Un Mensahe Digno di Kompartí

A lo largu di historia di salbashon, Dios a manda regularmente un mensahe spesial a traves di e Palabra profétiko pa prepará hende pa loke tabata biniendo. Dios nunka ta ser tumá di sorpresa (Isa. 46:9,10). E ta prepará Su pueblo pa futuro dor di manda profetanan pa revelá Su mensahe promé ku e huisio kai (Amos 3:7). Den e dianan promé ku diluvio, Dios a manda un mensahe na e mundu a traves di Noe ku e diluvio tabata biniendo. Na Egipto, Dios a lanta Hose pa prepará pa e hamber durante e shete añanan di abundansia. E profetanan hudiu a spièrta e lidernan israelita di e destrukshon benidero di Yerusalèm di parti di e ehérsitonan babilóniko. E mensahe di arepentimentu di Juan Boutista a prepará un nashon pa e promé binida di Hesus.

Lesa 2 Pedro 1:12. Ki ekspreshon Pedro ta usa pa deskribí e mensahe di Dios na su generashon?

Lesa 2 Pedro 1:16-21. Kiko tabata e mensahe akí di "bèrdat presente" ku Pedro i e disipelnan tabata proklamá?

E mensahe di nifikashon eterno pa e promé siglo tabata ku Kristu a bini. E amor di e Tata a ser revelá a traves di e sakrifisio di Kristu riba e krus. Ounke e "pago di piká ta morto", a traves di Kristu bida eterno a ser sigurá pa tur. Ta nos eskoho si nos lo risibié pa medio di fe (Rom. 3:23; Rom. 6:23; Efe. 2:8). E mensahe di salbashon akí den Hesus nunka lo bai for di moda. E ta bèrdat presente pa tur generashon.

E último buki di Beibel, Revelashon, ta presentá Hesus i Su salbashon eterno den un konteksto di tempu di fin, pa prepará un pueblo pa Su pronto regreso. E ta eksponé e falsedat di tradishon humano i religiosidat egoséntriko. For di komienso te na final, Revelashon ta revelá Hesus i Su obra na fabor di humanidat.

Hesus ta e berdadero testigu di e karakter di Su Tata. E ta e "soberano riba e reinan di mundu". E ta Esun "kende a stima nos i a laba nos di nos pikánan den Su propio sanger, i a hasi nos reinan i saserdotenan pa Su Dios i Tata" (lesa Rev. 1:1-6, NKJV). Revelashon ta trata tokante Hesus i Su mensahe di tempu di fin pa prepará Su pueblo pa Su pronto regreso.

E Evangelionan ta sentra prinsipalmente riba e promé binida di Kristu. Nan ta konta e historia di Su nasementu, Su bida i ministerio, i Su morto i resurekshon. Aunke nan ta papia di Su segundo binida, esei no ta nan énfasis prinsipal. E enfoke prinsipal di e buki di Revelashon, sinembargo, ta e klímaks di e konflikto di siglonan di antigwedat. Kada un di su profesianan prinsipal ta terminá den e regreso glorioso di nos Señor.

Lesa Revelashon 1:7, Revelashion 11:15, Revelashon 14:14-20, i Revelashon 19:11-18. Ki konklushon similar bo ta mira den kada un di e pasashinan akí?

For di e promé te na e último kapítulo di e buki di Revelashon, e klímaks di kada profesia ta e binida di Hesus. E "Lamchi ku a ser matá" (Rev. 5:12, NKJV), ta biniendo atrobe komo Rei di reinan i Señor di señornan (Rev. 19:16). E lo derotá tur e enemigunan ku ta oprimí i persiguí Su pueblo (Rev. 17:14). E lo libra nan for di e pesadia di piká akí i hiba nan kas na gloria. E gran konflikto entre bon i malu lo terminá. E tera ta ser hasí nobo, i e redimínan lo biba ku nan Señor pa semper (Rev. 21:1-4).

Den Revelashon 22:7 (lesa tambe Rev. 22:12,17 i 20), Hesus ta bisa: “Ata, Mi ta bin pronto! Bendishoná ta esun ku warda e palabranan di e profesia di e buki akí" (NKJV). Por lo tantu, e apelashon final di Hesus na henter humanidat ta pa respondé riba Su amor, aseptá Su grasia, i sigui Su bèrdat pa ta kla pa Su pronto regreso. Revelashon ta sera ku e invitashon di Hesus: "I e Spiritu i e brùit ta bisa: ‘Bin!' I laga esun ku tende, bisa: 'Bin!' ” (Rev. 22:17, NKJV).

Nos Señor ta invitá tur esnan ku ta buska bida eterno pa bin serka djE. Despues E ta invitá esnan di nos ku a aseptá e mensahe di salbashon i ta antisipando Su regreso ansiosamente pa uni kunE pa invitá otronan pa aseptá e mensahe di Su amor. E ta manda nos bai riba Su mishon pa kompartí Su mensahe pa prepará un mundu pa Su pronto regreso. No tin nada mas edifikante ku partisipá huntu ku Hesus den Su mishon na e mundu. No tin nada mas satisfaktorio ku koperá ku Kristu den Su plan di salbashon di e último dianan.

E episentro di Revelashon ta kapítulo 14. E kapítulo akí ta di sumo importansia pa e pueblo di Dios ku ta bibando den e último dianan di historia humano. E ta desplegá e mensahe di Dios di e tempu final na humanidat. E mensahe aki di e tempu di fin ta krusial pa e pueblo di Dios i pa henter humanidat.

Lesa Revelashon 14:14-20. Ki simbolismo ta ser usá aki pa ilustrá e regreso di nos Señor?

E simbolismo di kosecha ta ser usá a lo largu di Beibel pa deskribí e regreso di Kristu (Mat. 13:37-43; Marko 4:29). Den Revelashon 14 e kosecha di grano hechu ta representá e redenshon di esnan hustu, i kosecha di e drùifnan muchu hechu ta deskribí e destrukshon di esnan malbado. Revelashon 14:6-12 ta kontené un mensahe urgente di e último dianan pa prepará hòmber- i muhénan pa e kosecha final di tera.

Lesa Revelashon 14:6, 7. Kiko ta esensia di e mensahe hañá den e dos versíkulonan akí? Kon nan ta yuda nos komprondé ken nos ta komo Atventistanan di e di Shete dia?

E mensahe di e promé angel den Revelashon 14 ta apelá na un generashon di siglo 21 ku ta anhelá pa propósito den nan bida. E ta presentá e evangelio di e grasia di Dios ku ta proveé pordon pa tur hende. E ta limpia nos di e kulpa di piká i ta duna nos poder pa ta vensedónan. E mensahe akí ta proveé e base pa tur balor propio den e echo ku Kristu a krea nos i a redimí nos. E ta indiká ku un dia tur inhustisia lo yega na un fin den e huisio final di Dios. E ta notisia inkreiblemente bon, pasobra e ta revelá ku inhustisia lo no dura pa semper.

E mensahe di último tempu di Revelashon ta presentá Hesus den e plenitut di Su grasia salbadó pa henter humanidat (Rev. 14:6). E ta un apelashon sinsero pa "teme," òf duna reverensia na Dios den tur loke nos ta hasi, pa respetá Su mandatonan i obedesé Su lei den lus di e huisio di Dios (Rev. 14:7). Pa "teme Dios" tin di aber ku kon nos ta pensa. E ta un aktitut di obediensia ku ta hiba nos na biba bidanan piadoso (Prov. 3:7; Echonan 9:31; 1 Pe. 2:17). E mensahe akí ta invitá nos tambe pa "duna gloria" na Dios. Duna gloria na Dios ta relashoná ku loke nos ta hasi den tur aspekto di nos bida.

Lesa Eklesiastés 12:13,14 i 1 Korintionan 6:19,20. Kon e versíkulonan aki ta yuda nos komprondé kiko ta nifiká pa tantu teme Dios komo pa dun'E gloria?

Den un era di iresponsabilidat moral, ora miónes di hende ta sinti ku nan no tin ku duna kuenta i rason na ningun hende sino na nan mes, e mensahe di e ora di huisio akí ta rekordá nos ku nos ta responsabel pa nos akshonnan. Tin un relashon entre un aktitut di reverensia pa Dios, obediensia na Dios, i e huisio. Obediensia ta fruta di un relashon salbadó ku Hesus. Solamente Su hustisia ta sufisiente bon pa pasa e huisio i, den Su hustisia, nos ta sigur. A traves di Su hustisia nos ta biba pa glorifiká Su nòmber den tur loke nos ta hasi.

Lesa Revelashon 14:7, Revelashon 4:11, Génesis 2:1-3, i Eksodo 20:8-11. Kiko ta base di tur berdadero adorashon di Dios, i kon e Sabat ta reflehá e komprondementu akí?

Satanas a ataká e Sabat pasobra e sa ku e ta e kurason mes di adorashon. E ta eksaltá Kristu komo e Kreador i ta apelá na tur hòmber i muhé tur kaminda pa "adorá Esun ku a traha shelu i tera" (Rev. 14:7, NKJV). E ta papia ku relevansia den un era di evolushon. E ta yama nos bèk pa adorá e Hesus kende a krea nos i ta duna nos un sentido di nos berdadero balor den djE.

Lesa Revelashon 14:8, Revelashon 17:3-6, i Revelashon 18:1-4. Kiko nos ta siña tokante Babilonia spiritual for di e versíkulonan akí?

Den e buki di Revelashon, e palabra "Babilonia" ta representá un sistema falsu di religion basá riba obranan humano, tradishonnan trahá pa hende, i doktrinanan falsu. E ta eksaltá sernan humano i nan hustisia propio riba Hesus i Su bida sin piká. E ta pone e mandamentunan di lidernan religioso humano riba e mandamentunan di Dios. Babilonia tabata e sentro di idolatria, di adorashon di solo, i e siñansa falsu di inmortalidat di e alma. E sistema religioso falsu akí a integrá, di forma sutil, hopi di e práktikanan religioso di e Babilonia antiguo den su adorashon. E mensahe di Dios pa e último dianan na nos planeta ku ta muriendo ta e mensahe di Hesus i Su hustisia. E ta eko e apelashon di shelu: "Babilonia e grandi a kai, a kai ... Sali for di dje, Mi pueblo" (Rev. 18:2,4). Di forma divino Dios a lanta e iglesia Atventista di e di Shete dia pa eksaltá e mensahe di Kristu den tur su plenitut. Eksaltá Hesus ta eksaltá tur loke El a siña. E ta pa proklamá Esun ku ta "e kaminda, e bèrdat, i e bida" (Juan 14:6). E ta pa eksponé e erornan di Babilonia den kontraste ku e bèrdatnan di Hesus.

Lesa Revelashon 14:7, 9-11. Ki ophetonan di adorashon divergente ta ser destaká den e versíkulonan akí?

Revelashon 14 ta deskribí dos akto diferente di adorashon: adorashon di e Kreador i adorashon di e bestia. E dos aktonan di adorashon akí ta sentra rònt di e dia di adorashon di Dios, e berdadero Sabat, i un supstituto òf sabat falsu. Sabat ta representá e deskanso, siguransa i seguridat ku nos tin den Kristu nos Kreador, Redentor, i Rei ku ta bin. E dia falsu ta representá un supstituto humano i falsu, basá riba rasonamentu humano i dekretonan ku hende a traha.