E Famia

Nos no a ser duná hopi detaye, niun, realmente, den e promé páginanan di Skritura enkuanto di e tipo di edukashon di famia ku tabata tuma lugá den e promé dianan di historia humano, sinembargo nos por ta sigur ku tabata den e struktura di famia mes ku edukashon a tuma lugá e tempu ei.

“E sistema di edukashon establesé den Eden tabata sentrá den e famia. Adam tabata ‘e yu di Dios’ (Lukas 3:38), i tabata for di nan Tata ku e yunan di e Haltísimo tabata risibí instrukshon. Di nan, den e sentido di mas berdadero, tabata un skol di famia.” — Ellen G. White, Education, p. 33.

I aunke nos no sa eksaktamente kiko tabata ser siñá, nos por ta sigur ku e tabata trata ku e maravianan di kreashon i, despues di piká, e plan di redenshon.

Kiko e siguiente tekstonan ta siña, i dikon esakinan siguramente lo tabata parti di e edukashon ku Adam i Eva a komuniká na nan yunan? Génesis 1-2, Gen. 3:1-15, 2 Kor. 4:6, Lukas 10:27, Gal. 3:11, Rev. 22:12.

“E sistema di edukashon instituí na prinsipio di mundu mester tabata un modelo pa hende a lo largu di henter e tempu ku ta bin. Komo un ilustrashon di su prinsipionan un skol modelo a ser establesé den Eden, e hogar di nos promé mayornan.” — Ellen G. White, Education, p. 20.

Edukashon kristian ta un kompromiso pa eduká famianan i miembronan den doktrina, adorashon, instrukshon, kompañerismo, evangelismo, i servisio. Hogar ta kaminda bo ta ministrá na miembronan di famia tokante e amor i promesanan di Dios. Ta kaminda Hesus ta ser introdusí na yunan komo nan Señor i Salbador i amigu, i kaminda e Beibel ta ser validá komo e Palabra di Dios. Famia ta kaminda bo ta modelá kon un relashon saludabel ku nos Tata selestial ta.

Den Génesis 4:1-4, nos tin tantu Cain komo Abel tresiendo nan ofrendanan na Señor. Nos por asumí siguramente ku nan a siña tokante e nifikashon i importansia di e ofrendanan komo parti di nan edukashon familiar enkuanto di e plan di salbashon. Naturalmente, manera e storia ta mustra, un bon edukashon no semper ta hiba na e tipo di resultado ku un hende lo a spera.

Skritura ta duna nos tiki detaye tokante e infansia di Hesus. Hopi for di e añanan ei ta keda un misterio. Sinembargo, nos a ser duná algun impreshon den e karakter di Su mayornan terenal, Maria i Hose, i loke nos ta siña tokante nan por a yuda splika nos algu di Su infansia i promé edukashon.

Kiko e tekstonan akí ta siña nos tokante Maria i Hose i kon nan lo por duna nos persepshon den kon Hesus a ser eduká dor di Su mayornan?

Lukas 1:26-38

Lukas 1:46-55

Mat. 1:18-24

A traves di e tekstonan akí nos por mira ku tantu Maria komo Hose tabata Hudiunan fiel, buskando pa biba den obediensia na e lei- i mandamentunan di Dios. I enbèrdat, ora Señor a bin serka nan i a bisa nan tokante loke tabata bai sosodé ku nan, nan a hasi fielmente tur loke nan a ser bisá.

“E yu Hesus no a risibí instrukshon den e skolnan di sinagoga. Su mama tabata Su promé maestro humano. For di su lepnan i for di e ròlnan di e profetanan, El a siña di kosnan selestial. E palabranan eksakto kua E Mes a papia na Moises pa Israel awor El a ser siña na rudia di Su mama. Segun ku E tabata avansá di infansia pa hubentut, E no a buska e skolnan di e rabínan. E no tabatin mester di e edukashon ku mester a ser haña di fuentenan asina; pasobra Dios tabata Su instruktor.” — Ellen G. White, The Desire of Ages, p. 70.

No tin duda ku Maria i Hose tabata maestronan bon i fiel pa e Mucha pero, manera e storia den Lukas 2:41-50 ta revelá, tabatin hopi kos tokante nan Yu ku nan no tabata komprondé, pasobra Hesus tabatin konosementu i sabiduria ku a ser komuniká na djE so dor di Señor.

Den un sentido hopi real, edukashon na kualke nivel ta komunikashon. E maestro ta esun ku tin konosementu, sabiduria, informashon, echonan, loke sea, pa transmití na e studiante. Un hende yená ku un kantidat di konosementu mester ta kapas pa komunik’é na otronan; di otro manera, ki bon tur loke e sa ta, a lo ménos den términonan di siñamentu?

Na un otro nivel, sinembargo, bon abilidatnan di siña no ta solamente e abilidat pa komuniká. Krusial tambe na henter e proseso ta e konstrukshon di un relashon. “E berdadero maestro por transmití na su alumnonan poko donnan asina balioso manera e don di su propio kompañerismo. Ta bèrdat di hòmber- i muhénan, i kuantu mas di hóben i muchanan, ku solamente ora nos bin den kontakto a traves di simpatia nos por komprondé nan; i nos mester komprondé pa asina benefisiá mas efektivamente.” — Ellen G. White, Education, p. 212.

Den otro palabra, bon siñansa ta funshoná riba nivel emoshonal i personal tambe. Den kaso di e famia komo un skol, esaki ta asina importante. Un bon relashon mester ser konstruí entre e studiante i e maestro.

Relashonnan ta ser establesé i desaroyá pa medio di komunikashon. Ora kristiannan no ta komuniká ku Dios, manera dor di lesa e Beibel òf den orashon, nan relashon ku Dios ta stagna. Famianan tin mester di guia divino si nan mester krese den e grasia i konosementu di Kristu.

Lesa e siguiente tekstonan. Kiko nos por siña for di nan tokante kon pa konstruí relashonnan familiar fuerte (òf kualke tipo di relashon)? Salmo 37:7-9; Prov. 10:31,32; Prov. 27:17; Efe. 4:15; 1 Juan 3:18; Tito 3:1,2; Santiago 4:11.

Tumando e tempu pa sembra e simianan apropiá di komunikashon no solamente lo prepará miembronan di famia pa un relashon personal ku Kristu, sino tambe yuda desaroyá relashonnan interpersonal denter di e famia. E lo habri kanalnan di komunikashon ku lo bo ta kontentu ku bo a forma unabes bo yunan alkansá pubertat i edat adulto. I asta si bo no tin yu, e prinsipionan hañá den e tekstonan akí por funshoná pa tur tipo di relashon.

“I, boso tatanan, no provoká boso yunan na rabia: ma lanta nan den e kriansa i amonestashon di Señor” (Efe. 6:4).

“Ken por haña un esposa virtuoso? Pasobra su balor ta muchu mas haltu ku rubi” (Prov. 31:10, NKJV).

Mayornan tin un responsabilidat impreshonante. E tata ta e kabes di e famia, i e famia ta e ‘kuarto di mucha’ di iglesia, skol, i sosiedat. Si e tata ta suak, iresponsabel, i inkompetente, e ora ei e famia, iglesia, skol, i sosiedat lo sufri e konsekuensianan. Tatanan mester buska pa demostrá e fruta di Spiritu, amor, goso, pas, pasenshi, suavidat, bondat, fe, humildat, temperansia” (Gal. 5:22,23).

Mamanan tambe tin kisas e ròl di mas importante den henter sosiedat. Nan tin gran influensia den forma e karakter di nan yunan i establesé e humor i temperamentu di e hogar. Tatanan mester hasi tur loke nan por pa traha huntu ku e mamanan den e edukashon di nan yunan.

Kiko tata- i mamanan por siña for di e tekstonan akí? Efe. 5:22,23,25,26; 1 Kor. 11:3; 2 Kor. 6:14; Rom. 13:13,14; 2 Pe. 1:5-7; Fil. 4:8.

Mayornan kristian tin un obligashon moral di proveé un modelo bíbliko di Kristu i iglesia pa medio di nan komportashon. E relashon di matrimonio ta un analogia di e relashon di Kristu ku e iglesia. Ora mayornan ninga di guia, òf si nan ta guia den un forma tirániko, e ora ei nan ta pintando un kuadro falsu di Kristu pa nan propio yunan i pa mundu. Dios a komandá tur mayor kristian pa siña nan yunan di forma diligente (lesa Deut. 6:7). Mayornan tin e responsabilidat di siña nan yunan pa stima Señor ku henter nan kurason. Nan mester siña e temor di Señor, un deboshon amoroso i sumishon total na djE.

Den Deuteronomio 6:7, e yunan di Israel a ser duná instrukshonnan spesífiko tokante eduká nan yunan enkuanto di e gran kosnan ku Señor a hasi pa Su pueblo. Aunke kon gran storia e ansianonan tabatin pa konta nan yunan, nos, ku ta biba despues di e krus di Kristu, tin unu muchu mas mihó pa konta, no ta bèrdat?

Asina e sanashon òf training ku nos mester duna ta un evento proaktivo konstante den kua nos ta basha e bèrdat di Dios den nos yunan i prepará nan pa nan propio relashon ku Kristu.

Al final, sinembargo, nos tur a ser duná e don sagrado di boluntat liber. Finalmente, ora nan ta adulto, nos yunan lo tin ku kontesta pa nan mes dilanti di Dios.

Promé ku e yunan di Israel tabata bai drenta den e Tera Primintí, Moises a papia ku nan atrobe, refiriendo na e formanan maravioso ku Señor a guia nan, i el a amonestá nan bes tras bes pa no lubidá loke Señor a hasi pa nan. Den hopi forma Deuteronomio tabata e último boluntat i tèstamènt di Moises. I aunke nan a ser skibí míles di aña pasá, den un kultura i situashon di bida radikalmente diferente for di kualke kos ku nos ta konfrontá awe, e prinsipionan aya ta apliká pa nos tambe.

Lesa Deuteronomio 6. Kiko nos por siña for di e kapítulo akí tokante e prinsipionan di edukashon kristian? Kiko mester ta sentral na tur loke nos ta siña, no solamente na nos yunan sino na kualke hende ku no sa loke nos sa tokante Dios i Su gran echonan di salbashon? Ki spièrtamentu ta ser hañá den e versíkulonan akí tambe?

Asina sentral na tur loke nan tabata bai siña nan yunan tabatin e funshonamentu maravioso di Dios meimei di nan. I tambe, kon di forma kla e spièrtamentu a ser duná pa no lubidá tur loke Dios a hasi pa nan tampoko.

Naturalmente, si mayornan mester hunga e promé ròl prinsipal den integrá siñansanan bíbliko den bida di nan yunan, e ora ei nan tin un responsabilidat pa organisá i prepará nan propio bida den tal forma ku nan tin konosementu adekuá i tempu pa pasa ku nan yunan.

“E promé maestro di e mucha ta e mama. Durante e periodo di suseptibilidat di mas grandi i desaroyo di mas rápido su edukashon ta, te na un gran grado, den su mannan.” — Ellen G. White, Education, p. 275.

Esaki ta e tempu esensial ora mayornan ta ministrá na nan yunan tokante e amor i promesanan di Dios. Apuntá un tempu regularmente programá pa siña e sabiduria i promesanan di Dios na bo yunan lo impaktá bo famia positivamente pa generashonnan ku ta bin.