Hesus i e Perspektiva di e Apòstelnan di e Beibel

E boutismo di Hesus dor di Juan Boutista a marka e komienso di e ministerio di e Salbador, despues di kua Hesus a ser hibá dor di e Spiritu den e desierto di Judea, kaminda, den Su kondishon humano di mas débil, El a ser tentá dor di Satanas.

Lesa Mateo 4:1-11. Kon Hesus ta defendé Su mes kontra e tentashonnan di Satanas den desierto? Kiko nos mester siña tokante e Beibel for di e relato akí?

Ora El a ser tentá pa medio di apetito, Hesus a respondé: “Ta pará skirbí, Hende lo no biba pa medio di pan so, sino pa medio di kada palabra ku ta prosedé di Dios” (Mat. 4:4, NKJV). Hesus ta mustra bèk na e Palabra bibu i su fuente divino i final. Di e forma akí E ta afirmá e outoridat di Skritura. Ora El a ser tentá ku e reinonan i gloria di mundu, Hesus ta respondé: “Ta pará skirbí, Lo bo sirbi Señor bo Dios, i E solamente lo bo sirbi” (Mat. 4:10, Lukas 4:8, NKJV). Kristu ta rekordá nos ku berdadero adorashon ta enfoká riba Dios i no riba niun hende mas, i ku sumishon na Su Palabra ta berdadero adorashon. Finalmente, ku e tentashon riba e amor di ekshibishon i riba presunshon, Hesus ta respondé: “Atrobe ta para skirbí, Lo bo no tenta Señor bo Dios” ’ ” (Mat. 4:7, NKJV; tambe Lukas 4:12).

Den tur tres tentashon, Hesus t respondé ku e palabranan “Ta pará skirbí”. Es desir, Hesus ta bai direkto na e Palabra di Dios i nada mas pa atendé ku e atakenan i engañonan di Satanas. Esaki mester ta un lès poderoso pa nos tur: E Beibel, i e Beibel, so mester ta e norma i fundeshi final di nos kreensia.

Sí, e Beibel i e Beibel solamente tabata e método di defensa di Hesus kontra e atakenan di e atversario. Hesus ta Dios, pero den Su defensa kontra Satanas E ta someté Su mes únikamente na e Palabra di Dios.

No ta opinion; no ta un argumento elaborá i kompliká; no ta ku palabranan di hostilidat; e ta, en kambio, pa medio di e palabranan simpel i sinembargo profundo di Skritura. Pa Kristu, Skritura tin e outoridat di mas grandi i e poder di mas grandi. Di e forma akí, Su ministerio ta kuminsá ku un fundeshi sigur i ta sigui konstruí riba e integridat di e Beibel.

Lesa Mateo 5:17-20; Mateo 22:29; i Mateo 23:2,3. Kiko Hesus ta bisando den e kontekstonan akí?

Hesus a siña Su disipelnan obediensia na e Palabra di Dios i e lei. No tin nunka un indikashon di djE dudando e outoridat òf relevansia di Skritura. Al kontrario, konstantemente E tabata referí na dje komo e fuente di outoridat divino. I na e Saduseonan El a bisa: “Boso ta robes, pasobra boso no konosé ni e skrituranan ni e poder di Dios” (Mat. 22:29, RSV). Hesus a siña ku solamente konosementu intelektual di e Beibel i su siñansanan tabata insufisiente pa konosé bèrdat i, mas importante ainda, pa konosé Señor, kende ta e bèrdat ei.

Lesa Mateo 22:37-40 ta bisa nos tokante e perspektiva di Hesus di e lei di Moises?

Den e deklarashon akí na e abogado, Hesus ta resumí e Dies Mandamentunan, duná na Moises kasi 1.500 aña mas promé. Mester ser rekonosé kon Hesus ta focus riba e lei di Tèstamènt Bieu i ta elev’é te na e nivel di mas haltu. Hopi Kristian a konkluí di forma inkorekto ku aki a ser duná un mandamentu nobo, i pues di un manera òf otro e lei di Tèstamènt Bieu awor ta ser remplasá pa e evangelio di Tèstamènt Nobo. Pero echo ta ku loke Hesus ta siñando ta basá riba e lei di Tèstamènt Bieu. Hesus a divulgá i a revelá e lei di forma mas kompletu pa asina “riba e dos mandamentunan akí” (resumiendo e Dies Mandamentunan, e promé kuater ku ta enfoká riba relashonnan humano-divino, i e siguiente seis ku ta enfoká riba relashon interpersonal humano) “tur e lei i e profetanan ta dependé” (Mat. 22:40, RSV). Di e forma akí, Hesus ta elevá tambe henter e Tèstamènt Bieu ora E bisa: “e lei i e profetanan”, pasobra esaki ta un forma abreviá di referí na e lei, profetanan, i eskritonan, òf tur tres divishon di Tèstamènt Bieu.

“E [Kristu] tabata mustra na e Skrituranan komo un outoridat inkuestionabel, i nos mester hasi meskos. E Beibel mester ser presentá komo e palabra di e Dios infinito, komo e fin di tur kontroversia i e fundeshi di tur fe”. — Ellen G. White, Christ’s Object Lessons, pp. 39, 40.

Lesa Lukas 24:13-35, 44, 45. Kon Hesus ta usa e Skrituranan pa siña e disipelnan e mensahe di evangelio?

Despues di e morto di Kristu, Su siguidónan tabata konfundí i den duda. Kon esaki por a sosodé? Kiko e tabata nifiká? Den e kapítulo akí di Lukas, nos ta mira ku Hesus ta aparesé na nan dos biaha, promé na dos ku ta riba kaminda pa Emaus, i despues na otronan. Na dos okashon separá, Hesus ta splika kon tur kos a ser kumplí di e profesianan di Tèstamènt Bieu: “I kuminsando ku Moises i tur e profetanan, El a interpretá na nan den tur e skrituranan e kosnan enkuanto di su mes” (Lukas 24:27, RSV).

Atrobe den Lukas 24:44,45, E ta bisa: “Esakinan ta mi palabranan … ku tur kos skirbí tokante Mi den e lei di Moises i e profetanan i e salmonan mester ser kumplí” (RSV). Hesus e ora ei “a habri nan mente pa komprondé e skrituranan” (RSV).

Nota e referensia spesífiko den Lukas 24:27 na “tur e skrituranan”. Esaki ta ser enfatisá di nobo den e di dos pasashi komo e “lei di Moises i e profetanan i e salmonan” (Lukas 24:44, RSV). Esaki ta establesé klaramente ku Hesus, e Palabra hasí karni (Juan 1:1-3,14), ta dependé riba e outoridat di Skritura pa splika kon e kosnan akí a ser pronostiká sentenáres di aña mas promé. Dor di referí na e totalidat di Skritura, Hesus ta siñando e disipelnan pa medio di ehèmpel. Segun ku nan ta sali pa plama e mensahe di evangelio, nan tambe mester a eksponé tur Skritura pa trese komprondementu i poder na e konversonan nobo a lo largu di henter mundu.

Nota, tambe, kon den Mateo 28:18-20, Hesus ta bisa Su disipelnan e tempu ei (i na nos awe) ku “tur outoridat den shelu i riba tera a ser duná na Mi” (RSV). Pero e outoridat ei ta keda fihá den Su Tata i henter e Divinidat, pasobra E ta bisa nan: “P’esei bai i hasi disipel di tur nashon, batisando nan den nòmber di e Tata i di e Yu i di Spiritu Santu” (RSV). Despues ta bin e pasashi klave: “siñando nan pa warda tur loke Mi a ordená boso” (RSV). Kiko Hesus ta siña i ordená? Su siñansanan ta basá riba tur Skritura. Ta riba e outoridat profétiko di e Palabra El a bin, i ta den kumplimentu di e profesianan den Skritura El a someté na Su Tata.

Hesus a siña ku e Beibel ta e Palabra di Dios den sentido ku loke e ta bisa ta sinónimo ku loke Dios ta bisa. Su orígen ta ser hañá den Dios i, por lo tantu, ta kontené outoridat final pa tur aspekto di bida. Dios a obra a traves di historia pa revelá Su boluntat na humanidat a traves di e Beibel.

Por ehèmpel, den Mateo 19:4,5 (NKJV), Hesus ta referí na un sita skirbí dor di Moises. Pero Hesus ta tuma e pasashi akí i ta bisa: “E ku a traha nan na prinsipio … a bisa, ‘Pa e motibu akí un hende lo bandoná su tata i mama’ ”. Na lugá di bisa “Skritura ta bisa”, Hesus ta bisa: “E kende a traha nan na prinsipio … a bisa”, i ta atribuí na palabra di e Kreador loke e naradó di Génesis a skirbi. Dios ta ser, de echo, konsiderá komo e outor di e deklarashon akí, aunke el a ser skirbí dor di Moises.

Lesa e siguiente pasashinan. Kon Hesus a komprondé e personanan i eventonan históriko di e Beibel?

Lesa Mat. 12:3-4

Marko 10:6-8

Lukas 4:25-27

Lukas 11:51

Mat. 24:38

Hesus konsistentemente ta trata hende, lugá, i eventonan di Tèstamènt Bieu komo bèrdat históriko. E ta referí na Génesis 1 i 2, Abel den Génesis 4, David komiendo e pan di propisiashon, i Eliseo entre otro figuranan históriko. Bes tras bes E ta papia di e sufrimentunan di e profetanan di antaño (Mat. 5:12, Mat. 13:57, Mat. 23:34-36, Marko 6:4). Den un mensahe di spièrtamentu, Hesus ta deskribí tambe e dianan di Noe: “Manera ... nan tabata komiendo i bebiendo, kasando i dunando den kasamentu, te e dia ku Noe a drenta e arka, i no tabata sa te ora e diluvio a bin i a bai ku nan tur, asina tambe e binida di e Yu di Hende lo ta” (Mat. 24:38,39, NKJV). Tin tur indikashon ku Hesus tabata referiendo na e akto poderoso akí di e huisio di Dios komo un evento históriko.

E eskritornan di Tèstamènt Nobo ta aserká e Beibel di mesun manera ku Hesus ta hasi. Den asuntunan di doktrina, étika, i kumplimentu profétiko, Tèstamènt Bieu pa nan tabata e Palabra autoritativo di Dios. Nos ta haña nada, niun kaminda, den loke e hòmbernan akí ta bisa ku ta desafiá sea e outoridat òf outentisidat di kualke parti di e Beibel.

Kiko e pasashinan aki bou ta siña nos tokante kon e apòstelnan a komprondé e outoridat di e Palabra di Dios?

Echonan 4:24-26

Echonan 13:32-36

Rom. 9:17

Gal. 3:8

Nota den e pasashinan akí kon djaserka relashoná e Skrituranan ta na e bos di Dios Mes. Den Echonan 4, djis promé di a ser yená ku Spiritu Santu, e disipelnan ta alabá Dios pa e liberashon di Pedro i Juan. Den nan alabansa, nan ta halsa nan bosnan, rekonosiendo Dios komo e Kreador i pa a papia pa medio di David Su sirbidó. Es desir, e palabranan di David ta palabranan di Dios. Den Echonan 13:32-36, David ta ser sitá atrobe dor di Pablo, pero su palabranan ta ser atribuí na Dios, pasobra versíkulo 32 ta bisa: “Loke Dios a primintí na e tatanan” (RSV).

Den Romanonan 9:17, kaminda hende lo a ferwagt Dios e tema, Pablo ta usa e término “Skritura”, bisando: “Pasobra e Skritura ta bisa Fárao” (NKJV), kua en realidat por a ser deklará, “Pasobra Dios ta bisa Fárao”. Den Galationan 3:8 e tema “Skritura” ta ser usá na lugá di “Dios”, mustrando kon djaserka konektá e Palabra di Dios ta na Dios Mes.

De echo, e eskritornan di Tèstamènt Nobo di forma uniforme ta dependé riba Tèstamènt Bieu komo e Palabra di Dios. Tin sentenáres di sita den Tèstamènt Nobo for di Tèstamènt Bieu. Un erudito a kompilá un lista di 2.688 referensia spesífiko, 400 for di Isaias, 370 for di e Salmonan, 220 for di Eksodo, etcétera. Si hende mester a añadí na e lista akí alushonnan, temanan, e motibunan, e kantidat lo a oumentá grandemente. E bukinan ta yená ku referensianan na e profesianan di Tèstamènt Bieu ku hopi biaha ta ser introdusí ku e frase “ta para skirbí” (Mat. 2:5, Marko 1:2, 7:6, Lukas 2:23, 3:4, Rom. 3:4, 8:36, 9:33, 1 Kor. 1:19, Gal. 4:27, 1 Pe. 1:16). Tur esaki ta konfirmá ku e Skrituranan di Tèstamènt Bieu ta e fundeshi riba kua e siñansanan di Hesus i e apòstelnan ta basá.