Pa Medio di Skritura So — Sola Scriptura

For di nan prinsipio, Atventistanan di e di Shete dia a konsiderá nan mes di ta e pueblo di e Buki, es desir, Kristiannan ku ta kere den e beibel. Pa afirmá e prinsipio skritural di sola Scriptura (pa medio di Skritura so), nos ta rekonosé e outoridat úniko di e Beibel. Skritura so ta e norma obligatorio pa nos teologia i e outoridat final pa bida i doktrina. Otro fuentenan, manera eksperensia religioso, rason humano, òf tradishon, ta supordiná na e Beibel. De echo, e prinsipio di sola Scriptura tabata intenshoná pa salbaguardiá e outoridat di Skritura for di dependensia riba e iglesia i su interpretashon, i el a ekskluí e posibilidat ku e norma di su interpretashon lo a sali for di pafó di e Beibel.

Lesa 1 Korintionan 4:1-6, spesialmente versíkulo 6, den kua Pablo ta bisa ku nos no mester bai “mas aya di loke ta pará skirbí” (NKJV). Dikon e punto akí ta asina krusial pa nos fe?

Pa no bai mas aya di loke ta pará skirbí no ta ekskluí persepshonnan for di otro áreanan di estudio, manera arkeologia bíbliko òf historia. Otro áreanan por tira lus riba algun aspektonan bíbliko i e trasfondo di pasashinan skriptural, i asina por yuda nos komprondé e tèkst bíbliko mihó. Tampoko e ta ekskluí e yudansa di otro fuentenan den e tarea di interpretashon, manera léksiko-, dikshonario-, konkordansia-, i otro buki- i komentarionan. Sinembargo, den e interpretashon korekto di Beibel, e teksto di Skritura tin prioridat riba tur otro aspekto-, siensia-, i yudansanan sekundario. Otro puntonan di bista mester ser evaluá kuidadosamente for di e punto di bista di Skritura komo un totalidat.

Loke nos ta afirmá positivamente ora nos praktiká e prinsipio di sola Scriptura ta ku si un konflikto surgi den e interpretashon di nos fe, e ora ei Skritura so ta karga e outoridat ku ta transendé i husga kualke otro fuente òf tradishon di iglesia. Nos no mester bai mas aya òf kontra loke ta pará skirbí den e Beibel. Kristianismo berdadero i predikamentu konvinsente di evangelio ta dependé riba un kompromiso firme na e outoridat di Skritura.

“Skritura so ta e berdadero señor i maestro di tur eskrito i doktrina riba tera”. — Martin Luther, Luther’s Works, vol. 32: Career of the Reformer II, eds. Hilton C. Oswald and Helmut T. Lehmann, vol. 32 [Philadelphia: Fortress Press, 1999], pp. 11, 12.

Beibel mes ta afirmá ku “tur Skritura ta inspirá pa Dios” (2 Tim. 3:16, NIV) i ku “niun profesia di Skritura a tuma lugá a traves di e propio interpretashon di e profeta”, i ku hòmbernan “a papia for di Dios segun ku nan tabata ser hibá pa Spiritu Santu” (2 Pe. 1:20, 21, NIV). Ku Dios komo e outor final di e Beibel, nos por asumí un unidat i harmonia fundamental entre e vários partinan di Skritura pa ku e asuntunan klave ku e ta siña.

Lesa Tito 1:9 i 2 Timoteo 1:13. Dikon e unidat di e Beibel ta importante pa nos kreensia?

Solamente a base di su unidat interno, un unidat ku ta ser derivá di su inspirashon divino, Skritura por funshoná komo su propio intérprete. Si Skritura no tabatin un unidat general den su siñansanan, nos no por a presentá un harmonia den doktrina riba un sierto asuntu. Sin e unidat di Beibel, e iglesia lo no tabatin niun medio pa distinguí bèrdat for di eror i pa repudiá herehia. E lo no tabatin un base pa apliká medidanan disiplinario òf pa koregí desviashonnan for di e bèrdat di Dios. Skritura lo a pèrdè su poder konvisente i liberador.

Hesus i e eskritornan bíbliko, sinembargo, ta asumí e unidat di Skritura, kua ta basá riba su orígen divino. Nos por mira esaki den nan práktika komun di sita vários buki di Tèstamènt Bieu komo di peso igual i harmonioso (Rom. 3:10-18; aki Pablo ta hasi uso di sitanan Bíbliko for di Eklesiastés 7:20, Salmonan 14:2,3; 5:9; 10:7 i Isaias 59:7, 8).

E eskritornan di Beibel a konsiderá Skritura di ta un totalidat inseparabel i koherente, den kua temanan prinsipal ta ser desaroyá mas aleu. No tin diskordia entre Tèstamènt Bieu i Tèstamènt Nobo. Tèstamènt Nobo no ta kontené un evangelio nobo òf un religion nobo. Tèstamènt Bieu ta ser desplegá den Tèstamènt Nobo, i Tèstamènt Nobo ta konstruí riba Tèstamènt Bieu. Komo tal, e dos Tèstamèntnan tin un relashon resíproko den kua nan ta tira lus riba otro.

E Unidat di Skritura ta impliká tambe ku tur Skritura (tota scriptura) mester ser tumá den konsiderashon ora nos ta studia un tema bíbliko, mas bien ku konstruí nos siñansa solamente riba deklarashonnan isolá.

Kualke apelashon na Skritura so tin tiki sentido si e tèkst di Beibel no ta kla den su nifikashon.

Lesa Mateo 21:42; Mateo 12:3,5; Mateo 19:4; Mateo 22:31; Marko 12:10,26; Lukas 6:3; Mateo 24:15; i Marko 13:14. Kiko e referensia ripití di Hesus na Skritura ta impliká enkuanto di e klaridat di su mensahe?

E testimonio bíbliko ta opvio: Beibel ta sufisiente kla den loke e ta siña. Beibel ta asina kla ku e por ser komprondé dor di mucha- i dor di adultonan di mes manera, spesialmente den su siñansanan di mas básiko. I tòg tin oportunidatnan sin límite pa nos konosementu i komprondementu pa krese mas profundo. Nos no tin mester di niun outoridat eklesiástiko pa proveé e nifikashon di Beibel pa nos. En kambio, su siñansanan básiko por ser komprondé dor di tur kreyente. E ta asumí saserdosio di tur kreyente mas bien ku restringí su interpretashon na un par selektá, manera e saserdosio klériko. P’esei, nos ta ser enkurashá den Beibel pa studia Skritura pa nos mes pasobra nos ta kapas pa komprondé e mensahe di Dios na nos.

A ser indiká korektamente ku “e ehèmpel konsistente di e eskritornan di Beibel ta mustra ku e Skrituranan mester ser tumá den nan sentido kla i literal, a ménos ku e ta nifiká un figura kla i opvio. . . . No tin kitamentu di e ‘kaska’ di e sentido literal pa asina yega na e ‘núkleo’ di un nifikashon místiko, skondí, alegóriko, ku solamente e originadó por eksponé”. — Handbook of Seventh-day Adventist Theology [Hagerstown, MD: Review and Herald Publishing Association, 2000], p. 65. Mas bien, e klaridat di e Beibel ta pertenesé na e lenguahe, sentido, i palabranan di Skritura pasobra tin un bèrdat definitivo intenshoná pa e eskritornan bíbliko mas bien ku nifikashonnan suphetivo, sin kontròl, i múltiple di e tèkst bíbliko.

Nada di esaki ta nifiká ku, de bes en kuando, nos lo no topa tèkst- i ideanan ku nos no ta komprondé òf kapta kompletamente. Despues di tur kos, esaki ta e Palabra di Dios, i nos ta nada mas ku sernan humano kaí. Sinembargo, e Palabra di Dios ta sufisientemente kla riba e kosnan ku realmente nos mester sa i komprondé, spesialmente den relashon ku e kuestion di salbashon.

Solamente pasobra tin un unidat fundamental di Skritura, e Beibel por funshoná komo su propio intérprete. Sin un unidat asina, Skritura no por tabata e lus ku ta revelá su propio nifikashon, kaminda un porshon di Skritura ta interpretá otro porshonnan i pues ta bira e klave pa komprondé pasashinan similar.

Lesa Lukas 24:27,44,45. Kon Hesus ta referí bèk na Skritura pa splika ken E ta? Kiko esaki ta siña nos tokante kon nos por usa Skritura?

E bunitesa di laga Skritura interpretá Skritura ta ku e ta tira lus mas aleu riba su propio nifikashon. Hasiendo asina, nos no ta mara, sin diskriminá, vários pasashi huntu pa proba nos opinion. En kambio, kuidadosamente nos ta tuma na konsiderashon e konteksto di kada pasashi. Ademas di e konteksto inmediato promé i despues di un pasashi ku ta bou di investigashon, nos mester tuma na konsiderashon e konteksto di e buki den kua e pasashi ta ser hañá. Ademas, ya ku di akuerdo ku Pablo den Skritura, “tur kos ku a ser skirbí den pasado a ser skirbí pa siña nos” (Rom. 15:4, NIV), nos mester studia tur loke Skritura ta bisa riba un sierto tema.

“E Beibel ta su mes intérprete. Skritura mester ser kompará ku Skritura. E studiante mester siña mira e palabra komo un totalidat, i pa mira e relashon di su partinan. E mester haña un konosementu di su grandioso tema sentral, di e propósito original di Dios pa e mundu, di e surgimentu di e gran kontroversia, i di e obra di redenshon”. — Ellen G. White, Education, p. 190.

Ora nos ta kompará Skritura ku Skritura, ta importante pa studia e Beibel a fondo. Si ta posibel, nos mester hasi esei den su lenganan original, òf a lo ménos ku un tradukshon di Beibel apropiá ku ta fiel na e nifikashon kontené den e Hebreo i Griego original. Ounke konosementu di e lenganan original no ta nesesario pa tin un bon komprondementu di Beibel, lo e yuda sigur ora ta nesesario. Si no, estudio fiel i ku orashon di e Palabra, ku un aktitut di humildat i sumishon, seguramente ainda lo karga gran fruta.

Lesa Isaias 8:20. Dikon semper ta importante pa referí bèk na e “lei i testimonio” bíbliko komo e normanan pa nos siñansa i doktrina? Kiko esaki ta nifiká pa e ministerio di profetanan ku no a bira parti di e kanon bíbliko?

Ora nos ta papia tokante sola ScrituraI (Skritura so), Atventistanan di e di Shete dia inevitablemente ta ser konfrontá ku e pregunta di kiko hasi ku Ellen G White, ku tambe a ser inspirá pa Dios i a sirbi komo e mensahero di Dios na Su pueblo remanente. Kiko ta e relashon di su eskritonan ku Skritura?

Asta un lesamentu superfisial di e eskritonan di Ellen G. White ta mustra klaramente ku p’e, e Beibel tabata fundamental i sentral den tur su pensamentu i teologia. De echo, repetidamente e tabata afirmá ku e Beibel ta e outoridat di mas haltu i norma i standart final pa tur doktrina, fe, i práktika (lesa The Great Controversy, p. 595). Mas ainda, di forma kla el a sostené i a defendé e gran prinsipio protestant di sola Scriptura (lesa The Great Controversy, p. 9).

Den Ellen G. White su propio bista, su eskritonan, ora nan ser kompará ku Skritura, tabata un “lus menor pa guia hòmber- i muhénan na e lus mayó”, e Beibel (Advent Review and Sabbath Herald, Yanüari 20, 1903). Su eskritonan nunka ta un alterntiva na òf remplaso pa kualke estudio di Beibel serio. De echo, e ta komentá: “Boso no ta konosí ku e Skrituranan. Si boso a hasi e palabra di Dios boso estudio, ku un deseo pa alkansá e norma di Beibel i logra perfekshon kristian, boso lo no tabatin mester di e Testimonionan. Ta pasobra boso a neglishá di hasi boso mes konosí ku e Buki inspirá di Dios ku El a trata na alkansá boso pa medio di testimonionan simpel i direkto”. — Ellen G. White, Testimonies for the Church, tomo 2, p. 605.

Komo tal, su eskritonan mester ser apresiá. Nan ta kompartí e mesun tipo di inspirashon ku e eskritornan bíbliko tabatin, pero nan tin un funshon diferente ku e Beibel tin. Su eskritonan no ta un adishon na Skritura sino ta suheto na Skritura Santu. Nunka tabata su intenshon pa su eskritonan tuma lugá di Skritura; en kambio, el a elevá e Beibel komo e úniko norma pa fe i práktika.