Violando e Spiritu di e Lei

Lesa Nehemias 5:1-5. Kiko ta pasando aki? Kontra kiko e pueblo ta sklamando

E komunidat hudiu parse ta uní bou di liderazgo di Nehemias kontra e preshonnan eksterno. Pero no ta tur kos ta bon denter di e nashon ku ta enfrentá persekushon i ta defendé su mes di atakenan strañero. Apesar di e aparensia eksterno di duresa i esfuersonan uní kontra e enemigu, e komunidat ta kibrá di paden. E lidernan i esnan riku tabata uza esnan pober i esnan desampará pa nan propio ganashi, i e situashon a bira asina malu ku e famianan ta sklamando pa alivio. Algun famia tabata bisa ku nan no tabatin kuminda pa alimentá nan yunan; algun tabata sklama ku pa motibu di un hamber nan a hipoteká nan propiedat i awor no tabatin nada; otro famianan tabata keha ku nan mester a fia plaka pa e impuesto persa i asta nan yunan tabata esklabo.

Ta parse ku e kulpabel prinsipal di e problema tabata un hamber i pagonan di impuesto ku a kousa e famianan mas pober pa buska yudansa di nan bisiñanan. E gobièrnu persa tabata rekerí un impuesto di 350 talento di plata anualmente di e provinsia di Juda (mira nota riba Neh. 5:1-5 den e Andrews Study Bible, p. 598). Si un persona no por a paga e porshon designá di e impuesto obligatorio, e famia generalmente lo a hipoteká nan propiedat òf fia sèn promé. Si, sinembargo, nan no por a haña e sèn e siguiente aña, e ora ei nan mester a hasi algu ku e debe ku nan tabatin awor. Generalmente sklabitut di debe tabata e siguiente opshon. Ya nan a pèrdè nan tera, i awor nan mester a manda un hende di e famia, generalmente muchanan, pa ta den servisio di e kreditor pa asina traha i paga e debe.

Tin momentunan den bida ora nos ta haña nos mes den problema pa motibu di e konsekuensianan di nos propio akshonnan; naturalmente, tin momentunan tambe ora nos ta terminá malu òf den pèrtá finansiero debí na falta ku no ta di nos mes. E storia akiriba ta relatá un momentu ora strategianan gubernamental tabata perhudiká e pueblo, i hiba na pobresa intensifiká. Nan tabata ser atrapá den e spiral di pobresa profundo, sin salida.

Lesa Nehemias 5:6-8 (lesa tambe Eks. 21:2-7). Dikon Nehemias ta reakshoná ku rabia?

Aunke kon difísil ta pa nos kapta awe, sklabitut tabata un norma kultural den e mundu antiguo. Un mayor por a sea bira un esklabo e mes òf bende un yu. Sosialmente i legalmente, e mayornan tabatin derechi di bende nan yunan hòmber i muhé. Sinembargo, ya ku Dios ta trata totalmente di duna libertat, El a regulá e práktika na Israel dor di rekerí di e kreditornan pa liberá nan esklabonan kada shete aña. Asina Dios a protehá hende di bira esklabonan permanente i a demostrá Su deseo pa hende biba den libertat.

Aunke fiamentu tabata permití pa lei, kobramentu di interes no tabata permití (pa regulashonnan bíbliko kontra ekstorshon, lesa Eks. 22:25-27; Lev. 25:36,37; Deut. 23:19,20). I tòg, e interes ku e prestamistanan tabata kobra tabata chikitu kompará ku loke e nashonnan rondó di nan tabata kobra. Nan tabata ser pidí pa paga un porshento kada luna. Tekstonan mesopotámiko di siglo 7 ta mustra interes di 50 porshento pa plata i 100 porshento pa grano anualmente. Por lo tantu, e 12 porshento interes pa aña tabata abou kompará ku e práktika di e paisnan na Mesopotamia. Pero en general, di akuerdo ku e Palabra di Dios, e úniko kos ku e prestamistanan tabata hasi robes tabata pa kobra interes (Neh. 5:10), i ta interesante pa bisa ku e pueblo ni sikiera a menshoná esei den nan keho. Tur sobrá kos tabata denter di e norma sosial komo tambe denter di e provishonnan di e lei. Anto dikon Nehemias tabata “hopi rabiá”? Ta remarkabel ku e no a aktua mesora, sino a pensa serio riba e asuntu.

E echo ku Nehemias ta trata ku e problema di forma asina desisivo ta hopi atmirabel. E no ta pasa un keho por alto djis pasobra e no ta kibra e lei téknikamente òf ta sosialmente aseptabel, asta “bon” kompará ku e práktikanan di e region. Tabata e spiritu di e lei ku a ser kibrá den e situashon akí. Spesialmente durante un tempu di difikultat ekonómiko, tabata deber di e pueblo pa yuda otro. Dios ta na bando di esnan oprimí i esnan den nesesidat, i E mester a enkargá profetanan pa papia kontra e maldatnan i violensia kometé kontra esnan pober.

Aparentemente e reproche na e nobelnan i e gobernantenan, “kada un di boso ta demandando interes haltu for di su ruman” (Neh. 5:7, NKJV), no a trese e resultadonan deseá. Asina, Nehemias no a stòp einan sino a sigui bringa pa esnan oprimí meimei di nan. E por a djis bisa ku el a trata na siña e nobel- i gobernantenan ma e no a funshoná, i asina el a ser fòrsá pa laga e asuntu kai. Despues di tur kos, esakinan tabata esnan riku i poderoso di e tera ku e lo tabata bai kontra dje. Pero e no tabata satisfecho te ora un solushon pa e problema a ser implementá, asta si el a krea enemigunan poderoso den e proseso.

Lesa Nehemias 5:7-12. Kiko ta e argumentonan di Nehemias kontra loke ta pasando? Kiko e ta uza pa persuadí e pueblo pa drecha e eror?

Nehemias ta yama un gran asamblea, henter e pueblo di Israel a ser tresé huntu pa trata ku e asuntu akí. Mas probablemente e ta kontando riba e posibilidat ku ora henter e pueblo ta presente, e lidernan lo tin bèrgwensa, kisas asta tin miedu di sigui ku nan opreshon.

E argumento inisial di Nehemias ta sentrá riba sklabitut. Hopi di e Hudiunan, mas probablemente Nehemias inkluí, a kumpra libertat pa otro Hudiunan den servidumbre na strañeronan. Awor, e ta puntra e nobelnan i e gobernantenan si nan ta haña aseptabel pa kumpra i bende nan propio hendenan.Tin sentido pa e Israelitanan kumpra Hudiunan i duna nan libertat solamente pa nan terminá komo esklabonan di nan propio pueblo?

E lidernan no ta ofresé ningun kontesta pasobra nan ta mira ku e argumento akí ta rasonabel; p’esei Nehemias ta sigui. E ta puntra nan: “Boso no mester kana den e temor di nos Dios pa prevení e reprochenan di e nashonnan nos enemigunan?” (Neh. 5:9, ESV). E ora ei, Nehemias ta atmití ku e mes a yega di fia hende plaka i grano. Dor di deklará “laga nos stòp di kobra interes” (Neh. 5:10, NIV), el a afirmá e lei ku tabata prohibí e práktika akí ku rumannan Hebreo i a demostrá ku bou di su kargo di gobernadó, e lo a gusta pa hende ta atento pa ku otro. Inkreiblemente, e kontesta ta unánime. E lidernan a bai di akuerdo pa restourá tur kos na e pueblo.

Lesa Nehemias 5:12,13. Dikon Nehemias ta pronunsiá un maldishon kontra esnan ku no kumpli ku nan parti di e akuerdo?

Apesar ku e lidernan a bai di akuerdo pa restourá i debolbé loke nan a konfiská, Nehemias no ta satisfecho ku mero palabra. E tin mester di prueba sólido; p'esei, e ta pone nan hura dilanti di e saserdotenan. E akshon akí tambe a duna e prosedimentu balides legal den kaso ku e mester referí na e akuerdo mas despues.

Pero dikon e ta pronunsiá un maldishon? Nehemias ta realisá un akto simbóliko di kohe su mantel manera ku e tin algu den dje i despues ta sagudié komo un señal di pèrd’é. Asina, esnan ku lo a bai kontra e huramentu akí lo a pèrdè tur kos. Tabata kustumber pa pronunsiá maldishonnan pa asina impreshoná otronan e nifikashon di sierto lei òf regla. Tabata tambe ménos probabel ku e pueblo ta bai kontra e lei ora un maldishon tabata asosiá ku su kibramentu. Aparentemente Nehemias a sinti ku esaki tabata un asuntu asina importante ku e mester a hasi algu drástiko pa oumentá e posibilidat di su éksito.

Kiko e siguiente tèkstnan den Tèstamènt Bieu ta siña nos tokante e santidat di huramentunan pa e pueblo aki? (Num. 30:2; Deut. 23:21-23; Ekl. 5:4,5; Lev. 19:12; Gen. 26:31).

Al final, abla ta un don poderoso ku Dios a duna sernan humano; e ta eksistí komo algu radikalmente diferente for di loke animalnan tin. I tin poder den nos palabranan, poder asta di bida i morto. P’esei nos mester ta masha kuidadoso den loke nos ta bisa, den loke nos ta primintí pa hasi, i den ki kompromiso verbal nos ta hasi. Ta importante tambe ku nos echonan ta kuadra ku nos palabranan. Kuantu hende a bira lomba pa Kristianismo dor di esnan ku nan palabranan ta zona kristian pero nan akshonnan ta tur kos ménos esei?

Lesa Nehemias 5:14-19. Ki motibunan Nehemias ta duna pa no demandá “e provishonnan [salario] di e gobernadó" (Neh. 5:18, NKJV), di e pueblo?

Nehemias mas probablemente a skirbi e relato den e versíkulonan akí despues di su regreso na korte di Rei Artaherhes, despues di su 12 aña di gobernashon na Juda. Ounke gobernadónan tabatin derechi di risibí ingreso for di nan súpditonan, Nehemias nunka a reklamá e derechi akí, sino mas bien a finansiá su propio manera di biba. No solamente e tabata paga su mes gastunan, sino tambe e tabata proveé pa su famia komo tambe pa henter e korte. Zorobabel, e promé gobernadó, ta e úniko otro gobernadó ku nos sa su nòmber. Ora Nehemias ta bisa “e gobernadónan anterior”, probablemente e ta refiriendo na e gobernadónan entre Zorobabel i e mes. Komo resultado, pa tempu ku el a terminá su tempu di servisio, probablemente el a pèrdè plaka. Mas bien ku atkerí rikesa, manera hende lo a ferwagt di un posishon prestigioso, probablemente el a pèrdè rikesa i poseshon. Nehemias tabata riku, kua ta motibu dikon e por a proveé e alimento diario pa hopi hende, i e tabata generoso den supli hopi na otronan (Neh. 5:17,18).

Ounke no tabata mesun kos ku loke Abraham a hasi despues di e reskate di esnan ku a ser tumá koutivo dor di algun di e nashonnan alrededor (lesa Génesis 14), loke Nehemias ta hasi aki sinembargo ta revelá e mesun prinsipio krusial.

Lesa Nehemias 5:19. Kiko e ta bisando aki, i kon nos ta komprondé esaki den términonan di e evangelio?

Loke nos ta mira ku Nehemias ta un ehèmpel di un hende ku a pone Señor i e obra di Señor dilanti di su propio ganashi i bentaha personal. E ta un bon lès pa nos tur, no importá nos situashon partikular. Ta fásil pa traha pa Señor ora e no ta kosta nos hopi.