Sabat: Un Dia di Libertat

Despues di generashonnan di sklabitut i e degradashon sosial ku un kondishon asina por a kousa riba Su pueblo oprimí, Dios a trata na elevá e Israelitanan resien liberá, mustrando nan un mihó manera di biba i a duna nan leinan pa e mihó organisashon di nan sosiedat nobo. Pero un di e promé partinan di e proseso akí a bin den forma di un lès ophetivo práktiko i instruktivo.

Kontinuando pa henter e 40 aña di nan peregrinashon den desierto, e ritmo di bida akí, evidensia visibel di e provishon i altruismo praktiká di Dios, mester a bira parti di e kultura di sosiedat israelita. El a bin den forma di mana, un alimento ku tabata aparesé kada mainta riba suela rondó di e kampamentu di e Israelitanan.

Lesa Eksodo 16:16–18. Kiko bo ta kere ta nifikashon di e midí spesífiko pa kada persona enfatisá den e versíkulonan akí?

Den 2 Korintionan 8:10–15, Pablo ta hasi referensia na e storia akki komo un ehèmpel di kon Kristiannan mester duna: “Na e momentu aki boso abundansia lo supli loke nan tin mester, pa asina en kambio nan abundansia lo supli loke boso tin mester. E meta ta igualdat” (2 Korintionan 8:14, NIV).

E lès pa e Israelitanan, i nos, tabata ku Dios a proveé lo sufisiente pa Su pueblo i Su kreashon. Si nos tuma solamente loke nos tin mester i ta prepará pa kompartí nos ekseso ku otronan, tur lo ser kuidá i proveé p’e. Tumando solamente sufisiente pa e dia tabata rekerí pa e pueblo konfia ku lo tabatin mas pa e siguiente dia.

Hendenan oprimí, manera e esklabonan israelita, tin tendensia di focus riba nan propio sobrebibensia, pero Dios tabata ke demostrá nan un bida di konfiansa, generosidat, i interkambio.

Pero tabatin tambe un otro dimenshon, mas remarkabel, na e práktika akí. Kada djabièrnè un dòbel porshon di mana tabata aparesé riba suela, i riba e dia ei, i solamente e dia ei, e pueblo mester a kolektá e mana èkstra den preparashon pa Sabat. E provishon special pa Sabat a bira un forma adishonal pa nan siña konfia Señor pa tur nan nesesidatnan. E porshon èkstra aki di mana, un akto di grasia di parti di Dios, a permití nan disfrutá ainda mas plenamente di e sosiegu ku Dios a primintí nan riba e Sabat di e di shete dia.

Lesa Eksodo 20:8–11 i Deuteronomio 5:12–15. Kon e dos vershonnan akí di e di kuater mandamentu ta komplementá otro?

Rekordá ta un parti importante di e relashon ku Dios ta buska pa restablesé ku Su pueblo, un relashon sentrá riba e echo ku Dios ta nos Kreador i Redentor. Tur dos ròl ta aparesé den e dos vershonnan di e di kuater mandamentu i pues ta konektá djaserka ku Sabat i su práktika.

Saliendo for di un tera dominá pa asina tantu diosnan falsu, e israelitanan mester a ser rekordá di e berdadero ròl di Dios komo e Kreador. E Sabat tabata un forma krusial pa hasi esei, el a hasi ku tur kos tabata mas signifikativo den konteksto di e siklo semanal di proveé èkstra mana riba djabièrnè, un ehèmpel poderoso di Su poder kreativo. Den e vershon di Eksodo 20 di e di kuater mandamentu, Dios komo nos Kreador ta ser revelá di forma mas kla.

Den kontraste, nan reskate, redenshon, i salbashon ta e enfoke di e di kuater mandamentu den Deuteronomio 5. Esaki tabata un storia ku e israelitanan mester a bolbe konta regulamente; nan por a bolbe konektá kuné spesialmente tur Sabat. Nan promé storia tabata un di reskate físiko real for di sklabitut na Egipto, pero segun ku nan komprondementu di Dios i Su salbashon tabata krese, Sabat tambe lo a bira un símbolo i selebrashon semanal di nan salbashon spiritual.

Tur e dos motivashonnan akí pa Sabat tabata tokante restourá e relashon entre Dios i Su pueblo: “ ‘Mi a duna nan Mi Sabatnan komo un señal entre nos, pa asina nan por a sa ku Ami, Señor, a santifiká nan’ ” (Ezek. 20:12, NIV). I, manera nos a mira, esaki nunka tabata tokante e grupo di persona akí so. Riba e fundeshi di e relashon akí, nan mester a establesé un tipo nobo di sosiedat, un ku tabata amabel ku strañeronan i un bendishon pa e mundu en general.

“ ‘P’esei Señor boso Dios a manda boso pa warda e dia di Sabat’ ” (Deut. 5:15, NIV). Ora nos warda e Sabat komo un forma pa rekordá i selebrá tantu nos kreashon komo redenshon, nos por sigui krese den nos relashon, no solamente ku Señor sino tambe ku esnan rondó di nos. Dios ta miserikòrdioso ku nos; p’esei, nos mester ta miserikòrdioso ku otronan.

Un di e kosnan opvio for di un lesamentu rápido di e Dies Mandamentunan den Eksodo 20 i Deuteronomio 5 ta ku e di kuater mandamentu ta, definitivamente, esun di mas detayá. Miéntras algun di e mandamentunan ta ser registrá den djis tres palabra den algun vershon (den hebreo algun por ser ekspresá den solamente dos palabra), e di kuater mandamentu ta duna espasio na e pakiko, kon, i ken pa rekordá e dia di Sabat.

Lesa Eksodo 20:8–11. Kiko e ta bisa tokante e sirbidó- i strañeronan, asta animalnan, i kiko e ta nifiká?

Notabel entre e detayenan di Sabat akí tin e enfoke riba otronan. Sigve K. Tonstad ta argumentá ku e tipo di mandamentu akí ta úniko entre tur e kulturanan di mundu. E mandamentu di Sabat, e ta splika, “ta priorisá for di abou bin ariba i no for di ariba mirando abou, dunando promé konsiderashon na e miembronan di mas débil i di mas vulnerabel di sosiedat. Esnan ku tin mas mester di sosiegu, e esklabo, e strañero residente, i e bestia di karga, ta ser apuntá pa menshon spesial. Den e sosiegu di e di shete dia esnan ménos privilegiá, asta animalnan ku no por papia, ta haña un aliado.”—The Lost Meaning of the Seventh Day (Berrien Springs, MI: Andrews University Press, 2009), p. 126, 127.

E mandamentu tin un enfoke spesial riba urgi ku e Sabat ta un dia pa ser disfrutá dor di tur hende. Den lus di e Sabat, nos tur ta igual. Si bo ta un dunadó di trabou durante siman, bo no tin outoridat pa pone bo empleadonan traha riba Sabat. I esei ta pasobra Dios a duna nan tambe un dia di sosiegu. Si bo ta un empleado. òf asta un esklabo, pa restu di bo dianan, e Sabat ta rekordá bo ku bo a ser kreá i redimí igualmente dor di Dios, i Dios ta invitá bo pa selebrá esaki den formanan otro for di bo debernan di kustumber. Asta esnan pafó di e pueblo ku ta warda Sabat, “kualke strañero ku ta biba den bo stat” (Eks. 20:10, NIV)—mester benefisiá di e Sabat

E idea akí lo tabata un kambio remarkabel di perspektiva pa e Israelitanan, fresku for di nan propio eksperensianan di sklabitut i marginalisashon. Awor ku nan mester a ser establesé den un tera nobo, Dios no tabata ke pa nan adoptá e kustumbernan di nan opresornan anterior. Ademas di duna nan leinan detayá pa nan sosiedat, El a duna nan (nos tur, en realidat) un rekordatorio semanal, den un forma poderoso, di kon igual nos tur ta dilanti di Dios.

Miéntras e vishon original pa e Sabat i wardamentu di Sabat tabata amplio i inklusivo, Sabat a bira algu basta diferente pa hopi lider religioso pa e tempu ku Hesus a bin na tera. Na lugá di un dia di libertat i igualdat, Sabat a bira un dia di reglanan i regulashonnan humano i tradishonal. Den Su tempu, Hesus a lanta kontra e aktitutnan asina, spesialmente pasobra nan tabata ser imponé riba otronan.

Ki interesante ta ku El a hasi esaki di forma mas signifikante dor di ehersé un kantidat di sanashon riba Sabat. Ta parse ku Hesus a ehersé e milagernan akí intenshonalmente riba Sabat, kontrali na kualke otro dia, pa demostrá algu importante tokante kiko e Sabat mester ta. Hopi biaha den e storianan akí, Hesus a hasi komentarionan tokante e kumbinensia di sana riba Sabat, i hopi biaha e Fariseonan a usa Su deklarashonnan komo un èksküs pa promové nan kòmplòtnan ta mata Hesus.

Lesa e storianan di e sanashon di Hesus riba Sabat den Mateo 12:9–13, Marko 1:21–26, 3:1–6, i Juan 9:1–16. Kiko ta e kosnan di mas signifikante ku bo ta nota den e storianan akí?

Hesus a konfirmá ku e Sabat ta importante. Nos mester pone límitenan rondó di e tempu di Sabat pa ten’é spesial i pa permití e tempu semanal akí ta un oportunidat pa mehorá nos relashon ku Dios, nos famianan, nos iglesia, i nos komunidat. Pero wardamentu di Sabat no mester ta, di forma egoista, tokante nos so. Manera Hesus a bisa: “Ta lísito pa hasi bon riba Sabat” (Mat. 12:12, NKJV).

Hopi miembro di iglesia ta hasi hopi bon trabou pa kuida otronan. Pero hopi di nos ta sinti tambe ku nos mester hasi mas pa yuda. Nos sa ku Dios ta preokupá pa esnan ku ta sufri, oprimí, òf lubidá, i ku nos tambe mester preokupá. Komo ku nos a ser mandá pa no kore tras di nos trabou regular i ta liberá di e preshonnan di siman, riba Sabat nos ta ser duná tempu pa enfoká riba e preokupashon akí pa otronan komo un di e formanan di wardamentu di Sabat berdadero i aktivo: “Di akuerdo ku e di kuater mandamentu, e Sabat a ser dediká na sosiegu i adorashon religioso. Tur okupashon sekular mester a ser suspendé, pero obranan di miserikòrdia i benevolensia tabata den harmonia ku e propósito di Señor. . . . Pa aliviá esnan aflihí, pa konsolá esnan tristu, ta un trabou di amor ku ta honra e dia santu di Dios.”—Ellen G. White, Welfare Ministry, p. 77.

Manera nos a mira, Sabat tabata un parti ankrá di e siklo di bida di e nashon israelita. Pero e prinsipio di Sabat no tabata solamente tokante un dia kada siman. E tabata inkluí tambe un sosiegu spesial kada di shete aña, ku tabata kulminá den e aña di hubileo despues di shete sèt di shete aña, ku ta nifiká kada di sinkuenta aña.

Lesa Levítiko 25:1–7. Kiko ta remarkabel tokante e tipo di instrukshon akí? Den ki manera posibel lo bo por inkorporá e tipo di prinsipio akí den bo bida i trabou?

E aña sabátiko tabata permití e tera agríkola sosegá pa e aña. E ta un akto remarkabel di mayordomia di e tera, i e sabiduria di esaki komo un práktika di agrikultura a ser rekonosé ampliamente.

E di shete aña tambe tabata signifikante pa esklabonan (lesa Eks. 21:1–11). Den kaso ku kualke di e Israelitanan tabata asina den debe te pa bende nan mes komo esklabo, nan mester a ser liberá den e di shete aña. Di forma similar, debenan pendiente mester a ser kanselá na fin di e di shete aña (lesa Deut. 15:1–11).

Meskos ku e mana ku Dios a proveé na e Israelitanan den desierto, no planta kultivo pa un temporada tabata un akto di konfia ku Dios lo a proveé sufisiente den e aña anterior i for di loke e tera a produsí di su mes den e aña Sabátiko. Di forma similar, liberá esklabonan i kanselá debenan tabata un akto di miserikòrdia pero tambe un akto di konfiansa den e poder di Dios pa proveé pa nos nesesidatnan. Den un sentido, e pueblo mester a siña ku nan no tabatin mester di oprimí otronan pa asina proveé pa nan mes.

E prinsipionan i patronchi di Sabat mester tabata konektá djaserka na e struktura di e sosiedat israelita komo un totalidat. Igualmente, wardamentu kontemporáneo di Sabat mester ta un disiplina spiritual ku ta transformá tur nos otro dianan. Den un sentido práktiko, Sabat ta un forma di biba e instrukshonnan di Hesus pa buska promé Su reino: “Boso Tata selestial konosé tur boso nesesidatnan kaba . . . i E lo duna boso tur kos ku boso mester” (Mat. 6:32, 33, NLT).