Nos Dios Pordonadó

Lesa Nehemias 9:1-3. Dikon e pueblo tabata separá nan mes for di tur strañero?

Aunke Nehemias tabata ansioso pa sigurá ku e pueblo tabata asosiá e okashon aki ku goso, awor el a hiba e asamblea na yuna.Nan a humiá nan mes dilanti di Dios i a tira tera riba nan kabes, segun ku nan tabata bisti paña di saku di pita. Pasobra e strañeronan no tabatin parti den e piká kolektivo di e pueblo di Israel, e Israelitanan a separá nan mes for di nan, ya ku e Hebreonan tabata sa ku tabata nan pikánan ku mester a ser pordoná. Nan a rekonosé e pikánan di nan nashon, kua a hiba den eksilio.

Nan orashon i konfeshon kolektivo a demostrá un komprendementu profundo di e naturalesa di piká. E Israelitanan por tabata rabiá ku nan predesesornan a daña kos i a hiba henter e nashon den eksilio. Òf nan por a pasa tempu kehando tokante e eskohonan di nan lidernan i e falta di piedat desplegá dor di e generashonnan anterior, kua a hiba nan te kaminda nan tabata awor aki, djis un grupo chikitu di esnan ku a repatriá. Sinembargo, na lugá di keda karga odio i tristesa, nan a bira bèk na Dios den humildat i konfeshon.

Nehemias 9:3 ta informá ku e pueblo a lesa for di e Buki di Lei pa un kuart parti di dia, i pa un otro kuart nan a konfesá piká i a adorá Dios. Esaki ta e di tres lektura di e Torá. Lesa e Torá ta fundamental pa konfeshon, kua mester ta basá riba e bèrdat, kua ta bin di Dios. Pa medio di nos lesamentu di Beibel, Dios ta hala serka nos, i Spiritu Santu por papia ku nos i siña nos. E bèrdat di Su Palabra ta moldia nos pensamentu i komprendementu, ta kurashá i ta elevá nos. E Israelitanan tambe a lamentá i a yora, pasobra pasando tempu den e presensia santu di Dios ta hasi nos konsiente di Su bunitesa i bondat miéntras e ta impreshoná riba nos kon asombroso ta ku e Kreador di universo ta skohe pa ta ku nos, apesar di nos indignidat. Por lo tantu, nos ta realisá ku sin Dios den nos bida, nos no ta diferente for di niun di nos antepasadonan spiritual den fe. Solamente ku Dios obrando den nos, nos por ta e persona ku nos mester ta.

E reakshon di e pueblo riba e lesamentu di Beibel tabata un orashon largu ku a bolbe konta e bondat di Dios den kontraste ku e historia di e infidelidat di Israel. Por opservá ku e kontesta tabata mas manera un sermon ku un orashon, pasobra kasi tur versíkulo tin un paralelo un kaminda den Beibel.

Lesa Nehemias 9:4-8. Kiko ta e tópikonan prinsipal ku e orashon a enfoká riba dje den e versíkulonan inisial akí, i dikon?

Den e promé parti di e orashon, e pueblo ta bendishoná Dios, i spesífikamente Su nòmber. Den e kultura hebreo, un nòmber no ta solamente loke hende ta yama un persona, sino e tabata duna un persona su identidat. Pues, alabansa di e nòmber di Dios ta signifikante pasobra e ta demostrá na e mundu ku esaki ta un nòmber digno di alabansa i honor. Esaki ta e nòmber di e Kreador di Universo. E orashon ta kuminsá ku adorashon na Dios komo e Kreador i komo Esun ku ta "preservá" tur kos (Neh. 9:6, lesa tambe Kol. 1:16,17). E palabra "preservá" ta bin for di un verbo hebreo ku ta nifiká pa "mantené bibu".

Esun ku a krea tur kos ta Esun ku a skohe Abraham, un ser humano, ku di ningun manera tabata spesial sino ku "su kurason" tabata "fiel". Abraham por parse di tabata falta fe na hopi okashon, pero ora el a ser bisá pa entregá su yu hòmber, e no a duda (lesa Génesis 22) El a siña pa ta fiel, no di un dia pa otro, sino durante su kaminata largu ku Dios. Den pensamentu hebreo, e "kurason" ta referí na e mente. Ku otro palabra, Abraham a desaroyá fieldat den pensamentu i akshon i a ser rekonosé pa esei dor di Dios.

E promé frasenan di e orashon ta focus riba Dios komo

1. Kreador,
2. Konservadó, i
3. Wardadó di Promesa.

E pueblo primeramente ta rekordá nan mes di ken Dios ta: E ta e Esun fiel kende a krea nos, ta preservá nos, i semper ta warda Su promesanan na nos. Teniendo esei den mente ta yuda nos pa mantené nos propio bida den perspektiva i pa siña konfi’E asta den e situashonnan di mas difísil, ora ku lo por a parse ku E ta leu for di nos i no ta preokupá ku nos desafionan.

Lesa 9:9-22. Kon e parti akí di e orashon ta diferensiá di e promé parti?

E orashon ta pasa di alabá Dios pa Su fieldat na relatá e kontraste di infidelidat di e Israelitanan den nan eksperensianan na Egipto i den desierto. E ta deliniá tur e diferente kosnan ku Dios a duna e Israelitanan; pero desafortunadamente, e reakshon di e "tatanan" riba e regalonan ei tabata orguyo, terkedat, i despresio di e aktonan di grasia di Dios meimei di nan.

Rekonosimentu di frakaso humano i falta di berdadero deboshon na Dios ta un paso importante den konfeshon i arepentimentu. I apesar ku e tèkstnan akí ta papiando tokante hendenan separá di nos hopi tempu pasá, niun hende por nenga ku kada un di nos tin un problema ku e mesun asuntunan akí.

Naturalmente, ta aki ta kaminda e evangelio ta intervení tantu pa nos komo pa nan. Konfeshon di nos pikánan no ta salba nos; solamente e sakrifisio di Kristu na nos fabor ta hasi esei. Konfeshon, huntu ku arepentimentu, ta sentral na nos propio rekonosementu ku nos mester ser hustifiká dor di Kristu so. "Ora ku pa medio di arepentimentu i fe nos aseptá Kristu komo nos Salbador, Señor ta pordoná nos pikánan, i ta remití e pago preskribí pa transgreshon di e lei. E pekador e ora ei ta para dilanti di Dios komo un persona hustu; e ta gosa di fabor di Shelu, i a traves di e Spiritu e tin kompañerismo ku e Tata i e Yu". - Ellen G. White, Selected Messages, tomo 3, p. 191.

Na mes momentu, pa motibu ku Su bondat ta pone nos konfesá nos pikánan i repentí di nan, nos mester ta determiná, pa medio di e poder di Dios, pa bandoná nan tambe.

E resultado final ta ku Israel tabata tèrko, i Dios tabata amoroso. Mirando bèk na loke Dios a hasi pa e nashon israelita a kòrda e pueblo ku pasobra Dios a hasi asina tantu pa nan den pasado, E lo a sigui kuida nan den presente i den futuro. Ta p’esei tabata asina importante pa e pueblo kòrda semper kon Dios a aktua den nan historia. Ora nan a lubidá, esei tabata ora nan a haña nan den problema.

Lesa Nehemias 9:23-31. Kon e Israelitanan ta ser deskribí den komparashon ku e "gran bondat" di Dios (Neh. 9:25)?

E siguiente sekshon di orashon/sermon ta focus riba bida den Kánaan ora e Israelitanan a poseé e tera ku Dios a duna nan. Nan a ser duná tera, siudatnan, kunukunan di wendrùif, i kamponan kla pa uza, pero nan a konsider’é komo natural. Na final di versíkulo 25, nos ta ser bisá ku "nan a kome i tabata yená i a bira gordo" (NKJV). Bira gordo ta un ekspreshon ku ta ser hañá solamente algun biaha den Beibel (Deut. 32:15 i Jer. 5:28), i kada biaha e tabatin un konotashon negativo.

E pueblo kisas por a "deleitá nan mes den Bo gran bondat" (NKJV) pero esun di nan no tabata un delisia den Dios sino, en kambio, den tur loke nan tabatin. Aparentemente tin tur kos no ta produsí un komunion djaserka ku Dios. Hopi biaha nos ta pensa: "Si solamente mi tabatin esaki òf esaya, e ora ei lo mi tabata felis". Desafortunadamente, nos ta mira ku e Israelitanan a haña tur kos serka Dios, i tòg nan "felisidat" den e kosnan ei solamente a hasi nan ménos dediká na Dios. Demasiado biaha ta muchu fásil pa nos focus riba e donnan miéntras nos ta lubidá riba e Dunadó. Esaki ta un engaño fatal.

Naturalmente, esaki no ta nifiká ku nos no por ta kontentu pa e kosnan ku Dios a duna nos. E ta deseá pa nos regosihá den Su donnan, pero e goso akí den e kosnan ku E ta duna no ta garantisá un relashon ku Dios. De echo, si nos no ta kuidadoso, e kosnan akí por bira un piedra di trompeká.

Sinembargo, den e kapítulo aki, e lidernan awor a konfesá e manera ku nan tabata infiel na Dios. Ora nan tabata repasá nan historia, nan a menshoná spesífikamente transgreshonnan ku nan a kometé komo nashon. Algun aspekto ta destaká komo spesialmente importante, pasobra nan a ser ripití:

1. Israel a bandoná lei di Dios, i
2. nan a persiguí e profetanan.

Ku otro palabra, nan a realisá ku e lei di Dios i Su profetanan tabata esensial pa nan desaroyo komo un nashon deboto i komo individualnan. E orashon ta enfatisá e konklushon akí dor di deklará ku "si e hende hasi" e mandamentunan di Dios, "e lo biba pa medio di nan" (Neh. 9:29, NKJV; un sita direkto for di Lev. 18:5) i dor di suprayá ku ta e Spiritu ta esun ku a papia a traves di e profetanan. Dios a duna nos Su mandamentunan pa un bida abundante, i El a manda Su profetanan pa guia nos den nos komprendementu di Su bèrdat. Kiko nos ta hasi ku e donnan akí ta e pregunta esensial pa nos tur.

Lesa Nehemias 9:32-38. Kiko ta e enfoke di e konklushon di orashon di konfeshon?

Un biaha mas e orashon ta bira na alabá Dios pa kende E ta: grandi, poderoso, i temibel, esun ku ta warda e pakto i miserikòrdia. Nan ta parse sinsero den nan rekonosementu di e bondat di Dios pa nan.

Tambe nan ta trese un petishon den forma di hasi un pakto ku Dios, kua ta ser deskribí den detaye den kapítulo 10. Kiko ta nan petishon?

"P’esei awor, nos Dios, e Dios grandi, poderoso i temibel, Kende ta warda pakto i miserikòrdia: no laga tur e problema ku a bin riba nos parse chikitu Bo dilanti " (Neh. 9:32, NKJV).

E komunidat mester paga tributo na e reinan ku ta riba nan. Opreshon for di tur banda ta asotando e grupo chikitu di Israelitanan, i nan ta kansá di esei. Nan mester a soportá un tirania tras di otro, i nan ta sperando riba un alivio.

Interesante ta, ku nan ta yama nan mes “sirbidónan”. Despues di deliniá e infidelidat di nan nashon, nan ta terminá refiriendo na nan mes ku e palabra ei. Sirbidónan, naturalmente, ta obedesé esnan ku ta riba nan. E uso di e término akí, anto, ta impliká ku nan ta realisá nan nesesidat di obedesé Señor den formanan ku esnan ku a bin promé ku nan no a hasi. Esaki ta un ekspreshon di nan deseo pa ta fiel na Señor i Su mandamentunan. I, komo sirbidónan di Dios, nan ta pidiendo E pa intervení na nan fabor.

E komunidat di Esdras i Nehemias ta deskribí nan eksperensia aktual komo ta "den gran angustia" (Neh. 9:37), kua por ser kompará ku e aflikshon ku e Israelitanan a eksperensiá na Egipto (Neh. 9:9). Nan orashon ta alabá Dios pa a mira nan aflikshon na Egipto i no pas’é por alto. Awor e komunidat ta pidiendo Dios pa intervení meskos ku El a hasi den pasado, aunke nan no meres’é, pasobra niun hende, rei-, prens-, saserdote- òf profetanan, òf tatanan, tabata fiel. Pues, nan ta dependé solamente riba e grasia i miserikòrdia di Dios pa nan, i no riba nan mes òf den e obranan di nan antepasadonan, ku e speransa ku Señor lo intervení na nan fabor.