Adorá e Kreador

Pronto despues ku Dios a guia e pueblo di Israel for di Egipto, El a reuní ku nan na Seru di Sinai, i a duna nan e Dies Mandamentunan den forma skirbí, inkluyendo e promé dos mandamentunan tokante no adorá otro diosnan i no traha ídolonan (lesa Eksodo 20:2-6). Komo kontesta, e pueblo a primintí di hasi tur loke a ser ordená na nan i pa biba komo Su pueblo (lesa Eksodo 24:1-13).

Pero despues Moises a subi bai riba e seru pa kasi seis siman i e pueblo a kuminsá puntra su mes kiko a para di dje. Bou di preshon di e grupo, Aaron a traha un bisé di oro i a hiba e pueblo na hasi sakrifisionan su dilanti, despues di kua "nan a sinta pa kome i bebe i a lanta pa dibertí nan mes" (Eksodo. 32:6, NIV). Tantu Señor komo Moises tabata indigná pa kon lihé e pueblo a bira lomba pa Dios pa adorashon di ídolo, i tabata parse ku tabata solamente e interseshon di Moises ku a salba Israel for di su kastigu meresí (lesa Eks. 32:30-34).

Idolatría, sinembargo, tabata un tentashon ku hopi biaha e pueblo di Dios tabata kai aden. E historia di e reinan di Israel i Huda ta ser interumpí pa periodonan di idolatría, kua ta inkluí e aktonan indignante ku algun di e reinan tabata hiba e pueblo na kometé den adorashon di e diosnan akí. Un infieldat asina tabata un enfoke persistente di e profetanan ku Dios a manda pa asina yama e pueblo bèk na djE. Hopi biaha, tambe, meimei di e yamadanan pa reavivamentu i reforma, tabata tin yamadanan pa un mihó trato di e pobernan, esnan den nesesidat, i esnan indefenso meimei di nan.

Lesa Salmoo 115:1-8. Ki punto krusial e outor ta enfatisando aki?

Ta un tendensia humano ku nos ta bira meskos ku e kos òf e hende ku nos ta adorá i enfoká riba dje. Por lo tantu, tabata natural ku preokupashon pa otronan i pa hustisia lo a disminuí ora e pueblo di Dios a bira for di adorá un Dios di hustisia na adorá e diosnan falsu di e nashonnan den besindario, ku hopi biaha tabata ser karakterisá komo sernan di guera òf fertilidat. Ora nan a skohe otro diosnan, e pueblo a kambia di aktitut den hopi kos, inkluyendo kon nan tabata trata otronan. Si nan tabata fiel na Señor, nan lo a kompartí Su prepkupashon pa esnan den nesesidat meimei di nan.

A lo largu di Beibel, e pueblo di Dios ta ser urgí pa adorá Dios, pero nos tambe repetidamente ta ser ofresé rasonnan pa hasi esaki. Nos ta ser bisá pa ador’E pa motibu di ken E ta, pa loke El a hasi, i pa motibu di Su tantu atributonan. Entre esakinan tin Su bondat, hustisia, i miserikòrdia. Ora nos ser rekordá ken Dios ta, kiko El a hasi pa nos (spesialmente den e krus di Kristu), i kiko E ta primintí di hasi, niun di nos hamas por ta sin rason pa adorá i alabá Dios.

Lesa Deuteronomio 10:17-22, Salmo 101:1, 146:5-10, Isaias 5:16, 61:11. Kiko ta e motivashonnan pa adorá i alabá Dios duná den e versíkulonan akí?

Motibunan asina pa adorá no tabata nobo pa e pueblo di Dios. Algun di e momentunan di adorashon di mas entusiasmá di e Israelitanan resien liberá a sosodé komo kontesta riba e intervenshon opvio di Dios na nan fabor. Por ehèmpel, despues di a ser saká for di Egipto i krusa Laman Korá, Moises i Miriam a dirigí e pueblo den kanta alabansa na Dios pa loke nan a kaba di mira i a ser reskatá for di dje (lesa Eksodo 15).

E hustisia i miserikòrdia di Dios, manera revelá den eventonan asina, no mester a ser lubidá. Miéntras e pueblo ta mantené e historianan aki bibu dor di bolbe konta nan regularmente, e aktonan i hustisia di Dios a sigui ta un inspirashon pa nan adorashon añanan mas despues i den generashonnan ku a sigui. Un ehèmpel di bolbe konta i adorashon ta ser registrá den Deuteronomio 10:17-22.

Dios Su hustisia ta, na promé lugá, simplemente parti di ken E ta, un komponente sentral di Su karakter esensial. "Ta imposibel ku Dios lo kometé eror, ku e Todopoderoso lo a pervertí hustisia" (Job 34:12, NIV). Dios ta hustu i ta preokupá ku hustisia, i esei ta un motibu pa adorá- i alab’E.

Na di dos lugá, e hustisia di Dios ta ser mirá den Su aktonan hustu i rekto na fabor di Su pueblo i na fabor di tur ku ta pober i oprimí. Su hustisia nunka ta meramente un deskripshon di Su karakter. Mas bien, Beibel ta deskribí un Dios kende "a tende e sklamashon di esnan den nesesidat" (Job 34:28, NIV) i ta aktivo i ansioso pa drecha e erornan ku ta asina opvio den nos mundu. Finalmente, esaki lo ser realisá plenamente den e huisio final di Dios i Su rekreashon di e mundu.

Durante e mihó épokanan di e reinonan di Israel i Huda, e pueblo tabata bolbe na e tèmpel i e adorashon di Dios, aunke asta e tempu ei, nan adorashon hopi biaha tabata mesklá ku infiltrashonnan for di idolatria i e religionnan di e nashonnan den besindario. Pero di akuerdo ku e profetanan, asta nan mihó intentonan na religion no tabata sufisiente pa bira nan bèk for di e maldatnan kometé den e tera den nan bida diario. I no importá kon duru nan a traha pa ta religioso a traves di nan ritualnan di adorashon, e müzik di nan himnonan no por a hoga e sklamashonnan di esnan pober i esnan oprimí.

Amos a deskribí e pueblo di su tempu komo esnan ku "ta trapa esnan den nesesidat i kaba ku esan pober di e tera" (Amos 8:4, NIV). E a mira nan deseo pa kaba ku nan ritualnan pa asina nan por a bolbe habri e marshe i bai bèk na nan negoshi deshonesto, esun di "kumpra esnan pober ku plata i esnan den nesesidat pa un par di sandalia" (Amos 8:6, NIV).

Lesa Isaias 1:10-17, Amos 5:21-24, Mikeas 6:6-8. Kiko Señor tabata bisando e hendenan religioso akí tokante nan ritualnan?

A traves di Su profetanan Dios ta usa un lenguahe fuerte pa ridikulisá religion i adorashon ku ta deskonektá for di i den kontraste ku e sufrimento i opreshon di esnan rònt di nan. Den Amos 5:21-24 (NIV) nos ta lesa ku Dios ta bisa ku E ta "odia", "despresiá", i ta generalmente disgustá pa nan adorashon. Nan reunionnan ta ser deskribí komo un "holó stinki", i nan ofrendanan i músika ta ser deskartá komo ménos ku inútil.

Den Mikaes 6 nos ta mira un seri di sugerensianan kada bes mas eksagerá, asta di chèrchi, riba kon nan por adorá Dios di forma mas apropiá. E profeta ta ofresé, den un forma di chèrchi, e sugerensia di ofrendanan kimá, despues e ta oumentá e ofrenda na “miles di karné chubatu, ku dies mil riu di zeta di oleifi" (Mikeas 6:7, NIV) promé ku e bai na e ekstremo horibel, pero no deskonosí, di sugerí pa sakrifiká su promé yu pa gana e fabor i pordon di Dios. Al final, sinembargo, Ioke Señor realmente tabata ke pa nan tabata pa “aktua ku hustisia i pa stima miserikòrdia i pa kana humildemente ku bo Dios” (Mikeas 6:8, NIV).

Den nan splikashon di e relashon entre adorashon i hustisia, tin un otro paso urgí pa e profetanan: ku un preokupashon aktivo pa aliviá esnan pober i oprimí i yuda esnan den nesesidat ta un parti importante di adorashon riba su mes. Isaias 58 ta un kapítulo ku ta hasi e konekshon akí opvio.

Lesa Isaias 58. Kiko a bai robes den e relashon entre Dios i Su pueblo manera e ta ser deskribí den e promé parti di e kapítulo akí?

Manera nos a mira anteriormente, e krítika akí ta dirigí na hendenan ku ta aktivamente religioso.Nan ta parse di ta buskando Dios honestamente, pero aparentemente e no ta funshonando. Pues, Dios ta bisa ku nan mester trata na kambia e manera kon nan ta adorá, pa purba un manera diferente di sirbi Dios. Si E mester a skohe kon nan lo a adorá, lo tabata "pa lòs e kadenanan di inhustisia i lòs e kabuyanan di e yugo, liberá esnan oprimí i kibra tur yugo" (Isa. 58:6, NIV). Tambe nan lo a alimentá esnan ku tin hamber, duna asilo na esnan sin kas, i yuda esnan den nesesidat.

Aktividatnan asina no ta ser presentá komo e úniko forma pa adorá, pero Dios ta rekomendá nan komo un forma pa adorá, i un forma di adorashon ku kisas por ta deseabel pa algun di e práktikanan di adorashonnan mas tradishonal di e pueblo. Komo tal, adorashon no ta solamente enfoká di forma interno sino algu ku ta trese bendishon pa tur esnan rondó di e adoradónan di Dios. "E berdadero propósito di religion ta pa libra hende for di nan karganan di piká, pa eliminá intoleransia i opreshon, i pa promové hustisia, libertat i pas". - The SDA Bible Commentary, tomo 4, p. 306.

Den Isaias 58:8-12, Dios ta primintí bendishonnan komo kontesta riba e forma di adorashon akí. De echo, Dios ta bisando ku si e hendenan lo tabata ménos enfoká riba nan mes, nan lo a deskubrí Dios obrando ku nan i a traves di nan pa trese sanashon i restourashon.

Ta interesante pa bisa ku e kapítulo akí tambe ta konektá e tipo di adorashon akí ku un renobashon di wardamentu di Sabat yená ku "delisia". Nos a konsiderá kaba algun di e konekshonnan fuerte entre Sabat i ministerio, pero e versíkulonan akí ta inkluí tur dos e aktividatnan akí den e yamada akí na e pueblo pa revitalisá nan adorashon i pa deskubrí e bendishon di Dios. Reflehando riba e versíkulonan akí, Elena G. White a komentá, "riba esnan ku ta warda e Sabat di Señor ta deskansá e responsabilidat pa hasi un obra di miserikòrdia i bondat". - Welfare Ministry, p. 121.

Ora Hesus a ser konfrontá dor di algun di e lidernan religioso di Su tempu ku a kritik'É pa kome ku "pekadornan", El a sita e profeta Oseas, bisando nan pa bai bèk na nan bukinan i deskubrí kiko Dios tabata kier men realmente ora El a bisa: "Mi ta deseá miserikòrdia, no sakrifisio" (Mat. 9:13, NIV, sitando Oseas 6:6).

Manera nos lo mira, Hesus a biba un bida di asistensia i servisio. Su interakshonnan ku otronan, Su milagernan sanador, i hopi di Su parabelnan a demonstrá i a urgi ku un bida bibá di un forma asina tabata e mihó forma pa ekspresá deboshon bèrdadero na Dios. E lidernan religioso tabata Su krítikonan di mas grandi pero nan tabata tambe e blanko di Su krítikanan di mas duru. Meskos ku e hendenan religioso di tempu di Isaias, nan tabata kere ku nan tabata sigurá nan relashon spesial ku Dios pa motibu di nan práktikanan religioso, miéntras ku na mes momentu nan tabata eksplotá esnan pober i ignorá esnan den nesesidat. Nan adorashon no tabata sinkronisá ku nan akshonnan, i Hesus no tabata reservá den Su kondenashon di un hipokresia asina.

Lesa Marko 12:38-40. E komentario di Hesus ku nan tabata "devorá e kasnan di buidanan" ta parse fuera di lugá den e lista akí, òf esei ta e punto ku Hesus ta tratando na señalá? Kon lo bo a splika dikon "esakinan lo risibí kondenashon mas grandi"?

Kisas e sermon di mas spantoso di Hesus, partikularmente pa hendenan religioso, ta esun ku ta ser hañá den Mateo 23. No solamente Hesus a deskribí nan religion komo no ta yudando hendenan ku ta ménos privilegiá den bida, El a konsiderá un religion asina komo algu ku ta añadí na nan karganan. Pa medio di nan akshonnan òf tin biaha nan falta di akshon i preokupashon, Hesus a bisa "boso ta sera e porta di e reino di shelu den kara di hende" (Mateo 23:13, NIV).

Pero hasiendo eko di e profetanan di siglonan anterior, Hesus tambe a atendé direktamente ku e brùg entre nan práktikanan religioso serio i e inhustisianan ku nan tabata tolerá i probechá di nan. "Ai di boso, eskribanan i fariseonan, boso hipokrítnan! Boso ta duna un désimo partí di boso spesereinan, menta, eneldo i komino. Ma boso a neglishá e asuntunan di mas importante di e lei, hustisia, miserikòrdia i fieldat. Ma esakinan ta e kosnan ku boso mester a hasi sin neglishá e otronan" (Mateo 23:23, NIV). Hesus a hasi lihé pa añadí ku e práktikanan i e opservansianan religioso no ta malu riba nan mes, sino nan no mester tuma lugá di trata otronan hustamente.