Hesus komo e Gran Maestro

Kiko ta e puntonan di mas importante ku e apòstel ta asentuá tokante Hesus na kuminsamentu di e Epestel na e Hebreonan? (Hebr. 1:1-4).

Outornan di Tèstamènt Nobo repetidamente ta asentuá un idea signifikante:Hesus ta bin na tera pa mustra sernan humano ken e Tata ta. Den tempunan pasá, e revelashon di Dios a bin den un forma fragmentá a traves di profetanan; den Hesus, sinembargo, e revelashon final i kompletu di Dios a yega.

Tambe, den Su persona, Hesus ta “e reflekshon di e gloria di Dios” (Hebr. 1:3, NRSV). Komo hendenan pekaminoso, nos no por a soportá akseso kompletu na e gloria di Dios. Komo e Yu enkarná, Hesus ta reflehá e gloria ei. E ta skondí den e humanidat di Kristu pa asina nos lo por mir’é i komprondé klaramente e karakter di Dios.

Hesus ta tambe “e imágen ekspresá di su persona” (Hebr. 1:3). E palabra usá aki, e palabra griego character, tin biaha ta ser usá di e impreshon ku un seyo ta traha den was òf e representashon seyá riba un moneda. Asina Hesus ta “e imprenta eksakto di e ser mes di Dios” (Hebr. 1:3, NRSV).

Si nos ta deseá di konosé e Tata, nos mester skucha kuidadosamente na loke e Gran Maestro ta bisa di djE. I nos mester vigilá e Gran Maestro tambe. E Tata ta ser mirá den e Yu.

Kompará Hebreonan 1:1-4 ku 2 Korintionan 4:1-6. Den 2 Korintionan 4:1-6, ken Hesus ta, i kiko nos ta siña for di djE?

Miéntras nan ta eduká otronan tokante Dios, Pablo i su koleganan ta trata na reflehá e ministerio di siñansa propio di Hesus tokante e Tata. Komo “e imágen di Dios” (2 Kor. 4:4), Hesus a trese konosementu tokante Dios e tata pa nos. Di forma similar, Pablo ta evitá engaño i trosementu di e Palabra di Dios i, en kambio, ta eksponé e bèrdat klaramente (2 Kor. 4:2).

Meskos ku Dios, na kreashon, a usa lus pa eliminá skuridat, El a duna nos Su Yu, Hesus pa eliminá perspektivanan falsu tokante E i pa mustra nos e bèrdat tokante Dios. Ta den “e kara di Hesus” ku nos ta haña e konosementu di mas kla di Dios (2 Kor. 4:6).

Den e prólogo konmovedor na e evangelio akí (Juan 1:1-18), Juan ta diskutí Hesus komo e “Palabra” eterno. E afirmashonnan di Juan pa Hesus no ta tímido òf limitá; nan ta oudas i kómodo den ekstenshon. Hesus tabata den eksistensia promé ku mundu a bin den ser, for di eternidat, realmente. De echo, Hesus ta e agente di kreashon (Juan 1:2, 3). E ta “e lus di tur hende” (Juan 1:4, NRSV), i, komo e Palabra ku a bin den mundu, E “ta iluminá tur hende” (Juan 1:9, NRSV).

Di akuerdo ku Juan, kiko ta resultado di e echo ku Kristu a bira un ser humano? Komo e Palabra, ki lus El a trese? Ki kualifikashonnan E ta poseé pa hasi esaki? Juan 1:14, 18.

“E Lus a aparesé ora e skuridat di mundu tabata di mas profundo ... .

“Tabatin solamente un speransa pa e rasa humano ... ku e konosementu di dios kisas por a ser restourá na e mundu.

“Kristu a bin pa restourá e konosementu akí. El a bin pa pone un banda e siñansa falsu pa medio di kua esnan ku ta pretendé di konosé Dios mal represent’E. El a bin pa manifestá e naturalesa di Su lei, pa revelá den Su propio karakter e bunitesa di santidat.” — Ellen G. White, Education, p. 74-76.

Tur kos ku Hesus a hasi den Su bida riba tera tabatin un solo propósito: “e revelashon di Dios pa elevashon di humanidat.” — Education, p. 82.

Everything Jesus did in His life on earth had a single purpose: “the revelation of God for the uplifting of humanity.” — Education, p. 82.

Hesus mes ta bisa: “Ken ku a mira Mi a mira e Tata” (Juan 14:9, NRSV). Kiko tabata e senario di e deklarashon di Hesus? Dikon El a hasié? Juan 14:1-14.

Ta atraktivo pa kritiká e deklarashon torpe di Felipe (Juan 14:8). Despues di añanan di kompañerismo será ku Hesus, ainda e ta falta e punto esensial di e enkarnashon, ku Hesus a bin pa mustra e karakter di e Tata. kisas maestronan awe por haña algun konsuelo den e echo ku un di e alumnonan di e Gran Maestro a aktua asina malu! E deklarashon di Felipe probablemente ta registrá, sinembargo, no pa duna nos motibu pa kritik’é sino pa duna nos oportunidat pa saminá nos mes. Kon largu nos a kana ku Hesus? I nos a komprondé Hesus mihó ku Felipe? “Ken ku a mira i a mira e Tata”.

Ki preokupashon tokante e komunidat kristian na Filipos ta riba kurason di Pablo ora e ta skibi su karta na nan? Fil. 2:1-4; Fil. 4:2, 3.

Filipensenan 2:1-11 ta un di e pasashinan di mas profundo den henter Beibel. E ta diskutí e preeksistensia di Kristu, Su divinidat, Su enkarnashon, Su humanidat, Su aseptashon di morto riba e krus. E ta deskribí e kaminda largu, difísil i ku ta baha bai abou ku Hesus a tuma for di shelu pa Kalvario (Fil. 2:5-8). I e ta deskribí kon e Tata ta eksaltá Hesus na un posishon di adorashon universal (Fil. 2:9-11). Un kantidat di bèrdat asombroso ta di pak den e versíkulonan ei.

Kon Pablo ta introdusí Filipensenan 2:5-11? Di e eventonan di e bida di Hesus ku e ta selebrá, kua di nan bo ta kere e ta spera ku e kreyentenan ta reflehá den nan propio bida? Fil. 2:6-11.

Pablo ta spera ku e kreyentenan na Filipos, ku por tabata argumentativo, lo siña for di Hesus i Su enkarnashon. Si Hesus por a adoptá forma humano, “e forma di un esklabo, siendo nasí den semehansa humano” (Fil. 2:7, NRSV), i asta someté na krusifikashon, kuantu mas nan ta someté na otro pa amor?

Nos ta ser rekordá ku tin hopi di siña for di e Gran Mestro, Hesus. Nos ta siña di e milagernan ku El a ehekutá i e forma ku E ta aktua pa ku otronan. Nos por trata na modelá nos propio relashonnan ku otronan na Su gran superioridat i dor di meditá riba Su disponibilidat pa interkambiá e glorianan di shelu pa un pesebre (ki un lès pa nos!).

Kontrali na esei, mundu muchu biaha ta invitá nos pa eksaltá nos mes, pa broma di nos logronan. Na un pesebre na Bètlehèm i for di e Gran Maestro nos ta siña un lès diferente, ku e gran obra di Dios di edukashon i salbashon ta ser lográ no dor di eksaltá nos mes sino dor di humiá nos mes dilanti di Dios i birando sirbidónan na otronan.

Relashonnan humano demasiado biaha ta kibra. Nos ta bira distansiá for di otro. E persona ku un tempu tabata nos amigu será ta bira, despues di tempu, un hende ku nos ta deskonfiá. Sinembargo, un relashon kibrá asina por ser drechá. Ora esei sosodé, nos ta eksperensiá e milager di rekonsiliashon. Poko eksperensia humano ta mes dushi ku esaki.

Kon rekonsiliashon ta e parti di mas importante di e enkarnashon di Kristu i Su ròl komo Gran Maestro? 2 Kor. 5:16-21.

Si nos ta sinti nos bendishoná ora un relashon ku un otro ser humano ser restourá, kon grandioso nos mester sinti ora nos ser rekonsiliá ku Dios? Den 2 Korintionan 5:16-21, Pablo ta kla tokante ken ta hasiendo e rekonsiliashon, Dios e Tata a tuma e mando den drecha nos relashon kibrá kunE. I El a hasi e obra di rekonsiliashon “a traves di Kristu” (2 Kor. 5:18, NRSV). “Dios tabata den Kristu rekonsiliando e mundu ku Su mes” (2 Kor. 5:19, NKJV).

Atrobe, sinembargo, nos no simplemente mester ta konsumidónan di e gosonan di rekonsiliashon. Nos mester siña for di e Gran Maestro. Den Su enkarnashon, Hesus a partisipá den e obra di rekonsiliashon. I nos tambe ta ser invitá pa partisipá den dje. Dios a rekonsiliá nos ku Su mes a traves di Kristu. I awor nos, huntu ku Pablo, ta ser duná “e ministerio di rekonsiliashon” (2 Kor. 5:18).

Kolosensenan 1:15-20 ta un otro di e gran pasashinan di Tèstamènt Nobo riba e enkarnashon di Kristu. Hopi biaha pensá di ta un himno, e promé mitar di e pasashi ta diskutí e ròl di Kristu den kreashon (Kol. 1:15-17), miéntras e último mitar ta enfoká riba e ròl di Kristu den redenshon (Kol. 1:18-20). A traves di e ròl di Kristu komo Kreador-Redentor, Dios ta rekonsiliá tur kos ku E mes. E obra di rekonsiliashon ku Dios ta logra a traves di Kristu ta kósmiko den eskala, impaktando “tur kos, sea ta riba tera òf den shelu, dor di hasi pas pa medio di e sanger di su Krus” (Kol. 1:20, NRSV).

Miéntras nunka nos no por a igualá e eskala kósmiko di e obra di e Grn Maestro komo rekonsiliadó, nos ta ser invitá pa partisipá den “e ministerio di rekonsiliashon” den nos propio esfera (2 Kor. 5:18). Esaki pr tabata den mente di Hesus ora E a hasi orashon: “Meskos ku Bo a manda Mi den e mundu, Ami tambe a manda nan den e mundu” (Juan 17:18, NKJV)?

Un momentu, nan ta un banda di wardadónan di karné ordinario kuidando un tou di karné averahe pafó di un siudat chikitu. Den e siguiente momentu, nan ta e resipientenan di un aparishon asombroso di angelnan ku ta karga notisia alarmante, maravioso i devastador. Motivá pa e aparishon ei, nan ta buska e mucha ku e angelnan a anunsiá.

Imaginá bo pará huntu ku e wardadónan di karné i mirando den e pesebre. Kiko lo bo a mira? Lukas 2:8-20.

Nos mester atmirá e promé alumnonan di e Gran Maestro, Hosé i Maria i e wardadónan di karné. E kondishonnan humilde di e nasementu di Hesus no ta duna niun indikashon di e maravia di e enkarnashon, ku, den Persona di e Yu akí, Dios a bira Un ku humanidat. Sinembargo, ku yudansa di vishonnan, soñonan, i angelnan, e promé studiantenan ei di djE ta kapas di wak mas ayá di e aparensia eksterior di e nasementu di Hesus. E wardadónan di karné ta kompartí ku otronan e identidat di e yu akí, ku E ta “un Salbador, kende ta e Mesias, e Señor” (Lukas 2:11, NRSV; kompará Lukas 2:17).

Kon e Hòmbernan Santu ta reakshoná riba e notisia di e nasementu di Hesus? Kon Herodes ta reakshoná? Mat. 2:1-12.

Promé ku El a papia Su promé parabel òf a ehekutá Su promé milager, e Gran Maestro ta digno di nos adorashon pa motibu di ken E ta. Pa apresiá e ministerio di siñansa posterior di Hesus totalmente, nos mester uni ku e promé alumnonan akí, e Hòmbernan Sabí, den nan adorashon di e Gran Maestro. Esun kende Su siñansanan nos ta atmirá ta mas ku un edukadó sabí. E ta Dios ku a bin biba huntu ku humanidat. Edukashon kristian ta ankrá den adorashon di Kristu.

Huntu ku Hòmbernan Sabí, wardadónan, i angelnan, nos ta ser yamá pa adorá Kristu, e Rei resien nasí, i pa mira den e yu Hesus e realidat di Dios Mes.