Modelo pa un Mundu Mihó

“Enbèrdat Mi a mira e miseria di Mi pueblo na Egipto. Mi a tende nan grita pa motibu di nan kapatasnan, i Mi ta preokupá pa nan sufrimentu” (Eks. 3:7, NIV).

Kuatershen aña ta hopi tempu pa warda, spesialmente ora ta warda den kondishonnan di sklabitut ku tabata bira mas i mas severo. Dios a primintí ku E lo a regresá serka Su pueblo i saka nan for di Egipto, pero pa generashon tras generashon nan a ser lagá pa konstruí e rikesa i prestigio di nan opresornan idólatra, i tur e tempu Dios a parse di a keda ketu.

E ora ei Dios a manifestá Su mes den un forma úniko. El a aparesé den un mata ku tabata kimando den e desierto leu na un lider improbabel, un prens fugitivo i wardadó di karné humilde yamá Moises. El a duna e Moises resistente un trabou pa hasi, i e promé parti di e trabou ei tabata pa bai bèk serka e Israelitanan na Egipto ku e mensahe ku Dios a tende i mira nan opreshon, i, sí, E ta preokupá. De echo, E tabata na punto di hasi algu pa kambia nan situashon dramátikamente.

Lesa Eksodo 3:16, 17. Dikon tabata importante pa Dios kuminsá definí Su plan pa e hendenan akí ku e mensahe spesífiko akí? Kiko ta kapta bo atenshon tokante e deklarashon akí for di Dios?

Pero Dios no ta stòp ei. No solamente E tin un plan pa un tera mihó, E no tin intenshon pa e hendenan skapa for di Egipto deprivá. Pa siéntos di aña, nan a kontribuí na e rikesa di e Imperio Egipsio. Dios a premirá e resistensia inisial di Fárao, pero El a sigurá Moises ku e Israelitanan lo a ser kompensá pa nan añanan di trabou duru: “I lo Mi hasi e Egipsionan positivamente dispuesto pa ku e pueblo akí, pa asina ora boso bai, boso lo no bai man bashí” (Eks. 3:21, NIV).

Despues di nan añanan di opreshon, Dios a tuma e oportunidat pa establesé un tipo nobo di sosiedat ku e esklabonan anterior akí. E tabata ke pa nan biba den un forma diferente pa establesé un sosiedat ku lo a sigui ta sostenibel i viabel. Su plan tabata pa e tipo nobo di sosiedat akí lo tabata un modelo pa e nashonnan den besindario i, meskos ku Abraham, pa e bendishonnan ku nan tabata risibí for di Dios lo a bendishoná henter mundu tambe.

Lesa Mateo 22:37–40 i despues Eksodo 20:1–17. Kon e resúmen di Hesus di e mandamentunan ta yuda bo komprondementu segun ku bo ta lesa kada un di e Dies Mandamentunan?

E Dies Mandamentunan ta lesa manera un konstitushon. Despues di un preámbulo breve ku ta pone e base riba kua e deklarashonnan akí ta trahá, den e kaso akí, e echo di e liberashon di Dios di Su pueblo, e dokumento ta kontené e prinsipionan klave riba kua e nashon ta fundá. Den e kaso akí, tabatin demandanan spesífiko tokante kon sernan humano por a biba mihó nan amor pa Dios i amor pa otro. Ta un tiki straño ku hopi nashon ku un herensia Kristian a saka e base di nan leinan for di e prinsipionan fundamental akí.

Miéntras hopi di e deklarashonnan akí ta kòrtiku, nos no mester supestimá e ekstenshon di nan impakto i e magnitut di e Dies Mandamentunan komo e lei di bida. Por ehèmpel, e di seis mandamentu: “Lo bo no asesiná” (Eks. 20:13, NIV), ta resumí i inkluí “tur akto di inhustisia ku tin tendensia di minimisá bida” komo tambe “un negligensia egoista di kuida pa esnan den nesesidat òf ku ta sufri.”—Ellen G. White, Patriarchs and Prophets, p. 308. Di forma similar, e prohibishon kontra hòrtamentu (lesa Eks. 20:15) ta kondená “trafikashon di esklabo, i ta prohibí gueranan di konkista.” E ta “rekerí e pago di debe- òf salarionan,” komo tambe prohibí “tur intento pa probechá di e ignoransia, debilidat, òf problema di un otro.”—Patriarchs and Prophets, p. 309.

Fásilmente nos por bisa nos mes ku nos no ta mal hende. Por ehèmpel, si nos no ta direktamente enbolbí den asesinato òf hòrtamentu opvio, kisas por ta parse ku nos ta bon. Pero ora Hesus a papia tokante e mandamentunan, E a splika ku e mandamentunan no ta ser kumplí simplemente dor di no hasi algun aktonan spesífiko. Mas bien, nos pensamentunan, motivashonnan, i asta fayo pa hasi kosnan ku nos sa ku nos mester hasi, por kibra e lei di Dios (lesa Mat. 5:21–30)

Asina, imaginá bo un sosiedat den kua kada un di e Dies Mandamentunan tabata ser tumá na serio i bibá plenamente. E lo ta un sosiedat aktivo i vibrante den kua tur hende tabata aktua ku entusiasmo riba nan amor pa Dios dor di stima i kuida otro.

Lesa Eksodo 23:9. Kiko ta e mensahe di Dios na Israel aki?

Komo esklabonan resien liberá, e Israelitanan tabata sa kiko ta nifiká pa ser oprimí, eksplotá, i marginalisá. I miéntras nan tabata selebrá nan libertat, Dios tabata preokupá pa nan no lubidá di unda nan a bin, kon tabata pa ser ekskluí, i kiko El a hasi pa reskatá nan. El a instituí e Pasku komo un evento konmemorativo i un oportunidat pa bolbe konta e storia: “Ku un man poderoso Señor a saka nos for di Egipto, for di e tera di sklabitut” (Eks. 13:14, NIV).

Lesa Eksodo 22:21–23. Kon importante e rekuerdo di nan propio sklabitut tabata den e instrukshonnan tokante kon e pueblo mester trata esnan ménos fortuná den nan sosiedat nobo?

Apénas e ekonan a disparsé despues di e dunamentu di e Dies Mandamentunan ora Moises ta ser yamá pa pasa mas tempu ku Dios, kende ta dun’é instrukshonnan detayá enkuanto di kon e gran mandatonan akí mester ser bibá den sosiedat israelita. Asta promé ku e instrukshonnan pa konstruí e tabernakel, Dios ta duna tres kapítulo di leinan tokante kosnan manera e trato apropiá di esklabonan, leinan ku lo a destaká den kontraste skèrpi na e trato ku hopi di e israelitanan a eksperensiá. Tabatin leinan ku tabata trata ku krímennan violento, leinan relashoná ku propiedat, leinan pa bida diario, i prinsipionan pa establesé kortenan pa implementá e leinan akí i pa atministrá hustisia (Lesa Eksodo 21 te ku 23).

Prominente entre e leinan akí tabatin preokupashon pa konsiudadanonan den e sosiedat nobo akí, komo tambe preokupashon pa e strañeronan i esnan di mas vulnerabel. E hendenan akí no mester a ser eksplotá; nan a asta ser duná derechonan pa tin akseso na kuminda den formanan ku lo a respetá nan dignidat, manera kolektá sobránan di kosecha for di e kamponan ku a ser kosechá. Un trato asina pa “strañeronan” no tabata komun den e mundu antiguo. Asta awe algun hende parse ta lubidá e prinsipionan moral importante hañá aki enkuanto di e trato di otronan.

Hopi Kristian ta rekonosé i ta sigui e instrukshonnan di Beibel riba debolbé diesmo. Generalmente referí na dje den Malakias 3:10, e ta un simpel fórmula, ku kreyentenan ku ta duna 10 porshento di nan entrada, òf “ingreso”, pa sostené e obra di iglesia pa plama e evangelio. Konfiá ku e diesmonan akí, iglesianan generalmente tin poutanan estrikto tokante kon pa usa e fondonan akí, promé ku tur kos aplikando nan pa sostené ministerio direkto i evangelismo.

Lesa Deuteronomio 14:22–29. Den e instrukshonnan akí, kiko ta e propósito primario di debolbé diesmo?

E tentashon ta pa pensa ku nos a kumpli ku nos dunamentu ora nos duna e 10 porshento ei. Pero e instrukshonnan duná na e israelitanan ta sugerí ku e figura di 10 porshento tabata un komienso. Estudionan ta sugerí ku un israelita antiguo ku ta biba i duna di akuerdo ku e poutanan den e leinan Levítiko riba un promedio lo a duna kasi un kuart parti di e entrada anual na e obra di Dios, pa sostené e saserdotenan i santuario, i pa yuda e pobernan.

Algun erudito ta deskribí e dunamentu akí, partikularmente pa sostené e strañero- wérfano-, i buidanan, komo un segundo diesmo. Ta opvio ku e pueblo mester a disfrutá di e resultadonan di nan trabou i selebrá nan kosechanan. Dios a primintí pa bendishoná nan, partikularmente den nan tera nobo, pero nan no mester a menospresiá e bendishon ei òf lubidá esnan ku no tabata asina bendishoná.

Den añanan regular, e porshon akí di e kosecha mester a ser tresé na e santuario i kompartí for di einan. Pero kada di tres aña, mester tabatin un focus spesial riba kompartí nan bendishonnan den nan propio komunidat. Den e selebrashonnan di kosecha akí tabatin un enfoke spesial riba esnan ku kisas por a ser pasá por alto òf lubidá fásilmente: “Boso lo dun’é na e Levita, e strañero, e wérfanonan i e biuda, pa asina nan por kome den boso statnan i ta satisfecho” (Deut. 26:12, NIV).

Di akuerdo ku e instrukshonnan di Dios, por lo ménos algun porshon di e dunamentu di e israelitanan mester a ser enfoká riba proveé asistensia finansiero i práktiko na esnan ku tabatin mas mester di dje. Atrobe, esaki tabata basá riba rekuerdo i apresio di e pueblo di kon Dios tabata miserikòrdioso i hustu ku nan.

Ora Dios a topa ku e Israelitanan komo un pueblo ku no tabatin hogar di nan mes i ku tabata spera pa nan yegada den e Tera Primintí, E tabata konosé e importansia ku e tera lo a asumí ora nan a establesé nan sosiedat nobo den Kánaan. Bou di liderazgo di Josué, Dios a komandá un distribushon organisá di e tera pa tribu i gruponan familiar.

Pero E tabata sa tambe ku despues di tempu e rikesa, oportunidat, i rekursonan ku tabata konektá ku poseshon di tera lo a haña tendensia di bira konsentrá den mannan di e pokonan. Difikultatnan familiar, mal salú, eskohonan pober, i otro difikultatnan kisas por a pone algun doño di tereno bende nan tera pa ganashi a korto plaso òf simplemente pa sobrebibí, pero esaki lo a nifiká ku e famia kisas por a ser deprivá pa generashonnan ku ta sigui.

E solushon di Dios tabata pa dekretá ku tera nunka por a ser bendé totalmente. En kambio, tera lo a ser bendé solamente te na e siguiente “aña di hubileo”, na kua momentu e tera lo a ser duná bèk na su famia asigná, i kualke tera bendé por a ser redimí dor di e bendedó òf un otro miembro di famia di e bendedó na kualke momentu. Atrobe, Dios ta kòrda e pueblo riba nan relashon kunE i kon esei ta afektá nan relashonnan ku otronan: “E tera no mester ser bendé permanentemente, pasobra e tera ta di Mi i boso ta biba den mi tera komo imigrantenan i strañeronan” (Lev. 25:23, NIV).

Lesa Levítiko 25:8–23. Kon bo ta imaginá bo ku sosiedat lo tabata diferente si e prinsipionan akí tabata ser apliká, spesialmente e palabranan “lo bo no oprimí otro”?

“E regulashonnan ku Dios a establesé tabata designá pa promové igualdat sosial. E provishonnan di e aña sabátiko i di hubileo lo a, den gran medida, koregí e loke durante e interludio a bai robes den e ekonomia sosial i polítiko di e nashon.”—Ellen G. White, Patriarchs and Prophets, p. 534.

Historiadónan di Beibel ta insigur tokante si e ritmonan ekonómiko i sosial akí hamas a ser siguí totalmente pa kualke periodo di tempu spesífiko (lesa 2 Kron. 36:21). Ku tur esei, e reglanan akí ta ofresé un impreshon interesante den kon e mundu lo por a funshoná si e leinan di Dios a ser siguí totalmente. Ademas, nan ta resaltá e preokupashon partikular di Dios pa e pobernan i esnan marginá, komo tambe Su preokupashon ku si hustisia ta ser manifestá den formanan práktiko den nos mundu.