Posibilidatnan Ilimitá

Bo a yega di konsiderá kon diferente for di otro e disipelnan tabata? Nan antesedente-, personalidat-, temperamentu- i donnan tabata varia grandemente. Pero esaki no tabata un debilidat pa e iglesia. E tabata fortalesa. Mateo, un kobradó di belasting, tabata kuidadoso, eksakto i minusioso. Kontrali na esei, Pedro hopi bia tabata papia rápido, i tabata entusiasmá i impulsivo, pero tambe e tabatin kualidatnan natural di liderazgo. Juan tabata tierno ma franko tambe. Andres tabata un persona amabel, ekstremadamente konsiente di esnan rondó di dje, i sensitivo na otronan. Tomas tabatin e inklinashon natural di kuestioná, i tabata duda hopi bia. Kada un di e disipelnan akí, aunke nan tabatin diferente personalidat- i donnan, tabata ser usá poderosamente dor di Dios pa testifiká p’E.

Lesa 1 Korintionan 12:12,13, 18-22. Kiko nos ta deskubrí den e pasashinan akí tokante e nesesidat pa hendenan di diferente don den e kurpa di Kristu, e iglesia?

Dios ta deleitá den tuma hendenan di diferente orígen ku diferente talento- i abilidatnan i ta duna regalonan pa servisio na nan. E kurpa di Kristu no ta un grupo homogéneo di hende ku tur ta meskos. E no ta un klup di kampo ku hendenan di e mesun orígen ku tur ta pensa meskos. E ta un movementu dinámiko di hende ku diferente donnan, uní den nan amor pa Kristu i pa Skritura, i ku ta komprometé pa kompartí Su amor i bèrdat ku e mundu (Rom. 12:4, 1 Kor. 12:12). E miembronan di e kurpa di Kristu tin diferente donnan, pero kada un ta balioso; kada un ta krítiko pa e funshonamentu saludabel di e kurpa di Kristu. Meskos ku e wowonan, oreanan i nanishi tin diferente funshon pero ta nesesario pa e kurpa, tur don ta nesesario tambe (1 Kor. 12:21, 22).

Si bo konsiderá e kurpa humano kuidadosamente, asta e partinan di mas chikitu tin un ròl krusial. Konsiderá nos wempelnan. Ke tal si nos no tabatin algu tan insignifikante aparentemente manera wempelnan? Partíkulanan di stòf lo a nubla nos vishon, i e konsekuensianan ku a resultá probablemente lo por a kousa dañonan ireparabel. E miembro di iglesia ku parse esun di mas “insignifikante” ta un parti esensial di e kurpa di Kristu i a ser dotá pa Spiritu Santu. Ora nos dediká e donnan akí totalmente na Dios, kada un di nos por hasi un diferensia eterno.

Di akuerdo ku 1 Korintionan 12:11,18; Efesionan 4:7,8; i Santiago 1:17, Dios ta e originadó di tur don, i “tur don perfekto” ta bin di djE. Pues, nos por ta sigur ku E lo duna nos é donnan di Spiritu Santu ku ta pas mihó ku nos personalidat, i E lo usa nos abilidatnan mihó pa sirbi Su kousa i glorifiká Su nòmber.

Lesa Marko 13:34 i 1 Korintionan 12:11. Na ken Dios ta duna donnan spiritual?

Beibel ta kla. Dios tin un tarea spesial pa kada un di nos den kompartí e evangelio ku otronan. Den e parabel di Hesus di e kabes di famia ku ta laga su kas pa su sirbidónan i ta pidi nan pa kuid’é p’e, e doño di kas ta duna su sirbidónan nan trabou enkargá (Marko 13:34). Tin un tarea pa kada individuo, i Dios ta duna donnan spiritual na tur hende pa kumpli ku e tarea divino òf ministerio ku nan ta ser yamá p’e. Ora nos someté nos bida na Kristu, i a traves di boutismo bira miembronan di Su kurpa, e iglesia, Spiritu Santu ta duna donnan pa asina nos por sirbi e kurpa i testifiká na e mundu.

Na 1903 Ellen G. White a skibi un karta na un sierto hòmber pa enkurash’é pa usa e donnan ku Dios a dun’é den servisio. “Nos tur ta miembronan di e famia di Dios, tur den un grado mas grandi òf ménos konfiá ku talentonan duná di Dios, pa e uso di kua nos ta ser tené responsabel. Sea nos talento ta grandi òf chikitu, nos mester us’é den servisio di Dios, i nos mester rekonosé e derecho di tur otro hende pa usa e donnan konfiá na nan. Nos no mester despresiá nunka e kapital físiko, intelektual òf spiritual di mas chikitu”. — Letter 260, 2 di desèmber 1903.

Lesa Echonan 10:36-38; Mateo 3:16,17; i Echonan 2:38-42. Kiko e tekstonan akí ta siña nos tokante e promesa di Spiritu Santu na boutismo?

Meskos ku Hesus a ser ungí ku Spiritu Santu na Su boutismo pa prepar’E i ekip’E kompletamente pa Su ministerio na e mundu, kada un di nos ta ser primintí e Spiritu Santu na nos boutismo. Dios ta anhelá pa nos tin e seguridat positivo ku El a kumpli ku Su Palabra i a duna donnan spiritual na nos pa bendishoná Su iglesia i e mundu.

Read 1 Corinthians 12:7 and Ephesians 4:11-16. Why does God impart spiritual gifts to each believer? What are the purposes of those gifts?

Donnan spiritual ta sirbi vários propósito. Dios ta duna nan pa nutri i fortalesé Su iglesia pa kumpli ku Su ministerio. Nan ta diseñá pa desaroyá un iglesia unifiká; kla pa kumpli ku Su mishon den mundu. E eskritornan di Beibel ta duna nos ehèmpelnan di e donnan spiritual ku Dios ta konsedé na Su iglesia, manera ministrá, sirbi, proklamá, siña, enkurashá i duna. E ta papia tambe tokante e donnan di hospitalidat, miserikòrdia, yudansa, i alegria, pa menshoná djis algun. Pa un lista mas kompletu, lesa Romanonan 12 i 1 Korintionan 12.

Bo por ta puntrando bo mes tokante e relashon entre donnan spiritual i talentonan natural. Donnan spiritual ta kualidatnan konsedé divinamente ku ta ser duná dor di Spiritu Santu na kada kreyente pa ekipá nan pa nan ministerio spesial den iglesia i servisio na e mundu. Nan por inkluí tambe talentonan natural ku ta ser santifiká pa Spiritu Santu i usá den servisio pa Kristu. Tur talento natural ta duná pa Dios, pero no tur ta ser usá den servisio pa Kristu.

“E donnan spesial di e Spiritu no ta e úniko talentonan representá den e parabel. E ta inkluí tur don i talento, sea original òf atkerí, natural òf spiritual. Tur mester ser usá den servisio di Kristu. Ora nos bira Su disipelnan, nos ta someté nos mes na djE ku tur loke nos ta i tin. E donnan akí E ta debolbé na nos, purifiká i elevá, pa ser usá pa Su gloria den bendishoná nos próhimonan”. — Ellen G. White, Christ’s Object Lessons, p. 328.

Tambe Dios a establesé donnan spesial manera e don di profesia i funshonnan spesífiko den iglesia, inkluyendo pastor-, ansiano- i maestronan, ku ta maestronan denter di e kurpa di Kristu pa nutri i ekipá kada miembro pa servisio (lesa Efe. 4:11,12). E funshon di tur liderazgo di iglesia ta pa yuda kada miembro pa deskubrí nan donnan spiritual i siña nan pa usa e donnan akí pa edifiká e kurpa di Kristu.

Kompará 1 Korintionn 1:4-9 ku 2 Korintionan 1:20-22. Kiko e pasashinan akí ta bisa nos tokante e promesanan di Dios i spesialmente donnan spiritual promé ku e segundo binida di Kristu?

Dios ta primintí ku Su iglesia lo manifestá tur e donnan di Spiritu Santu djis promé ku e regreso di nos Señor. Su promesanan ta sigur. El a duna nos e testimonio di Spiritu Santu den nos kurason pa guia kada un di nos na un komprondementu di e donnan ku El a duna nos. Ta Dios ta esun kende ta duna e donnan i Dios a traves di Su Spiritu kende ta revelá nan na nos.

Lesa Lukas 11:13, Santiago 1:5, i Mateo 7:7. Si nos ta deseá di deskubrí e donnan ku Dios a duna kada un di nos, kiko E ta invitá nos pa hasi?

Nos ta risibí e donnan di Spiritu ora nos konsagrá nos mes na Dios i pidiE pa revelá nos e donnan ku El a duna nos. Ora nos kurasonnan ser hasí bashí di gloria propio i nos prioridat ta pa sirbi Hesus, Su Spiritu lo impreshoná nos ku e donnan spiritual ku E tin pa nos. “No te ora, pa medio di fe i orashon, e disipelnan a someté nan mes kompletamente na Su obra, ku e dramamentu di e Spiritu a ser risibí. E ora ei, den un sentido spesial, e biennan di shelu a ser entregá na e siguidónan di Kristu ... . E donnan ya ta di nos den Kristu, pero nan poseshon berdadero ta dependé riba nos resepshon di e Spiritu di Dios”. — Ellen G. White, Christ’s Object Lessons, p. 327.

Donnan spiritual (lesa 1 Kor. 12:4-6) ta kualidatnan ku Dios ta duna pa asina nos por sirbiE efektivamente. Ministerionan ta e áreanan general den kua nos por ekspresá nos donnan, i aktividatnan ta e eventonan spesífiko ku ta permití nos usa nos donnan. Donnan spiritual no ta bin kompletamente desaroyá. Segun ku Spiritu Santu ta impreshoná bo ku algun área di servisio, hasi orashon pa E guia bo na un ministerio spesífiko pa ehersé bo don a traves di un aktividat mishonero.

Lesa e parabel di e talentonan den Mateo 25:14-30. Kiko ta e pensamentu di mas signifikante ku ta destaká na bo den e storia akí? Dikon e promé dos sirbidónan a ser elogiá pa Dios i e último sirbidó kondená? Kiko e parabel akí ta bisa nos tokante e uso di nos talentonan? Nota partikularmente Mateo 25:29.

E shon a duna kada sirbidó talentonan di akuerdo ku nan “propio abilidat” (Mat. 25:15, NKJV). Kada individuo a risibí un kantidat diferente. Un a risibí sinku talento, un otro dos, i un otro unu. Kada sirbidó tabatin un eskoho di kon invertí òf usa e talentonan ku a ser duná na nan. Un punto krusial aki ta ku loke a ser duná na nan no tabata di nan. E tabata pertenesé na un otro hende ku a duna nan enkargo riba dje.

E preokupashon di e shon no tabata ken tabatin talentonan superior òf ken tabatin inferior. No tabata kuantu talento a ser duná na kada un. E preokupashon tabata loke kada un a hasi ku loke a ser duná na dje.

Pablo ta pon’é di e forma akí den 2 Korintionan 8:12 (NKJV): “Ma si promé tin un mente boluntario, e ta ser aseptá di akuerdo ku loke un hende tin, i no di akuerdo ku loke e no tin”. Pa Dios, loke ta importá no ta asina tantu kiko bo tin, sino mas bien, loke bo ta hasi ku loke bo tin.

Dios a elogiá e promé dos sirbidónan pasobra nan tabata fiel den uso di nan talentonan. Nan talentonan a oumentá ku uso. E sirbidó “malu” no a usa e talento ku e shon a dun’é, i e no a oumentá. Ta un bèrdat eterno ku “E lei di servisio ta bira e konekshon ku ta uni nos na Dios i na nos próhimo”. — Ellen G. White, Christ’s Object Lessons, p. 326. E sirbidó infiel a desperdisiá su oportunidat di sirbi i finalmente a pèrdè e abilidat di sirbi.

Ora nos usa e donnan ku Dios a duna nos pa gloria di Su nòmber, nan lo oumentá, ekspandé, i krese. Kon bo por deskubrí e donnan ku Dios a duna bo? Pidi Dios humildemente pa revelá na bo e áreanan den kua E ta deseá pa bo sirbi pa ministerio. Segun ku E ta impreshoná bo, bira enbolbí. Bo donnan lo krese segun ku bo ta usa nan, i lo bo haña satisfakshon den Su servisio.