Desaroyá un Aktitut Ganadó

Lesa Juan 4:27-30, 39-42. Kon e interakshon di Hesus ku e muhé Samaritano ta demostrá e bèrdat ku tur sorto di hende ta habrí pa e evangelio, asta den lugánan inesperá?

E último lugá ku e disipelnan a spera di topa kurasonnan reseptivo na e evangelio tabata na Samaria. E Samaritanonan tabata den konflikto konstante ku e Hudiunan tokante doktrina i adorashon. E enemistat aki tabata dékadanan bieu. E Samaritanonan ke a partisipá den konstrukshon di e tèmpel na Yerusalèm, pero a ser nengá e oportunidat ei pa motibu di nan matrimonionan miksto ku e kultura pagano rònt di nan i nan opinionnan ku no ta òrtodòks. Komo resultado, e Samaritanonan a konstruí nan propio tèmpel riba Seru Gerizim. E disipelnan lo a pasa purá banda di Samaria bai komo un tereno infértil pa proklamashon di e evangelio.

Hesus sí tabata mira loke e disipelnan no tabata mira: kurasonnan reseptivo. Huan ta kuminsá su deskripshon di historia di e muhé na e pos ku e palabranan aki: "El a sali for di Hudea i a regresá Galilea. Pa yega Galilea e mester a pasa via Samaria" (Huan 4:3, 4). Hesus "mester" a pasa dor di Samaria, pasobra Spiritu Santu a konvensé ku lo tin kurasonnan habri pa e evangelio den e lugá improbabel aki. Ora nos bista ta divinamente ungí pa Spiritu Santu, nos lo mira posibilidatnan kaminda otronan ta mira solamente problema. Nos ta mira un kosecha grandi di almanan pa e reino di Dios, ora ku otronan ta mira solamente tereno seku i bandoná.

Lesa Echonan 8:4, 5, 14. Kiko tabata resultado final di e ministerio di Hesus na Samaria?

E disipelnan lo a pasa Samaria por alto sin nunka proveé un oportunidat pa e Samaritanonan tende bèrdat di e Palabra di Dios. Hesus a mira loke nan no tabata mira. El a rekonosé ku Spiritu Santu a krea un reseptividat den kurason di un muhé. Su kombershon dramátiko a hasi impakto riba desena di hende den e siudat ei. No semper nos lo mira resultadonan inmediato di nos aktividatnan di testifikashon, pero si nos sembra simianan den kurasonnan reseptivo, un dia nan lo produsí un kosecha pa e gloria di Dios.

Nos aktitutnan hopi biaha ta determiná nos abilidat di influensiá otronan. Un aktitut severo, krítiko, i hostil ta bai alehá hende for di bo, i asta si bo logra testifiká, bo palabranan, no importá kon sinsero, ta muchu ménos probabel di ser risibí.

Kontrali di esei, un aktitut positivo i un kreensia den otronan ta hala nan serka nos. E ta krea un laso di amistat. Hesus a deklará e prinsipio akí maraviosamente ora El a bisa: "Mi no ta yama boso sirbidó mas, pasobra un sirbidó no sa kiko su shon ta hasiendo; ma Mi a yama boso amigu, pasobra tur kos ku Mi a tende di mi Tata Mi a hasi konosí na boso" (Juan 15:15, NKJV). Amigunan ta aseptá otro apesar di nan debilidat- i erornan, i libremente nan ta kompartí nan goso- i tristesanan.

Lesa Mateo 15:21-28 i Marko 14:6-9. E tekstonan akí ta deskribí dos muhé di sirkunstansianan ekstensivamente diferente. Hesus ta parse di ta duru ku unu i amabel ku e otro. Ki indikashonnan bo tin den e pasashinan akí ku Hesus tabata ekstendiendo Su grasia salbador ku kada un i generando konfiansa?

E muhé den Mateo 15 ta un kananeo. Intenshonalmente Hesus a rechasá su petishon na prinsipio pa, miéntras e ta persistí, su fe lo krese. Finalmente E ta konsedé ku su deseo i despues E ta hasi un deklarashon sorprendente ku ningun lider religioso na Hudea na e momentu ei hamas lo a hasi na un pober muhé kananeo. E ta bisa públikamente: "O muhé, grandi ta bo fe!" (Mat. 15:28, NKJV). E ta dun’é un di e kòmplimèntnan di mas grandi ku kualke maestro religioso hamas por a duna. Bo por imaginá kon kurason di e muhé a regosihá i su bida a kambiá?

E muhé ku ta ungi e pianan di Hesus ku perfume karu ta un Hudiu, un muhé di mal reputashon, un muhé ku a faya gravemente i a hasi piká hopi biaha, pero e tabata un ku a ser pordoná, transformá, i renobá. Ora otronan ta kritik'é, Hesus ta felisit’é i ta aprobá su akshonnan. E ta deklará: "Na unda ku e evangelio akí ser prediká den henter mundu, loke a muhé aki a hasi lo ser kontá tambe komo un rekordatorio na dje" (Marko 14:9, NKJV).

Amistat so no ta gana hende pa Kristu. Kisas nos por tin hopi amigu, hende ku nos gusta di ta huntu kuné i ku gusta di ta huntu ku nos, pero si nunka nos no bisa nan kiko Hesus ta nifiká pa nos i kon El a kambia nos bida, nos amistat por hasi tiki diferensia eterno. Klaro, por ta dushi pa ta rònt di nos, pero Dios ta yama nos pa mas ku dushi pa ta huntu kuné. Amistat so lo no trese hende na Kristu, pero aktitutnan hostil por alehá hende for di Kristu.

Apòstel Pablo ta kòrda nos pa papia "e bèrdat den amor" (Efe. 4:15). E lasonan di amistat ta ser konstruí ora nos ta di akuerdo ku hende tantu ku ta posibel, demostrá aseptashon, i kòmplimènt nan kaminda ta apropiá. Ki importante ta pa nos hasié un kustumber di buska e bon den hende, kontrali na e malu.

Lesa 2 Tesalonisensenan 1:1-4. Menshoná algun di e kosnan spesífiko ku Pablo ta felisitá e tesalonisensenan p'e.

Tin esnan ku parse nan ta deleitá di buska kosnan ku ta robes den otronan, si ta pa ningun otro rason ku esaki ta pone nan sinti mihó ku nan mes.

Apòstel Pablo tabata lo kontrali. E tabata buska loke ta positivo den e iglesianan ku e tabata ministrá na dje. Siguramente, e tabata reprendé eror i no tabata tolerá piká, pero su enfoke tabata pa edifiká e iglesianan ku el a establesé. Un manera kon e tabata hasi esaki tabata dor di suprayá loke nan tabata hasi bon.

E deklarashon di Ellen G. White riba e importansia di relashonnan positivo ta remarkabel. "Si nos lo a humiá nos mes dilanti di Dios, i ta kariñoso i kortes i kompasivo, i piadoso [yen di piedat], lo tabatin shen kombershon na e bèrdat, kaminda awor tin solamente un". - Testimonies for the Church, tomo 9, p. 189.

Lesa Romanonan 15:7 i Efesionan 4:32. Kon lo bo a deskribí e fundeshi di tur aseptashon? Kua ta e esensia di un aktitut di aseptashon?

Den e dos pasashinan akí apòstel Pablo ta presentá e prinsipionan ku ta base di nos aseptashon di otro. Pasobra Kristu a pordoná i a aseptá kada un di nos, nos por, posiblemente, nenga di pordoná i aseptá otro? De echo, ta presisamente pasobra Hesus a risibí nos, ku nos por risibí otro, asta apesar di e defektonan di e otro.

Pensa bon riba kiko esaki ta nifiká. Pensa riba bo mes i riba algun di e kosnan ku bo a hasi i kisas ta luchando ainda kuné, kosnan ku, kisas, abo so sa di nan, kosnan ku lo bo tin hopi miedu si otro hende tambe tabata sa di dje.

I sinembargo, kiko? Pa fe bo ta ser aseptá den Kristu, kende sa tur kos di loke otronan kisas no sa nada. Sí, E sa tur esei, i sinembargo, E ta aseptá bo di tur manera, no pa motibu di bo propio bondat, sino pa motibu di esun di djE mes.

Kiko, anto, mester ta bo aktitut pa ku otronan?

Aki tin un konsepto difísil pa algun komprondé. Aseptashon genuino ta nifiká ku nos ta aseptá hende manera nan ta, ku tur nan kustumbernan pekaminoso, pasobra nan ta sernan humano kreá den e imágen di Dios. Pasobra Kristu a muri pa nos "miéntras nos tabata pekadornan ainda" i "a rekonsiliá nos ku Dios" ora nos tabata Su enemigunan, nos por pordoná i aseptá otronan. Su amor pa ku nos ta bira e fundeshi mes di nos aseptashon i pordon pa ku otronan (Rom. 5:6-10).

Pero unabes ku un relashon di aseptashon i afekto a ser establesé, hopi biaha ta nesesario pa konfrontá un otro individuo amorosamente ku e bèrdatnan di Skritura. Faya di hasi esaki ta neglishá di stima. Komo amigunan nos ta preokupá sufisiente pa kompartí bèrdatnan eterno ku ta kambia bida ku nos amigunan.

E aktitut di Hesus no tabata: "Hasi kiko ku bo ke. E ta bon. Ainda Mi ta aseptá bo". Su aktitut tabata, mas bien: "No importá kiko bo a hasi, Mi ta dispuesto pa pordoná bo i proveé bo ku poder pa kambia". Bèrdatnan bíbliko presentá humildemente den e Spiritu di Kristu ku un aktitut amoroso ta gana kurasonnan i kambia bidanan.

Hesus no a neglishá di presentá bèrdat pa "motibu di amor", pasobra esei lo no tabata amor. Amor semper ta buska e mihó pa un otro. No tin konflikto entre amor i bèrdat. Bèrdat presentá humildemente i di forma amabel ta un deklarashon di amor. Hesus a bisa: "Ami ta e kaminda, e bèrdat, i e bida" (Juan 14:6). Hesus ta e úniko kaminda di salbashon (Echonan 4:12). Su grasia ta salba nos pa asina nos por konosé Su bèrdat i biba Su bida. Bèrdat sin amor ta hiba na legalismo sofokante, ku ta choka bida spiritual. Asina yamá “amor” sin bèrdat ta hiba na sentimentalismo tolerante sin sustansia, lagando un hende keda drif riba un laman di insertidumbre. Bèrdat presentá den amor ta hiba na un eksperensia kristian outéntiko ku ta proveé direkshon, propósito i siguransa kla.

Lesa 1 Pedro 3:15; 2 Timoteo 4:2; i Tito 3:4, 5. Ki ekspreshonnan den e versíkulonan akí ta presentá e balanse entre presentá bèrdat bíbliko i un spiritu humilde i di aseptashon?

E eskritornan di Tèstamènt Nobo nunka ta enfatisá amor riba bèrdat. Nan tabata kombiná maraviosamente amor i bèrdat, grasia i lei, kompashon i honestidat. Pedro ta spièrta rumannan kreyente pa "pa duna un defensa na tur hende ku pidi boso un rason pa e speransa ku tin den boso, ku humildat i temor" (1 Pe. 3:15, NKJV). Den otro palabra, bo mester sa kiko bo ta kere, dikon bo ta ker’é, i ta kapas pa splika loke bo ta kere i dikon. Esaki no ta nifiká ku bo tin tur e kontestanan òf mester ta kapas di konvensé otronan di bo kreensianan. E ta nifiká solamente ku, ku “humildat i temor”, es desir, ku humildat i un sentido di e grandesa di e temanan ku ta den wega, bo por splika i defendé bo fe.

Pablo ta konsehá su disípulo hóben Timoteo pa "Prediká e palabra! Sea dispuesto den tempu i fuera di tempu. Konvensé, reprendé, spièrta, ku tur pasenshi i siñansa" (2 Tim. 4:2, NKJV). E ta rekordá Tito ku ta e bondat i amor di Dios a salba esnan ku a nase di nobo den djE (Tito 3:5).

Nos tambe ta yamá pa presentá e bèrdat den amor ku tur mansedumbre i humildat. Nos Señor ta invitá nos pa uni kunE pa kompartí ku amor i aktitut di aseptashon Su mensahe di tempu di fin pa un mundu ku ta muriendo sin Kristu.