Di Orguyo pa Humildat

Lesa Daniel 4:1-33. Kiko ta pasa ku e rei, i dikon?

Dios ta duna Nabukodonosor un di dos soño. E biaha aki, e rei no ta lubidá e soño. Pero pasobra e ekspertonan babilóniko ta bolbe faya, e rei ta konvoká Daniel pa proveé e interpretashon di e soño. Den e soño e rei ta mira un palu grandi ku ta elevá te na shelu i un ser selestial ta ordená pa e palu ser kòrtá. Solamente e tronkon i raisnan lo a keda den tera i lo a ser muhá ku e serena di shelu. Pero loke mester a preokupá Nabukodonosor tabata e parti di e soño den kua e ser selestial a bisa: “Laga su kurason ser kambiá for di esun di un hende, lag’é ser duná e kurason di un bestia, i laga shete tempu pasa riba dje” (Dan. 4:16, NKJV). Rekonosiendo e seriedat di e soño, Daniel ta ekspresá di forma kortes e deseo ku e soño lo a referí na e enemigunan di e rei. Sinembargo, fiel na e mensahe transmití dor di e soño, Daniel ta bisa ku de echo e soño ta referí na e rei mes.

Palunan generalmente ta ser uzá den Beibel komo símbolonan di reinan, nashonnan, i imperionan (Ezekiel 17; 31; Oseas 14; Zak. 11:1,2; Lukas 23:31). Asina, e palu grandi ta un representashon apropiá di un rei arogante. Dios ta duna Nabukodonosor dominio i poder; sinembargo, persistentemente e ta faya di rekonosé ku tur loke e ta poseé ta bin di Dios.

Konsentrá riba Daniel 4:30. Kiko e rei ta bisa ku ta mustra ku ainda e no ta kapta e spièrtamentu ku Señor a dun’é?

Kisas loke ta asina peligroso tokante orguyo ta ku e por hiba nos na lubidá kon dependiente nos ta riba Dios pa tur kos. I unabes nos lubidá esei, nos ta riba tereno spiritual peligroso.

Lesa Daniel 4:27. Ademas di e spièrtamentu tokante kiko lo sosodé, kiko Daniel ta bisa e rei pa hasi, i dikon? (Lesa tambe Prov. 14:31).

Daniel no solamente ta interpretá e soño, e ta indiká Nabukodonosor tambe un manera di sali for di su situashon: “P’esei, o rei, laga mi konseho ta aseptabel pa bo; kibra ku bo pikánan dor di ta hustu, i bo inikidatnan dor di mustra miserikòrdia na esnan pober. Kisas por tin un prolongashon di bo prosperidat” (Dan. 4:27, NKJV).

Nabukodonosor ta realisá un trabou masivo di konstrukshon na Babilonia. E hardinnan, un sistema di kanal, i sentenar di tèmpelnan i otro proyektonan di konstrukshon ta kombertí e siudat den un di e maravianan di e mundu antiguo. Pero un splendor i bunitesa asina, a lo ménos pa un parti, ta ser lográ pa medio di eksplotashon di man di obra esklabo i negligensia di esnan pober. Ademas, e rikesa di e imperio ta ser uzá pa gratifiká e plasernan di e rei i su elenko. Por lo tantu, e orguyo di Nabukodonosor no solamente ta strob’é di rekonosé Dios, ma komo konsekuensia ta hasié tambe aheno na e difikultatnan di esnan den nesesidat. Mirando e kuido spesial ku Dios ta mustra pa esnan pober, no ta sorprendente ku di e otro posibel pikánan ku Daniel por a resaltá dilanti di e rei, e ta menshoná e piká di negligensia di esnan pober.

E mensahe na Nabukodonosor di ningun manera ta algu nobo. E profetanan di Tèstamènt Bieu hopi biaha ta spièrta e pueblo di Dios kontra oprimí esnan pober. De echo, prominente entre e pikánan ku ta provoká e eksilio di e rei ta negligensia di esnan den nesesidat. Despues di tur kos, kompashon pa esnan pober ta e ekspreshon di mas haltu di karidat kristian; de lo kontrario, eksplotashon i negligensia di esnan pober ta konstituí un atake riba Dios Mes. Ora nos kuida esnan den nesesidat, nos ta rekonosé ku Dios ta doño di tur kos, kua ta nifiká ku nos no ta doño sino meramente mayordomonan di e propiedat di Dios.

Dor di sirbi otronan ku nos poseshonnan, nos ta honra Dios i ta rekonosé Su ekselensia. Ta e derecho di pertenensia di Dios ku mester determiná finalmente e balor i funshon di poseshonnan material. Aki ta kaminda Nabukodonosor ta faya, i nos ta kore riesgo di faya tambe, a ménos ku nos rekonosé e soberania di Dios riba nos logronan i manifestá nos rekonosementu di e realidat akí dor di yuda esnan den nesesidat.

Apesar ku el a ser bisá pa arepentí i buska e pordon di Dios, e orguyo implakabel di Nabukodonosor ta pone e dekreto selestial ser ehekutá (Dan. 4:28-33). Miéntras e rei ta kanando den su palasio i ta alabando su mes pa loke el a logra, e ta ser aflihí ku un kondishon mental ku ta fòrsa su ekspulshon for di e palasio real. E por a eksperensiá un kondishon mental patológiko yamá likantropia klíniko òf zoantropia. Un kondishon asina ta hiba e pashènt na aktua manera un animal. Den tempunan moderno e enfermedat akí a ser yamá “disforia di espesienan”, e sintimentu ku kurpa di un hende ta di e espesie robes i, por lo tantu, e deseo di ta un animal.

Lesa 2 Reinan 20:2-5; Jonas 3:10; i Jeremias 18:7,8. Kiko e tèkstnan akí ta bisa nos tokante e chèns di e rei pa a evitá e kastigu?

Desafortunadamente, Nabukodonosor mester siña na malu. Ora e tabata investí ku poder real, Nabukodonosor no tin abilidat pa reflekshoná riba su relashon ku Dios. Por lo tantu, dor di priva e rei di outoridat real i mand’é bai biba huntu ku e bestianan di sabana, Dios a duna e rei un oportunidat pa rekonosé su dependensia total riba djE. De echo, e último lès ku Dios ke siña e rei arogante ta ku “Shelu ta goberná” (Dan. 4:26, NKJV). Por sierto, e huisio riba e rei tin un propósito ainda mas grandi den e plan di Dios, manera ta ser ekspresá di forma asina kla den e dekreto di e sernan selestial: “Pa e bibunan por sa ku e Haltísimo ta goberná den e reino di hende, ta dun’é na ken ku e ke, i ta establesé riba dje e hòmber di mas abou” (Dan. 4:17, NKJV).

Den otro palabra, e disiplina apliká na Nabukodonosor mester ta un lès pa nos tur tambe. Pa motibu ku nos ta pertenesé na e grupo di “esnan bibu”, nos mester paga mihó atenshon na e lès prinsipal ku nos mester siña ku ta “e Haltísimo ta goberná den e reino di hende”.

Lesa Daniel 4:34-37. Kon, i dikon, kosnan ta kambia pa e rei?

Dios ta permití Nabukodonosor ser di dal pa un enfermedat straño, pero finalmente E ta restour’é fásilmente na un estado mental sano. Ta interesante pa bisa ku tur kos ta kambia ora, na final di e shete añanan predesí dor di e profeta, e rei enfermo ta hisa su wowonan na shelu (Dan. 4:34).

“Pa shete aña Nabukodonosor tabata un asombro pa tur su súpditonan; pa shete aña el a ser humiá dilanti di henter mundu. Despues su rason a ser restourá i, mirando ariba den humildat na e Dios di shelu, el a rekonosé e man divino den su kastigu. Den un proklamashon públiko el a rekonosé su kulpa i e gran miserikòrdia di Dios den su restourashon”. — Ellen G. White, Prophets and Kings, p. 520.

Sin duda, gran kambionan por tuma lugá ora nos hisa nos bista na shelu. Asina ku su komprondementu bin bèk, e rei ta duna evidensia ku el a siña e lès akí.

Pero e historia akí no tin tantu di hasi ku Nabukodonosor manera ku e miserikòrdia di Dios. E rei a pèrdè tres oportunidat anterior pa aseptá e Dios di Israel komo Señor di su bida. Okashonnan asina ta disponibel p’e ora e rekonosé e sabiduria eksepshonal di e kuater koutivonan hóben di Judea (Daniel 1), ora Daniel interpretá su soño (Daniel 2), i ora e tres hòmbernan hebreo ser reskatá for di e fòrnu di kandela (Daniel 3). Despues di tur kos, si e reskate ei no humi’é, kiko lo hasi esei? Apesar di e terkedat di e gobernante, Dios ta dun’é un di kuater oportunidat, finalmente ta gana kurason di e rei, i ta restour’é na su funshon real (Daniel 4). Manera e kaso di Nabukodonosor ta ilustrá, Dios ta duna un oportunidat tras di otro pa asina restourá nos na un relashon korekto kunE. Manera Pablo ta skibi hopi siglo mas despues, Señor “ta deseá pa tur hende ta salbá i bin na konosementu di e bèrdat” (1 Tim. 2:4, NKJV). Nos ta mira den e storia akí un ehèmpel poderoso di e bèrdat ei.

E rei arepentí ta deklará: “Tur e habitantenan di tera ta ser konsiderá komo nada” (Dan. 4:35). Konsiderando e konteksto, ki punto importante e ta tresiendo dilanti?

Kon nos sa ku Nabukodonosor realmente ta aseptá e Dios berdadero? Nos ta haña un pida importante di evidensia den e echo ku Nabukodonosor mes ta e outor di e karta inkluí dor di Daniel den kapítulo 4. En realidat, mayoria di e kapítulo akí parse ta un transkripshon di un karta ku e rei ta distribuí na su reino enorme. Den e karta akí, e rei ta papia tokante su orguyo i lokura, i humildemente ta rekonosé e intervenshon di Dios den su bida. Monarkanan antiguo poko biaha lo a skibi kualke kos despektivo tokante nan mes. Praktikamente tur dokumento real antiguo ku nos sa di dje ta glorifiká e rei. Un dokumento manera esaki, por lo tantu, den kua e rei ta atmití su orguyo i su komportashon bestial, ta mustra na un kombershon genuino. Ademas, dor di skibi un karta relatando su eksperensia i humildemente ta konfesá e soberania di Dios, e rei ta aktuando komo un mishonero. E no por tene loke el a eksperensiá i a siña di e Dios berdadero pa su mes mas. Loke nos a mira aki, anto, den e orashon i alabansa di e rei (Dan. 4:34-37), ta revelá e realidat di su eksperensia.

E rei awor tin un konhunto diferente di balornan i por rekonosé e limitashonnan di poder humano. Den un orashon profundo di gradisimentu, e rei ta eksaltá e poder di e Dios di Daniel i ta atmití ku “Tur e habitantenan di tera ta ser konsiderá komo nada” (Dan. 4:35, NKJV). Es desir, sernan humano no tin nada di nan mes di kua nan por gaba. Pues, e último mirada di Nabukodonosor den e buki di Daniel ta mustra un rei humilde i gradesidu, kantando alabansanan na Dios i spièrtando nos kontra orguyo.

Naturalmente, Dios ta sigui kambia bida awe. No importá kon orguyoso òf pekaminoso hende por ta, den Dios tin miserikòrdia i poder pa kambia pekadornan rebelde den yunan di e Dios di Shelu.