Pakiko Testifiká?

Dios ta proveé oportunidatnan diario pa hendenan tur kaminda konos’E. E ta move riba nan kurason a traves di Spiritu Santu. E ta revelá Su mes den e bunitesa i komplehidat di e mundu natural. E inmensidat, órden i simetria di e universo ta papia di un Dios infinito ku sabiduria ilimitá i poder infinito. E ta regla sirkunstansianan òf providensianan den nos bida pa hala nos serka djE mes.

Aunke Dios ta revelá Su mes pa medio di e impreshonnan di Su Spiritu, e glorianan di naturalesa, i aktonan di providensia, e revelashon di mas kla di Su amor ta ser hañá den e bida i ministerio di Hesu-Kristu. Ora nos kompartí Hesus ku otronan, nos ta proveé nan ku nan mihó oportunidat pa ser salbá.

Lesa Lukas 19:10 i kompar’é ku Santiago 5:19,20. Kiko e Evangelio di Lukas ta siña tokante e propósito di Kristu di bin na tera? Kon nos ta koperá ku Kristu den Su obra di salba esnan pèrdí?

Di akuerdo ku Santiago, “Esun ku bira un pekador for di e eror di su kaminda lo salba un alma for di morto” (Santiago 5:20, NKJV). E buki di Romanonan ta amplia e pensamentu aki. Den Romanonan 1 i 2, tantu e paganonan ku a mira e revelashon di Dios den naturalesa komo e hudiunan ku a risibí e revelashon profétiko di Dios den Skritura ta pèrdí sin Kristu. Den Romanonan 3–5 e apòstel ta revelá ku salbashon ta bin pa grasia pa medio di fe so. Den Romanonan 6-8 e ta deskribí kon e grasia ku ta hustifiká kada kreyente tambe ta grasia ku ta santifiká. Den Romanonan 10 e ta deklará ku “ken ku yama riba e nòmber di Señor lo ta salbá” (Rom. 10:13, NKJV), i despues e ta señalá ku niun hende por yama si nan no a kere, i ku nan no por kere si nan no a tende, i nan no por tende a ménos ku un hende bisa nan (Rom. 10:14,15). Nos ta e konekshonnan di Dios den e plan di salbashon pa alkansá hendenan pèrdí ku e gloria di e evangelio.

Kualke hende a yega di puntra bo: “Kon bo dia ta bayendo?” Of “Tur kos ta oké ku bo awe?” Ke tal si bo a hasi Dios e preguntanan ei? “Dios, kon Bo dia ta bayendo?” Ki tipo di kontesta bo ta kere ku lo bo a risibí? Posiblemente lo tabata un manera esaki: “Mi dia tabata ekstremadamente difísil. Lágrima a yena Mi wowo mirando mil kampamentunan di refugiado yená ku muchanan ku friu, hamber, i yorando. Mi a kana den e kayanan di e siudatnan drùk di mundu i a yora ku esnan sin kas i pober. Mi kurason ta kibra riba muhénan abuzá i muchanan ku miedu, bendé den sklabitut seksual. Mi a testiguá e ruinanan di guera, e efektonan destruktivo di desasternan natural, i e agonia doloroso di malesanan debilitante i mortal.” Lo bo a respond’E bèk dor di puntra: “Pero Dios, tin kalke kos ku ta hasi Bo regosihá? Tin kualke kos ku ta trese goso na Bo kurason? Tin kualke kos ku ta pone Bo kanta?”

Lesa Lukas 15:6,7,9,10,22-24, i 32). Kon e storianan akí ta kaba, i kiko e finalnan akí ta bisa bo tokante Dios?

Henter shelu ta regosihá ora esnan pèrdí ser hañá. Den un mundu yená ku enfermedat, desaster i morto, nos por trese goso na e kurason di Dios dor di kompartí e “bon notisia” di salbashon ku otronan. Un di e motivashonnan di mas grandi pa kompartí e amor di Dios ta e konosementu ku testifikashon ta trese goso na e kurason di Dios. Kada bia ku nos revelá Su amor, henter shelu ta kanta.

Lesa Sofonias 3:17. Kiko ta e reakshon di Dios ora nos aseptá Su grasia salbador?

Imaginá bo e esena akí. Komo resultado di bo testifikashon algun hòmber òf muhé òf mucha hòmber òf mucha muhé ta aseptá Hesus komo su Salbador personal. Henter shelu ta eksplotá den kanto gososo, i nos Salbador poderoso ta regosihá pa e persona ei ku kantamentu. Kiko por ta mas benefisioso, mas satisfaktorio, ku sa ku bo testifikashon ta trese goso na e kurason di Dios den un mundu di tristesa?

E Laman Morto ta marka e elevashon di mas abou di tera. Na 1.388 pia bou di nivel di laman, e ta klasifiká komo e laman di mas abou di mundu. E riu Hordan ta kore for di e Laman di Galilea i ta sirkulá su kaminda a lo largu di e Vaye di Hordan te ora e yega na su fin den Laman Morto.

E klima kayente i seku, ku e lus di solo intenso i kondishonnan desierto, ta pone e awa evaporá basta rápido. Ya ku kontenido di e salu i mineral di e Laman Kòrá ta 33.7 porshento, poko kos ta sobrebibí den su awanan. No tin piská, ni matanan, solamente algun mikrobio i bakteria den fondo.

Den nos bida kristian, si e grasia di Dios ku ta kore den nos bida no ta flui bai na otronan, nos lo bira stanká i kasi sin bida meskos ku e Laman Morto. Komo Kristiannan, esaki no ta e manera ku nos mester biba.

Lesa Juan 7:37,38 i Lukas 6:38. Ora kreyentenan risibí e korientenan di awa bibu for di Kristu, kiko ta e resultado natural?

“Dios por a alkansá Su opheto di salba pekadornan sin nos yudansa; pero pa nos desaroyá un karakter meskos ku esun di Kristu, nos mester kompartí den Su obra. Pa asina drenta den Su goso, e goso di mira almanan redimí pa medio di Su sakrifisio, nos mester partisipá den Su labornan pa nan redenshon.”—Ellen G. White, The Desire of Ages, p. 142.

“Esnan ku lo tabata vensedónan mester ser halá for di nan mes; i e úniko kos ku lo kumpli ku e gran obra akí, ta di bira intensamente interesá den salbashon di otronan”—Ellen G. White, Fundamentals of Christian Education, p. 207.

Nos ta krese miéntras nos ta kompartí ku otronan loke Kristu a hasi den nos propio bida. Konsiderando tur loke nos a ser duná den Kristu, kiko sino solamente e egoismo di mas degradá lo por tene nos for di kompartí ku otronan loke a ser duná na nos mes? Si nos faya di kompartí nos fe, nos bida spiritual lo bira mes stanká ku e Laman Morto.

Lealtat na Kristu ta rekerí un kompromiso pa hasi Su boluntat. E tin mester di obediensia na Su mandatonan. E ta resultá den un kurason ku ta bati huntu ku Su kurason pa salba esnan pèrdí. E ta pone prioridat riba e kosnan ku E ta pone komo prioridat.

Lesa 1 Timoteo 2:3,4 i 2 Pedro 3:9. Kiko e pasashinan akí ta bisa nos tokante e kurason di Dios? Kiko ta Su prioridat?

Dios ta pashoná tokante salba hende. No tin nada mas importante p’E. Ta Su sinsero deseo pa “tur” ser salbá i “bin na konosementu di e bèrdat” (1 Tim. 2:4, NKJV). E “no ta dispuesto pa niun hende peresé sino ku tur mester bin na arepentimentu” (2 Pe. 3:9, NKJV). E Komentario Bíbliko di Atventistanan di e di Shete dia ta indiká ku e palabra griego usá pa “dispuesto” den e pasashi akí ta boulomai, kua ta ekspresá “e inklinashon di mente, manera ‘ke’ òf ‘deseá’ ”. E komentario e ora ei ta hasi e opservashon perspikas riba e palabra chikitu “pero”. E palabra griego pa “pero” ta alla. E ta ser usá aki “pa enfatisá e kontraste entre e misinterpretashon di e naturalesa di Dios, es desir, ku E lo por ta dispuesto pa algun peresé, i e bèrdat ku E ta deseá pa tur ser salbá.”—The SDA Bible Commentary, tomo 7, p. 615. E mandato di Kristu pa kada un di nos pa partisipá den Su mishon komo testigunan di Su amor, grasia i bèrdat ta un ekstenshon di Su deseo pa henter humanidat ser salbá.

Lesa Echonan 13:47 i kompar’é ku Isaias 49:6. Na ken e pasashi akí ta apliká na promé lugá? Kon apòstel Pablo ta us’é?

Tin momentunan ora un profesia di Tèstamènt Bieu tin mas ku un aplikashon. Aki apòstel Pablo ta tuma un profesia ku tabata referí promé na Israel i profétikamente na e Mesias (lesa Isa. 41:8, Isa. 49:6 i Lukas 2:32) i aplik’é na e iglesia di Tèstamènt Nobo. Pa e iglesia neglishá òf minimisá e mandato di Kristu ta pa faya den e propósito di su eksistensia i pèrdè su yamada profétiko na e mundu.

E siman akí nos a enfoká riba kontestá e pregunta: “Pakiko testifiká?” Nos a deskubrí ku ora nos kompartí nos fe,nos tin e goso di koperá ku Dios den Su mishon na e mundu. Nos testifikashon di Su amor ta proveé hende ku gran oportunidatnan pa salbashon, ya ku nan por mira Su grasia i bèrdat mas klaramente.

Na mes momentu, testifikashon ta tambe un di e medionan di Dios di yuda nos krese spiritualmente. Un fayo pa kompartí loke Kristu a hasi pa nos i pa ministrá na otronan ta strangulá bida spiritual genuino.

Testifikashon ta pone nos den kontakto ku kurason di Esun kende ta anhelá pa henter humanidat ser salbá. E ta un kontesta di obedensia na Su mandato. Den e estudio di awe nos lo saminá e motivashon di mas grandi pa testifikashon.

Lesa 2 Korintionan 5:14, 15, 18-20. Kiko a motivá Pablo pa eksperensiá prueba- i tribulashonnan pa kousa di e evangelio? Kon e mesun motivashon akí por stimulá nos sirbishi pa Kristu?

Apòstel Pablo tabata motivá pa amor. Tin kosnan ku lo bo hasi pa amor ku lo bo no hasi pa niun otro motibu. Ora e apòstel ta deklará: “E amor di Kristu ta obligá nos”, e ta papiando un bèrdat eterno. E palabra “obligá” ta nifiká “urgi, fòrsa, kontrolá, òf motivá ekstremadamente”. Asina, e amor di Kristu tabata kontrolá e akshonnan di Pablo i a motivá su testimonio. Ku propósito infleksibel i singularidat di mente, el a kompartí e plan di salbashon a lo largu di e mundu mediteráneo.

“Amor mester biba den e kurason. Un kristian konsiensudo ta saka su motibunan di akshon for di su amor profundo di kurason pa su Maestro. A traves di e raisnan di su afekto pa Kristu ta brota un interes apnegá den su rumannan.”—Ellen G. White, The Adventist Home, p. 425.

Ora nos rekonosé berdaderamente e inmenso sakrifisio ku Kristu a hasi pa nos, nos ta ser inundá pa Su amor i obligá pa kompartí ku otronan loke El a hasi pa nos.