Kompartiendo e Historia di Hesus

Komo Kristiannan, nos tur tin un storia personal pa konta, un storia kon Hesus a kambia nos bida, i loke El a hasi pa nos.

Lesa Efesionan 2:1-10. Kiko nos tabata promé ku nos a konosé Kristu? Kiko ta di nos for di dia ku nos a aseptá Kristu?

A. Promé ku nos a konosé Kristu (Efe. 2:1-3)

B. Despues ku nos a konosé Kristu (Efe. 2:4-10)

Ki un kambio asombroso! Promé ku nos a konosé Kristu, nos tabata "morto den infrakshon- i pikánan", "kanando di akuerdo ku e kurso di e mundu aki", "kumpliendo ku e deseonan di e karni”, i "tabata pa naturalesa yunan di rabia" (NKJV). Pa pon’é den forma simpel, promé ku nos a konosé Kristu, nos tabata dual sin rumbo dor di bida den un kondishon pèrdí.

Nos por a eksperensiá loke tabata parse di ta felisidat, pero tabatin un angustia den e alma i un propósito inkompleto den nos bida. Bini serka Kristu i eksperensiá Su amor a hasi tur e diferensia. Awor den Kristu nos ta berdaderamente "bibu". A traves di e "abundante rikesanan di Su grasia" i Su "riku miserikòrdia" pa ku nos, nos a risibí e don di salbashon. El a lanta nos pa “sinta huntu den e lugánan selestial den Kristu Hesus, pa den e siglonan ku ta bin E lo por demostrá e abundante rikesanan den Su bondat pa ku nos den Kristu Hesus" (NKJV). Den Kristu, bida a haña un nifikashon nobo i tin un propósito nobo. Manera Juan ta deklará: "Den djE tabatin bida, i e bida tabata e lus di hende" (Juan 1:4, NKJV).

Lesa Efesionan 2:10. Kiko e teksto akí ta bisa nos tokante kon sentral bon obranan ta pa e fe kristian? Kon nos ta komprondé e idea akí den konteksto di salbashon pa medio di fe "sin e obranan di lei" (Rom. 3:28)?

Juan i Santiago, e yunan hòmber di Zebedeo, tabata konosí komo e "yunan di bos" (Marko 3:17, NKJV). De echo, tabata Hesus ken a duna nan nan nòmber di kariño. Un ilustrashon di e disposishon ardiente di Juan a tuma lugá ora Hesus i Su disipelnan tabata biaha dor di Samaria. Ora nan tabata purba haña un lugá pa pasa anochi, nan a topa ku oposishon debí na e prehuisio di e samaritanonan kontra e hudiunan. Nan a ser rechasá asta e akomodashonnan di mas humilde.

Santiago i Juan a pensa ku nan tabatin e solushon pa e problema. "Ora Su disipelnan Santiago i Juan a mira esaki, nan a bisa: 'Señor, Bo ke pa nos manda kandela baha for di shelu riba nan i konsumí nan, manera Elias a hasi?’" (Lukas 9:54, NKJV). Hesus a reprendé e rumannan hòmber, i nan tur a bandoná e pueblo den silensio. E kaminda di Hesus ta e kaminda di amor, no forsa kombativo.

Den presensia di e amor di Hesus, e imprudensia i rabia di Juan a ser transformá den bondat amoroso i un spiritu amabel i yen di kompashon. Den e promé epístola di Juan, e palabra amor ta aparesé kasi 40 biaha; den su vários formanan, e ta aparesé 50 biaha.

Lesa 1 Juan 1:1-4, 1 Juan 3:1; 1 Juan 4:7-11; i 1 Juan 5:1-5. Kiko e pasashinan akí ta bisa bo tokante e testimonio di Juan i e kambionan ku a tuma lugá den su bida pa motibu di su interakshon ku Hesus?

Tin un prinsipio eterno den universo. Ellen G. White ta deklará e prinsipio akí bon den e palabranan akí: "E ehersisio di forsa ta kontrali na e prinsipionan di e gobièrnu di Dios; E ta deseá solamente e servisio di amor; i amor no por ser eksigí; e no por ser ganá pa medio di forsa òf outoridat. Solamente pa medio di amor, amor ta ser spièrtá". - The Desire of Ages, p. 22.

Ora nos ta komprometé na Kristu, Su amor lo bria a traves di nos na otronan. E testimonio di mas grandi di kristianismo ta un bida kambiá. Esaki no ta nifiká ku nunka nos lo no ta kometé erornan, i ku kisas tin biaha nos lo no ta e kanalnan di amor i grasia ku nos ta suponé di ta. Pero e ta nifiká sí ku, di forma ideal, e amor di Kristu lo kore for di nos bida, i nos lo ta un bendishon pa esnan rònt di nos.

Ken tabata e promé mishoneronan ku Hesus a yega di manda bai? Nan no tabata entre e disipelnan. Nan no tabata entre Su siguidónan di hopi tempu. E promé mishoneronan ku Hesus a manda bai tabata hòmbernan loko, demoniakonan ku un par di oranan promé a terorisá e region i a hinka miedu den kurason di e habitantenan den bisindario.

Ku poder demoniako sobrenatural, un di esnan endemoniá akí a kibra e kadenanan ku tabata mar'é, gritando den tononan horibel, i e tabata mutilá su mes kurpa ku piedranan skèrpi. E agonia den nan stèmnan solamente tabata reflehá un agonia mas profundo den nan alma (Mat. 8:28,29; Marko 5:1-5).

Pero despues nan a topa ku Hesus, i nan bida a ser kambiá. Nunka nan lo tabata meskos. Hesus a saka e demoñonan ku tabata tormentá nan for di nan kurpa pa bai den un tou di porko ku a bula for di baranka den laman (Mat. 8:32-34; Marko 5:13,14).

Lesa Mateo 8:28-34. Kiko a pasa ku e hòmbernan akí, i kiko e hendenan di e pueblo a topa ora nan a sali pa mira kiko a sosodé?

E demoniakonan tabata awor hòmbernan nobo, transformá pa e poder di Kristu. E hendenan di e pueblo a haña nan sintá na e pianan di Hesus, skuchando kada palabra for di boka di e Maestro. Nos mester nota ku e evangelio di Mateo ta bisa ku tabatin dos hòmber demoniako ku a keda liberá, miéntras e evangelio di Marko ta focus e storia riba solamente un di nan dos. Pero e punto ta, Hesus a restourá nan físikamente, mentalmente, emoshonalmente, i spiritualmente.

Lesa Marko 5:18-20. Opviamente e demoniako kambiá, e konverso nobo akí, ke a keda huntu ku Hesus, pero kiko Kristu a mand'é bai hasi?

"Pa un par di momentu solamente e hòmbernan akí tabata privilegiá pa tende e siñansanan di Kristu. Ni un sermon for di Su lepnan hamas a yega di kai riba nan oreanan. Nan no por a instruí e hendenan manera e disipelnan, ku tabata diariamente huntu ku Hesus, tabata kapas di hasi. Pero nan tabata karga den nan mes persona e evidensia ku Hesus tabata e Mesias. Nan por a konta loke nan tabata sa; loke nan mes a mira, i a tende, i a sinti di e poder di Kristu. Esaki ta loke tur hende por hasi kende su kurason a ser toká pa e grasia di Dios". - Ellen G. White, The Desire of Ages, p. 340. Nan testimonionan a prepará Dekápolis, dies siudat na kosta di Laman di Galilea, pa risibí e siñansanan di Hesus. Esaki ta e poder di testimonio personal.

Lesa 1 Juan 5:11-13; Hebreonan 10:19-22; i 1 Korintionan 15:1,2. Ki siguridat di bida eterno e Skrituranan ta duna nos, ku ta permití nos testifiká di nos salbashon den Kristu ku siguridat?

Si nos no tin e siguridat personal di salbashon den Hesus, no ta posibel pa kompartié ku un otro hende. Nos no por kompartí loke nos mes no tin. Tin kristiannan konsiensudo ku ta biba den un estado di inseguridat konstante, puntrando nan mes si un dia nan lo ta sufisiente bon pa ser salbá. Manera un predikadó bieu i sabí a bisa un bia: "Ora mi wak mi mes, mi no ta mira niun posibilidat di ser salbá. Ora mi wak Hesus, mi no ta mira niun posibilidat di bai pèrdí". E palabranan di Señor ta resoná ku siguransa a traves di siglonan: "Mira na Mi, i ser salbá, boso ekstremonan di tera! Pasobra Ami ta Dios, i no tin ningun otro" (Isa. 45:22).

Nos Señor ke pa kada un di nos regosihá den e salbashon ku E ta ofresé asina libremente. E ta anhelá pa nos eksperensiá loke ta nifiká pa ta hustifiká pa Su grasia i ta liber di e kondenashon ku e kulpa di piká ta trese. Manera Pablo ta bisa den Romanonan 5: "P’esei, siendo hustifiká pa fe, nos tin pas ku Dios pa medio di nos Señor Hesukristu" (Rom. 5:1, NKJV). E ta añadí ku nos por tin e siguransa ku "P’esei awor no tin kondenashon pa esnan ku ta den Kristu Hesus" (Rom. 8:1, NKJV). Apòstel Juan ta konfirmá ku "esun ku tin e Yu, tin bida; esun ku no tin e Yu di Dios, no tin bida" (1 Juan 5:12, NKJV).

Si pa medio di fe nos a aseptá Hesus, i E ta biba den nos kurason a traves di Su Spiritu Santu, e regalo di bida eterno ta di nos awe. Esaki no ke men ku, unabes nos a eksperensiá e grasia di Dios i salbashon den Kristu, nos no por pèrd’é nunka (2 Pe. 2:18-22, Hebr. 3:6, Rev. 3:5). Semper nos tin e eskoho liber di alehá for di djE; pero unabes nos a eksperensiá Su amor i a komprondé e profundidatnan di Su sakrifisio, nos lo no mester skohe nunka pa alehá for di Esun ku ta stima nos asina tantu. Dia pa dia nos lo buska oportunidatnan pa kompartí ku otronan e grasia duná na nos den Hesus.

"Mi a ser krusifiká huntu ku Kristu: no opstante mi ta biba; sinembargo no ami, sino ta Kristu ta biba den mi: i e bida ku mi ta biba awor den e karni, mi ta biba pa medio di fe den Yu di Dios, kende a stima mi, i a entregá Su mes pa mi" (Gal. 2:20).

Tin siguramente sierto sakrifisionan ora nos aseptá Kristu. Tin kosnan ku E ta pidi nos someté. Hesus a hasi kla e kompromiso ku lo ta nesesario pa siguiE: "Si un hende ta deseá di bin Mi tras, lag’é nenga su mes, hisa su krus diariamente, i sigui Mi" (Lukas 9:23, NKJV). Morto riba un krus ta un morto doloroso. Ora nos someté nos bida na e invitashon di Hesus i e "hòmber bieu” di piká akí ser krusifiká (lesa Rom. 6:6), e ta doloroso. Tin biaha ta doloroso pa renunsiá deseonan karisiá i kustumbernan di bida largu, pero e rekompensanan ta pisa mas ku e doló.

Testimonionan poderoso ku tin un impakto ku ta kambia bida riba otronan, ta enfoká riba loke Kristu a hasi pa nos, no riba loke nos a renunsiá p’E. Nan ta sentrá riba Su sakrifisio, no riba nos asina yamá "sakrifisionan". Pasobra Kristu nunka ta pidi nos pa renunsiá algu ku ta den nos mihó interes pa retené.

Sinembargo, e historia di kristianismo ta yená ku storianan di esnan ku mester a hasi tremendo sakrifisionan pa kousa di Kristu. No ku e hendenan aki tabata ganando salbashon, òf ku nan aktonan, no importá kon apnegá i sakrifisial nan ta, a duna nan mérito dilanti di Dios. En kambio, den mayoria kaso, realisando loke Kristu a hasi pa nan, e hòmber- i muhénan akí tabata dispuesto pa pone tur riba e altar di sakrifisio, di akuerdo ku e yamada di Dios den nan bida.

Lesa Juan 1:12, Juan 10:10, Juan 14:27, i 1 Korintionan 1:30. Nos testimonio ta basá semper riba loke Kristu a hasi pa nos. Menshoná algun di e donnan di Su grasia ku ta ser menshoná den e tekstonan akiriba.

Den lus di e tekstonan akiriba, pensa riba loke Kristu a hasi pa bo. Bo por tabata un kristian dediká henter bo bida, òf posiblemente bo a eksperensiá un kombershon mas dramátiko. Meditá riba kon bon Hesus tabata ku bo i e propósito, pas, i felisidat ku El a duna bo. Pensa riba e biahanan ku El a duna bo e forsa pa pasa dor di e eksperensianan difísil di bo bida.