate di hende. Esnan ku lo peresé lo peresé pasobra nan a rechasá pa ser adoptá komo yunan di Dios pa medio di Kristu Hesus.” - Ellen G. White Comments, The SDA Bible Commentary, tomo 6, p. 1114.

Algun di e divishonnan di mas profundo entre hende ta ser kousá pa diferensianan di rasa, etnisidat, i religion. Den hopi sosiedat, karchinan di identidat ta indiká e etnisidat òf religion ku un hende ta pertenesé na dje, i e distinshonnan aki hopi biaha ta konektá ku privilegionan òf restrikshonnan ku hende tin ku biba kuné riba un base diario. Ora gueranan òf konfliktonan surgi, e markadónan aki di identidat i diferensianan hopi biaha ta bira katalisadónan pa represhon i violensia.

Den Efesionan 2:11-22, Pablo ta indiká un mihó forma pa e komunidat Kristian. Kon nos unidat den Kristu ta afektá nos diferensianan? Kiko a ser terminá dor di e morto di Hesus riba e krus?

Pablo ta invitá e Efesionan pa kòrda kon nan bida tabata promé ku nan a risibí e grasia di Dios den Kristu. Diferensianan étniko, kultural, i religioso a krea frikshon i konflikto entre gruponan di hende. Pero e bon notisia ta ku, den Kristu, nos tur ta un pueblo ku un Salbador i Señor en komun. Nos tur ta pertenesé na e pueblo di Dios. “Pero awor den Kristu Hesus boso ku un tempu tabata leu a ser tresé serka pa e sanger di Kristu” (Efe. 2:13, NKJV).

E tèmpel antiguo na Yerusalèm tabatin un muraya di separashon pa distinguí e sekshonnan di e tèmpel ku tabata aksesibel solamente pa Hudiunan étniko. E muraya aki tabatin un inskripshon ku tabata prohibí strañeronan pa bai mas leu, bou di pena di morto. Tabata e regulashon aki ku Pablo a ser akusá di a transgredí ora e a drenta e tèmpel despues di su biahenan mishonero. Ora Pablo a ser arestá e a ser akusá di a trese den e sekshon Hudiu di e tèmpel un Efesio yamá Trofimo (Echonan 21:29). Den e epestel aki Pablo ta argumentá ku Kristu “ta nos pas, ku a hasi tur dos [gruponan étniko] unu, i a basha e muraya meimei di separashon abou” (Efe. 2:14, NKJV).

Den Kristu, kreyentenan ta desendientenan di Abraham i ta risibí e sirkumsishon di e kurason. E sirkumsishon físiko ku Dios a duna Abraham tabata mustra na e sirkumsishon spiritual ku kreyentenan lo a risibí den Kristu (lesa Deut. 10:16). “Den djE boso tambe a ser sirkumsidá ku e sirkumsishon no hasí ku man, dor di kitamentu di e kurpa di piká di e karni, pa medio di e sirkumsishon di Kristu (Kol. 2:11, NKJV).

Pablo ta práktiko den su palabranan na e Efesionan. E unidat ku ta eksistí entre Hudiunan i Paganonan, entre hendenan di diferente trasfondo kultural i étniko, no ta un mito òf simplemente un konstrukshon teorétiko; e ta un realidat ku ta demandá nos “pa kana digno di e yamada ku kua boso a ser yamá” (Efe. 4:1, NKJV).

Di akuerdo ku Efesionan 4:1-3, den ki forma Kristiannan mester kana digno di nan yamada den Kristu?

E resultado práktiko di e birtutnan i grasianan aki den bida di e Kristian ta yuda “mantené e unidat di e Spiritu den e vínkulo di pas” (Efe. 4:3, NKJV). Tur e atributonan aki ta ankrá den amor (1 Kor. 13:1-7). E práktika aktivo di amor ta preservá relashonnan entre rumannan hòmber i muhé i ta promové pas i unidat den e komunidat Kristian i mas aya. Unidat den iglesia ta manifestá e amor di Dios den formanan úniko ku otronan por testiguá. E iglesia ta ser yamá pa ta un testimonio asina, spesialmente den un tempu di konfliktonan, divishonnan, i gueranan.

Lesa Efesionan 4:4-6. Kiko ta un tema krusial den e tres versíkulonan aki?

Den e promé versíkulonan di e kapítulo aki, Pablo ta ekspresá su interes profundo den unidat di e iglesia. E ta kuminsá ku un enkurashamentu na unidat (Efe. 4:1-3) i ta sigui ku un lista di shete elemento ku ta uni kreyentenan (Efe. 4:4-6). Unidat ta simultáneamente algu ku kreyentenan ya ta poseé (Efe. 4:4-6), algu ku konstantemente mester traha riba dje i mantené (Efe. 4:1-3), i algu ku ta e futuro meta den direkshon di kua nos ta lucha (Efe. 4:13).

“E apòstel ta urgi su rumannan pa manifestá den nan bida e poder di e bèrdat kua e a presentá na nan. Pa medio di humildat i bondat, pasenshi i amor, nan mester a representá e karakter di Kristu i e bendishonnan di Su salbashon. Tin solamente un kurpa, i un Spiritu, un Señor, un fe. Komo miembronan di e kurpa di Kristu tur kreyentenan ta ser animá dor di e mesun spiritu i e mesun speransa. Divishonnan den iglesia ta deshonrá e religion di Kristu dilanti di e mundu i ta duna okashon na e enemigunan di bèrdat pa hustifiká nan kurso. E instrukshonnan di Pablo no a ser skirbí solamente pa e iglesia den su tempu. Dios a designá ku nan mester ser mandá abou pa nos. Kiko nos ta hasiendo pa preservá unidat den e lasonan di pas?” - Ellen G. White, Testimonies for the Church, tomo 5, p. 239.

“Pero na kada un di nos grasia a ser duná di akuerdo ku e midí di e don di Kristu” (Efe. 4:7, NKJV). Miéntras salbashon ta un regalo duná na tur hende ku lo risibié, algun donnan spiritual ta ser duná na sierto hendenan pa un propósito spesial.

Lesa Efesionan 4:11. Ki donnan di liderazgo Dios ta duna e iglesia?

Di akuerdo ku Efesionan 4:12, kiko ta e propósito di Dios ora E a duna donnan spesial di liderazgo na e iglesia? Kon e donnan aki ta relashoná ku otro?

Tur Kristian ta den un sentido ministernan i sirbidónan di Dios i e Evangelio. E mandato di Kristu den Mateo 28:19,20 ta ser duná na tur Kristian pa bai, pa hasi disipel di tur nashon, pa batisá, i pa siña. E obra di ministerio no ta ser duná solamente na un poko privilegiá, manera pastornan i/òf evangelistanan, sino na tur ku ta karga e nòmber di Kristu. Ningun hende por reklamá eksklushon for di e obra di plama e Evangelio, i ningun lider di iglesia por pretendé di tin un ministerio eksklusivo. E donnan spiritual di liderazgo ta spesífikamente pa edifiká e iglesia. Lidernan di iglesia ta nesesario pa stimulá, promové, i enkurashá unidat.

E lista di Pablo di donnan di liderazgo ta bisa nos ku e ròlnan aki ta tambe pa ekipá e pueblo di Dios pa alkansá esnan pèrdí. Ta responsabilidat di algun persona spesialmente yamá denter di iglesia pa yuda otronan kumpli ku nan ministerio i servisio pa Kristu, i pa edifiká e kurpa di Kristu, “te ora nos tur yega na unidat di e fe i di e konosementu di e Yu di Dios, na un hòmber perfekto, na e midí di estatura di e plenitut di Kristu” (Efe. 4:13, NKJV). E ehèmpel di e estilo di liderazgo di Hesus mester guia e forma kon nos ta hasi ministerio. Hesus a bin pa sirbi otronan i no pa ser sirbí (Mat. 20:25-28); nos mester bai i hasi meskos.

Tin un tendensia fuerte entre sernan humano di ta independiente i no duna kuenta na ningun hende. Sosiedat oksidental, en partikular, ta ser karakterisá pa e inklinashon aki. Pablo ta kòrda nos, sinembargo, ku ningun Kristian ta so den e mundu aki i ku nos ta forma un komunidat di fe ku lidernan spiritual pa yuda enkurashá otro den nos biahe komun. Nos ta, tur huntu, parti di e kurpa di Kristu.

Kristianismo ta un religion di relashonnan: relashon ku Dios i un ku otro. No tin sentido di bisa di tin un relashon profundo ku Dios sin ku e relashon ei tin un impakto riba e relashon ku un hende tin ku otro hende. Kristianismo no por ser bibá den un bashí. E prinsipionan di unidat ku Pablo ta diskutí den su Epestel na e Efesionan tambe ta aplikabel na kon nos ta relashoná ku otronan.

Lesa Efesionan 5:15-21. Kiko Pablo ta bisando nos den versíkulo 21? Kiko ta e relashon entre sumishon i unidat?

E kurashamentu di Pablo pa ta someté na otro ta konektá ku e frase “yená ku e Spiritu” den Efesionan 5:10. Un di e ekspreshonnan di e dramamentu di e Spiritu ta sumishon un na otro. Esaki ta referí na e aktitut apropiá di humildat i konsiderashon ku nos mester tin pa ku hende. Naturalmente, esaki no ta un atributo natural di mayoria personalidat sino ta resultado di e bida di e Spiritu den nos kurason. Ta un regalo di e mesun Spiritu, ken ta e vínkulo di unidat den Kristu. Mirá for di e perspektiva aki, sumishon ta un kualidat interior ku ta ekspresá nos reverensia pa Kristu i Su sakrifisio pa nos.

Lesa Efesionan 5:22-6:9. Ki impakto riba nos relashon humano e kualidat di sumishon mutuo aki tin den e hogar i lugá di trabou di un kreyente den Kristu?

Te na algun midi, unidat den iglesia ta dependé riba unidat den e hogar. Pablo a enfatisá ku e unidat, amor, i rèspèt ku mester eksistí entre esposo i esposa mester representá e amor di Kristu pa ku e iglesia, un amor apnegá. Por lo tantu, rèspèt kristian tantu den e hogar komo den iglesia ta ser rekerí di esposo i esposanan i miembronan di iglesia. E atributo kristian aki mester ser representá tambe den relashonnan entre yunan i mayornan i entre empleadonan i dunadónan di trabou (sirbidó i maestronan). E tipo di harmonia i pas ku mester penetrá den nos hogarnan mester penetrá den nos bida di iglesia tambe.

Ellen G. White, “The Spirit of Unity”, p. 179-188, den Testimonies for the Church, tomo 9.

Kristu no tabata rekonosé distinshon di nashonalidat òf rango òf kredo. E eskribanan i Fariseonan tabata deseá di saka un benefisio nashonal for di tur e donnan di shelu i pa ekskluí e restu di e famia di Dios den mundu. Pero Kristu a bin pa kibra tur muraya di separashon. E a bin pa mustra ku Su don di miserikòrdia i amor ta mas ilimitá ku airu, lus, òf áwaseru ku ta refreská tera.

“E bida di Kristu a establesé un religion den kua no tin kasta, un religion pa medio di kua Hudiu i Pagano, liber i katibu, ta konektá den un fraternidat komun, igual dilanti di Dios. Ningun kuestion di pólisa tabata influensiá Su movementunan. E no tabata hasi diferensia entre próhimo i strañeronan, amigu i enemigunan. E loke tabata apelá na Su kurason tabata un alma ku tabatin set di e awanan di bida.” - Ellen G. White, Testimonies for the Church, tomo 9, p. 190, 191.