Ora Nos ta So

Lesa Eklesiastés 4:9-12. Kiko ta e idea básiko einan? Di ki prinsipio di bida e ta papiando en general?

Masha poko di nos por logra nos so. Asta si nos ta solitario i gusta ta so, trempan òf lat nos no solamente ke un poko kompania sino kisas asta nos por rekerí esaki, spesialmente den tempunan di nesesidat. En realidat, nos a ser trahá pa komunidat, pa kompañerismo. Ki fortuná ta esnan ku tin miembronan di famia serkano ku por duna konsuelo i sosten, spesialmente den tempunan di nesesidat.

Desafortunadamente, tin hende den nos iglesia, kaminda nos ta traha, den e komunidatnan kaminda nos ta biba, ku no tin niun hende pa bai serka dje, no solamente den tempu di nesesidat, sino asta pa un kombersashon na final di dia. E sentido di soledat por surgi na kualke momentu. “E dia di mas difísil pa mi”, un hòmber soltero a bisa, “ta djadumingu. Durante siman mi ta rondoná di hende na trabou. Riba Sabat mi ta mira hende na iglesia. Pero riba djadumingu mi ta mi so”.

Ki prinsipionan nos por siña di e siguiente pasashinan, partikularmente ora nos por ta pasando dor di un tempu di soledat? Juan 16:32, 33; Fil. 4:11-13.

Sí, komo Kristiannan nos tin no solamente e realidat di Dios sino e realidat di ta kapas pa tin kompañerismo ku Dios. I nos por, en realidat, haña konsuelo for di e serkania di Dios ku nos. Pero e serkania di Dios ku Adam, den Eden, no a impedí Dios di bisa: “No ta bon pa hende ta so” (Gen. 2:18, NKJV). Por lo tantu, Dios tabata sa ku Adam, asta ora e tabatin kompañerismo ku Dios den un mundu ku no tabata dañá dor di piká, ainda tabatin mester di kompania humano. Kuantu mas, anto, sobrá di nos tambe tin mester di kompania.

Nos mester ta kuidadoso tambe di asumí ku djis pasobra tin hopi hende rondó di nos, un hende no por ta solitario. Algun di e hendenan di mas solitario ta biba den siudatnan grandi kaminda hopi biaha nan tin interakshon ku otronan. Djis ta rondó di otro hende no ta nifiká ku un hende no por sintié so i isolá i den nesesidat di kompañerismo.

Un hóben a papia di e bentahanan di no ta kasá: “Dos biaha mi tabatin e oportunidat di bai sirbi den e kampo mishonero, i mi a respondé sin niun duda”. Un persona kasá, ku un famia, kisas lo mester a tuma un poko mas tempu pa tuma e desishon ei pasobra e no ta enbolbí e so sino tambe su kasá i yunan.

Kiko ta, di akuerdo ku Pablo, bon motibunan pa keda soltero? 1 Kor. 7:25-34, NKJV.

Mayoria hende ta pensa ku ser kasá ta e boluntat di Dios pa nan. E no a bisa: “no ta bon pa hende ta so”? I sinembargo, nos tin hopi ehèmpel den Beibel di hende ku no tabata kasá, inkluyendo e ehèmpel di mas grandi di tur, Hesukristu.

Jeremias a ser bisá pa no kasa (Jer. 16:1-3); e tabata un huisio riba un situashon históriko. Nos no sa si e restrikshon ei hamas a ser kitá, pero ta evidente ku Jeremias tabata un gran profeta miéntras e tabata soltero.

Tambe, e estado sivil di Ezekiel no tabata parse di ta di gran importansia, apesar ku su esposa a muri diripiente. E ni sikiera a ser permití pa tene rou sino mester a sigui ku e ministerio ku Señor a asigná na dje (Eze. 24:15-18). Profeta Oseas tambe a eksperensiá un matrimonio kibrá, pero e tabata kapas pa sigui den ministerio. Miéntras e storia ta parse straño pa nos, Dios a bis’é pa bai kasa ku un prostituta ku Dios tabata sa ku lo a bandoná Oseas pa otro hòmber (Oseas 1-3). Ora nos wak bèk, nos por mira Dios tratando di ilustrá e amor unilateral ku E tin pa Israel i pa nos, pero mester tabata ekstremadamente difísil i doloroso pa Oseas pa ta e lès ophetivo.

Den kada un di e ehèmpelnan aki, estado sivil no tabata un problema. Dios tabata interesá den e hende su integridat, obediensia, i abilidat pa bisa loke Dios tabata ke pa e bisa. Nos mester ta sigur ku nos bida no ta ser definí pa nos kondishon sivil. Hopi bos awe lo bisa nos ku a ménos ku nos ta kasá nos no ta kompletu. Pablo lo a kontestá: “No sea manera e hendenan di e mundu aki”. En kambio, “ofresé boso kurpa na djE komo un sakrifisio bibu, puru i agradabel” (Rom. 12:1, 2, CEV).

Di tur e formanan ku piká a destruí humanidat, ku eksepshon di sufrimentu físiko i morto, kiko a afrontá konsekuensianan mas devastador di piká ku e famia? Ta kasi manera kos ku e frase “famia disfunshonal” ta redundante. Ki famia, te na algun grado, no ta disfunshonal?

Ku eksepshon di morto, un di e kosnan di mas difísil ku un famia por afrontá, ta divorsio. Hendenan ku ta pasa dor di e eksperensia teribel aki ta eksperensiá un variedat di emoshon. Probablemente esun di promé i di mas komun ta fèrdrit, kua, dependiendo di e personanan, por dura pa vários luna pa vários aña ku diferente intensidat. Algun hende lo eksperensiá miedu; miedu di loke ta deskonosí, tenshonnan finansiero, i miedu di ta inkapas pa enfrentá. Algun hende lo pasa dor di un periodo di depreshon, rabia, i, sí, soledat.

Ki prinsipionan ekstensivo enkuanto di divorsio nos por saka for di e siguiente versíkulonan? Mal. 2:16; Mat. 5:31, 32; 19:8; 1 Kor. 7:11-13.

“E Iglesia komo un agensia redentor di Kristu tei pa ministrá na su miembronan den tur nan nesesidatnan i pa kuida tur hende pa tur por krese i yega na un eksperensia Kristian madurá. Esaki ta partikularmente bèrdat ora miembronan ta afrontá desishonnan pa bida largu manera matrimonio i eksperensianan doloroso manera divorsio. Ora e matrimonio di un pareha ta den peliger di kibra, tur esfuerso mester ser hasí dor di e partnernan i esnan den iglesia òf famia ku ta ministrá na nan pa logra nan rekonsiliashon den harmonia ku prinsipionan divino pa restourá relashonnan dañá (Oseas 3:1-3; 1 Kor. 7:10, 11; 13:4-7; Gal. 6:1).

“Rekursonan ku por ta di yudansa pa miembronan den e desaroyo di un hogar Kristian fuerte ta disponibel atraves di iglesia òf otro organisashonnan di iglesia. E rekursonan aki ta inkluí:

1. programanan di orientashon pa parehanan ku ta preparando pa kasa,
2. programa di instrukshon pa parehanan kasá ku nan famianan, i
3. programanan di sosten pa famianan kibrá i personanan divorsiá”
.

– The Seventh-day Adventist Church Manual, 19th edition (Nampa, Idaho: Pacific Press Publishing Association, 2016), p. 161.

Un biaha un hende a hasi e pregunta: Kiko ta e diferensia entre hende i galiña respekto e asuntu di morto? E kontesta ta ku, diferente for di galiña, ku ta muri, nos sernan humano, ku ta muri tambe, sa ku nos lo muri. Galiña no sa. I ta e konosementu aki di nos morto inminente ku ta impaktá grandemente kon nos ta biba aworakí.

Manera nos sa, tur relashon, inkluyendo matrimonio, trempan òf lat ta yega na un fin den nos enemigu di mas grandi: morto. No importá kon será un union ta, no importá e gran amor, e kompañerismo profundo, e tempu pasá huntu, komo sernan humano nos (diferente for di galiña) sa ku trempan òf lat morto lo bin (a ménos ku Hesus bin promé) i, ora esaki sosodé, tur nos relashonnan lo kaba. Esaki tabata nos destino for di e promé piká i lo ta asina te na e regreso di Hesus.

Beibel no ta bisa nos kua di dos, Adam òf Eva, a muri promé, pero mester tabata partikularmente doloroso pa e otro, spesialmente ya ku morto nunka tabata suponé di ta parti di bida pa kuminsá. Si, manera nos a mira den un lès anterior, morto di un solo blachi a pone nan yora, ken por a imaginá nan mes kiko nan a pasa aden ku un morto di un partner?

E problema ta ku nos ta asina kustumbrá ku morto, ku nos ta djis tum’é komo normal. Pero nunka e tabata ser suponé di ta algu ku nos komo sernan humano lo a eksperensiá. P’esei, te na e dia aki, nos ta lucha pa dun’é sentido, ora, hopi biaha, simplemente nos no por.

Kiko e siguiente tèkstnan ta siña nos tokante morto i tokante kon hende ta lucha kuné? Isa. 57:1; Rev. 21:4; 1 Tes. 4:17, 18; Mat. 5:4; 2 Sam. 18:33; Gen. 37:34.

No tin duda: no solamente nos tur ta afrontá e realidat di nos propio morto, nos ta afrontá e realidat di morto di otronan, di sernan kerí, di kisas nos kompañero di mas íntimo. Por lo tantu, trempan òf lat, hopi di nos lo afrontá un tempu, un etapa, di soledat provoká pa e morto di un otro persona. E ta difísil, e ta hasi doló, i na momentunan asina nos por, i hopi biaha mester, djis reklamá e promesanan di Dios. Despues di tur kos, den e mundu aki di piká, sufrimentu, i morto, kiko mas nos tin?

Un hóben yamá Natalie tabata kasá pa shete aña ora, riba invitashon di un amiga, e a asistí na un seri di reunion evangelístiko na un iglesia Atventista di e di Shete dia. Konvensí pa loke e a siña, e a someté su kurason na Kristu, e tabatin un eksperensia di nasementu nobo, i, apesar di e opheshonnan enérgiko di su esposo, mayornan, suegronan, asta su bisiña, Natalie a uni ku e Iglesia Atventista di e di Shete dia. Tambe e a ahustá su estilo di bida, te na tur grado posibel, na su fe nobo.

Manera bo por imaginábo, e a afrontá un gran kantidat di opstákulo; loke a hasié spesialmente difísil tabata su esposo, ku a argumentá, i korektamente: “Esaki no ta loke mi a firma p'e ora nos a kasa. Bo ta un persona kompletamente nobo, i mi ke esun bieu bèk”.

Pa añanan awor, e a bin ta luchando pa biba un bida di fe. Ounke e ta kasá, e ta loke nos lo por yama “spiritualmente soltero”.

Ki palabranan alentador nos ta haña den e siguiente versíkulonan pa esnan ku por ta sinti nan mes spiritualmente soltero? Isa. 54:5; Hos. 2:19, 20; Ps. 72:12.

Den henter mundu, tin “Natalie” den nos iglesia. E personanan aki, hòmber òf muhé, ta kasá pero ta asistí na iglesia nan so òf ku nan yunan. Kisas nan a kasa ku un persona di un fe diferente. Òf kisas ora nan a uni ku e iglesia, nan kasá no a hasi esei. Òf ora nan a kasa, tur dos tabata miembro di iglesia, pero un, pa kualke motibu, a bandoná, a stòp di bin, i kisas asta ta hostil na e fe. E hòmber- i muhénan aki ta bin iglesia nan so i na e komementu despues di servisio di adorashon, òf ta bai hasi obra mishonero òf aktividatnan sosial di iglesia nan so. Nan ta tristu ora nan no por kontribuí finansieramente na e ministerio di iglesia mes tantu ku nan lo ke pasobra nan kasá no ta di akuerdo pa hasi esei. Ounke nan ta kasá, kisas nan por ta sinti nan mes spiritualmente manera un biudo òf un biuda.

Probablemente nos tur, na un momentu òf otro, a yega di topa hendenan asin’aki den iglesia, i nan tin mester di nos amor i sosten.

“Meimei di un bida di trabou aktivo, Enok a mantené konstantemente su komunion ku Dios. Mas grandi i mas forsoso su trabounan tabata, tantu mas konstante i ferviente tabata su orashonnan. E a sigui ekskluí su mes den sierto periodonan for di henter sosiedat. Despues di a keda pa un tempu entre e hendenan, trahando pa benefisiá nan pa medio di instrukshon i ehèmpel, e tabata retirá su mes, pa pasa un temporada den soledat, teniendo hamber i set pa e konosementu divino ei kua Dios so por impartí. Komunikando asina ku Dios, Enok a bin mas i mas ta reflehá e imágen divino. Su kara tabata radiante ku un lus santu, asta e lus ku ta bria den kara di Hesus. Ora e sali for di e komunionnan divino aki, asta e impionan tabata kontemplá ku temor reverente e impreshon di shelu riba su kara”. – Ellen G. White, Gospel Workers, p. 52. Ounke e storia aki di Enok ta alentador i tin algu poderoso di bisa tokante esnan ku skohe pa tin tempunan di soledat, hopi ta afrontá un soledat ku nan no ta pidi p’e. Nan no ke ta nan so. Sí, atrobe, semper nos por tin un komunion di goso ku Señor, kende ta omnipresente, pero tin biaha nos ta anhelá kompania i kompañerismo humano. Kon krusial ta pa nos, komo iglesia, ta kla pa aserká esnan ku kisas ta sintá djis banda di nos riba Sabat tur siman, sinembargo ku ta pasando dor di un periodo teribel di soledat. Na mes momentu, si abo ta pasando dor di un momentu asina, buska un hende ku bo ta sinti ku bo por konfia na iglesia (òf otro kaminda) i laga nan sa. Hopi biaha hende simplemente no por bisa, dor di wak un hende, dor di kiko nan ta pasando. Ta fásil, a lo ménos pa algun hende, pa skonde tras di un máskara.