Restorashon Final di Unidat

Juan 14:1-3 ta e promesa mihó konosí di e segunda binida di Hesus. Kiko e promesa aki ta bisabo tokante e tipo di bida ku e redimínan lo biba riba e tera nobo?

E promé Kristiannan tabata konsiderá e regreso di Kristu e "speransa bendishoná" (Tito 2:13, NKJV). Nan tabata spera ku tur e profesianan i promesanan di Skritura ta ser kumplí na e Segundo Binida, pasobra e ta e meta mes di e peregrinashon Kristian. Tur esnan ku ta stima Kristu ta wak padilanti na e dia ku nan lo ta kapas pa kompartí kompañerismo kara-kara kunE. Su palabranan den e versíkulonan ei ta sugerí un serkania i intimidat ku nos lo kompartí, no solamente ku Hesus sino ku otro, tambe.

Kristiannan ta kere den e promesa aki pasobra Beibel ta sigurá nos di su kumplimentu. Nos tin e siguransa aki pasobra nos ta kere den e palabranan di Hesus, "Lo Mi bini atrobe" (Juan 14:3, NKJV). Meskos ku e promé binida di Kristu a ser profetisá, asina Su segundo binida tambe a ser bisá padilanti, asta den Tèstamènt Bieu. Promé ku e Diluvio, Dios a bisa e patriarka Enoc ku e binida di e Mesías den gloria lo a pone un fin na piká. E a profetisá, “Mira, Señor ta bin ku dies míles di Su santunan, pa ehekutá huisio riba tur, pa kondená tur ku ta impio entre nan di tur nan echonan impio ku nan a kometé den un forma impio, i di tur e kosnan duru ku pekadornan impio a papia kontra djE” (Hudas 5:14, 15, NKJV).

Mil aña promé ku Hesus a bini na e tera aki, Rei David tambe a profetisá di e binida di e Mesias pa reuní e pueblo di Dios huntu. "Nos Dios lo bin, i E lo no keda ketu; un kandela lo devorá dilanti di djE, i lo tin tempestat pisá tur rònt di djE. E lo konvoká e shelunan ariba, i tera, pa E huzga Su pueblo: ‘Reuní Mi santunan serka Mi, esnan ku a sera un aliansa ku Mi pa medio di sakrifisio’ ” (Sal. 50:3-5, NKJV).

E segundo binida di Hesus ta konektá estrechamente na Su promé binida. E profesianan ku a predesí Su nasementu i ministerio (por ehèmpel, Gen. 3:15; Mik. 5:2; Isa. 11:1; Dan. 9:25, 26) ta e fundeshi pa nos speransa i konfiansa den e promesa tokante Su segundo binida. Kristu "a aparesé pa kita piká pa medio di e sakrifisio di Su Mes. ... Asina Kristu a ser ofresí un biaha pa karga e pikánan di hopi. Na esnan ku ansiosamente ta spera riba djE E lo aparesé pa un di dos biaha, no pa piká, ma pa salbashon” (Hebr. 9:26, 28, NKJV).

Lesa Isaias 11:1-10. Ki promesa a ser duná na Israel, i kiko e ta bisa tokante e lugá di biba eterno di e redimínan?

E Beibel ta kuminsá ku e storia di e Kreashon di e tera (Génesis 1, 2). E ta un deskripshon di un mundu bunita i harmonioso konfiá na nos promé mayornan, Adam i Eva. Un mundu i hogar perfekto pa e rasa humano, kua Dios a krea. E último dos kapítulonan di Beibel tambe ta papia di e kreashon di Dios di un mundu perfekto i harmonioso pa humanidat redimí (Revelashon 21, 22), pero e biaha aki ta mas eksakto pa bisa re-kreashon, e restorashon di e tera for di efektonan destruktivo di piká.

Hopi kaminda Beibel ta deklará ku e kas eterno aki di esnan redimí lo ta un lugá real, no un fantasia òf soño imaginario. Esnan redimí lo ta kapas pa mira, tende, hole, mishi, i sinti un eksperensia nobo, un bida nobo. E profesia di Isaias 11 ta un pasashi bunita ku ta predesí e binida di e Mesias, ku lo krea un era nobo. E lo terminá ku tur violensia i marka e komienso di un pas eterno. E reinado di Dios riba e tera nobo aki lo establesé harmonia universal.

Lesa Revelashon 21:1-5. Kiko lo disparsé pa semper komo un resultado di e harmonia nobo aki?

Ellen White a skirbi di loke ta spera esnan redimí: "Segun ku e añanan di eternidat ta pasa, nan lo trese revelashonnan mas riku i mas glorioso di Dios i di Kristu. Meskos ku konosementu ta progresivo, asina amor, reverensia, i felisidat lo oumentá. Mas hende siña di Dios, mas grandi nan atmirashon di Su karakter lo ta. Segun ku Hesus ta habri nan dilanti e rikesanan di redenshon i e logronan asombroso den e gran konflikto ku Satanas, e kurasonnan di esun reskatá ta batí ku un deboshon mas fuerte, i nan lo toka e harpanan di oro ku un man mas firme: i dies mil biaha dies mil i míles di míles di bos lo uní pa engrandesé e poderoso koro di alabansa."- Ellen G. White, The Story of Redemption, p. 432, 433.

For di e promé dianan di e iglesia e promesa di e regreso di Kristu, kisas mas ku kualke otro kos, a sostené e kurasonnan di e pueblo fiel di Dios, spesialmente durante pruebanan. Loke sea tabata nan luchanan spantoso, loke sea tabata nan tristesanan i doló inkonsolabel, nan tabatin e speransa di e regreso di Kristu i tur e promesanan maravioso ku e Segundo Binida ta kontené.

Lesa 1 Tesalonisensenan 4:13-18. Ki promesanan ta inkluí den e pasashi aki? Kiko esaki ta bisa tokante e speransa di relashonnan restorá?

E segundo binida di Kristu lo afektá henter humanidat den formanan profundo. Un aspekto importante di e establesimentu di e reino di Dios ta e reunion di e skohínan. “I E lo manda Su angelnan ku un gran zonidu di trompèt, i nan lo reuní Su skohínan for di e kuater bientunan, for di un ekstremo di shelu te na e otro” (Mat. 24:31, NKJV). Na momentu di e reunion aki, e mortonan hustu lo ser resusitá i risibí inmortalidat (1 Kor. 15:52, 53). “E mortonan den Kristu lo resusitá promé” (1 Tes. 4:16, NKJV). Esaki ta e momentu ku nos tur tabata spera riba dje. Esnan resusitá lo reuní ku esnan ku tabata anhelá nan presensia i amor. Esaki ta e forma ku Pablo ta regosihá na e evento aki: “O morto, unda bo pui ta” O Hades, unda bo viktoria ta?” (1 Kor. 15:55, NKJV).

No ta e kurpanan enfermo, di edat, desfigurá ku a baha bai den graf ku ta lanta den e resurekshon, sino kurpanan nobo, inmortal, perfekto, no mas marká pa e piká ku a kousa nan deterioro. E santunan resusitá ta eksperensia e kumplimentu di Kristu Su obra di restourashon, reflehando e imágen perfekto di Dios ku tabata intenshoná na Kreashon (Gen. 1:26, 1 Kor. 15:46-49).

Na momentu di e segundo binida di Hesus, ora ku e mortonan redimí ser resusitá, e hustunan bibu riba tera lo ser kambiá i tambe duná kurpanan nobo i perfekto. "Pasobra e loke ta koruptibel aki mester bisti inkorupshon, i e loke ta mortal aki mester bisti inmortalidat" (1 Kor. 15:53, NKJV). Asina, e dos grupo aki di redimínan, e hustunan resusitá i transformá, "lo ser tumá huntu ... den e nubianan pa kontra ku Señor den laira. I asina nos lo ta semper ku Señor" (1 Tes. 4:17, NKJV).

"Pasobra mira, Mi ta krea shelunan nobo i un tera nobo; i e kosnan di ántes lo no ser rekòrdá mas òf bin na mente" (Isa. 65:17, NKJV). Tantu Isaias komo Juan (Rev. 21:1) a mira den vishon e tera nobo primintí.

Konsiderá e deskripshon di Juan di e stat fabuloso di e redimínan, e Yerusalèm Nobo, den Revelashon 21:2, 9-27. Kiko e versíkulonan aki ta impliká tokante e unidat i harmonia ku lo eksistí den e stat aki?

Lesa Revelashon 22:1-5. E riu di bida ku ta kore for di e trono di Dios ku e palu di bida ku ta ekstendé ta dos karakterístikanan importante mas di e stat nobo. Kiko nan propósito lo ta riba e tera nobo?

E palu di bida, kua Adam a pèrdè akseso na dje dor di su transgreshon (Gen. 3:22-24), lo ser restorá dor di Kristu den e Yerusalèm Nobo. Akseso na e palu aki ta un di e promesanan pa esnan ku vense (Rev. 2:7). Su kargamentu di diesdos sorto di fruta, un sorto kada luna, por sugerí un rason ku den e tera nobo “di luna nobo pa un otro, i di un Sabat pa un otro, tur karni lo bin pa adorá Mi dilanti, Señor ta bisa” (Isa. 66:23, NKJV). E referensia na e "kuramentu di e nashonnan" tambe ta suprayá e intenshon di Dios pa kita tur barera entre hende i pa restorá humanidat na su propósito original: pa restorá tur pueblo, tribu, i nashonnan den un famia no dividí, bibando den harmonia i pas, uní pa duna gloria na Dios.

“E sanamentu di e nashonnan” ta referí figurativamente na e eliminashon di tur e bareranan i separashon nashonal i lingwístiko. ... E blachinan di e palu di bida ta kura e kiebronan entre nashonnan. E nashonnan ya no ta 'paganonan' mas sino ta uní den un famia komo e berdadero pueblo di Dios ([kompará] 21:24-26). Loke Mikeas a antisipá siglonan promé awor ta ser kumplí: 'Nashon lo no lanta spada kontra nashon, i nunka mas nan lo trein pa guera. Kada un di nan lo sinta bou di su palu di wendrùif i bou di su palu di figo, sin un hende ku ta spanta nan' (Mik. 4:3-4; [kompará] Isa: 2:4). Einan kantu di e riu di bida esnan redimí lo 'invitá su bisiña pa sinta' (Zak. 3:10 ) huntu kuné bou di e palu di bida. E kualidat di kurashon di e blachinan di e palu lo kura tur herida: rasial, étniko, tribal, òf lingwístiko, ku a kibra i dividí humanidat pa siglonan."-Ranko Stefanovic, Revelation Of Jesus Christ: Commentary on the Book of Revelation, p. 593.

Lesa Isaias 35:4-10, 65:21-25. Kon diferente bida lo ta e ora ei for di loke nos ta eksperensiá aworakí?

Diferente biaha den e buki di Isaias nos ta lesa di algu nobo: "kosnan nobo" (42:9, 48:6), "un kantika nobo" (42:10), "un kos nobo" (43:19), "un nòmber nobo" (62:2). Loke ta nobo den kapítulo 65 ta un òrdu nobo di kosnan. Tin pas i harmonia entre tur e kriaturanan di Dios. E maldishonnan di e pakto riba e tera pa desobedensia i rebelion (lesa Lev. 26:14-17, Deut. 28:30) lo ser kanselá pa semper, pasobra piká no tei mas. A kambio, lo tin abundansia di bendishon, kasnan pa biba aden, i kuminda pa disfrutá.

Kon bida lo ta den un lugá asina bunita? Algun hende ta puntra nan mes si nos lo ta kapas pa rekonosé nos amigunan i famianan, despues ku nos kurpanan risibí inmortalidat i ta kompletamente restorá den e imágen di Dios. Despues di e resurekshon di Kristu, Su disipelnan tabata kapas pa rekonos'E. Maria a rekonosé Su bos (Juan 20:11-16). Tomas a rekonosé e aparensia físiko di Hesus (Juan 20:27, 28). E dos disipelnan di Emaus a rekonosé Su pekuliaridat na e mesa di sena (Lukas 24:30, 31, 35). Asina, si nos kurpanan mester ta similar na e kurpa resusitá di Hesus, siguramente nos lo ta kapas pa rekonosé otro, i nos por wak padilanti na un eternidat di relashonnan restorá. Nos por asumí ku siguransa ku nos lo kontinuá nos relashonnan ku esnan ku nos konosé i stima i ku ta einan ku nos.

"Einan esnan redimí lo konosé, manera nan ta konosí tambe. E sintimentunan di amor i simpatia kua Dios Mes a implantá den e alma lo haña einan e ehersisio di mas berdadero i dushi. E komunion puru ku sernan santu, e bida sosial harmonioso ku e angelnan bendishoná i ku esnan fiel di tur siglo ku a laba nan pañanan i a hasi nan blanku den e sanger di e Lamchi, e lasonan sagrado ku ta uni ‘henter e famia huntu den shelu i tera’ (Efesionan 3:15), esakinan ta yuda pa konstituí e felisidat di esnan redimí."-Ellen G. White, The Great Controversy, p. 677.

Ellen G. White, “Behold, I Come Quickly”, p. 355-359, den Counsels for the Church. Lesa e artíkulonan “Resurrection”, p. 1082-1084, i “Heaven and New Earth”, p. 863, 864, den The Ellen G. White Encyclopedia.

"E resurekshon i asenshon di nos Señor ta un evidensia sigur di e triunfo di e santunan di Dios riba morto i e graf, i un garantia ku shelu ta habrí pa esnan ku laba nan pañanan di karakter i hasi nan blanku den e sanger di e Lamchi. Hesus a asendé na e Tata komo un representante di e rasa humano, i Dios lo hiba esnan ku ta reflehá Su imágen pa kontemplá i kompartí kunE Su gloria.

"Tin hogarnan pa e peregrinonan di tera. Tin bistínan pa e hustunan, ku koronanan di gloria i palmanan di viktoria. Tur loke a konfundí nos den e providensianan di Dios lo ser hasí kla den e mundu binidero. E kosnan difísil pa ser komprondé e ora ei lo haña splikashon. E misterionan di grasia lo habri nos dilanti. Kaminda nos mentenan finito a diskubrí solamente konfushon i promesanan kibrá, nos lo mira e harmonia di mas perfekto i bunita. Nos lo sa ku amor infinito a ordená e eksperensianan ku tabata parse di mas penoso. Segun ku nos ta realisá e kuidou tierno di Esun ku ta hasi tur kos obra pa nos bon, nos lo regosihá ku goso indeskriptibel i yen di gloria."-Ellen G. White, Counsels for the Church, p. 358.