E Beibel — E Fuente Outoritativo di Nos Teologia

Tradishon mes no ta malu. E ta duna echonan periódiko den nos bida diario un sierto rutina i struktura. E por yuda nos keda konektá ku nos raisnan. Por lo tantu, no ta un sorpresa ku tradishon tambe ta hunga un parti importante den religion. Pero tin tambe algun peliger konektá ku tradishon.

Kiko Marko 7:1-13 ta siña nos tokante kon Hesus a reakshoná riba algun tradishon humano den Su tempu?

E tradishon ku Hesus a konfrontá a ser entregá kuidadosamente den e komunidat hudiu di maestro pa alumno. Den tempu di Hesus, el a asumí un lugá banda di Skritura. Tradishon, sinembargo, tin un tendensia di krese a lo largu di periodonan largu di tempu, i asina akumulando mas i mas detaye i aspektonan ku no tabata originalmente parti di Dios su Palabra i plan. E tradishonnan humano akí, aunke nan ta ser promové dor di “ansianonan” respetá (lesa Marko 7:3,5), esta, dor di e lidernan religioso di e komunidat hudiu, no ta igual na e mandamentunan di Dios (lesa Marko 7:8,9). Nan tabata tradishonnan humano, i finalmente nan a hiba na un punto kaminda nan a hasi “e palabra di Dios di ningun efekto” (Marko 7:13, NKJV).

Lesa 1 Korintionan 11:2 i 2 Tesalonisensenan 3:6. Kon nos ta distinguí entre e Palabra di Dios i tradishon humano? Dikon ta asina importante pa nos hasi e distinshon akí?

E Palabra bibu di Dios ta inisiá den nos un aktitut reverente i fiel pa kuné. E fieldat akí ta generá un sierto tradishon. Nos fieldat, sinembargo, semper mester ta leal na e Dios bibu, kende a revelá Su boluntat den e Palabra Skirbí di Dios. Asina, e Beibel tin un ròl úniko ku ta remplasá tur tradishon humano. E Beibel ta para mas haltu i ariba di tur tradishon, asta esnan bon. Tradishonnan ku ta sali for di nos eksperensia ku Dios i Su Palabra mester ser di tèst konstantemente kontra e referensia di Skritura Santu.

Lesa Romanonan 2:4 i Tito 3:4,5. Kon nos ta eksperensiá e bondat, pasenshi, pordon, amabilidat, i amor di Dios? Dikon ta importante pa nos fe no ta djis un konosementu apstrakto i intelektual, sino algu ku nos ta eksperensiá realmente? Na mes momentu, den ki forma nos eksperensianan por ta den konflikto ku e Beibel i asta despistá nos den nos fe?

Eksperensia ta parti di nos eksistensia humano. E ta impaktá nos sintimentu- i pensamentunan den un forma poderoso. Dios a diseñá nos den tal forma ku nos relashon ku Su kreashon, i asta na Dios Mes, ta konektá di forma signifikante na i formá dor di nos eksperensia.

Ta Dios Su deseo pa nos eksperensiá e bunitesa di relashonnan, di arte i músika, i di e maravianan di kreashon, komo tambe e goso di Su salbashon i e poder di e promesanan di Su Palabra. Nos religion i fe ta mas ku solamente doktrina i desishonnan rashonal. Loke nos ta eksperensiá, di forma signifikante, ta forma nos perspektiva di Dios i asta nos komprondementu di Su Palabra. Pero nos mira klaramente tambe e limitashonnan i insufisiensianan di nos eksperensianan ora ta trata di konosé e boluntat di Dios.

Ki spièrtamentu ta ser hañá den 2 Korintionan 11:1-3? Kiko esaki mester bisa nos tokante e límitenan di konfia nos eksperensianan?

Eksperensianan por ta hopi engañoso. Papiando bíblikamente, eksperensia mester tin su propio esfera. E mester ser informá i formá dor di Skritura i interpretá dor di Skritura. Tin biaha nos ke eksperensiá algu ku no ta den harmonia ku e Palabra i boluntat di Dios. Aki nos mester siña konfia e Palabra di Dios asta riba nos eksperensia i deseonan. Nos mester ta alerta pa sigurá ku asta nos eksperensia ta semper den harmonia ku e Palabra di Dios i no ta kontradesí e siñansa kla di e Beibel.

Nos tur ta pertenesé na i ta parti di un kultura òf kulturanan partikular. Nos tur ta ser influensiá i formá dor di kultura tambe. Niun di nos ta skapa di dje. En realidat, pensa riba kuantu di Tèstamènt Bieu ta e storia di Israel antiguo ku a ser korumpí dor di e kulturanan rondó di dje. Kiko ta pone nos pensa ku nos awe ta nada diferente, òf mihó?

E Palabra di Dios tambe ta ser duná den un kultura spesífiko, aunke e no ta limitá na esun kultura akí. Miéntras faktornan kultural inevitablemente ta influensiá nos komprondementu di e Beibel, nos no mester pèrdè e echo for di bista ku e Beibel ta sobrepasa kategorianan kultural establesé di etnisidat, imperio, i status sosial. Esaki ta un rason dikon e Beibel ta sobrepasa kualke kultura humano i ta asta kapas di transformá i koregí e elementonan pekaminoso ku nos ta haña den tur kultura.

Lesa 1 Juan 2:15-17. Kiko Hesus ke men ora El ta deklará ku nos no mester stima e kosnan di mundu? Kon nos por biba den e mundu i tòg no tin un mentalidat mundano?

Kultura, meskos ku kualke otro faseta di e kreashon di Dios, ta afektá pa piká. Konsekuentemente, e tambe ta para bou di e huisio di Dios Sí, algun aspekto di nos kultura kisas por aliniá hopi bunita ku nos fe, pero semper nos mester ta kuidadoso pa distinguí entre nan dos. Idealmente, fe bíbliko mester desafiá, si mester, e kultura eksistente i krea un kontra kultura ku ta fiel na e Palabra di Dios. A ménos ku nos tin algu ankrá den nos ku ta bin for di ariba di nos, pronto nos lo sede na e loke tin rondó di nos.

Ellen G. White ta proveé e siguiente persepshon: “E siguidónan di Kristu mester ta separá for di e undu den prinsipio- i interesnan, pero nan no mester isolá nan mes for di e mundu E Salbador tabata meskla konstantemente ku hende, no pa enkurashá nan den nada ku no tabata di akuerdo ku e boluntat di Dios, sino pa elevá i enoblesé nan”. — Ellen G. White, Counsels to Parents, Teachers, and Students, p. 323.

Lesa 2 Korintionan 10:5,6; Proverbionan 1:7; i Proverbionan 9:10. Dikon obediensia na Kristu den nos pensamentunan ta asina importante? Dikon temor di Señor ta e prinsipio di sabiduria?

Dios a duna nos e abilidat pa pensa i pa rasoná. Tur aktividat humano i tur argumento teológiko ta asumí nos abilidat pa pensa i pa saka konklushonnan. Nos no ta sostené un fe irasonabel. Despues di e Era di Iluminashon di siglo 18, sinembargo, rason humano a asumí un ròl nobo i dominante, spesialmente den sosiedat oksidental, ku ta bai muchu mas aya di nos abilidat pa pensa i pa yega na konklushonnan korekto.

Kontrali na e idea ku tur nos konosementu ta basá riba eksperensia sensashonal, un otro persepshon ta konsiderá rason humano komo e fuente prinsipal di konosementu. E prospekto akí, yamá rashonalismo, ta e idea ku bèrdat no ta sensashonal sino intelektual i ta derivá for di rason. Den otro palabra, sierto bèrdat ta eksistí, i nos rason so por kapta nan direktamente. Esaki ta hasi rason humano e tèst i norma pa bèrdat. Rason a bira e outoridat nobo e outoridat nobo dilanti di kua tur otro kos mester a bùig, inkluyendo e outoridat di iglesia i, mas dramátikamente ainda, asta e outoridat di Beibel komo e Palabra di Dios. Tur kos ku no tabata opvio pa rason humano a ser deskartá i su legitimidat kuestioná. E aktitut akí a afektá partinan grandi di Skritura. Tur milager- i aktonan sobrenatural di Dios, manera e resurekshon korporal di Hesus, e nasementu bírgen, òf e Kreashon di seis dia, pa menshoná djis un par, no tabata ser konsiderá bèrdat i fidedigno mas.

E bèrdat ta, nos mester rekordá e echo ku asta nos poder pa rasoná ta afektá pa piká i mester ser tresé bou di reinado di Kristu. Sernan humano ta ser skuresé den nan komprondementu i isolá for di Dios (Efe. 4:18). Nos mester ser iluminá dor di e Palabra di Dios. Ademas, e echo ku Dios ta nos Kreador ta indiká ku, papiando bíblikamente, nos rason humano no a ser kreá komo algu ku ta funshoná independientemente òf outónomamente di Dios. Mas bien, “temor di Señor ta e prinsipio di sabiduria” (Prov. 9:10; kompará ku Prov. 1:7). Ta solamente ora nos aseptá e revelashon di Dios, personifiká den e Palabra Skirbí di Dios, komo supremo den nos bida, i ta dispuesto pa sigui loke tin skirbí den e Beibel, ku nos por rasoná korektamente.

Spiritu Santu, kende a revelá i a inspirá e kontenido di e Beibel na sernan humano, nunka lo guia nos kontrali na e Palabra di Dios òf for di e Palabra di Dios. Pa Atventistanan di e di Shete dia, e Beibel tin un outoridat mas haltu ku tradishon humano, eksperensia, rason, òf kultura. Beibel so ta e norma pa medio di kua tur otro kos mester ser di tèst.

Lesa Juan 5:46,47; i Juan 7:38. Pa Hesukristu, e Beibel ta e fuente fundamental pa komprondé asuntunan spiritual. Kon Beibel ta konfirmá ku Hesus ta e berdadero Mesias?

Algun hende ta profesá di a risibí “revelashonnan” i instrukshonnan spesial for di Spiritu Santu, pero esakinan ta bai kontra e mensahe kla di e Beibel. Pa nan Spiritu Santu a haña un outoridat mas haltu ku e Palabra di Dios. Ken ku nulifiká e Palabra skirbí i inspirá di Dios i ta evadí su mensahe kla, ta kanando riba tereno peligroso i no ta siguiendo e guiansa di e Spiritu di Dios. E Beibel ta nos úniko salbaguardia spiritual. E so ta un norma konfiabel pa tur asuntunan di fe i práktika.

“Pa medio di e Skrituranan Spiritu Santu ta papia na e mente, i ta impreshoná bèrdat riba e kurason. Asina E ta eksponé eror, i ta sak’é for di e alma. Ta pa medio di e Spiritu di bèrdat, ku ta obra a traves di e palabra di Dios, ku Kristu ta someté Su pueblo skohí na Su mes”. — Ellen G. White, The Desire of Ages, p. 671.

Spiritu Santu nunka mester ser komprondé di ta remplasá e Palabra di Dios. Mas bien, E ta traha den harmonia ku i a traves di e Beibel pa hala nos na Kristu, i asina hasi e Beibel e úniko norma pa spiritualidat bíbliko outéntiko. E Beibel ta proveé doktrina sano (lesa 1 Tim. 4:6), i komo Palabra di Dios e ta fidedigno i ta meresé aseptashon total. No ta nos tarea pa sinta den huisio riba Skritura. E Palabra di Dios, mas bien, tin e derecho i e outoridat pa husga nos i nos pensamentu. Despues di tur kos, e ta e Palabra Skirbí di Dios Mes.