Un Forma Eksitante pa Bira Enbolbí

Lesa Génesis 1:1, 2, 26; Hebreonan 1:1, 2; i Efesionan 3:8, 9. Kon e versíkulonan akí ta revelá e unidat di e Deidat?*

E Tata, Yu, i Spiritu Santo a partisipá huntu den Kreashon. Nan kada un tabatin tareanan diferente, pero a traha huntu den un union indivisibel. E Tata tabata e Diseñadó Maestro, e gran arkitekto. El a realisá Su plannan a traves di Hesus, komo e agente aktivo den Kreashon, den unísono ku e poder di Spiritu Santo. Un akto sobrenatural asina poderoso ta mas ayá di nos komprondementu. Loke nos por komprondé, i klaramente tambe, no ta solamente e realidat di e mundu kreá i e kósmos pero tambe ku Dios Mes a traha tur kos (lesa Romanonan 1:18-20).

Gruponan chikí tabata idea di Dios promé. Aunke mester ta kuidadoso ora ta usa analogianan respekto hopi di e aspektonan misterioso di Dios, laga nos usa unu libremente i bisa ku e Tata, Yu i Spiritu Santo tabata komponé e promé "grupo chikí" den historia di salbashon. Nan a partisipá huntu den kreashon di e rasa humano i despues den su redenshon despues di e Kaida.

Kompará Juan 10:17, 18 ku Romanonan 8:11; i 1 Korintionan 15:15. Kon e resurekshon di Kristu ta demostrá e unidat di e Tata, Yu i Spiritu Santo den e plan di salbashon?

E Tata, Yu i Spiritu Santo ta uní den un "grupo chikí" ku e propósito indiká di redimí e rasa humano. "E plan di salbashon tabatin su lugá den e konsilionan di e Infinito for di tur eternidat". - Ellen G. White, Fundamentals of Christian Education, p. 186. No tin nada mas importante pa Dios ku salba mas tantu hende posibel (1 Tim. 2:4; 2 Pe. 3:9). Gruponan chikí por tin múltiple propósito ku nos lo studia den e lès di e siman akí, pero nan propósito primordial ta pa focus riba gana hendenan pèrdí pa Hesus. Es desir, dor di traha den gruponan chikí, nos por yuda no solamente nos mes sino otronan tambe. Es desir, e meta final di nos gruponan chikí ta pa gana almanan.

Beibel ta proveé numeroso ehèmpelnan di gruponan chikí ku ta hasi orashon, tin kompañerismo, ta enkurashá otro, i ta traha huntu pa Kristu. E gruponan aki tabata proveé e pueblo di Dios e oportunidat pa kompartí responsabilidatnan i usa nan diferente donnan mas plenamente. Es desir, gruponan chikí por proveé tambe e oportunidat pa Señor usa kada un di nos mas plenamente.

Lesa Eksodo 18:21-25. Ki konseho providensial e suegro di Moises, Jethro, a proveé ku a hasi un diferensia signifikante pa Moises? Dikon e plan aki tabata vitalmente importante?

Kada individuo den e kampamentu di Israel a bira partí di un grupo di dies, guiá pa un ofisial deboto. E gruponan chikí akí tabata un lugá pa resolvé problema, pero nan tabata tambe muchu mas. Nan tabata lugánan di kompañerismo kaminda problemanan por a ser evitá i bida spiritual nutrí. Nan tabata lugánan di vishon, kaminda e plannan di Dios pa Israel por a ser kompartí. Den gruponan manera esaki, hende por a forma relashonnan estrecho i afektuoso ku por a yuda tur envolví pa atendé ku kualke problema ku nan tabata konfrontá. Sin duda, e tempu aya, i meskos awor, hende tabata lucha ku kosnan ku otronan por a yuda nan kuné. Gruponan chikí ta proveé oportunidatnan pa kompañerismo kaluroso i afektuoso, kresementu spiritual, i resolushon di problema.

Ta fasinante ku ekspertonan di gruponan chikí ta bisa nos ku tamaño ideal pa interakshon di grupo ta entre seis i diesdos persona. Esaki ta e tamaño eksakto ku tantu Moises komo Hesus a usa pa forma nan gruponan.

Lesa Lukas 6:12, 13; Mateo 10:1; i Marko 3:13-15. Kiko tabata e propósito dòbel di Hesus ora El a yama e disipelnan i a skohe nan pa ta parti di Su ministerio di grupo chikí?

E propósito di Hesus ora El a yama e disipelnan tabata pa prepará nan tantu spiritualmente komo práktikamente pa nan mishon na e mundu. Den komunion kunE nan lo a krese den grasia. Den konteksto di nan reunionnan di grupo chikí, nan lo a siña kon pa ministrá mas efektivamente. Dia pa dia, miéntras nan tabata opservá Hesus ministrando na e nesesidatnan di hendenan rònt di djE, nan lo a siña a traves di opservashon kon pa usa nan donnan. E propósito di e gruponan chikí di Hesus tabata tantu nutrishon spiritual komo mishon.

Lesa 1 Korintionan 12:12-25. Kon e kurpa humano ta proveé un ilustrashon ekselente di traha huntu den harmonia den gruponan chikí?

Pablo no solamente ta revelá e importansia di donnan spiritual den bida di e iglesia, pero e ta sugerí tambe un modelo kon nan por ta organisá. E ta diskutí donnan spiritual den konteksto di e kurpa di Kristu i kon e por funshoná.

Un estudio di anatomia i fisiologia ta revelá ku e órganonan di e kurpa ta organisá den diferente sistemanan ku ta relashoná ku otro. Por ehèmpel, esnan digestivo, kardiovaskular, respiratorio, i skeletal ta djis un par di e sistemanan orgániko kompliká di e kurpa. Donnan spiritual ta meskos ku e diferente partinan di e kurpa. Nan ta funshoná mihó ora nan ta organisá den sistema- òf gruponan. De echo, den mayoria kaso nan no por funshoná nan so. Nos kurpa no ta djis un masa di órganonan separá ku ta move libremente den kualke kos ku nan ta hasi. Kada funshon korporal ta organisá den un sistema hopi uní ku ta traha huntu pa ku un meta komun.

Tur esaki ta bisa nos algu tokante e medioambiente den kua nos por usa nos donnan spiritual mihó. Ta asina fásil pa bira desanimá ora nos ta funshoná nos so, pero ora nos ta partí di un grupo chikí di hendenan ku interes- i metanan similar, nos ta deskubrí ku nos esfuersonan por ta muchu mas mihó enfoká i grandemente magnifiká.

Gruponan chikí ta proveé e mihó medioambiente pa ehersé nos donnan spiritual i por bira e kurason di e ministerio mishonero di un kongregashon lokal.

Ellen G. White ta suprayá e balor di gruponan chikí den e palabranan akí: "E formashon di gruponan chikitu komo un base di esfuerso kristian a ser presentá na mi pa Unu ku no por faya. Si tin un gran kantidat den iglesia, laga e miembronan ser formá den gruponan chikí, pa traha no solamente pa e miembronan di iglesia, sino pa inkrédulonan. Si den un lugá tin solamente dos òf tres ku konosé e bèrdat, laga nan forma nan mes den un grupo di obrero. Laga nan tene nan laso di union konstante, primiendo huntu den amor i unidat, enkurashando otro pa avansá, kada un hañando kurashi i fortalesa for di asistensia di e otronan". - Testimonies for the Church, tomo 7, p. 21, 22.

Ministerio di gruponan chikí ta ordená pa Dios pa kapasitá kada miembro di iglesia pa krese spiritualmente, eksperensiá kompañerismo kaluroso, i usa e donnan ku Dios a duna nan den sirbishi.

E iglesia di Tèstamènt Nobo a eksplotá den kresementu. Den un par di aña kòrtiku el a krese di un grupo chikí di kreyentenan pa desénas di míles di adoradónan. Tabatin hopi faktor ku a kontribuí na e entrada akí di kreyentenan i e fenómeno di kresementu rápido akí. E ministerio di Hesus a sembra e simia di e evangelio i a prepará e multitutnan pa aseptá e predikashon di e disipelnan. Despues di e asenshon di Kristu, Spiritu Santu a baha poderosamente riba e dia di Pentekòste riba e disipelnan kreyente ku tabata hasiendo orashon. Un di e faktornan ku a kontribuí na e kresementu rápido di e iglesia di Tèstamènt Nobo tabata nan struktura organisatorio di gruponan chikí. Gruponan chikí a hasi un diferensia.

Lesa Echonan 18:1-5 i Echonan 20:1-4. Dikon bo ta kere Lukas a registrá algun di e nòmbernan di esnan ku ken Pablo tabata traha djaserka?

Ta fasinante pa nota ku Lukas ta menshoná algun di e nòmbernan di esnan ku ken Pablo a traha. P'é kada un tabata importante. E tabata konosé nan pa nòmber. Nan tabata sostené otro mutuamente den nan ministerio mishonero. Aunke e kantidat di nòmbernan ku el a menshoná tabata chikitu, esei ta yuda komprobá e punto tokante e importansia di traha djaserka ku otro, asta den kantidatnan chikitu.

Kada un di e hendenan akí siguramente tabatin donnan ku tabata diferente for di esnan ku otronan tabata poseé. Nan tabata bini for di diferente orígen- i kulturanan. Nan formanan di mira kosnan no tabata semper meskos, pero kada un tabatin un kontribushon balioso pa hasi pa e kousa di Kristu. Nan diversidat di donnan, antesedente-, i eksperensianan a kontribuí na kresementu di e iglesia. Nan kada un a kontribuí na e mishon di Kristu for di e rikesa di nan mes antesedente i eksperensia personal ku Hesus.

Kompará Echonan 16:11-15, 40; i Echonan 12:11, 12. Ki invitashon Lidia a duna Pablo inmediatamente despues di su kombershon? Na unda tantu Pablo komo Pedro a bai despues ku nan a ser librá for di prizòn?

E kreyentenan di Tèstamènt Nobo tabata topa regularmente den hogarnan. Hogarnan kristian a bira sentronan di influensia i kurason di e ministerio di grupo chikí.

Gruponan chikí ta un vehíkulo ku Dios ta usa pa pone Su iglesia krese. Nan ta "hafnan sigur" pa hende ekspresá nan problemanan i diskutí preokupashonnan mutuo. Nan ta proveé oportunidatnan pa kresementu spiritual den konteksto di relashonnan afektuoso. Hopi no kristian lo sinti mas konfortabel na prinsipio partisipando den un reunion di grupo chikí den un hogar ku asistí na un servisio tradishonal di iglesia pa promé bia.

Lesa Echonan 4:31, Echonan 12:12, i Echonan 20:17-19, 27-32. Numerá tur e diferente elementonan den e gruponan akí di Tèstamènt Nobo. Den ki aktividatnan e gruponan akí tabata envolví?

E promé Kristiannan tabata reuní pa intersedé pa otronan, hasi orashon pa preokupashonnan mutuo, kompartí den kompañerismo kaluroso, studia e Palabra di Dios, ser ekipá pa servisio, yuda protehá otro kontra maestronan falsu, i partisipá huntu den aktividatnan mishonero.

Gruponan chikí ta hasi un diferensia. Hendenan ku ta uni nan donnan den servisio, hendenan ku ta enfoká riba poder di Spiritu Santu pa evangelisá, ta un arma poderoso den mannan di Señor.

Lesa Mateo 9:37, 38. Kiko Hesus ta bisa tokante e kosecha, i kiko ta Su solushon pa e problema?

E disipelnan tabata mira solamente posibilidatnan suak pa progreso di e evangelio, pero Hesus a mira gran oportunidatnan. El a kompartí e bon notisia ku nan ku "e kosecha berdaderamente ta abundante”, despues El a señalá e problema: “e trahadónan ta poko" (Mat. 9:37, NKJV). E solushon di Kristu tabata pa hasi orashon pa "e Señor di kosecha manda trahadónan den Su kosecha" (Mat. 9:38, NKJV). Gruponan chikí ta un kontesta riba e orashon di Hesus i mas i mas rápidamente ta oumentá e kantidat di trahadónan pa e kosecha di Kristu.

E enfoke di tur grupo chikí efektivo ta testimonio i servisio. Ministerio di grupo chikí pronto lo muri si su enfoke ta interno i no eksterno. Si e grupo chikí bira egoista i un tiki mas ku un grupo di diskushon, e lo faya den su propósito i pèrdè e rason vital pa su eksistensia. Gruponan chikí ta eksistí pa hiba hende na Hesus, nutrí nan fe den Hesus, i ekipá nan pa testifiká pa Hesus.