Edukashon den e Hòfi di Eden

Aunke nos no ta pensa riba un hòfi komo un klas, e tin sentido perfekto, spesialmente un manera Eden, yená ku e rikesanan intakto di e kreashon di Dios. Difísil pa imaginá, for di nos perspektiva awe, kuantu e sernan no kaí akí, den un mundu no kaí, siendo direktamente siñá pa nan Kreador, mester tabata siñando den e “klas” ei.

Lesa Génesis 2:7-23. Kiko bo ta nota tokante e determinashon di Dios ora El a krea, pone, i empleá Adam?

Dios a traha e hòmber i e muhé den Su imágen i a duna nan un hogar i trabou signifikativo. Ora bo konsiderá dinámika di maestro-studiante, esaki ta un relashon ideal. Dios tabata konosé e abilidatnan di Adam pasobra El a krea Adam. E por a siña Adam, sabiendo ku Adam por a realisá su potensial kompletu.

Dios a duna e hòmber responsabilidat, pero E tabata ke tambe felisidat p’e. I kisas parti di e medionan di dun’é felisidat tabata dunando e responsabilidatnan. Despues di tur kos, ken no ta haña satisfakshon, felisidat asta, for di ser duná responsabilidatnan i despues kumpli ku nan fielmente? Dios tabata konosé e kurason di Adam i loke e tabattin mester pa prosperá, asina ku El a duna Adam e tarea di kuida e hòfi. “E ora ei Señor Dios a kue e hòmber i a pon’é den e hòfi di Eden pa atend’é i kuid’é” (Gen. 2:15, NKJV). Ta difísil pa nos imaginá, konosiendo solamente un mundu di piká i morto manera nos konosé, kiko e trabou mester a enserá i e lèsnan ku, sin duda, Adam a siña segun ku e tabata traha i kuida nan hogar di hardin.

Den Génesis 2:19-23, Dios ta krea kompañeronan animal pa Adam, i tambe E ta kea Ev komo esposa di Adam. Dios tabata sa ku Adam tabatin mester di e kompania i yudansa di un igual, asina El a krea muhé.

Dios tabata sa tambe ku hende mester tabata den relashon será kunE, asina ku El a krea un espasio íntimo den Eden denter di e límitenan di e hardin. Tur esaki ta testiguá di e determinashon di Dios den kreashon i Su amor pa humanidat. Atrobe, for di e gran distansia entre nos i Eden, ta difísil pa imaginá kon lo tabata, aunke ta prèt pa purba imaginá, no ta bèrdat?

Un di e gran gosonan pa hopi maestronan ta pa reuní den nan klasnan: kologando bòrchinan, organisando materialnan, i reglando e salanan den e forma di mas deseabel. Ora nos wak e vishon di Dios pa e klas ku tabata e Hòfi di Eden, nos ta mira e kuido ku E tabatin preparando un medioambiente di siña pa Adam i Eva. E tabata deseá pa bunitesa rondoná nan. Nos por imaginá ku tur flor, para, animal, i palu tabata ofresé un oportunidat pa Adam i Eva siña mas tokante nan mundu i tokante nan Kreador.

Sinembargo, tin un kambio di Génesis 2 pa Génesis 3. Nos a tuma inventario di tur e kosnan bon ku Dios a krea ku intenshon divino. Pero den Génesis 3:1 tambe nos ta spièrta na e provishon di Dios pa boluntat liber. E presensia di e kolebra komo “di mas sutil ku kualke bestia di sabana” ta un desviashon for di e lenguahe usá te awor. Palabranan manera “hopi bon” i “no bergonsá” i “agradabel” ta athetivo usá pa deskribí e kreashon di Dios den e kapítulonan anterior. Awor, sinembargo, ku e kolebra, Tin un kambio di tono. E palabra “sutil” ta ser tradusí tambe den algun vershon komo “astuto”. Di ripiente un elemento negativo ta ser introdusí den loke, te asina leu, tabata solamente perfekshon.

Kontrali na esei, Génesis ta presentá Dios komo e opuesto di “astuto”. Dios ta enfátikamente kla tokante Su espektativanan di e pareha den e hòfi. Nos sa di e mandato di Dios den Génesis 2:16,17 ku El a establesé un regla klave ku nan mester a obedesé, i esei tabata pa no kome for di e palu prohibí.

Kualke otro kos ku nos por saka for di e historia akí, un kos ta resaltá: Adam i Eva a ser kreá komo sernan moral liber, sernan ku tabata kapas pa skohe entre obediensia i desobedensia. Por lo tantu, for di komienso, asta den un mundu no kaí, nos por mira e realidat di boluntat liber humano.

Den Génesis 3:1-6, eksaminá e deskripshonnan ku e kolebra a usa i ku Eva a ripití despues Kiko bo ta ripará tokante e informashon ku e kolebra ta ofresé Eva? Kiko bo ta ripará tokante kon Eva e ora ei ta konsiderá e palu di konosementu di bon i malu?

Den Génesis 2:17 Señor a bisa Adam ku si el a kome for di e palu, e lo a “muri seguramente”. Ora Eva, den Génesis 3:3, a ripití e mandato, e no a ekspres’é di forma asina fuerte, lagando afó e palabra “seguramente”. Den Génesis 3:4 e kolebra ta pone e palabra bèk aden pero den un kompletu kontradikshon di loke Dios a bisa. Ta parse ku, aunke Eva a ser siñá di Dios den e hòfi, e no a tuma loke el a siña di forma mes serio ku e mester a tum’é, manera nos por mira a traves di e lenguahe mes ku el a usa.

Manera nos a mira ayera, apesar di e mandato kla di Dios Eva, asta den su lenguahe, a disminuí loke el a ser siñá. Aunke e no a mal interpretá loke Señor a bis’é, opviamente e no a tum’é sufisiente na serio. Difísilmente hende por eksagerá e konsekuensianan di su akshon.

Asina, ora Eva a topa ku e kolebra, el a ripití (pero no eksaktamente) na e kolebra loke Dios a bisa enkuanto di e palunan den e hòfi (Gen. 3:2, 3). Naturalmente, e mensahe akí no tabata notisia na e kolebra. E kolebra tabata konosí ku e mandato i pa e motibu ei tabata bon prepará pa tros’é, asina probechando di e inosensia di Eva.

Eksaminá Génesis 3:4-6. Ademas di direktamente ninga eksaktamente loke Dios a bisa, kiko mas e kolebra a bisa ku, opviamente, a logra ku Eva? Di ki prinsipionan el a probechá?

Ora e kolebra a bis’é ku parti di e mensahe tabata inkorekto, Eva por a bai pa konsultá ku Dios. Esaki ta e bunitesa di e edukashon di Eden: e akseso ku e studiantenan tabatin na nan Maestro Poderoso tabata seguramente mas ayá di kualke kos ku nos por imaginá awor riba tera. Sinembargo, na lugá di hui, na lugá di buska yudansa divino, Eva ta aseptá e mensahe di e kolebra. Su aseptashon di e revishon di e kolebra ta rekerí algun duda di parti di Eva tokante Dios i loke El a bisa nan.

Mientrastantu, Adam mes ta dual den un situashon difísil. “Adam a komprondé ku su kompañera a violá e mandato di Dios, a ignorá e úniko prohibishon poné riba nan komo un tèst di nan fidelidat i amor. Tabatin un teribel lucha den su mente. El a lamentá ku el a permití Eva dual for di su banda. Pero awor e echo tabata hasí; e mester a ser separá for di esun kende su kompania tabata su goso. Kon e por tabatin e asina?” — Ellen G. White, Patriarchs and Prophets, p. 56. Desafortunadamente, aunke konosiendo korekto for di robes, e tambe a skohe di forma robes.

Ora Adam i Eva a skohe pa sigui e mensahe di e kolebra, nan a enfrentá, entre hopi otro konsekuensia, deportashon for di e klas di Dios. Pensa riba loke Adam i Eva a pèrdè pa motibu di nan piká. Ora nos komprondé nan kaida, nos por komprondé mihó e propósito di edukashon pa nos den e époka presente. Apesar di nan deportashon, bida den un mundu imperfekto a trese un propósito nobo pa edukashon.

Si edukashon promé ku e Kaida tabata e manera di Dios di familiarisá Adam i Eva kunE, Su karakter, Su bondat, i Su amor, e ora ei despues di nan deportashon e obra di edukashon mester ta pa yuda familiarisá humanidat ku e kosnan ei, i tambe krea e imágen di Dios den nos di nobo. Apesar di nan eliminashon físiko for di e presensia di Dios, e yunan di Dios ainda por yega na konos’E, Su bondat, i Su amor. A traves di orashon, servisio, i studia Su Palabra, nos por hala mas serka di nos Dios manera Adam i Eva den Eden a hasi.

E bon notisia ta ku pa motibu di Hesus, i e plan di redenshon, tur kos no ta pèrdí. Nos tin speransa di salbashon i di restourashon. I hopi di edukashon kristian mester ta mustrando studiantenan den direkshon di Hesus i loke El a hasi pa nos i e restourashon ku E ta ofresé.

Lesa 2 Pedro 1:3-11. Den lus di tur loke a ser pèrdí ora sernan humano a bandoná e hòfi, e versíkulonan akí ta bin komo estímulo ku hopi por ser rekuperá. Kiko Pedro ta skibi ku nos mester hasi pa asina buska restourashon di e imágen di Dios den nos bida?

A traves di Hesus, nos a ser duná “tur kos ku ta pertenesé na bida i santidat” (NKJV). Ki un promesa! Kiko algun di e kosnan ei kisas por ta? Wèl, Pedro ta duna nos un lista: fe, birtut, konosementu, dominio propio, perseveransia, etcetera. Nota, tambe, ku konosementu ta un di e kosnan ku Pedro ta menshoná. E idea akí, naturalmente, ta hiba na e noshon di edukashon. Berdadero edukashon lo hiba na berdadero konosementu, e konosementu di Kristu, i asina no solamente nos lo bira mas manera E, nos por para tambe pa kompartí nos konosementu di djE ku otronan.

Algun hende ta ser konsiderá “studiantenan natural” den klas. Apénas nan mester studia pa haña puntonan ekselente. Nan ta apsorbé material fásilmente. Nan konosementu parse ta “pega”. 2 Pedro 1 i 2, sinembargo, ta hasi evidente ku nos edukashon den Kristu ta un eksperensia di oportunidat igual pa esnan ku lo dediká nan mes.

E palabranan di ánimo di 2 Pedro 1 ta kontrastá ku e spièrtamentu sobrio den 2 Pedro 2.

Lesa 2 Pedro 2:1-17. Ki palabranan poderoso i di kondenashon e ta bisando aki? Na mes momentu, meimei di e spièrtamentu i kondenashon skèrpi akí, ki gran speransa ta ser primintí na nos?

Nota kiko Pedro ta skibi den versíkulo 10 tokante esnan ku ta despresiá outoridat. Ki un reprendementu skèrpi pa loke ta realidat den nos tempu tambe. Nos komo iglesia mester traha riba suposishon di sierto nivelnan di outoridat (lesa Hebr. 13:7, 17, 24), i nos ta ser yamá pa someté i obedesé nan, por lo ménos te e grado ku nan mes ta fiel na Señor.

Sinembargo, meimei di e kondenashon duru akí, Pedro ta ofresé (den versíkulo 9) un antítesis. E ta bisa ku aunke Dios ta poderoso pa saka pafó esnan ku skohe engaño, “Señor sa kon pa libra esnan santu di tentashonnan” (NKJV). Ta posibel ku parti di nos edukashon den kristianismo no ta solamente evitando tentashon sino tambe siñando e hopi maneranan ku Dios por i ta libra nos for di dje komo tambe yuda warda nos kontra esnan, e ta spièrta, ku “den sekreto lo trese herehianan destruktivo” (2 Pe. 2:1, NKJV)? I tambe, ya ku despresio di outoridat ta asina kondená, nos edukashon kristian no mester konsistí tambe di siña e forma korekto di komprondé, someté, i obedesé “esnan ku ta goberná riba boso” (Hebr. 13:7, NKJV)?

Aunke no por bisa ku Adam i Eva a despresiá outoridat, al final nan a skohe pa desobedesé e outoridat ei. I loke a hasi nan transgreshon asina malu tabata ku nan a hasié den kontesta riba un kontradikshon evidente di loke e outoridat ei, Dios Mes, a bisa nan, i kende a hasi esei pa nan mes bon tambe.