Un Komunidat di Sirbidó

Nos a mira den e promé kapítulonan di Echonan kon e promé kreyentenan kristian a establesé un tipo di komunidat diferente, kuidando esnan den nesesidat meimei di nan, i huntu alkansá esnan pafó di e komunidat, ofresiendo nan yudansa kaminda tabatin mester i invitando nan pa uni ku loke Dios tabata hasiendo entre nan.

Ademas di e deskripshonnan di Hesus di salu i lus, Pablo ta usa un kantidat di metáfora pa ilustrá e akshon di iglesia den e mundu. Entre otro kosnan, e ta deskribí esnan ku ta biba komo pueblo di Dios komo un sakrifisio (lesa Rom. 12:1), kurpa di Kristu (lesa 1 Kor. 12:12-20), komo embahadornan (lesa 2 Kor. 5:18-20), i komo perfume (lesa 2 Kor. 2:14-16). Kada un di e imágennan akí ta papia tokante un ròl komo representante- òf agentenan di e reino di Dios asta awor, asta meimei di un mundu destruí dor di e gran konflikto.

Repasá kada un di e deskripshonnan "representativo" akiriba. Kua ta deskribí mihó kon lo bo ke representá Dios i Su kamindanan den bo komunidat, i dikon?

Kada un di e imágennan akí tin akshonnan asosiá ku nan, no komo un medio pa ser aseptabel pa Dios sino komo personanan ku ya a ser aseptá dor di Dios a traves di e sakrifisio di Kristu, kende a respondé na e amor i grasia di Dios dor di ta Su agentenan den un mundu heridá i muriendo.

Pero nan por ser konsiderá tambe riba un nivel ainda mas profundo: pasobra e amor i grasia di Dios ta loke e reino di Dios ta trata di dje, ora nos aktua den tal forma, reflehando na otronan den amor i grasia, nos ta establesé i bira partisipantenan den e reino eterno ei, asta awor.

Den lei internashonal, un embahada nashonal ta ser konsiderá parti di e nashon ku e ta representá, asta ora e ta físikamente situá den un pais strañero, kisas un distansia largu for e nashon di orígen. Di forma similar, e echo di pone den práktika e kamindanan di e reino di Dios ta ofresé bistanan rápido di e realidat eterno ei aworakí mes i, komo tal, ta apuntá i ta un antesala di e derota final di maldat. I ora nos hasi esei, komo embahadornan di Kristu, komo agentenan di Kristu, nos por eksperensia e realidat di Su amor i hustisia den nos mes bida, den iglesia, i den bida di esnan ku nos ta trata na sirbi.

Lesa 2 Korintionan 2:16. Kiko ta e diferensia entre e dos aromanan, i kon nos por sa kua di nan nos ta?

E definishon standart di e pueblo remanente identifiká den profesia di Beibel ta ser hañá den Revelashon 12:17: esnan ku "ta warda e mandamentunan di Dios i tin e testimonio di Hesukristu" (lesa tambe Rev. 14:12). Den e storia di Beibel, e karakterístikanan akí ta señalá e pueblo di Dios den e etapanan final di e historia di tera. Pero, tambe den e storianan di Beibel, nos por haña ehèmpelnan di kon un remanente asina ta aktua i partikularmente kon hendenan asina ta sirbi otronan.

E ehèmpel di Moises den e sentido aki ta alarmante. Lesa Eksodo 32:1-14. Kua ta e komparashon entre Moises den e storia akí i e remanente deskribí den Revelashon 12:17?

Den su rabia kontra e pueblo di Israel, Dios tabata menasá di destruí nan i transferí e promesanan duná na Abraham, ku su desendientenan lo a bira un gran nashon, na Moises i su famia (lesa Eks. 32:10).

Pero Moises no tabata ke esei. En kambio, Moises tabatin e kurashi di diskutí ku Dios, sugeriendo ku si Dios aktua manera E ta menasando pa aktua, lo a pon’E keda mal mirá (lesa Eks. 32:11-13). Pero despues Moises ta bai mas leu i ta riska urgi su kaso ku Dios.

Moises tabata lucha pa guia e pueblo aki dor di desierto. Nan tabata keha i diskutí kasi for di e momentu ku el a saka nan den libertat. I sinembargo, Moises ta bisa Dios, si Bo no ta kapas pa pordoná nan, "e ora ei kita mi for di e buki ku Bo a skirbi" (Eksodo 32:32, NIV). Moises ta ofresé di renunsiá eternidat pa salba esnan ku ken el a kompartí su biahe.

Ki un ehèmpel poderoso di interseshon apnegá na fabor di esnan ku no meres’é! I ki un símbolo poderoso di henter e plan di salbashon!

"Miéntras Moises tabata intersedé pa Israel, su timides a pèrdè den su interes profundo i amor pa esnan pa ken, den mannan di Dios, e tabata e medio pa hasi asina tantu. Señor a skucha su súplikanan, i a konsedé su orashon altruista. Dios a proba Su sirbidó; El a tèst su fieldat i su amor pa e pueblo ingrato i ku a faya, i ku noblesa Moises a soportá e prueba. Su interes den Israel no tabata bin di motibu egoista. E prosperidat di e pueblo skohí di Dios tabata mas kerí p’e ku honor personal, mas ku e privilegio di bira e tata di un nashon poderoso. Dios tabata komplasí ku su fieldat, su simplesa di kurason, i su integridat, i El a komprometé na dje, komo un wardadó di karné fiel, e gran responsabilidat di guia Israel na e Tera Primintí". - Ellen G. White, Patriarchs and Prophets, p. 319.

Diskushonnan di iglesia tin biaha ta parse di keda pegá riba e aparente nesesidat pa skohe entre un enfoke riba trabou sosial òf obra di evangelio, sea karidat òf testifikashon, sea hustisia òf evangelismo. Pero ora nos komprondé kada un di e konseptonan akí mihó i opservá e ministerio di Hesus, e diferensia ta kita, i nos ta realisá ku prediká e evangelio i traha pa yuda otronan ta konektá djaserka.

Den un di e sitanan di mas konosí di Ellen White, el a splik'é asin’aki: "E método di Kristu so lo duna éksito berdadero den alkansá e hendenan. E Salbador tabata meskla ku hende manera un ku tabata deseá nan bon. E tabata mustra Su simpatia pa nan, E tabata ministrá na nan nesesidatnan, i E tabata gana nan konfiansa. Despues E tabata pidi nan: ‘Sigui Mi’....

“Esnan pober mester ser aliviá, esnan malu mester ser kuidá, esnan ku ta sufri i esnan ku ta aflihí mester ser konsolá, esnan ignorante instruí, esnan sin eksperensia konsehá. Nos mester yora ku esnan ku ta yora, i regosihá ku esnan ku ta regosihá”. - Ellen G. White, The Ministry of Healing, p. 143.

Manera nos a mira, e dos akshonnan di reino akí, hustisia i evangelismo, tabata ligá djaserka, no solamente den e ministerio di Hesus sino den e promé mandato di Hesus na Su disipelnan: "Segun ku boso ta bai, proklamá e mensahe akí: 'E reino di shelu a yega serka'. Kura esnan malu, lanta esnan morto, limpia esnan ku tin lepra, saka demoño. Pòrnada boso a risibí; duna pòrnada" (Mat. 10:7,8, NIV). Den poko palabra, un di e mihó maneranan pa alkansá otronan ku nos mensahe ta di ministrá na nan nesesidatnan.

Lesa 1 Pedro 2:12 i Filipensenan 2:15. Kiko Pedro i Pablo ta bisa tokante e poder di testifikashon di bon obranan hasí dor di e pueblo di Dios?

Ku un komprondementu mas amplio di e bon nobo di Dios, evangelismo no tin sentido den ousensia di un pashon pa hende. Versíkulonan manera 1 Juan 3:16-18 i Santiago 2:16 ta enfatisá e kontradikshon den prediká e evangelio sin bib’é. Mihó bisá, evangelismo, hibando e bon nobo di speransa, reskate, arepentimentu, transformashon, i e amor di Dios ku ta abarká tur kos, ta un ekspreshon di hustisia.

Tantu evangelismo komo e deseo pa hustisia ta surgi for di rekonosé e amor di Dios pa hendenan pèrdí, kibrá i heridá, un amor ku ta krese tambe den nos kurason bou di e influensia di Dios den nos bida. Nos no ta skohe un akshon òf e otro; en kambio, nos ta traha ku Dios ora nos ta traha ku hende, ora nos ta supli nan nesesidatnan real, i ora nos ta usa e rekursonan ku Dios a konfia nos kuné.

Na kuminsamentu di e buki di Job, Dios ta mustra na Job i su fieldat na djE komo un demostrashon di e bondat di e kamindanan di Dios i Su trato ku humanidat kaí (lesa Job 1:8). Ta remarkabel ku Dios ta permití Su reputashon dependé di e kon Su pueblo ta biba nan bida riba e tera akí. Pero Pablo a ekspandé e fe aki ku Dios tin den algun di Su "santunan" pa inkluí e komunidat di e iglesia: "Su intenshon tabata ku awor, pa medio di e iglesia, e sabiduria múltiple di Dios por a ser hasí konosí na e gobernantenan i outoridatnan den e esferanan selestial" (Efe. 3:10, NIV).

Lesa Efesionan 2:19. Kiko bo ta pensa ta inkluí den e idea di deskribí e komunidat di iglesia komo e "famia" di Dios? Kon e deskripshon akí mester influensiá e forma ku e iglesia organisá ta operá?

Den kualke komunidat òf organisashon, e forma kon e entidat ta trata su miembronan ta reflehá e balornan fundamental di e grupo. Komo e kas di Dios, e kurpa di Kristu i e komunidat di e Spiritu, e iglesia tin e yamada di mas haltu pa praktiká i alkansá: "Pasobra Dios no ta un Dios di desórden sino di pas, manera den tur e kongregashonnan di e pueblo di Dios" (1 Kor. 14:33, NIV).

E balornan di hustisia, grasia i amor, manera a ser demostrá den e hustisia, grasia i amor di Dios, mester goberná tur loke ta pasa denter di e iglesia. For di komunidatnan di iglesia lokal te ku e organisashon mundial di iglesia, e prinsipionan akí mester guia lidernan di iglesia den e forma ku nan ta guia, tuma desishonnan, i preokupá nan mes pa "esnan di mas chikitu di esakinan" entre e komunidat di iglesia. Nan mester guia tambe e forma kon nos ta resolvé e disputanan ku lanta ratu ratu entre miembronan. Si nos no por trata esnan meimei di nos ku hustisia i dignidat, kon nos ta bai hasi esei ku otronan tambe?

Kaminda e organisashon di iglesia empleá hende, e mester ta un doño di trabou generoso, ku ta balorá hende promé ku kualkier otro konsiderashon i ta traha kontra trato inhustu di miembronan. Iglesianan mester ta lugánan seif, kaminda tur miembro di iglesia ta hasi loke nan por pa protehá esnan vulnerabel. I, manera nos ta mira den e iglesia primitivo, miembronan di e komunidat di iglesia mester ta spesialmente prepará pa duna pa sostené esnan di nan "famia" di iglesia ku ta sufri òf ta den nesesidat.

Hesus a duna esaki komo un mandato, bisando ku no solamente esaki lo a transformá e komunidat di fe, sino tambe lo el a demostrá e realidat di nan fe na esnan ku ta opservá: "Un mandamentu nobo Mi ta duna boso: Stima otro. Meskos ku Mi a stima boso, asina boso mester stima otro. Na esaki tur hende lo sa ku boso ta Mi disipelnan, si boso un stima otro" (Juan 13:34,35, NIV).

Asta ku e mihó motivashon- i intenshonnan, i keriendo ku nos ta na banda di Dios i bondat, traha pa Señor por ta difísil i desalentador. E tristesa i doló di nos mundu ta real. Esaki ta un rason pa kua nos tin mester di un komunidat di iglesia. Hesus a duna ehèmpel di e tipo di komunidat solidario akí ku Su disipelnan. Poko biaha El a manda un hende bai riba nan mes, i asta ora esei a sosodé nan tabata bin huntu pronto atrobe pa kompartí nan historianan i renobá nan energia i kurashi.

Lesa Hebreonan 10:23-25. Hebreonan 10:25 ta esun mihó konosí di e versíkulonan akí, pues kiko e dos versíkulonan anterior ta añadí na nos komprondementu di e versíkulo bon konosí? Kiko ta algun di formanan den kua nos por enkurashá otro "pa ku amor i bon obranan" (NIV)?

Den kasi kualke tarea, kousa, òf proyekto, un grupo di hende ku ta traha huntu por logra mas ku tur e hendenan ei trahando individualmente. Esaki ta kòrda nos atrobe di e kuadro di e iglesia komo e kurpa di Kristu (lesa Rom. 12:3-6), den kua nos tur tin ròlnan diferente pero komplementario pa hunga. Ora ku nos kada hasi loke nos ta hasi mihó, pero hasié na un forma ku ta permití nos influensianan pa traha huntu, nos por konfia pa medio di fe ku nos bida i obra lo hasi un diferensia pa eternidat.

Miéntras ku resultado ta importante ora nos ta trata na hasi loke ta korekto, e resultado ta tokante hende i nan bida, tin biaha nos mester konfia Dios ku loke e resultado kisas por ta. Tin biaha ora nos ta traha pa aliviá pobresa, pa protehá esnan vulnerabel, pa liberá esnan oprimí, i pa papia pa esnan sin bos, nos lo mira tiki progreso. Pero nos mester tin e speransa ku nos ta trahando den un kousa mucha mas grandi i inevitablemente viktorioso: "Laga nos no kansa di hasi bon, pasobra na e momentu apropiá nos lo kosechá un kosecha, si nos no entregá. P’esei, segun ku nos tin oportunidat, laga nos hasi bon na tur hende, spesialmente na esnan ku ta pertenesé na e famia di kreyentenan" (Gal. 6:9,10, NIV, lesa tambe Hebr. 13:16).

Ta e motibu akí nos ta ser yamá pa nos un enkurashá otro, literalmente, pa inspirá ku kurashi. Pa biba fielmente ta tantu dichoso komo difísil. Nos Dios di hustisia i nos komunidat di hustisia ta nos sostennan di mas grandi i loke nos ta invitá otronan pa uni.