“Lo Mi Hasi Tur Kos Nobo”

Lesa Revelashon 19:6-9 huntu ku Juan 14:1-3. Kon un sena di kasamentu ta ilustrá adekuadamente e union tantu sperá entre Kristu i Su pueblo?

Dos mil aña pasá, Kristu a bandoná Su hogar selestial pa invitá Su siguidónan na un sena di kasamentu (Mateo 22:1-14) ku lo tuma lugá despues di Su kasamentu ku Su brùit. "E boda ta representá e resepshon dor di Kristu di Su reino. E Stat Santu, e Yerusalèm Nobo ... ta ser yama ‘e brùit, e esposa di e Lamchi’. ... Den Revelashon, e pueblo di Dios ta ser bisá di ta e invitadonan na e sena di kasamentu. Revelashon 19:9. Si nan ta invitadonan, nan no por ser representá tambe komo e brùit. ...

“Den e parábola di Mateo 22 e mesun figura di e boda ta ser introdusí, i e huisio investigador ta ser representá klaramente komo tumando lugá promé ku e kasamentu. Promé ku e kasamentu e rei ta drenta pa mira e invitadonan, pa mira si tur ta bistí ku e bistí di kasamentu, e bistí di karakter sin mancha labá i hasí blanku den e sanger di e Lamchi. Mateo 22:11; Revelashon 7:14".- Ellen G. White, The Great Controversy, p. 426-428. Despues di Su morto i resurekshon, e Brùidehòm a regresá na kas di Su Tata pa "prepará un lugá" pa Su pueblo, Su invitadonan di kasamentu (Juan 14:1-3) Nan ta permanesé riba tera preparando pa Su regreso. Na fin di mundu, E lo regresá i hiba nan na kas di Su Tata.

Revelashon 19:8 ta deklará ku e lino fini i limpi a ser duná na e brùit dor di Kristu. E bistí aki ta mustra ku e invitadonan di kasamentu ku drenta e siudat no ta reklamá niun mérito pa nan obranan. Di manera ku, e "lino fini, limpi i briante" ta representá "e aktonan hustu di e santunan" (NKJV), aktonan ku a bini komo resultado di nan union ku Kristu, kende ta biba den nan. Por lo tantu, e bistínan aki ta simbolisá Su hustisia i ku Su pueblo "ta warda e mandamentunan di Dios, i e fe di Hesus" (Rev. 14;12). Miéntras E tabata riba·tera, Hesus a konta un parabel tokante un kasamentu. Sinembargo, un di e invitadonan a preferá di bisti su propio bistí na lugá di e bistí di kasamentu proveé dor di e rei, i e a ser saká for di e kasamentu (Mat. 22:1-14 ).

Revelashon 3:18 ta mustra ku e bistí di hustisia di Kristu, e oro di fe i amor, i e ungwente pa wowo di Spiritu Santu ta e nesesidatnan di mas grandi di e pueblo di Dios ku ta bibando den e tempu di fin. E oferta di Hesus pa e Laodisensenan "kumpra" e donnan aki for di djE ta mustra nos ku E ta pidi pa algu a kambio pa loke E ta ofresé nan. Nos ta renunsiá sosten-propio i konfiansa den nos mes a kambio di un bida di obediensia fiel na Kristu i konfiansa den djE komo nos úniko speransa di salbashon.

Lesa Revelashon 19:11-16. Kiko ta e nòmber di e koredó di e kabai blanku, i kiko ta nifiká ku un spada skèrpi ta sali for di Su boka? Kiko esaki ta bisa nos tokante kon pa ta na e banda ganadó na final?

Loke nos ta mira aki ta un representashon di e Segundo binida di Kristu, e kumplimentu di e promesa ku kreyentenan den tur siglo tabata anhelá p’e. Meskos ku Hesus, Su pueblo a basa nan fe riba e Palabra di Dios. Revelashon 19:11-16 ta e kulminashon di e hopi viktorianan di Hesus: Hesus a derotá Satanas den shelu; E a derota Satanas den desierto; E a derot'é na e krus; i E lo derot'é na Su regreso.

"Pronto ta aparesé den ost un nubia pretu chikitu, di un tamaño masoménos mitar di un man di hende. Ta e nubia kua ta rondoná e Salbador i kua ta parse den distansia di ta skondé den skuridat. E pueblo di Dios sa ku esaki ta e señal di e Yu di hende. Den silensio solèm nan ta kontempl'é segun ku e ta hala mas serka di tera, birando mas briante i mas glorioso, te ora e ta un nubia blanku grandi, su base un gloria manera kandela konsumidó, i riba dje e regenbog di e pakto. Hesus ta sali dilanti komo un konkistador poderoso. Awor no un ‘Hòmber di Tristesa’, pa bebe e kopa amargo di bèrgwensa i aflikshon, E ta bin, viktorioso den shelu i tera, pa husga e bibunan i e mortonan. ‘Fiel i Berdadero’, ‘den hustisia e ta husga i hasi guera’. I ‘e ehérsitonan ku tabata den shelu’ (Revelashon 19:11,14) ta siguiE. Ku himnonan di melodia selestial e angelnan santu, un multitut inmenso, innumerabel, ta asistiE riba Su kaminda. E firmamentu ta parse yená ku formanan radiante, ‘dies mil biaha dies mil, i míles di míles’. Ningun pèn humano por deskribí e esena; ningun mente mortal ta adekuá pa konsebí su splendor”. - Ellen G. White, The Great Controversy, p. 640-641.

Den 2 Tesalonisensenan 1:8-10, Pablo ta duna un otro deskripshon di e viktoria final di Kristu na e Segundo Binida, ora tur e podernan sekular i religioso, kua a konspirá kontra djE, ser destruí, i Su pueblo ser liberá pa tur eternidat.

Lesa Revelashon 20:1-3 huntu ku Yeremias 4:23-26. Durante e milenio, kiko ta e estado di e tera? Den ki forma Satanas ta mará na kadena?

E 1000 aña (òf milenio) ta kuminsá ku e segundo binida di Kristu. Na e momentu aki, Satanas i su angelnan kaí ta na kadena. E maramentu di Satanas na kadena ta simbóliko, pasobra sernan spiritual no por ser mará físikamente. Satanas ta mará dor di sirkunstansianan. E plaganan a desolá e tera i a eksterminá su habitantenan malbado di e tera, i a lag’é den un kondishon kaótiko paresido na e tera promé ku Kreashon (Gen. 1:2). Den un estado asina, e tera ta funshoná komo Satanas su prison durante e milenio. Pa motibu ku no tin niun ser humano pa tenta i hasi daño, tur loke Satanas i su sosionan demoniako por hasi ta kontemplá e konsekuensianan di nan rebelion kontra Dios.

Lesa Revelashon 20:4-6. Unda e redimínan ta durante e milenio?

Revelashon ta mustra ku e pueblo di Dios lo pasa e milenio den e lugánan selestial ku Kristu a prepará pa nan (Juan 14:1-3). Juan ta mira nan sintá riba trononan komo reinan i saserdotenan, husgando e mundu. Hesus a primintí e disipelnan ku nan lo a “sinta riba diesdos trono i huzga e diesdos tribunan di Israel” (Mat. 19:28). Pablo a deklará ku e santunan lo a husga e mundu (1 Kor. 6:2, 3).

E huisio aki ta konserní e imparsialidat di e akshonnan di Dios. A lo largu di historia Satanas a lanta dudanan enkuanto di e karakter di Dios i Su trato ku e sernan ku E a krea. Durante e milenio, Dios ta permití e redimínan di tin akseso na e registronan di historia pa haña kontestanan riba tur pregunta enkuanto di e imparsialidat di Su desishonnan respekto esnan ku a bai pèrdí, komo tambe preguntanan ku ta trata ku Su guia den nan propio bida. Na konklushon di e milenio, tur pregunta tokante e hustisia di Dios ta keda establesí pa semper. E pueblo di Dios ta kapas pa mira mas aya di un sombra di duda ku e akusashonnan di Satanas tabata infundá. Nan ta kla awor pa kontemplá e atministrashon di e hustisia di Dios na e huisio final di esnan pèrdí.

Despues di eradikashon di piká, e tera lo ser transformá den e hogar di esnan redimí. Kon lo e ta?

Den Revelashon 21:1, Juan a mira ''un shelu nobo i un tera nobo". Beibel ta referí na tres shelu: e firmamentu, e universo yen di strea, i e lugá kaminda Dios ta biba (2 Kor. 12:2). Den Revelashon 21:1, e atmósfera di tera ta na bista. E tera kontaminá i e firmamentu no por soportá e presensia di Dios (Rev. 20:11). E palabra “nobo” na Griego (kainos) ta referí na algu nobo den kalidat, no den orígen i tempu. E planeta aki lo ser purifiká dor di kandela i restourá na su estado original (2 Pe. 3:10-13).

Partikularmente interesante ta e echo ku e promé kos ku Juan a opservá riba e tera nobo ta ku no tin laman. E referensia di Juan na “e laman” (ku e artíkulo definí) ta mustra ku probablemente e tabatin den mente e laman ku tabata rondon’é riba Patmos, kua a bira un símbolo di separashon i sufrimentu. P'e, e ousensia di e laman ei riba e tera nobo tabata nifiká ousensia di doló kousá dor di su separashon for di esnan ku e tabata stima.

Lesa Revelashon 21:2-8 i 7:15-17. Ki paralelonan ta eksistí den e deskripshon di e tera nobo i e Hardin di Eden, den Génesis 2?

Un bida liber di sufrimentu i morto riba e tera restourá ta garantisá dor di e presensia di Dios meimei di Su pueblo. E presensia aki ta ser manifestá den e Yerusalèm Nobo, i "e tabernakel di Dios" (Rev. 21:3), kaminda Dios lo biba meimei di Su pueblo. E presensia di Dios ta hasi bida berdaderamente un paraiso den e tera restourá.

E presensia di Dios ta garantisá libertat for di sufrimentu: sin morto, tristesa, yoramentu, òf doló, kua ta tur e konsekuensianan di piká. Ku e eradikashon di piká, “e promé kosnan a pasa bai” (Rev. 21:4, NKJV).

E idea aki a ser bon formulá dor di Maria i Marta na morto di nan ruman hòmber Lázaro: “Señor, si Bo tabata aki, mi ruman hòmber lo no a muri' "(Juan 11:21, 23, NKJV). E rumannan muhé tabata sa ku morto no por a eksistí den presensia di Kristu. Di mes manera, e presensia konstante di Dios riba e tera nobo lo sigurá libertat for di e doló i sufrimentu ku nos ta eksperensia awor den e bida aki. E libertat aki ta e gran speransa ku a ser primintí na nos den Kristu, un speransa seyá den Su sanger.

Juan awor ta deskribí e kapital di e tera nobo, e Yerusalèm Nobo. Miéntras e ta un lugá real habitá dor di hende real, e Yerusalèm Nobo i bida den dje ta mas aya di kualke deskripshon terenal (1 Kor. 2:9).

Lesa Revelashon 21:9-21. Kiko ta e karakterístikanan eksterior di e Yerusalèm Nobo?

E Yerusalèm Nobo ta ser referí na dje komo e brùit, esposa di e Lamchi. E Yerusalèm Nobo ta e lugá ku Kristu ta preparando pa Su pueblo (Juan 14:1-3 ).

E siudat ta rondoná dor di un muraya haltu ku diesdos porta, tres porta na kada un di e kuater banda, ku ta permití entrada for di kualke direkshon. E karakterístika aki ta mustra na e alkanse universal di e siudat. Den e Yerusalèm Nobo tur hende tin akseso ilimitá na e presensia di Dios.

E siudat ta ser ilustrá mas aleu komo un kubo perfekto; e ta 12,000 furlong, òf stadia (2.414 km), den largura, hanchura, i haltura. E kubo ta konsistí di 12 banda. Por lo tantu, e siudat ta totalisá 144,000 stadia, kua ta reflehá e 144.000 ku a ser trasladá sin mira morto na e segundo binida di Hesus. Den e tèmpel di Tèstamènt Bieu, e lugá Santísimo tabata un kubo perfekto (1 Reinan 6:20). E Yerusalèm Nobo tabata funshoná pues komo e sentro di e adorashon di Dios.

Lesa Revelashon 21:21-22:5. Ki karakterístikanan interior di e siudat ta kòrdabo riba e Hòfi di Eden? Kiko ta nifikashon di e promesa ku lo no tin mas maldishon den e siudat (Rev. 22:3)?

E karakterístika di mas prominente di e Yerusalèm Nobo ta e riu di awa di bida ku ta kore for di e trono di Dios (Gen. 2:10). Den kontraste ku e riu na Babilonia, na kua e pueblo di Dios tabata sinta komo koutivonan anhelando pa Yerusalèm (Salmo 137), na e oria di e riu di bida den e Yerusalèm Nobo, e pueblo di Dios ku tabata dual pa siglonan a haña nan hogar.

Na ámbos banda di e riu tin e palu di bida ku blachinan pa "kurashon di e nashonnan" (Rev. 22:2). E kurashon aki no ta referí na enfermedat, komo ku riba e tera nobo lo no tin enfermedat. E ta referí na kurashon di tur e heridanan kousá dor di e bareranan ku a separá hende a lo largu di historia E redimínan di tur siglo i for di tur nashon awor ta pertenesé na un famia di Dios.

Lesa Ellen G. White, “Without a Wedding Garment”, p. 307-319, den Christ’s Object Lessons; “The Controversy Ended”, p. 662-678, den The Great Controversy.

E buki di Revelashon ta konkluí ku loke a ser introdusí na komienso: e segundo binida di Kristu den poder i gloria i e establesimentu di e reino eterno di Dios. E regreso di Kristu, ora ku finalmente E lo ta uní ku Su brùit, ta e punto kulminante den e buki.

Sinembargo, e buki no ta pone e eventonan aki den un konteksto irealístiko. Ku Hesus ta biniendo pronto ta e promé realidat. E di dos realidat ta ku ainda nos ta aki wardando riba Su regreso. Miéntras nos ta spera, nos mester tin un komprenshon kla di e mensahenan di Revelashon, i nos por haña e komprondementu aki dor di lesa e buki bes tras bes te ora e fin di tur kos yega. E mensahenan di e buki di Revelashon ta kòrda nos konstantemente, miéntras nos ta warda, no pa wak na e kosnan di e mundu, ma pa fiha nos bista riba shelu i riba djE kende ta nos úniko speransa. E Kristu di Revelashon ta e kontesta riba tur speransa i anhelonan humano meimei di e enigmanan i insertidumbrenan di bida. E ta tene e futuro di e mundu aki i nos futuro den Su mannan.

E buki ta kòrda nos tambe ku promé ku e fin yega, nos ta ser konfiá ku e tarea di proklamá e mensahe di Su pronto regreso na henter mundu. Nos espera pa Su regreso no ta pasivo, sino aktivo. Tantu e Spiritu i e Brùit ta yama: "Bin!" (Rev. 22:17, NKJV). Nos mester uni ku e yamada ei. Ta un bon notisia, i komo tal, e mester ser proklamá na e habitantenan di mundu.