Bibando e Speransa Atvènt

A lo largu di e storia di Beibel, tin un yamada ripití di e pueblo di Dios, partikularmente esnan ku ta eksperensiando sklabitut, eksilio, opreshon, pobresa, òf otro inhustisia òf tragedia, pa Dios intervení. E esklabonan na Egipto, e Israelitanan na Babilonia, i hopi otronan a sklama na Dios pa E mira i tende nan sufrimentu i pa koregí e maldatnan akí. I Beibel ta ofresé ehèmpelnan signifikante di e akshonnan di Dios pa reskatá i restourá Su pueblo, tin biaha asta tumando vengansa riba nan opresornan i enemigunan.

Pero e reskatenan akí generalmente tabata di durashon kòrtiku, i e vários profetanan tabata sigui mustra padilanti na un intervenshon final, ora Dios lo a pone un fin na maldat i halsa esnan oprimí. Na mes momentu, e profetanan akí tabata sigui ku e lamento: "Kuantu mas, o Señor?" Por ehèmpel, e angel di Señor a puntra tokante e eksilio di e Israelitanan: "Señor Todopoderoso, kuantu tempu mas lo Bo tene kompashon atras"? (Zak. 1:12, NIV).

E salmonan ta yen di lamentonan tokante e aparente prosperidat i bon fortuna di e malbadonan miéntras e hustunan ta ser abuzá, eksplotá, i ta pober. E salmista repetidamente ta yama riba Dios pa intervení, konfiando ku e mundu no ta ordená aktualmente den e forma ku Dios a kre'é òf ta deseá pa e ta, i e ta tuma e lamento di e profetanan i esnan oprimí. "Kuantu mas, O Señor?" (lesa, por ehèmpel, Salmo 94:3-7).

Den un sentido, inhustisia ta mas difísil pa soportá entre esnan ku ta kere den un Dios hustu ku ta deseá hustisia pa henter Su pueblo. E pueblo di Dios semper lo tin un sentido di falta di pasenshi tokante maldat den e mundu, i e aparente inaktividat di Dios ta un otro fuente di falta di pasenshi. P’esei, e preguntanan tin biaha ta skèrpi di e profetanan: “Kuantu tempu mas, Señor, mi mester yama pa yudansa, ma Bo no ta skucha? Òf sklama na Bo: ‘Violensia!’ ma Bo no ta salba?" (Hab. 1:2, NIV).

Un lamento similar ta ser hasí den Tèstamènt Nobo, kaminda asta kreashon mes ta ser deskribí komo kehando na Dios pa reskatá i rekreá (lesa Rom. 8:19-22). Den Revelashon 6:10, e lamento akí, “Kuantu tempu mas, o Señor?”, ta ser hasí na fabor di esnan ku a ser martirisá pa nan fe den Dios. Pero ta e mesun lamento, yamada na Dios pa intervení na fabor di Su pueblo oprimí i persiguí.

Religion hopi biaha a ser kritiká pa un tendensia di hala kreyentenan for di bida presente na un mihó bida futuro. E krítika ta ku e enfoke riba un otro esfera ta bira un forma di distraishon santifiká i ta duna e kreyente ménos benefishi pa ku e mundu i na sosiedat. Tin biaha kreyentenan a habri nan mes pa tipo di kritiká asina, tin biaha asta kultivando, predikando, i praktikando e tiponan di aktitut akí.

I tambe nos tin ehèmpelnan teribel di esnan na poder ku ta bisa esnan pober i esnan oprimí pa simplemente aseptá nan destino tristu awor pasobra, ora Hesus regresá, tur kos lo ser drechá.

Sí, nos mundu ta un lugá kaí, kibrá i trágiko, i no tin nada robes òf fuera di lugá den anhelá pa e momentu ora Dios lo pone e mundu na òrdu; ora E lo pone un fin na inhustisia, doló, i tristesa; i ora E lo remplasá e desòrdu aktual ku Su reino glorioso i hustu. Despues di tur kos, sin e speransa ei, sin e promesa ei, realmente nos no tin ningun speransa ètòl.

Den Su sermon riba e fin di mundu (lesa Mateo 24 i 25), Hesus a dediká e promé mitar di Su diskurso na detayá e nesesidat di skapa, asta El a yega na e punto di bisa ku "si e dianan ei no a ser hasí kòrtiku, ningun bida lo no a ser salba" (Mateo 24:22, NIV). Pero esaki ta mas un introdukshon di Su splikashon di e nifikashon di e promesanan akí di Dios. E enfoke solamente, òf asta prinsipalmente, riba e aspekto di "skapa" di e speransa kristian pa e futuro ta pa faya algun di e puntonan mas profundo ku Hesus tabata plantia.

Lesa Mateo 24 i 25. Kiko ta e puntonan di mas importante for di bo lesamentu di e sermon akí di Hesus? Kon lo bo a resumí e instrukshonnan di Hesus pa kon nos mester biba miéntras nos ta spera Su regreso?

Loke nos ta kere tokante e futuro tin implikashonnan importante pa kon nos ta biba awor. Un konfiansa saludabel riba e promesanan di Dios tokante Su futuro pa nos mundu mester ta e katalisadó pa kompromiso energétiko, e chispa pa un bida ku ta riku i profundo i ta hasi un diferensia na otronan.

E speransa kristian den e segundo binida di Hesus no ta trata solamente di wak padilanti na un futuro briante. Pa e promé Kristiannan, e resurekshon korporal di Hesus a duna e promesa di Su regreso un realidat sólido. Si E por a bin bèk for di morto, kua nan a presensiá pa nan mes, seguramente E lo a bin bèk pa kompletá e proyekto di kita piká i su efektonan i renobá e mundu (lesa 1 Kor. 15:22,23).

Pa apòstel Pablo, e resurekshon tabata e elemento klave di e speransa atvènt. E tabata prepará na riska e kredibilidat di tur loke e tabata prediká riba e milager kulminante akí den e storia di Hesus: "si Kristu no a ser resusitá, boso fe ta en bano" (1 Kor. 15:17, NIV). Pensa riba su palabranan aki i kon importante e resurekshon di Kristu ta pa tur loke nos ta spera riba dje.

Lesa 1 Korintionan 15:12-19. Kon lo bo a splika na un no-kreyente ku ta interesá dikon e bèrdat di e resurekshon ta asina fundamental pa e speransa kristian?

Siendo testigu di e Hesus resusitá a transformá e promé disipelnan. Manera nos a mira, anteriormente Hesus a manda nan bai pa anunsiá i establesé e reino di Dios (lesa Mat. 10:5-8), pero e morto di Hesus a destruí nan kurashi i a kibra nan speransa. Nan komishon mas despues (lesa Mateo 28:18-20), duná pa e Hesus resusitá i empoderá pa e binimentu di Spiritu Santu (lesa Echonan 2:1-4), a pone nan riba e kaminda di kambia e mundu i praktiká e reino ku Hesus a establesé.

Librá di e poder i miedu i morto, e promé kreyentenan a biba i kompartí yen di kurashi den nòmber di Hesus (lesa, por ehèmpel, 1 Kor. 15:30,31). E maldat ku ta trese morto ta e mesun maldat ku ta trese sufrimentu, inhustisia, pobresa, i opreshon den tur nan forma. Sinembargo, pa motibu di Hesus i Su viktoria riba morto, tur esakinan lo terminá un dia. "E último enemigu pa ser destruí ta morto" (1 Kor. 15:26, NIV).

Lesa Eklesiastés 8:14. Den ki formanan bo ta mira e realidat rígido i poderoso di loke tin skirbí aki?

Miéntras sufrimentu, opreshon, i tragedia ta sufisiente difísil pa soportá riba nan mes, e daño òf insulto ta ainda mas duru si e ta parse di ta sin sentido òf e ta sosodé sin bo ripará. E posibel banidat di tristesa ta mas pisá ku su karga inisial. Un mundu sin registro òf hustisia final ta e máksimo den krueldat apsurdo. No ta nada straño ku eskritornan ateista den siglo binti a lamentá tokante loke nan tabata kere tabata e "apsurdidat" di e kondishon humano. Sin speransa di hustisia, sin speransa di huisio, sin speransa di ku e kosnan lo ser drechá, di bèrdat nos mundu lo tabata un mundu apsurdo.

Pero e lamento di Eklesiastés 8:14 no ta final di e historia. Na final di su protestanan, Salomon ta dal un buèlta direpente. Meimei di su lamentonan tokante banidat, e ta bisa, básikamente: Warda un ratu, Dios ta bai husga, pues tur kos no ta banidat; de echo, awor tur kos i tur hende ta importá.

Lesa Eklesiastés 12:13, 14. Kiko esaki ta bisa nos tokante kon importante tur loke ku nos ta hasi aki ta?

E speransa di huisio ta baha na loke un hende ta kere tokante e naturalesa esensial di Dios, bida, i e mundu den kua nos ta biba. Manera nos a mira, Beibel ta insistí ku nos ta biba den un mundu ku Dios a krea i ta stima, pero un mundu ku a desviá i den kua Dios ta obrando den direkshon di Su plan pa kreashon di nobo, tur pa medio di e bida i morto di Hesus. E huisio di Dios ta un parti klave den Su ponementu di nos mundu na òrdu. Pa esnan ku ta risibí asina tantu di e maldatnan di mundu, esnan ku a ser marginalisá, maltratá, oprimí, i eksplotá, e promesa di huisio ta seguramente bon notisia.

Lesa Revelashon 21:1-5, 22:1-5 i pasa algun tempu trata imaginá kon bida lo ta manera e ta ser deskribí aki. Dikon ta difísil pa imaginá bida sin piká, morto, doló, i lágrima?

E deskripshonnan di Beibel di nos bida despues di piká ta indudablemente maravioso i glorioso i sin duda apénas ta representá loke ta spera nos. Asta den e versíkulonan akí, e deskripshonnan kasi ta bai mes tantu tokante loke lo no tin einan ku loke lo tin. Ora e mundu akí ta tur loke nos a konosé, e por ta difísil pa imaginá bida sin doló i sufrimentu, morto i miedu, inhustisia i pobresa.

No solamente no tin mas di e kosnan akí, sino e deskripshon aki ta añadí un toke personal: "E lo seka tur lágrima for di nan wowonan" (Rev. 21:4, NIV). Den e konteksto di esnan ku a ser salbá, Dios Su kompashon pa esnan ku a sufri a traves di historia di humanidat ta alkansá un klímaks den e solo frase akí. No solamente E ta trese un fin na nan sufrimentu, sino personalmente E ta seka nan lágrimanan.

Maltratá i marká pa un bida di piká i un mundu di inhustisia i tragedia, nos por mira den e buki di Revelashon indikashonnan di un proseso di kurashon pa nos tur ku tabata víktima di piká den hopi diferente forma. Deskribiendo e palu di bida, Juan ta splika ku "e blachinan di e palu ta pa kuramentu di e nashonnan" (Rev. 22:2, NIV). Un biaha mas, Dios ta demostrá Su komprondementu di, i kompashon pa, loke tabata nifiká pa ta humano, pa sinti, eksperensiá, testifiká, i asta partisipá den maldat di e mundu akí. Su plan pa krea nos mundu di nobo ta inkluí restourá i sana kada un di nos.

Te na e momentu ei, nos ta trata na ta tur loke nos por den Kristu, hasiendo nos parti, pa basilante i chikitu ku nos parti kisas por ta, pa ministrá na esnan rondó di nos ku tin mester di loke nos tin pa ofresé. Loke sea e ta, palabranan kariñoso, un kuminda kayente, yudansa médiko, tratamentu dental, paña, konseho, loke sea nos por hasi nos mester hasié ku e amor apnegá, ku ta nenga su mes, di sakrifisio propio ku Hesus a manifestá ora E tabata aki. Naturalmente, mundu ketu bai lo sigui bira pió, apesar di nos mihó esfuersonan. Hesus tabata sa esei; sinembargo, e bèrdat akí no a impidiE di ministrá na otronan, i e nos mester impedí nos tampoko.