Unidat i Relashonnan Kibrá

Pablo i Barnabas a traha huntu testifikando pa Hesus. Pero nan tabata tin un desakuerdo riba si nan por a konfia un hende tan miedoso manera Juan Marko (Echonan 15:36-39). E peligernan potensial di prediká e mensahe a pone ku na un momentu Juan Marko a bandoná Pablo i Barnabas i a regresá kas (Echonan 13:13).

"E abandono a pone Pablo husga Marko desfaborabel, i asta severamente, pa un tempu. Barnabas, na otro banda, tabata inkliná pa diskulp'é pa motibu di su falta di eksperensia. E tabata sinti anhelo pa Marko no mester bandoná e ministerio, pasobra e a mira den dje kualifikashonnan ku lo a kalifik'é pa ta un obrero útil pa Kristu."-Ellen G. White, The Acts of the Apostles, p. 170

Ounke Dios a usa tur e hòmbernan aki, e problemanan entre nan tabatin mester di resolushon. E apòstel ku tabata prediká grasia, mester a ekstendé grasia na e predikador hóben ku a desapunt’é. E apòstel di pordon mester a pordoná. Juan Marko a krese bou di tutoría positivo di Barnabas (Echonan 15:39), i, finalmente, kurason di Pablo aparentemente a ser toká dor di e kambionan.

Kon e kartanan di Pablo na Timoteo i e iglesia na Kolosa a revelá su relashon renobá ku Juan Marko i un konfiansa nobo den e predikador hóben aki? Kol. 4:10, 11; 2 Tim. 4:11.

Ounke e detayenan di Pablo su rekonsiliashon ku Juan Marko por ta inkompletu, e registro bíbliko ta kla. Juan Marko a bira un di e kompañeronan di konfiansa di e apòstel. Pablo a rekomendá Juan Marko altamente komo un "kompañero di trabou" na e iglesia na Kolosa. Na final di Pablo su bida, e a enkurashá Timoteo fuertemente pa trese Juan Marko kuné na Roma paso e tabata ''útil pa mi pa ministerio" (2 Tim. 4:11,NKJV). E ministerio di Pablo a ser enrikesé dor di e predikador hóben, kende opviamente e a pordoná. E barera entre nan a ser kibrá, i nan por a traha huntu den e kousa di Evangelio. Loke sea tabata e problemanan entre nan, i ounke kon hustifiká Pablo por tabata kere ku e mes tabata respekto di su aktitut anterior pa ku Juan Marko, tur kos a keda su tras awor.

Miéntras e tabata enkarselá na Roma, Pablo a topa ku un esklabo fugitivo yamá Onesimo, ku a hui for di Kolosa pa Roma. Pablo a realisá ku e tabata konosé e doño di Onesimo personalmente. E Epístola na Filemon ta e apelashon personal di Pablo na su amigu enkuanto di un relashon restorá ku e esklabo fugitivo.

Relashonnan ta importante pa Pablo. E apòstel tabata sa ku relashonnan kibrá ta perhudisial pa kresementu spiritual i pa unidat di iglesia. Filemon tabata un lider di iglesia na Kolosa. Si e a warda amargura pa ku Onesimo, e lo a pinta su testimonio Kristian i e testimonio di e iglesia na e komunidat no kreyente.

Lesa Filemon 1-25. Ki prinsipionan importante tokante relashonnan restorá nos por haña aki? Kòrda, e palabra klave ta prinsipionan.

Na promé bista ta poko sorprendente ku Pablo no a papia mas enérgiko kontra e kosnan malu di sklabitut. Pero e strategia di Pablo tabata muchu mas efektivo. E Evangelio, perfektamente, ta kibra tur distinshonnan di klase. (Gal. 3:28; Kol. 3:10, 11). E apòstel a manda Onesimo bèk na Filemon, no komo esklabo ma komo su yu den Hesus i komo e "ruman hòmber stimá" di Filemon den Señor (Filemon 16).

Pablo tabata sa ku esklabonan fugitivo tabatin un futuro miserabel. Nan por a ser detené na kualke momentu. Nan tabata kondená na un bida di privashon i pobresa. Pero awor, komo ruman hòmber den Kristu di Filemon i obrero boluntario, Onesimo por tabatin un mihó futuro. Su kuminda, kas, i trabou por a ser sigurá bou di Filemon. E restorashon di un relashon kibrá por a hasi un diferensia dramátiko den su bida. E a bira un "ruman fiel i stimá" i kolaboradó ku Pablo den e Evangelio (Kol. 4:9). Pablo tabata asina ferviente, asina firme den su deseo pa rekonsiliashon entre nan ku e tabata dispuesto pa paga for di su propio saku kualke problema finansiero ku lo por a surgi for di loke a pasa entre e dos kreyentenan di Hesus.

Manera nos a mira den un lès anterior, e iglesia na Korintio tabatin problema serio. Kua prinsipionan Pablo ta deskribí den 1 Korintionan 3:5-11, 1 Kor. 12:1-11, i 2 Korintionan 10:12-15 pa sanashon i restourashon, kua ta asina vital pa unidat di iglesia?

Den e pasashinan e apòstel ta deskribí prinsipionan kritiko pa unidat di iglesia. E ta señalá ku Hesus a usa diferente obrero pa kumpli ku diferente ministerio den Su iglesia, ounke ku kada unu ta trahando huntu pa edifikashon di e reino di Dios. (1 Kor. 3:9).

Dios ta yama nos na kooperashon, no kompetensia. Kada kreyente ta dotá dor di Dios pa koperá den ministrashon na e kurpa di Kristu i sirbi e komunidat (1 Kor. 12:11). No tin donnan mas grandi òf menor. Tur ta nesesario den e iglesia di Kristu (1 Kor. 12:18--23 ). Nos donnan duná pa Dios no ta pa ekshibishon egoista, i nan ta duná dor di Spiritu Santu pa servisio den plamamentu di e evangelio.

Tur komparashon ku otronan no ta sabí, pasobra nan lo laga nos sinti sea deskurashá òf arogante. Si nos pensa ku otronan ta hopi mas "superior" ku nos, nos lo sinti deprimí ora nos kompará nos mes ku nan i fásilmente nos por ser deskurashá den kual sea ministerio nos ta aden. Na otro banda, si nos pensa ku nos trabou pa Kristu ta mas efektivo ku e trabou di otronan, nos lo sinti nos mes orguyoso, kual ta e último sintimentu ku un Kristian mester tin.

Tur dos aktitut ta paralisá nos efektividat pa Kristu i e kompañerismo ku nos tin un ku otro. Segun ku nos ta traha denter di e esfera di influensia ku Kristu a duna nos, nos lo haña goso i alegria den nos testifikashon pa Kristu. Nos obranan lo komplementá e esfuersonan di otro miembronan, i e iglesia di Kristu lo dal stapnan grandi pa e reino.

Kiko ta pordon? Pordon ta hustifiká e komportashon di un persona ku a hasi nos un daña horibel? Mi pordon ta dependé di e arepentimentu di e ofensor? Kiko ta pasa si esun ku mi ta rabiá kuné no meresé mi pordon?

Kon e siguiente pasashinan ta yuda nos komprondé e naturalesa bíbliko di pordon? Rom. 5:8-11; Lukas 23:31-34; 2 Kor. 5:20, 21; Efe. 4:26.

Kristu a tuma e inisiativa di rekonsiliá nos ku Su Mes. Ta e "bondat di Dios [ku ta] hibabo na arepentimentu" (Rom. 2:4,NKJV). Den Kristu nos a ser rekonsiliá ku Dios miéntras nos tabata pekadornan ainda. Nos arepentimentu i konfeshon no ta krea rekonsiliashon. E morto di Kristu riba e krus a hasié; nos parti ta pa aseptá loke a ser hasí pa nos.

Ta bèrdat ku nos no por risibí e bendishonnan di pordon te ora ku nos konfesá nos pikánan. Esaki no ta nifiká ku nos konfeshon ta krea pordon den kurason di Dios. Pordon tabata den Su kurason tur tempu. Konfeshon, en kambio, ta kapasitá nos pa risibié (1 Juan 1:9). Konfeshon ta di vital importansia, no pasobra e ta kambia e aktitut di Dios pa ku nos sino pasobra e ta kambia nos aktitut pa kunE. Ora ku nos someté na e poder di konvikshon di e Spiritu pa arepentí i konfesá nos piká, nos ta ser kambiá.

Pordon ta asina krusial tambe pa nos propio bienestar spiritual. Un fayo di pordoná un persona ku a hasi nos daño, asta si nan no meresé pordon, por lastimá nos mas ku e ta lastimá nan. Si un individuo a hasibo daño i e doló ta kria pus paden pasobra bo a faya di pordoná, bo ta permitiendo nan pa hasi bo ainda mas daño. Kuantu biaha sintimentunan i daño asina ta e kousa di divishonnan i tenshonnan den iglesia. Doló no resolvé entre miembronan di iglesia ta hasi daño na e unidat di e kurpa di Kristu.

Pordon ta liberá un otro for di nos kondenashon pasobra Kristu a liberá nos for di Su kondenashon. E no ta hustifiká un otro su komportashon pa ku nos. Nos por ser rekonsiliá ku un persona ku a hasi nos daño, pasobra Kristu a rekonsiliá nos na Su Mes ora nos a hasiE daño. Nos por pordoná pasobra nos a ser pordoná. Nos por stima pasobra nos ta stimá. Pordon ta un eskoho. Nos por skohe pa pordoná apesar di e akshonnan òf aktitutnan di e otro persona. Esaki ta e berdadero spiritu di Hesus.

Lesa Mateo 18:15-17. Ki tres paso Hesus ta duna nos pa yuda nos resolvé konfliktonan ora ku un otro miembro di iglesia hasi nos daño? Kon nos mester apliká e palabranan aki den nos situashonnan kontemporáneo?

E deseo di Hesus ora E a duna e konseho di Mateo 18 ta pa mantené konfliktonan interpersonal den e iglesia den un grupo mas chikitu posibel. Su intenshon ta ku e dos persona envolví ta resolvé e problema nan mes. Ta pa e motibu aki Hesus ta deklará, "Si bo ruman peka kontra bo, bai i bis'é su falta entre abo kuné so"(Mat. 18:15,NKJV). Segun ku e kantidat di hende envolví den un konflikto entre dos individuo oumentá, mas frikshon por ser kreá, i mas e por afektá e kompañerismo di otro kreyentenan. Hende ta tuma parti, i e liñanan di bataya ta ser halá. Pero ora Kristiannan trata na resolvé nan diferensianan den privá, i den spiritu di amor Kristian i komprondementu mutuo, un klima di rekonsiliashon ta ser kreá. E atmósfera ta adekuá pa Spiritu Santu obra ku nan segun ku nan ta lucha pa resolvé nan diferensianan.

Tin biaha apelashonnan personal pa resolushon di konflikto ta inefektivo. Den e kasonan aki Hesus ta invitá nos pa hiba un òf dos otro huntu ku nos. E di dos paso aki den e proseso di rekonsiliashon semper mester sigui e promé paso. E propósito ta pa trese hende huntu, no alehá nan mas for di otro. E un òf dos ku uni ku e partido ofendí no ta bini pa proba su punto òf pa uni pa kulpa e otro individuo. Nan ta bin den amor i miserikòrdia Kristian komo konsehero i kompañeronan di orashon pa partisipá den e proseso di trese dos hende distansiá huntu.

Tin okashonnan kaminda tur intento pa resolvé e problema no ta funshoná. Den e kaso aki, Hesus ta instruí nos pa nos trese e asuntu dilanti di e iglesia. Siguramente e no ta papiando aki tokante interumpí e servisio di adorashon Sabat mainta ku un asuntu di konflikto personal. E lugá apropiá pa trese e asuntu, si e promé dos pasonan no a yuda pa rekonsiliá e dos partidonan, ta e hunta di iglesia. Atrobe, e propósito di Kristu ta rekonsiliashon. No ta pa kulpa un partido i eksonerá e otro.

"No permití resentimentu madurá den malisia. No permití e herida kria pus i rementá den palabranan venená, kua ta kontaminá e mentenan di esnan ku ta tende. No permití pensamentunan amargo sigui yena bo mente i di dje. Bai serka bo ruman, i den humildat i sinseridat papia kuné tokante e asuntu."-Ellen G. White, Gospel Workers, p. 499.

Lesa e artíkulo “Forgiveness”, p. 825, 826, den The Ellen G. White Encyclopedia.

"Ora e obreronan tin un Kristu ku ta biba permanente den nan propio alma, ora tur egoismo ta morto, ora ku no tin niun rivalidat, niun lucha pa soberania, ora ta eksistí unidat, ora nan santifiká nan mes, pa amor un pa otro ta ser mirá i sintí, e ora ei e áwaseru di e grasia di Spiritu Santu lo bin mes sigur riba nan ku e promesa di Dios nun

"Si nos para riba e gran dia di Señor ku Kristu komo nos refugio, nos toren haltu, nos mester pone un banda tur envidia, tur lucha pa soberania. Nos mester destruí kompletamente e raisnan di e kosnan profano aki, pa nan no surgi atrobe den bida. Nos mester pone nos mes kompletamente na banda di Señor."-Ellen G. White, Last Day Events, p. 190.