Bibando e Evangelio

Juan 3: 16 ta bisa: "Pasobra Dios a stima mundu asina tantu ... " (NIV), i e palabra Griego original ta kosmos, ku ta nifiká "e mundu komo un entidat kreá i organisá". - The SDA Bible Commentary, tomo 5, p. 929. E versíkulo akí ta trata di salbashon pa humanidat, pero e plan di salbashon tin implikashonnan pa henter e kreashon tambe.

Lesa Romanonan 8:20-23. Kiko esaki ta siña nos tokante e asuntunan mas amplio den e plan di salbashon?

Naturalmente, riba un nivel, salbashon ta tokante kada un di nos den nos relashon personal ku Señor. Pero tin mas. Hustifikashon realmente no ta trata di solamente haña nos pikánan pordoná. Di e mihó manera, e mester ta tambe tokante kon, a traves di Hesus i e poder di Spiritu Santu, Señor ta krea e famia di Dios, ku ta selebrá nan pordon i siguransa di salbashon pa medio di, entre otro kosnan, ta testigunan na e mundu pa medio di nan bon obranan.

Lesa Juan 3:16, 17. Kon versíkulo 17 ta kontribuí na un komprondementu mas amplio di versíkulo 16?

Nos por aseptá ku Dios ta stima otro hendenan ku solamente nos mes. E ta stima esnan ku nos ta stima, i nos ta regosihá den esei. Tambe E ta stima esnan ku nos ta duna un man, i nos rekonosementu di e bèrdat akí hopi biaha ta nos motivashon pa nos interaktuá ku nan. Pero tambe E ta stima esnan ku nos no ta konfortabel kuné, òf asta tin miedu di dje. Dios ta stima tur hende, tur kaminda, asta esnan ku kisas nos no ta gusta partikularmente.

Kreashon ta un manera ku nos por mira esaki demostrá. Di forma konsistente Beibel ta señalá e mundu rondó di nos komo evidensia di e bondat di Dios: "E ta laga Su solo sali riba esun malu i esun bon, i ta manda áwaseru riba esun hustu i esun inhustu" (Mat. 5:45, NIV). Asta bida mes ta un regalo di Dios, i apesar di e kontesta òf aktitut di hende pa ku Dios, kada persona ta un risibidó di e don ei.

E historianan mesklá di salbashon i e gran konflikto ta yama nos pa rekonosé un bèrdat tokante bida kual ta fundamental pa nos komprondementu di nos mundu i nos mes, i esei ta: nos i nos mundu ta kaí, kibrá, i pekaminoso. Nos mundu no ta loke el a ser kreá pa ta, i aunke ainda nos ta karga e imágen di e Dios kende a krea nos, nos ta parti di e dekadensia di mundu. E piká den nos bida ta di e mesun naturalesa ku e maldat ku ta kousa asina tantu doló, opreshon, i eksplotashon tur kaminda riba mundu.

Por lo tantu, ta korekto pa nos sinti e doló, inkomodidat, tristesa, i tragedia di e mundu i e bidanan rondó di nos. Nos lo mester tabata robòt pa no sinti e doló di bida akinan. E lamentonan di e buki di Salmonan, e tristesanan di Yeremias i e otro profetanan, i e lágrimanan i kompashon di Hesus ta demostrá ku e tipo di reakshon akí na e mundu i su maldat ta apropiá, i partikularmente nan esnan ku asina tantu biaha ta ser heridá dor e maldat ei.

Lesa Mateo 9:36, 14:14, Lukas 19:41, 42, i Juan 11:35. Kiko tin den kada un di e versíkulonan akí ku a konmové Hesus ku kompashon? Kon nos por tin un kurason ku ta bira suave pa e doló rondó di nos?

Nos mester kòrda tambe ku piká i maldat no ta solamente "eifó", òf e resultado di e dekadensia di otro hende: "Si nos bisa di ta sin piká, nos ta gaña nos mes i e bèrdat no ta den nos" (1 Juan 1:8, NIV). Den e konsepto di e profetanan bíbliko, piká tabata un tragedia no primeramente pasobra un hende a kibra " e reglanan", sino pasobra piká a kibra e relashon entre Dios i Su pueblo, i tambe ku nos pikánan ta hasi otronan doló. Esaki por tuma lugá riba un eskala chikitu òf grandi, pero e ta e mesun maldat.

Egoismo, kudishi, maldat, prehuisio, ignoransia, i deskuido ta na rais di tur e maldat, inhustisia, pobresa, i opreshon di mundu. I konfesá nos pekaminosidat ta e promé paso pa resolvé e maldat akí, komo tambe un promé paso pa permití e amor di Dios tuma su lugá meresí den nos kurason: "Si nos konfesá nos pikánan, E ta fiel i hustu i lo pordoná nos nos pikánan i purifiká nos di tur inhustisia" (1 Juan 1:9, NIV).

Resumí Efesionan 2:8-10 den bo propio palabranan. Kiko e versíkulonan akí ta bisa nos tokante e relashon entre grasia i bon obranan?

E Beibel ta bisa nos ku, entre otro kosnan, nos a ser kreá pa adorá Dios i pa sirbi otronan. Solamente den nos imaginashon nos por trata na komprondé kiko e echonan akí lo tabata den un ambiente sin piká.

Pa awor, pa motibu di piká, nos konosé solamente un mundu kibrá i kaí. Afortunadamente pa nos, e grasia di Dios, ekspresá i revelá den e sakrifisio di Hesus pa e pikánan di mundu, ta habri e kaminda pa pordon i kurashon. Por lo tantu, asta meimei di e eksistensia kibrá akí nos bida ta bira mas plenamente e obra di Dios, i Dios ta usa nos pa asosiá kunE pa trata na sana i restourá e daño i doló den bida di otronan (lesa Efe. 2:10). "Esnan ku risibí tin ku impartí na otronan. For di tur direkshon ta bin yamadanan pa yudansa. Dios ta yama hende pa ministrá ku goso na nan próhimo”. - Ellen G. White, The Ministry òf Healing, p. 103.

Atrobe, nos no ta hasi bon obranan, kuida esnan pober, animá esnan oprimí, duna kuminda nan esnan ku tin hamber, pa gana salbashon òf reputashon dilanti di Dios. Den Kristu, pa medio di fe, nos tin tur e reputashon dilanti di Dios ku hamas nos lo tin mester. Mas bien, nos ta rekonosé nos mes tantu komo pekadornan i víktimanan di piká ku ta, apesar di esei, stimá i redimí dor di Dios. Miéntras ainda nos ta lucha ku tentashonnan di egosentrismo i kudishi, e grasia apnegá i humilde di Dios ta ofresé un tipo nobo di bida i amor ku lo transformá nos bida.

Ora nos wak na e Krus, nos ta mira e sakrifisio grandi i kompletu hasí pa nos i ta realisá ku nos no por añadí nada na loke e ta ofresé nos den Kristu. Pero esaki no ta nifiká ku nos no mester hasi algu den kontesta na loke a ser duná na nos den Kristu. Al kontrario, nos mester respondé, i ki mihó manera pa respondé riba e amor ku a ser demostrá na nos ku demostrá amor na otronan? Lesa 1 Juan 3:16, 17. Kon e versíkulonan akí, na un manera asina poderoso, ta kapta loke nos reakshon na e krus mester ta?

Pa medio di Su ministerio i Su siñansa, Hesus a urgi un inklushon radikal. Tur ku tabata buska Su atenshon ku motibunan honesto, sea hendenan muhé ku mal reputashon, kobradónan di impuesto, leprosonan, Samaritanonan, senturionnan Romano, lidernan religioso, òf muchanan, E tabata risibí nan ku kalor i kuido genuino. Segun ku e iglesia primitivo mester a bin deskubrí den formanan transformadó, esaki tabata inkluí e ofresementu di e don di salbashon.

Ora e promé kreyentenan tabata rekonosé pokopoko e karakter inklusivo di e evangelio, nan no tabata meramente añadí bon obranan pa otronan na nan fe komo algu "bunita" pa hasi. E tabata fundamental pa nan komprondementu di e evangelio, manera nan a eksperensi’é den e bida, ministerio, i morto di Hesus. Miéntras nan tabata lucha ku e problemanan i kuestionnan ku tabata surgi, promé individualmente pa lidernan manera Pablo i Pedro (lesa, por ehèmpel, Echonan 10:9-20), despues komo un kurpa di iglesia na e konsilio di Yerusalèm (lesa Echonan 15), nan a kuminsá realisá e kambio dramátiko ku e bon notisia akí a trese den nan komprondementu di e amor i inklushon di Dios i kon esei mester a ser praktiká den bida di esnan ku ta profesá di ta siguiE.

Kiko kada un di e siguiente tèkstnan akí ta siña nos tokante nos humanidat komun? Kon kada idea mester influensiá nos aktitut pa ku otronan?

Mal. 2:10

Echonan 17:26

Rom. 3:23

Gal. 3:28

Galationan 3:28 ta un resúmen teológiko di e storia práktiko ku Hesus a konta tokante e bon Samaritano. Na lugá di diskutí tokante ken nos ta obligá di sirbi, djis bai i sirbi, i kisas asta ta prepará pa ser sirbí dor di esnan ku kisas nos no ta spera ku ta sirbi nos. E elemento komun di e famia humano global ta ser realisá na un nivel mas haltu den e famia komun di esnan ku ta uní dor di e evangelio, dor di e amor salbador di Dios ku ta yama nos na unidat den djE: "Pasobra nos tur a ser batisá pa medio di un Spiritu pa forma un kurpa, sea hudiu òf griego, esklabo òf liber" (1 Kor. 12: 13, NIV).

E invitashon i yamada transformadó di e evangelio "na tur nashon, tribu, lenga i pueblo" (Rev. 14:6) a kontinuá a lo largu di historia Kristian. Sinembargo, Revelashon ta deskribí un proklamashon renobá di e mensahe akí, e bon notisia tokante Hesus i tur loke e ta enserá, na e fin di tempu.

Lesa Revelashon 14:6, 7. Kon e komprondementu komun di e evangelio, resumí mas komunmente pa Juan 3:16, ta ser inkluí den e mensahe spesífiko di e angel den versíkulo 7?

Revelashon 14:7 ta trese tres elemento klave huntu ku nos a nota kaba den e estudio akí di Dios Su preokupashon tokante maldat, pobresa, i opreshon a lo largu di e storia di Beibel:

Huisio. E apelashon pa huisio, pa hustisia ser hasí, tabata un yamada ripití di esnan ku a ser oprimí a lo largu di historia. Afortunadamente, Beibel ta presentá Dios komo Un ku ta tende e lamentonan di esnan den angustia. Manera hopi biaha ta ser ekspresá den e Salmonan, por ehèmpel, esnan ku ta ser tratá inhustamente ta konsiderá huisio komo bon notisia.

Adorashon.E eskritonan di e profetanan Hebreo hopi biaha ta konektá e temanan di adorashon i bon obranan, partikularmente ora ta kompará e adorashon di esnan ku ta profesá di ta pueblo di Dios ku e erornan ku nan a kometé i a sigui kometé. Den Isaias 58, por ehèmpel, Dios a deklará eksplísitamente ku e adorashon ku E tabata deseá mas tabata aktonan di bondat i kuido pa esnan pober i esnan den nesesidat (lesa Isa. 58:6,7).

Kreashon. Manera nos a mira, un di e elementonan fundamental di e yamada di Dios pa hustisia ta e famia komun di humanidat, ku nos tur a ser kreá den Su imágen i ta stimá p’E, ku nos tur tin balor den Su bista i ku niun hende mester ser eksplotá òf oprimí pa e ganashi inhustu i kudishi di un otro. Ta parse kla ku e proklamashon di e evangelio di tempu di fin akí ta un yamada amplio i ekstenso pa aseptá e reskate, redenshon, i restourashon ku Dios ke pa humanidat kaí. Por lo tantu, asta meimei di e problemanan enkuanto di adorashon berdadero i falsu, i persekushon (lesa Rev. 14:8-12), Dios lo tin un pueblo ku lo para pa loke ta hustu, pa e mandamentunan di Dios i e fe di Hesus, asta meimei di e maldat di mas pió.