Testifikashon Empoderá pa e Spiritu

Ku e promesa di Spiritu Santu, Hesus a respondé riba e preokupashon di e disipelnan tokante ku E tabata bandoná nan i regresá na shelu. “Ta na boso bentaha ku Mi ta bai; pasobra si Mi no bai, e Yudadó lo no bin serka boso; ma si Mi bai, lo Mi mand’E serka boso” (Juan 16:7, NKJV). E palabra griego pa “yudadó” ta parakletos. E ta referí na “un ku ta bin huntu ku” pa e propósito di yuda. Un di e funshonnan prinsipal di Spiritu Santu ta pa kompañá tur kreyente pa empoderá i guia nan den nan aktividatnan di testifikashon. Ora nos testifiká pa Hesus, nos no ta so. Spiritu Santu ta banda di nos pa guia nos na e buskadónan sinsero. E ta prepará nan kurasonnan promé ku nos topa nan. E ta guia nos palabranan, E ta trese konvikshon na mente di e buskadónan, i ta fortifiká nan pa respondé na Su impulsonan.

Lesa Juan 15:26,27 i Juan 16:8. Kiko e versíkulonan akí ta bisa nos tokante e ròl di Spiritu Santu den testifikashon?

Spiritu Santu ta testifiká òf duna testimonio di Hesus. Su meta final ta pa hiba tantu hende na Hesus ku ta posibel. Su mishon ta pa glorifiká Hesus. Den e ròl akí E ta konvensé tur kreyente di nan responsabilidat pa testifiká. E ta habri nos wowonan pa mira e posibilidatnan den hende tur rònt di nos i ta traha tras di kortina pa krea reseptividat na e mensahe di e evangelio.

E Evangelio di Juan ta deklar’é klaramente. E “lo konvensé e mundu di piká (Juan 16:8, NKJV). Den otro palabra, E ta move riba kurasonnan pa trese un sensashon profundo di aliniashon di Dios i e nesesidat di arepentimentu. Tambe E ta konvensé mundu “di hustisia”. No solamente Spiritu Santu ta revelá piká, E ta instruí nos den hustisia. E ta revelá e grandesa di e hustisia di Hesus den kontraste ku nos propio sushedat. E ròl di Spiritu Santu no ta simplemente pa señalá kon malu nos ta; e ta pa revelá kon bon, kon amabel, kon miserikòrdioso i kon amoroso Hesus ta i pa moldia nos na Su imágen.

Testifiká ta simplemente koperá ku Spiritu Santu pa glorifiká Hesus. Den e poder di e Spiritu i bou di Su guia nos ta testifiká di e Kristu asombroso akí kende a transformá nos bidanan.

E buki di Echonan korektamente a ser yamá “E Echonan di Spiritu Santu”. E ta un aventura eksitante di testifikashon, proklamashon evangelístiko, i kresementu di iglesia. Echonan ta e storia di kreyentenan konsagrá, yená ku Spiritu Santu, ku ta impaktando e mundu pa Kristu. Nan tabata totalmente dependiente riba Spiritu Santu pa logra resultadonan milagroso. Di nan ta un ehèmpel di loke Spiritu Santu por logra a traves di hòmber- i muhénan ku ta totalmente konsagrá na djE.

Lesa Echonan 2:41,42; Echonan 4:4,31; Echonan 5:14, 42; Echonan 6:7; i Echonan 16:5. Kiko ta impreshoná bo mas tokante e pasashinan akí? Kiko ta e mensahe ku Lukas, e outor di Echonan, ta deseá di kompartí dor di registrá un kresementu asina rápido?

E intenshon di Lukas ora el a skibi e buki di Echonan ta pa kompartí ku kada lektor e ministerio di Spiritu Santu den e iglesia primitivo.

Nota tambe ku e no ta duda pa usa kantidatnan pa midi e movementu di e Spiritu den e promé siglo. Es desir, e tabata kontando boutismo. Den Echonan 2:41 e ta destaká e echo ku 3.000 a ser batisá riba un solo dia na un solo lugá. Den Echonan 4:4 e ta papia di 5.000 hòmber ku a ser batisá. Den Echonan 5:14 multitutnan ta bin na Señor i ta ser batisá.

Sea ta un solo individuo manera Lidia, e wardadó di prezu di Filipos, un mucha muhé esklabo ku tabata poseé pa demoño, òf e eunuko etiope, Lukas ta tuma nota i ta registrá e movementu di Spiritu Santu den kurason di e personanan akí. E punto importante aki ta ku tras di kada un di e gran kantidatnan tin sernan humano individual, kada unu un yu di Dios pa ken Hesukristu a muri. Sí, nos gusta e kantidatnan grandi, ma al final, testifikashon hopi bia ta un esfuerso di persona na persona.

Pa fasilitá e kresementu rápido di e iglesia di Tèstamènt Nobo, iglesianan nobo a ser plantá. Un di e motibunan ku e iglesia primitivo a krese asina rápido ta pasobra e iglesia tabata ser renobá konstantemente pa medio di plantamentu di iglesianan nobo. Ki un mensahe importante pa nos awe.

Den henter e buki di Echonan, Spiritu Santu tabata poderosamente presente. E tabata ministrá na i a traves di e kreyentenan miéntras nan tabata testifiká pa nan Señor den un variedat di forma. E tabata fortalesé nan pa enfrentá e pruebanan i desafionan di testifiká den un kultura hostil. El a hiba nan na buskadónan di bèrdat sinsero. El a prepará e kurasonnan di e personanan den siudatnan kompletu promé ku e kreyentenan a yega na e siudatnan ei. El a habri portanan di oportunidat ku nunka nan a soña di dje i a empoderá nan palabra- i akshonnan.

Lesa Echonan 7:55; Echonan 8:29; Echonan 11:15; Echonan 15:28,29; i Echonan 16:6-10. Kon Spiritu Santu a ministrá na e disipelnan ku tabata testifiká den kada un di e eksperensianan numerá den e versíkulonan di Beibel akí? Den otro palabra, kiko tabata algun di e vários kosnan ku Spiritu Santu a hasi den e situashonnan akí?

E ministerio variá di Spiritu Santu den e promé siglo tabata realmente asombroso. E eksperensia akiriba ta djis un muestra di Su aktividat. El a fortalesé Esteban pa testifiká pa su Señor dilanti di un multitut sin miserikòrdia i for di kontròl ku tabata piedr’é te na morto. El a guia Felipe milagrosamente na un etiope influyente ku tabata buskando e bèrdat, pa habri e kontinente di Afrika pa e evangelio. El a duna Pedro un señal di konfirmashon ora e kreyentenan gentil tambe a risibí e don di Spiritu Santu. El a trese e iglesia huntu den unidat na un momentu ora ku fásilmente e por a dividí riba e tema di sirkumsishon, i El a habri henter e kontinente di Europa na e predikashon di e evangelio a traves di apòstel Pablo.

Spiritu Santu tabata aktivo den e iglesia di Tèstamènt Nobo i ta aktivo den bida di e iglesia awe. E ta anhelá pa empoderá nos, fortalesé nos, siña nos, guia nos, unifiká nos, i ta manda nos bai riba e mishon di mas importante den mundu, kua ta hiba hòmber- i muhénan na Hesus i Su bèrdat. E punto ku nos mester kòrda ta ku ainda E ta aktivo i trahando awe, meskos ku E tabata den tempu di e apòstelnan i e iglesia primitivo.

E Palabra di Dios tabata den e kurason mes di e testimonio di e iglesia di Tèstamènt Nobo. E sermon di Pedro riba dia di Pentekòste a basa su mes prinsipalmente riba Tèstamènt Bieu pa proba ku Kristu tabata e Mesias. E testimonio di Esteban ora e tabata muriendo a repasá e historia di Israel den Tèstamènt Bieu. Pedro a referí na e “palabra ku Dios a manda pa e yunan di Israel” (Echonan 10:36, NKJV) i despues el a kompartí e storia di Resurekshon ku Cornelio. Apòstel Pablo a referí bes tras bes na e gran predikshonnan enkuanto di e binida di e Mesias, i Felipe a splika kuidadosamente na un etiope buskando e nifikashon di e predikshon mesiániko den Isaias 53. Den kada kaso, e disipelnan a proklamá e Palabra di Dios, no esun di nan mes. E Palabra inspirá pa e Spiritu tabata e base di nan outoridat.

Lesa Echonan 4:4,31; Echonan 8:4; Echonan 13:48,49; Echonan 17:2; Echonan 18:24,25. Kiko e pasashinan akí ta siña nos tokante e relashon entre Spiritu Santu, e Palabra di Dios, i e testimonio di e iglesia di Tèstamènt Nobo?

E mesun Spiritu Santu ku a inspirá e Palabra di Dios ta traha a traves di e Palabra pa kambia bidanan. Tin un poder ku ta duna bida den e Palabra di Dios pasobra, a traves di e Spiritu, e ta e Palabra bibu di Kristu.

Lesa 2 Pedro 1:21 i Hebreonan 4:12. Dikon e Palabra di Dios ta asina poderoso pa kambia bidanan?

“E energia kreativo ku a yama e mundunan den eksistensia ku e palabra di Dios. E Palabra akí ta impartí poder; e ta engendrá bida. Kada òrdu ta un promesa; aseptá pa e boluntat, risibí den e alma, e ta trese kuné e bida di Esun Infinito. E ta transformá e naturalesa i ta bolbe krea e alma den e imágen di Dios”. — Ellen G. White, Education, p. 126.

E motibu ku Beibel tin tal poder pa transformá bida ta pasobra e mesun Spiritu Santu ku a inspirá e Beibel na promé lugá ta inspirá i kambia nos segun ku nos ta les’é. Ora nos ta kompartí e Palabra di Dios ku otronan, Spiritu Santu ta traha pa kambia nan bida a traves di e Palabra ku El a inspirá. Dios a primintí di bendishoná Su Palabra, no nos palabranan. E poder ta den e Palabra di Dios, i no den spekulashon humano.

Un estudio kuidadoso di e buki di Echonan ta revelá Dios a traves di Su Spiritu obrando milagernan den bidanan humano. Echonan ta un estudio di kaso riba e triunfo di e evangelio ku ta triunfá riba prehuisionan kultural, transformando kustumbernan di bida largu, profundamente ankrá, i siñando henter humanidat e grasia i bèrdat di Kristu. Spiritu Santu ta topa hende kaminda nan ta, pero E no ta laga nan ei. Den Su presensia, nan ta ser kambiá. Nan bidanan ta ser transformá.

Lesa Echonan 16:11-15,23-34; Echonan 17:33,34; i Echonan 18:8. Esakinan ta djis un par di e storianan di kombershon den Beibel. Kiko e vários relatonan ta siña nos tokante e poder di Dios pa kambia bida di tur sorto di hende di vários orígen?

Ki un variedat asombroso di hende. Lidia tabata un empresario hudiu próspero, i e wardadó di prezu di Filipos tabata un funshonario romano di klase media. Spiritu Santu por alkansá tur área di sosiedat. Su poder pa transformá ta alkansá tantu hòmber komo muhé, riku i pober, eduká i sin edukashon.

E último dos personahenan riba nos lista ta igualmente remarkabel. Echonan 17:34 ta referí na e kombershon di Dionisio e areopagita. E areopagitanan di Atenas tabata parti di e tribunal legal di huesnan ku tabata trata kasonan hudisial. Nan tabata miembronan prominente i bon respetá di sosiedat griego.

A traves di e poder di Spiritu Santu, e ministerio di apòstel Pablo a alkansá asta e rango superior di sosiedat. Crispo (Echonan 18:8) tabata un gobernadó di e sinagoga hudiu. E tabata un lider religioso saturá den pensamentu hudiu di Tèstamènt Bieu, i Spiritu Santu a habri kaminda i a kambia su bida. E historianan di kaso akí ta revelá ku, segun ku nos ta testifiká pa Kristu i kompartí Su Palabra ku otronan, Spiritu Santu lo hasi kosnan remarkabel den bida di tur sorto di hende di tur sorto di orígen, kultura, edukashon, i kreensia. Nos no por i no mester hasi suposishonnan tokante ken por òf no por ser alkansá. Nos trabou ta pa testifiká na tur hende tresé den nos bida. Señor lo hasi sobrá.