E Yamada di Dios

Nos lo por bisa ku Esdras a ser skohé pa vários motibu:

1. e tabata dispuesto pa bai;
2. e tabata un lider; i
3. e tabata un eskriba i maestro ku abilidat.

Tin motibunan adishonal ku nos lo por haña tambe. Pero tin un versíkulo ku kisas ta demostrá mihó dikon Esdras a ser duná e tarea akí.

Kiko Esdras 7:10 ta bisa tokante Esdras? Kon Esdras lo por a “prepará” òf “dediká” su kurason pa buska “e lei di Señor” i hasié?

E palabra pa “prepará” òf “dediká” ta kun na hebreo. E palabra por ser tradusí komo “prepará, dediká, ta firme, establesé firmemente, ta stabil, òf sigur”. Por lo tantu, e berdadero nifikashon di e deklarashon akí parse ta nifiká ku Esdras a dediká su kurason firmemente òf a establesé den su kurason pa buska Dios.

Despues di a yega Yerusalèm, Esdras a duna ehèmpel di loke ta nifiká pa ta dediká na Dios, i el a siña e Palabra di Dios na Yerusalèm pa 13 aña. Por a pars’é ku e no tabata hasiendo niun diferensia durante e 13 añanan ei, pero despues, despues ku e murayanan tabata kla, e pueblo a yama un asamblea, no pasobra niun hende a fòrsa nan, sino pasobra nan tabata ke a hasié. E Palabra di Dios ku nan a bin ta tende di Esdras a kue rais.

Dikon Nehemias a ser skohé? Lesa Nehemias 1:1-11.

Nehemias tabata simpatisá ku Dios i e pueblo. E tabata preokupá ora el a haña sa ku e trabou na Yerusalèm a para. Nehemias tabatin un pashon pa e kousa, i meskos ku Esdras, el a ofresé su mes komo boluntario pa e trabou. Dios a kontestá nan orashon- i deseonan. Tin biaha nos ta haña e idea ku si nos ta stima algu e no mester ta di Dios, pasobra Dios lo duna nos solamente tareanan difísil ku kisas nos no ke hasi. Pero si nos ta kanando ku Dios, e deseonan pa hasi algu ku nos ta stima hopi biaha ta duná di Dios. Dios ke pa nos tin pashon pa loke nos ta hasi p’E.

Den e promé lès di e trimèster akí nos a studia kon Dios a yama Zorobabel (c. 538 P.K.) i Esdras (457 P.K.) pa ministerionan spesial. Den e di dos lès nos a konsiderá e yamada di Dios na Nehemias (444 P.K.). Nos mester realisá ku e yamadanan akí a ser efektuá den harmonia ku e konosementu adelantá di Dios. Por ehèmpel, Zorobabel a ser mové pa Dios pa hasi un tarea spesífiko den kontesta riba e fin di e 70 aña di koutiverio ku Jeremias a profetisá.

Den ki aña Esdras a ser yamá na ministerio? Tabata e mesun aña den kua Rei Artaherhes a emití un dekreto. Kon e aña ei ta signifikante den profesia? Buska Daniel 9:24-27.

Daniel 9:25 ta deklará ku “desde e salida di e mandato pa restourá i konstruí Yerusalèm te na Mesias e Prens, lo tin shete siman i sesentidos siman” (NKJV). E último siman di e profesia akí ta ser menshoná den versíkulo 27. Ya ku un siman ta kontené shete dia, asina un siman profétiko ta igualá 7 aña (Num. 14:34; Ezek. 4:5,6). Por lo tantu, e profesia akí ta papia tokante 70 siman, kua ta igualá 490 aña. E pregunta ku mester ser kontestá ta: Kiko ta e fecha inisial di e profesia di 70 siman? E tèkst ta deklará ku lo ta for di e momentu ku e dekreto ta ser duná pa restourá i konstruí Yerusalèm.

Tabatin un total di tres dekreto duná enkuanto di e restourashon di e pueblo hudiu. Siro, Darío, i Artaherhes tur a duna órdennan pa restourashonnan. Sinembargo, solamente esun di Artaherhes ta inkluí preokupashon pa e siudat di Yerusalèm mes, i solamente e dekreto akí ta asosiá ku alabá Dios pa Su intervenshon (Esdras 7:27,28).

Nos ta konta e komienso di e profesia di 70 siman for di aña 457 P.K., e di setenta aña di Rei Artaherhes I manera ta ser menshoná den Esdras 7:7-26. Ademas, pa motibu ku e aña 457 P.K. ta tambe e komienso di e profesia di 2300 dia di Daniel 8:14 (wak e estudio di mayan), e dekreto akí ta sirbi komo e punto di komienso pa e dos profesianan akí. E setenta aña ta terminá ku aña 34 D.K., kua ta ora e predikamentu di e evangelio a ser ekspandé i a bai tambe na e paganonan (marká pa e persekushon di e iglesia primitivo i e martirio di Esteban). E mitar di e siman lo tabata aña 31 D.K., kua ta ora Kristu a muri riba e krus.

E palabra “determiná” ku ta ser hañá den Daniel 9:24, “Setenta siman a ser determiná”, ta nifiká literalmente “Setenta siman a ser kòrtá kitá afó”. Aunke e palabra tradusí komo “determiná” no ta ser uzá niun otro kaminda den Beibel, e ta ser hañá den literatura hudiu, i e ta nifiká “kòrtá kitá afó” for di algu mas largu. Ya ku Daniel 8 ta presentá e profesia di 2300 aña, kua su punto di komienso no ta ser duná den Daniel 8, lógikamente e ta dedusí ku ora e siguiente kapítulo (Daniel 9) ta papia tokante 490 aña komo “determiná” òf “kòrtá kitá afó”, nan por ser “kòrtá kitá afó” solamente for di e 2300 aña profétiko ku ta ser menshoná den e kapítulo anterior. Despues di tur kos, di kiko otro e periodo akí lo por ser “kòrtá kitá afó” sino for di un otro profesia di tempu mas largu?

Lesa Daniel 8. Kiko tabata esun parti di e vishon duná ku no a ser spliká (lesa spesialmente Dan. 8:14, 26, 27)?

Tin hopi motibu dikon e profesia di 70 siman di Daniel 9:24-27 i e 2300 anochi- i maintanan di Daniel 8:14 ta pertenesé huntu:

1. tur dos ta profesia di tempu;
2. e terminologia spesífiko di “vishon” i “komprondementu” ta konektá nan (lesa Dan. 8:26,27 i 9:23);
3. tur dos interpretashon di e profesianan a ser duná dor di Gabriel (lesa Dan. 8:16 i 9:21);
4. e úniko parti di e vishon ku no a ser spliká den Daniel 8 tabata e vishon tokante e 2300 anochi- i maintanan (tin biaha tradusí komo “dia”) den Daniel 8:14;
5. Daniel 8 ta kontené e vishon i despues un interpretashon parsial di dje, miéntras Daniel 9 tin un interpretashon so, den e kaso akí e interpretashon di e úniko parti di Daniel 8 ku no a ser interpretá, kua tabata e profesia di e 2300 dia di Daniel 8:14, esun parti di e vishon ku Daniel no a komprondé (lesa Dan. 8:27).

E informashon duná na nos den Esdras ta yena e pidanan ku falta di e predikshonnan di e profesia den e buki di Daniel, es desir, ki ora kuminsá konta e tempu profétiko respekto aspektonan krusial di e ministerio i obra di Kristu na nos fabor.

Tin hopi papiamentu tokante ku Dios ta eligí nos òf ta skohe nos pa hasi algu. Hopi hende tin diferente idea riba kiko e elekshon ei ta nifiká. Kiko Beibel ta bisa tokante nos elekshon?

Lesa Romanonan 8:28, 29. Na kiko Dios ta yama nos? Pa kiko E ta skohe nos?

E pasashi ta deklará spesífikamente ku Dios a predestiná sernan humano pa ta konforme e imágen di Su Yu. E no ta bisando ku Dios ta predestiná nos sea pa ser salbá òf pa ser kondená, i ku nos no tin eskoho den e asuntu. Den otro palabra, e elekshon ta pa e propósito di nos transformashon. Nos mester ser kambiá pa reflehá e Yu di Dios. E transformashon akí ta ser primintí despues den e siguiente versíkulo (Rom. 8:30), den kua Pablo, e outor, ta deklará ku esnan ku Dios ta yama E ta hustifiká (hasi nos hustu) i glorifiká (santifiká) tambe. Por lo tantu, nos no ta ser lagá pa transformá nos mes,sino mas bien, Dios ta primintí di logra e transformashon akí pa medio di Su poder.

Lesa Romanonan 9. Ki tipo di elekshon òf yamada di Dios ta ser deskribí den e kapítulo akí?

Den Romanonan 9 Pablo ta diskutí e elekshon di Dios pa un tarea spesífiko. E Israelitanan a ser skohé pa hiba e bon notisia tokante Dios na e mundu. E frase “Jacob Mi a stima, ma Esau mi a odia” (Rom. 9:13, NKJV) normalmente ta ser mal komprondé komo nifikando ku Dios a stima solamente un di e rumannan hòmber. Sinembargo, den konteksto di e pasashi akí, Pablo ta bisando ku Jacob a ser skohé pero Esau no. Pa kiko Jacob a ser skohé? Pa ta tata di e nashon israelita. Por lo tantu, tin dos tipo di elekshon/skohementu ku Dios ta hasi. Di promé, Dios ta skohe kada un di nos pa salbashon i ke pa nos ser transformá den e imágen di Hesus. Di dos, Dios ta skohe diferente hende pa tareanan spesífiko.

Si nos ser yamá dor di Dios, ainda nos tin eskoho liber pa aseptá òf rechasá e yamada ei, meskos ku nos tin eskoho liber pa aseptá òf rechasá e salbashon ku E ta ofresé nos tur. E por pone nos den un posishon partikular, pero nos por skohe pa no sigui Su mandatonan. Sí, E ke pa nos hasi kosnan spesífiko p’E, meskos ku E ta yama nos pa bira manera djE. E elekshon di Dios pa un tarea spesífiko ta parti di Su plan pa nos salbashon. Ora nos hasi loke E ta yama nos pa hasi, nos ta revelá den nos bida e realidat di e salbashon ku E ta duna nos.

Rei Saul a ser duná e posishon di rei. Desafortunadamente, Saul nunka a duna su kurason totalmente na Dios, apesar di e tarea ku el a ser duná. Djis pasobra un hende ser yamá dor di Dios pa hasi algu spesial p’E no ta nifiká ku e persona akí lo aseptá Dios. Nos boluntat liber ta permanesé e faktor determinante, i si nos no sigui e guiansa di Dios, nos por pèrdè tur kos.

Lesa Eksodo 3 i 4. Kiko esaki ta siña nos tokante loke ta sosodé ora Señor yama un hende pa un tarea?

Nos kontesta por ta manera esun di Esdras i di Nehemias, ku a bai sin kuestioná, òf nos por ta manera Moises, ku tabatin opheshon- i èksküsnan. Moises a bai al final, pero no sin purba libra di dje. El a oponé, bisando ku e no tabata sufisiente bon, un hende ku no ta bal nada, i e no tabatin un posishon importante. Pues, kon Fárao posiblemente por a skuch’é? Tambe e tabata preokupá ku e pueblo hudiu lo no a ker’é òf skuch’é, i e trabou lo tabata en vano. Ademas, el a keha ku e no tabata kualifiká, “Mi no por papia lihé i mi lenga ta pisá” (Eks. 4:10, NKJV), i no tabatin e abilidatnan nesesario. Por último, direktamente el a pidi Dios pa manda un otro hende. I sí, ora nos lesa e storia di Moises, nos ta haña sa ki un lider poderoso, aunke imperfekto, Moises a bira. E tabata un hende ku fielmente a hasi e tarea ku Señor a yam’é pa hasi.