Organisashon di Iglesia i Unidat

Manera nos a mira kaba den un lès anterior, den Tèstamènt Nobo e iglesia ta ser representá dor di e metáfora di kurpa. E iglesia ta e kurpa di Kristu. E metáfora aki ta aludí na vários aspektonan di e iglesia i e relashon entre Kristu i Su pueblo. Komo e kurpa di Kristu, e iglesia ta dependé riba djE pa su eksistensia mes. E ta e Kabes (Kol. 1:18, Efe. 1:22) i e Fuente di e bida di e iglesia. Sin djE lo no tabatin iglesia.

E iglesia tambe ta derivá su identidat for di Kristu, pasobra E ta Fuente i e Fundeshi i e Inisiadó di su kreensia i siñansanan. Sinembargo, e iglesia ta mas ku e kosnan aki, krusial manera nan ta pa su identidat. Ta Kristu i Su Palabra manera ta ser revelá den Skritura ku ta determiná loke e iglesia ta. Asina, e iglesia ta derivá su identidat i nifikashon for di Kristu.

Den Efesionan 5:23-27, Pablo ta usa e relashon entre Kristu i Su iglesia pa ilustrá e tipo di relashon ku mester tin entre esposo i esposa. Kiko ta e ideanan klave di e relashon aki entre Kristu i Su iglesia?

Ounke ku nos por ta dudoso ku e konsepto di sumishon pa motibu di kon lidernan den e siglonan pasá a abusá di dje, e iglesia no opstante mester ta suheto na e Kabes, Kristu, i ta suheto na Su outoridat. Nos rekonosementu di Kristu komo e Kabes di e iglesia ta yuda nos kòrda na ken nos máksimo lealtat mester pertenesé, i esei ta Señor Mes i na niun otro. E iglesia mester ser organisá, pero e organisashon ei semper mester ta supordiná na e outoridat di Hesus, e berdadero Lider di nos iglesia.

“E iglesia ta konstruí riba Kristu komo su fundeshi; e mester obedesé Kristu komo su kabes. E no mester dependé riba hende, òf ser kontrolá dor di hende. Hopi ta afirmá ku un posishon di konfiansa den iglesia ta duna nan outoridat pa dikta loke otro hende mester kere i kiko nan mester hasi. E afirmashon aki Dios no ta sanshoná. E Salbador ta deklará, 'Boso tur ta ruman'. Tur ta eksponé na tentashon, i ta suheto na eror. Nos no por dependé riba niun ser finito pa guiansa. E Baranka di fe ta e presensia bibu di Kristu den iglesia. Riba esaki esun di mas débil por dependé, i esnan ku ta pensa ku nan ta esnan di mas fuerte lo proba di ta esnan di mas débil, a ménos ku nan hasi Kristu nan efisiensia."-Ellen G. White, The Desire of Ages, p. 414.

Durante Su ministerio huntu ku Su disipelnan, Hesus repetidamente a eksperensiá momentunan ora ku probablemente E tabata sintié provoká pa e envidia pa poder ku nan tabata parse di tin. E apòstelnan tabata parse di ta ansioso pa bira lidernan poderoso di e reino di Hesus (Marko 9:33, 34; Lukas 9:46). Asta ora ku e disipelnan tabata komiendo e Último Sena huntu, e sintimentunan aki di dominashon i superioridat tabata ser sintí di forma palpabel entre nan (Lukas 22:24).

Durante un okashon asina, Hesus klaramente a ekspresá Su pensamentunan enkuanto di liderazgo spiritual entre Su pueblo. Ki prinsipionan di liderazgo nos ta siña for di e spièrtamentu di Hesus den Mateo 20:25-28? Kon nos por manifestá e prinsipio aki den nos bida i spesialmente den nos iglesianan?

"Den e pasashi kòrtiku aki Hesus ta presentá nos dos modelo di outoridat. Esun promé ta e idea Romano di outoridat. Den e modelo aki, e hendenan élite ta para di forma herárkiko riba otronan. Nan tin e poder pa tuma desishonnan i spera sumishon for di esnan bou di nan. Hesus klaramente a rechasá e modelo di outoridat aki ora E a deklará: ‘No t'asina ku boso!' En kambio E a presentá e disipelnan un modelo nobo di outoridat impreshonante, un rechaso kompletu, òf kambio kontrario, di e modelo herárkiko ku kua nan tabata konosí."-Darius Jankiewicz , “Serving Like Jesus: Authority in God’s Church”, Adventist Review, Mart 13, 2014, p. 18.

E konsepto di outoridat ku Hesus ta presentá den e storia aki ta basá riba dos palabra klave: sirbidó (diakonos) i esklabo (doulos). Den algun tradukshon e promé palabra, sirbidó, hopi biaha ta ser tradusí "minister”, i e di dos, "sirbiente'' òf "esklabo”. Tur dos palabra asina ta pèrdè hopi di e forsa di Hesus Su intenshon. Ounke Hesus no tabata deseá di abolí tur struktura di outoridat, loke E tabata deseá di enfatisá ta ku lidernan di iglesia promé ku tur kos mester ta sirbidónan i esklabonan di e pueblo di Dios. Nan posishonnan no ta pa ehersé outoridat riba hende òf dominá nan òf pa duna nan mes prestigio i reputashon. "Kristu tabata establesiendo un reino riba diferente prinsipionan. E a yama hende, no pa outoridat, sino pa sirbi, esnan fuerte pa karga e debilidatnan di esnan débil. Poder, posishon, talento, edukashon, a pone su poseedor bou di e obligashon di mas grandi pa sirbi su próhimo."-Ellen G. White, The Desire of Ages, p. 550.

Lesa 2 Timoteo 2:15 i Tito 1:9. Di akuerdo ku e konsehonan di Pablo na Timoteo i Tito, ki tareanan krusial ta e responsabilidat di un lider i ansiano di iglesia fiel?

Nota kuantu énfasis Pablo ta pone riba mantené e doktrinanan i siñansanan puru. Esaki ta krusial pa unidat, spesialmente pasobra hende por argumentá ku, mas ku kualke otro kos, nos siñansanan ta loke ta unifiká nos iglesia. Atrobe, komo Atventistanan, komo hendenan for di asina tantu diferente ámbito di bida, kultura, i trasfondo, nos unidat den Kristu ta ser hañá den nos komprondementu di e bèrdat ku Kristu a duna. Si nos bira konfundí riba e siñansanan aki, e ora ei solamente káos i divishon lo bini, spesialmente segun ku nos ta aserka e fin.

"P’esei mi ta hurabo dilanti di Dios i di Señor Hesukristu, Kende lo huzga e bibunan i e mortonan na Su aparishon i Su reino: Prediká e palabra! Sea prepará na tempu i for di tempu. Konvensé, reprendé, eksórtá, ku hopi pasenshi i siñansa. Pasobra e tempu lo bin ora ku nan lo no soportá doktrina sano; ma di akuerdo ku nan mes deseonan, pasobra nan tin orea ku ta kishikí, nan lo akumulá pa nan mes siñadónan; i nan lo bira nan orea for di e bèrdat, i lo bolbe na fábula" (2 Tim. 4:1-4, NKJV).

Ku e palabranan aki, Pablo ta focus su pensamentunan inspirá riba e segundo binida di Hesus i riba e dia di huisio. E apòstel ta usa tur su outoridat duná dor di Dios (lesa 1 Tim. 1:1) pa duna Timoteo e konseho importante aki. Den konteksto di e último dianan, ku siñansanan falsu ta abundá i inmoralidat ta lanta, Timoteo mester a prediká e Palabra di Dios. Esei tabata e ministerio pa kua e a ser yamá.

Komo parti di su ministerio di siñansa, Timoteo mester konvensé, reprendé, i ekshortá. E verbonan aki ta kòrda nos riba e guiansa den pasado duná dor di e Skrituranan (2 Tim. 3:16). Klaramente, e obra di Timoteo ta pa sigui, siña, i implementá loke e ta haña den e Skrituranan i pa hasi esei ku toleransia i pasenshi. Reprendementu skèrpi i severo masha poko biaha ta trese un pekador na Kristu. Dor di sigui loke Pablo a skirbi, i siguié bou di guiansa di Spiritu Santu, i ku un aktitut di sirbidó-lider, Timoteo lo tabata un forsa unifikadó poderoso den e iglesia.

Un di e problemanan prinsipal di organisashon di iglesia ta di atendé disiplina. Kon disiplina ta yuda preservá unidat di iglesia tin biaha ta un tema masha delikado i fásilmente por ser komprondé malu. Pero for di un perspektiva bíbliko, disiplina di iglesia ta sentrá riba dos área importante: preservá puresa di doktrina i preservá puresa di bida i práktika di iglesia.

Manera nos a mira kaba, Tèstamènt Nobo ta mantené e importansia di preservá e puresa di siñansa bíbliko despues di apostasia i siñansa falsu, partikularmente na e fin di tempu. E mesun kos ta konta pa preservashon di e respetabilidat di e komunidat pa medio di protekshon kontra inmoralidat, deshonestidat, i degradashon. Pa e rason aki ta papia di e Skritura komo "útil pa doktrina, pa reprendementu, pa korekshon, pa instrukshon den hustisia" (2 Tim. 3:16, NKJV).

Lesa Mateo 16:19 i 18:15-20. Ki prinsipionan Hesus a duna na e iglesia enkuanto di disipliná i amonestá esnan ku ta den falta?

Beibel ta sostené e konsepto di disiplina i di nos responsabilidat un pa otro den nos bida spiritual i moral. De echo, un di e karakterístikanan distinguí di e iglesia ta su santidat, òf separashon, for di mundu. Siguramente nos ta haña den Beibel hopi ehèmpel di situashonnan difísil ku tabata rekerí e iglesia pa aktua di manera desisivo kontra komportashonnan inmoral. Normanan moral mester ser mantené den iglesia.

Ki prinsipionan e pasashinan aki ta siña nos pa sigui ora ku nos ta trata ku asuntunan difísil den iglesia? Mat. 7:1-5; Gal. 6:1, 2.

Nos no por ninga e siñansa bíbliko tokante e nesesidat di disiplina di iglesia. Nos no por ta fiel na e Palabra sin dje. Pero tuma nota di e kualidat redentivo den hopi di e spièrtamentunan aki. Tantu ku ta posibel, disiplina mester ta mas redentivo posibel. Nos mester kòrda tambe ku nos tur ta pekador i ku nos tur tin mester di grasia. Pues, ora nos ta ministrá disiplina nos mester hasié den humildat i ku un konsenshi determiná di nos propio fayonan, tambe.

Manera nos a mira durante henter e trimèster aki (i kua ta bale la pena ripití), komo iglesia nos a ser organisá i unifiká pa mishon, pa hasi obra mishonero. Nos no ta djis un klup sosial pa hendenan di e mesun opinion bini huntu i afirmá otro den loke nos ta kere (ounke esei por ta importante, tambe). Nos a ser tresé huntu pa kompartí ku e mundu e bèrdat ku nos, nos mes, a yega na stima.

Lesa Mateo 28:18-20, Hesus a duna Su disipelnan instrukshonnan final pa nan mishon na e mundu. Identifiká e palabranan klave di e mandato di Hesus. Kiko e palabranan aki ta impliká pa e iglesia awe?

E gran mandato di Hesus na Su disipelnan ta inkluí kuater verbo klave: bai, hasi disipel, batisá, i siña. Di akuerdo ku e gramátika Griego di e versíkulonan aki, e verbo prinsipal ta pa hasi disipel, i e otro tres verbo ta indiká kon esaki por ser hasí. Disipelnan ta ser hasí ora kreyentenan bai na tur nashon pa prediká e Evangelio, batisá hende, i siña nan pa warda loke Hesus a bisa.

Segun ku e iglesia ta respondé na e mandato aki, e reino di Dios ta ser ekspandé, i mas i mas hende di tur nashon ta uni na e filanan di esnan ku aseptá Hesus komo Salbador. Nan obediensia na e mandato di Hesus pa ser batisá i pa warda Su siñansanan ta krea un famia universal nobo. E disipelnan nobo tambe ta sigurá di e presensia di Hesus tur dia segun ku nan mes ta hasi mas disipelnan. E presensia di Hesus ta un promesa di e presensia di Dios. E Evangelio di Mateo ta kuminsá ku e anunsio ku e nasementu di Hesus ta tokante "Dios ku nos" (Mat. 1:23) i ta terminá ku e promesa di e presensia kontinuo di Hesus huntu ku nos te na Su Segundo binida.

"Kristu no a bisa Su disipelnan ku nan trabou lo ta fásil. ... E a sigurá nan ku E lo tabata ku nan; i ku si nan lo a avansá ku fe, nan lo a move bou di e eskudo di e Omnipotensia. E a ordená nan pa ta balente i fuerte; pasobra Unu mas poderoso ku angelnan lo tabata den nan filanan, e General di e ehérsitonan di shelu. E a hasi provishon kompletu pa e kontinuashon di nan obra i a tuma riba Su Mes e responsabilidat di su éksito. Tanten ku nan tabata obedesé Su palabra, i tabata traha den konekshon kunE, nan lo no por a faya."-Ellen G. White, The Acts of the Apostles, p. 29.

Ellen G. White, “Individual Responsibility and Christian Unity”, p. 485-505, den Testimonies to Ministers and Gospel Workers; “Unity in Diversity”, p. 483-485, “Church Discipline”, p. 498-503, den Gospel Workers.

Lesa e artíkulonan “Church”, p. 707-710, i “Church Organization”, p. 712-714, den The Ellen G. White Encyclopedia.

"Prinsipionan di bon liderazgo ta apliká den tur forma di sosiedat, inkluyendo e iglesia . Sinembargo, e lider den iglesia mester ta mas ku un lider. E mester ta tambe un sirbidó.

Tin un aparente kontradikshon entre ta un lider i ta un sirbidó . Kon un hende por guia i sirbi na mes momentu? E lider no ta okupá un posishon di honor? E no ta manda i spera ku otronan ta obedes’é? Kon, anto, e ta okupá e posishon di mas abou di ta un sirbidó, di risibí òrdu i kumpli ku nan?

"Pa por resolvé e paradòks nos mester mira na Hesus. E ta representá di forma supremo e prinsipio di liderazgo ku ta sirbi. Henter Su bida tabata unu di servisio. I na mes momentu E tabata e lider di mas grandi ku mundu a yega di mira."- G. Arthur Keough, Our Church Today: What It Is and Can Be (Washington, D.C., and Nashville: Review and Herald, 1980), p. l06.