Klavenan pa Unidat Familiar

Ki ilustrashon Pablo ta usa pa deskribí e unidat nobo ku ta eksistí entre personanan den Kristu? Kon Kristu a traha “un” for di “dos”? Efe. 2:11-22; lesa tambe Gal. 3:28.

E krus di Kristu ta kita e bareranan ku ta separá hende for di otro. Murayanan tabata separá adoradónan den e tèmpel Hudiu, hòmbernan for di muhénan, i Hudiunan for di Paganonan. Ora e tabata deskribí e unidat di Hudiu- i Paganonan den Kristu, Pablo a usa lenguahe ku ta apliká igualmente na otro divishonnan entre nashonnan, gruponan di hende, klasenan sosial, i género. “Pa krea for di e dos un solo humanidat nobo den su mes, i asina hasi pas” (Efe. 2:15, NEB) ta bon notisia ku ta yuda parehanan pa realmente konosé unidat di “un karni” den matrimonio. Tambe, pa fe den Kristu, famianan separá pa hopi tempu por ser rekonsiliá.

Ta un kos pa sita tèkstnan di Beibel tokante unidat den Kristu; ta kompletamente un otro kos pa realmente eksperensi’é. Ki kambionan práktiko Kristu ta trese na nos bida ku ta kapasitá nos pa eksperensiá e unidat ku a ser primintí na nos? Lesa, por ehèmpel, Rom. 6:4-7, 2 Kor. 5:17, Efe. 4:24-32.

“Visualisá un sírkulo grandi, for di e rant di kua tin hopi liña ta kore bai te na e sentro. Mas serka e liñanan akí ta aserká e sentro, mas serka nan ta un di otro. ... Mas serka nos yega serka Kristu, mas serka nos lo ta di otro”. – Ellen G. White, The Adventist Home, p. 179.

“Entre tata i yu, esposo i esposa, ... ta para Kristu e Mediador, sea nan ta kapas di rekonos’é òf nò. Nos no por establesé kontakto direkto fuera di nos mes eksepto atraves di djE, atraves di Su Palabra, i dor ku nos ta siguiE”. – Dietrich Bonhoeffer, The Cost of Discipleship (New York: The MacMillan Publishing Co., 1979), p. 108.

“Ku Señor por laga bo amor krese i basha over pa otro i pa tur otro hende” (1 Tes. 3:12, NIV).

Hesus a hasi orashon na Su Tata pa Su siguidónan lo por “ta un meskos ku nos ta un” (Juan 17:22, NIV). Resumí loke Hesus tabata bisando aki, i enfoká spesífikamente riba e ròl di amor ku ta nesesario pa logra e unidat akí.

Unidat entre Su siguidónan tabata den mente di Hesus den Su orashon. Eksperensiá amor ágape ta esensial pa e unidat akí. “Ágape” ta e palabra bíbliko pa e amor di Dios usá den e orashon akí i na hopi otro lugá den Tèstamènt Nobo. Un amor asina ta e naturalesa mes di Dios (1 Juan 4:8), i e ta identifiká e siguidónan di Hesus (Juan 13:35). E amor di Dios no ta natural den e kurason humano pekaminoso. E ta bin den un hende su bida ora Hesus ta biba huntu ku e kreyente pa medio di Su Spiritu (Rom. 5:5; 8:9, 11).

“Stima otro manera Ami a stima boso” (Juan 15:12, NIV). E disipel Juan, ku a skirbi e palabranan akí, un tempu no tabata digno di ser stimá sino orguyoso, ku hamber pa poder, krítiko, i di temperamentu haltu (Marko 3:17; Lukas 9:54, 55; lesa tambe The Desire of Ages, p. 295). Mas despues den bida e a kòrda kon Hesus a sigui stim’é apesar di e rasgonan akí. E amor di Hesus a kambia Juan gradualmente, i a kapasit’é pa stima otronan den unidat Kristian. “Nos ta stim’E pasobra E a stima nos promé” (1 Juan 4:19, NKJV), e a skirbi, i “si Dios a stima nos asina tantu, nos tambe mester stima otro” (1 Juan 4:11, NKJV).

Lesa 1 Korintionan 13:4-8. Purba pone bo nòmber kaminda e palabra “amor” ta aparesé. Kon bon e ta pas? Pidi Hesus pa trese e kualidatnan di amor akí den bo bida pa medio di Su Spiritu. Ki kambionan e Spiritu lo por sugerí bo pa hasi pa alkansá e ideal Kristian akí?

“Si orguyo i egoismo lo a ser poné un banda, den sinku minüt mayoria di nos difikultatnan” lo a ser kitá. – Ellen G. White, Early Writings, p. 119.

Komo sernan humano, nos naturalesa a ser korumpí pa piká. I, kisas, e ehèmpel di mas grandi di e korupshon ei ta e maldishon di egoismo. Parse ku nos a nase egoista; nos por mira e realidat akí den muchanan chikí, ken nan naturalesa básiko ta deseo pa nan mes. “Ami, ami, ami ...”. Pa tempu ku nos alkansá edat adulto e rasgo akí por manifestá su mes den algun forma bastante teribel, spesialmente den e hogar.

Naturalmente, Hesus a bin pa kambia esaki (Efe. 4:24). Su Palabra ta primintí nos ku nos, pa medio di djE, no mester ser dominá dor di e rasgo di karakter destruktivo akí. Henter Su bida ta un ehèmpel perfekto di loke ta nifiká pa biba sin egoismo; a medida ku nos ta imitá Su bida (1 Juan 2:6), nos lo vense e tendensia pa biba solamente pa nos mes.

Buska e siguiente tèkstnan. Kiko nan ta bisa nos tokante biba un bida di apnegashon?

Fil. 2:3-5

1 Juan 3:16-18

Manera Ellen G. White a skirbi akiriba, si orguyo i egoismo lo a ser poné un banda, asina tantu problema por a ser resolvé di forma masha rápido, hopi promé ku nan putri i fermentá i finalmente kombertí den algu desagradabel. Tur miembro di famia, spesialmente e mayornan, mester ser eradiká (Prov. 16:6) di e piká akí na pia di e Krus (e ehèmpel di mas grandi den henter e universo di apnegashon), asta si esei ta nifiká bai bèk konstantemente na e Krus i rudiá den orashon, fe, lágrima, i sumishon.

Ki konseho Pablo tin enkuanto di humildat i servisio den relashonnan? Efe. 5:21. Kon bo ta pensa ku e aktitut akí ta kontribuí na unidat den iglesia? Dikon e ta asina importante na kas? Efe. 5:22-6:9

E palabra “someté” (Efe. 5:21) ta nifiká pone bo mes humildemente dilanti di un otro persona riba base di eskoho boluntario. E prinsipio úniko akí a kuminsá ku Kristu (Mat. 20:26-28; Juan 13:4, 5; Fil. 2:5-8) i ta karakterisá tur esnan ku ta yená ku Su Spiritu (Efe. 5:18). “Reverensia pa Kristu” ta loke ta motivá hende pa someté di e forma akí (Efe. 5:21, NIV). Resiprosidat den entrega personal tabata, i ta ainda, un siñansa Kristian revolushonario tokante relashonnan sosial. E ta trese na bida e realidat spiritual ku nos tur ta un den Kristu; no tin eksepshon.

Un prinsipio di e hogar. E kampo di prueba di sumishon Kristian ta den e hogar. Si e prinsipio akí ta efektivo einan, e lo hasi un diferensia dramátiko den iglesia. Pablo ta pasa inmediatamente di e introdukshon di e prinsipio di sumishon pa diskutí su aplikashon den famianan.

Tres par di relashon ta ser menshoná den Efesionan 5:22-6:9, e relashonnan di mas komun i sinembargo di mas desigual den sosiedat. E intenshon no ta pa reforsá un órden sosial eksistente sino pa mustra kon e kultura di fe di Kristu ta funshoná ora tin un sumishon boluntario radikalmente diferente di kreyentenan un na otro.

Dikon bo ta kere ku Pablo konstantemente ta papia promé na esnan ku ta sosialmente mas débil den e kultura: e esposanan, yunan, i esklabonan? Skirbi e frase kalifikativo athunto na e sumishon di kada un di esakinan.

Efe. 5:22

Efe. 6:1

Efe. 6:5

Esnan ku poder sosial mas grandi, esposonan, mayornan, shonnan, semper ta ser menshoná na di dos lugá. Kada un ta risibí un instrukshon bastante inkomun na e kultura. E instrukshonnan akí mester a asombrá e kreyentenan di siglo I. Nan a nivelá e tereno rondó di e Krus i a habri e kaminda pa berdadero unidat ser eksperensiá den relashonnan.

Finalmente, koherensia familiar i unidat ta dependé di e kompromiso di miembronan di famia, kuminsando ku e kompromiso di e parehanan matrimonial, pa un kuida pa otro. Lamentablemente, historia bíbliko ta pèstá ku ehèmpelnan di promesanan ku a faya, konfiansa kibrá, i falta di kompromiso kaminda e mester tabata presente. Skritura tambe tin ehèmpelnan konmovedor di personanan komun ku, ku yudansa di Dios, a komprometé nan mes na amigu- i famianan i a kumpli ku nan promesanan.

Wak e siguiente famianan i nan nivelnan di kompromiso. Kon kompromiso por a ser fortalesé den algun famia? Kiko a enkurashá e kompromiso demostrá den e otronan?

Kompromiso entre mayor i yu

Gen. 33:12-14, Eks. 2:1-10

Kompromiso di rumannan

Gen. 37:17-28

Kompromiso familiar

Ruth 1:16-18; 2:11, 12, 20; 3:9-13; 4:10, 13

Kompromiso matrimonial

Os. 1:2, 3, 6, 8; 3:1-3

Ora nos komprometé nos mes ku un otro persona, manera den matrimonio òf den e desishon pa karga òf adoptá un yu, mester tin un sumishon boluntario di nos mes pa asina hasi un eskoho diferente den futuro, un sumishon di kontròl riba un segmento importante di nos bida. Leinan por frena komportashon negativo, pero matrimonio i relashonnan familiar mester di amor denter di nan pa kapasitá nan pa prosperá.

Ellen G. White, “A Sacred Circle”, p. 77-180, den The Adventist Home; Testimonies for the Church, tomo 6, p. 236-238.

Unidat-e promé obra. “E promé obra di Kristiannan ta pa ta uní den famia. … “Mas djaserka e miembronan di famia ta uní den nan trabou den e hogar, mas elevador i servisial lo ta e influensia ku tata i mama i yunan hòmber i muhé lo ehersé pafó di e hogar”. – Ellen G. White, The Adventist Home, p. 37.

E sekreto di unidat familiar. “E kousa di divishon i diskordia den famianan den iglesia ta separashon for di Kristu. Pa yega serka di Kristu ta pa yega serka otro. E sekreto di berdadero unidat den iglesia i den famia no ta diplomasia, no maneho, no un esfuerso sobrehumano pa vense difikultatnan, aunke lo tin ku hasi hopi di esaki, sino union ku Kristu”. – Página 179.