Adorashon den Edukashon

Tin algu den nos, algu, sin duda, ku originalmente a ser di weif den nos dor di Dios pero, manera ku tur otro kos, a ser afektá dor di piká, ku ta anhelá adorashon. Opviamente, na prinsipio nos mester a adorá e Úniko digno di adorashon, nos Señor i Kreador. Pero desde e Kaida, tur esaki a kambia di gran manera.

Pero, sí, nos tur ta adorá algu, un hende, loke sea. Esaki ta yuda splika dikon a lo largu di historia humano, i asta awe, sernan humano ta praktiká adorashon. Den Egipto antiguo, algun hende tabata adorá e fárao; otro tempunan, den otro teranan, hende tabata adorá estatuanan di piská, diosnan ku hopi kabes, i otro supuesto deidatnan. Algun hende tabata adorá solo, luna, e streanan.

Awendia, mayoria hende ta muchu sofistiká pa bùig dilanti un estatua di un sapu (pero aparentemente no un estatua di Maria), sinembargo esaki apénas ta nifiká ku sernan humano, asta sernan humano sekular, no ta adorá algu: plaka, poder, sèks, nan mes, streanan di Rock, aktornan, polítikonan. Loke sea nos ta stima mas tantu, loke sea nos ta focus nos atenshon mas riba dje, loke sea nos ta biba p’e, esei ta loke nos ta adorá. I, outor sekular David Foster Wallace a atvertí, si bo adorá e kos robes, lo e "kome bo na bida".

Kiko e historia den Daniel 3 ta siña nos tokante e importansia di adorashon berdadero?

Opviamente e tres hóbennan hudiu a tuma e di dos mandamentu (Eksodo 20:4 — 6) ku mes seriedat ku Dios tabatin intenshon pa e ser tumá. Despues di tur kos, e ta parti di e Dies Mandamentunan, huntu ku prohibishonnan tokante matamentu, hòrtamentu etcetera. Adorashon, adorashon apropiá, ta asina importante ku, de echo, e ta bira sentral na e problemanan den e último dianan, promé ku e segundo binida di Kristu. Pues, edukashon kristian mester inkluí henter e kuestion di adorashon: kiko e ta, kon nos ta hasié, dikon e ta importante, i ken nos ta adorá?

E Salmonan den Tèstamènt Bieu finalmente a bin pa hunga un ròl den e bida religioso di Israel antiguo. Nan tabata ser resitá, kantá, hopi biaha ku instrumèntnan musikal, durante momentunan di adorashon, spesialmente adorashon públiko, kua den Tèstamènt Bieu tabata klave na kon e pueblo tabata adorá en general. Israel tabata funshoná komo un komunidat, i komo un komunidat nan tabata adorá huntu.

E Salmonan ta básikamente poemanan, e lírikonan di kantikanan. E palabra hebreo pa e Salmonan, Tehillîm, ta nifiká “kantikanan di alabansa”. I ora nos kanta alabansanan na Dios, kualkier otro kos ku nos ta hasiendo, nos ta adorando Dios.

Lesa Salmo 78:1 — 17. Kiko ta e mensahe esensial aki, i kon e ta pas den henter e kuestion di edukashon i adorashon?

Tin un sierto determinashon den e mensahe di Salmo 78. Den versíkulo 2, Asaf ta menshoná kon nos lo kompartí e "dichonan skur di antaño." E palabra "skur" no ta nifiká "menasante" sino, mas bien, dòf òf disparsiendo, manera historia por bira ora eventonan krusial bai mas i mas leu bèk den tempu. Den otro tradukshonnan, skur ta ser referí na dje komo "sekreto" (NLV) òf "bèrdatnan bieu i dushi" (Message). E punto aki ta ku loke sea e edukashon di Israel tabata inkluí, e tabata inkluí siña e yunan e historianan tokante e trato di Señor ku e nashon skohí.

Lesa Salmo 78:6 — 17. Kiko tabata e lèsnan spesífiko ku nan mester a siña nan yunan? Kiko tabata e meta final di e edukashon akí?

Un di e relatonan di mas maravioso den Tèstamènt Nobo di kon Hesus a ministrá na almanan kibrá ta ser hañá den e historia di Hesus i e muhé na e pos.

Lesa Juan 4:7 — 26. Kiko Hesus ta bis'é tokante adorashon? De echo, kon nan a yega na e tópiko di adorashon, pa kuminsá?

Aunke el a purba kambia e tema dor di papia tokante tokante adorashon. Hesus a usa su táktika pa duna nos algun bèrdat profundo tokante adorashon i kiko adorashon ta enserá. Kisas di mas importante pa nos propósitonan inmediato ta loke El a bisa den Juan 4:24: "Dios ta Spiritu, i esnan ku ta ador'E mester adorá den spiritu i bèrdat" (NKJV).

Adorashon berdadero di Señor mester ta "den spiritu”, es desir, e mester bin di amor di Dios, di e eksperensia di konos'E personalmente. "E religion ku ta bin di Dios ta e úniko religion ku lo hiba na Dios. Pa por sirbiE korektamente, nos mester a nase di e Spiritu divino. Esaki lo purifiká e kurason i renobá e mente, dunando nos un kapasidat nobo pa konosé i stima Dios. Lo e duna nos un obediensia dispuesto na tur Su rekerimentunan. Esaki ta adorashon berdadero. E ta e fruta di e obra di Spiritu Santu.” — Ellen G. White, The Desire of Ages, p. 189.

Na mes momentu, adorashon mester ta "den bèrdat". Nos mester tin algun konosementu korekto di Dios, di ken E ta i kiko E ta rekerí di nos. Den otro palabra, doktrina tambe ta envolví. (Kon signifikante ta, por ehèmpel, pa sa ku nos ta adorá un Dios kende no ta kima hende den fièrnu pa eternidat.)

Asina, nos ta mira aki dos elemento den adorashon: e eksperensia ku ta bin di konosé i obedesé Dios, i e bèrdatnan ophetivo revelá na nos tokante Dios. Spiritu sin bèrdat por hiba na un sentimentalismo superfisial ku ta fundá mas riba emoshon kaprichoso mas ku riba kualke otro kos. Kontrali na esei, bèrdat sin spiritu por hiba na formalismo sin bida. Por lo tantu, nos tin mester di tur dos.

Kon lo bo a purba siña un hende adorá "den spiritu i bèrdat"? Den ki kasonan kisas un hende por tin mester di un énfasis mas riba un ku riba ku e otro?

Lesa 1 Krónikanan 16:1 — 36. Purba imaginá bo mes e esena. Bo ta imagin'é komo solèm, temeroso, òf festivo i alegre? Den ki forma e por ta kisas un kombinashon di tur dos? Kiko nos por siña for di e esena akí tokante adorashon i kon nos mester siña i asta eksperensiá adorashon?

E lugá di adorashon tabata e tabernakel, kaminda Dios tabata habitá ku Israel Antiguo i kaminda e plan di salbashon a ser revelá na nan. Sentral, anto, na adorashon i edukashon di adorashon mester tin Hesus i e plan di salbashon, tur di kua a ser pronostiká den e sirbishi di tabernakel. Kualkier otro kos ku Dios a hasi pa nos ku ta meresé alabansa i adorashon, nada di esei no ta nifiká nada sin e speransa di bida eterno ofresé na nos pa medio di Su morto di sakrifisio i sustituto riba e krus.

Nota tambe e impulso "evangelístiko" di e pasashi: henter mundu mester a siña tokante e Dios di Israel.

Wak 1 Krónikanan 16:29: "Duna Señor e gloria debí na Su nòmber; trese un ofrenda, i bin Su dilanti. O, adorá Señor den e bunitesa di santidat!" (NKJV). E bunitesa di santidat? Kiko esei lo por ta nifiká?

Pa kuminsá, pensa riba kon mahos, kon dañino, kon humiante, piká ta. Tambe, ta difísil pa nos awor imaginá nos mes kon malu, teribel i humiante e práktikanan di adorashon di e nashonnan rondó di Israel tabata, práktikanan ku tabata inkluí, asta sakrifisionan di mucha. I, sin duda, e kosnan akí tabata reflehá kon e hendenan ku tabata práktika nan tabata.

Na otro banda, Israel antiguo mester tabata un nashon santu, separá for di e kustumbernan malbado rondó di nan. Nan mester tabata santu den nan kurasonnan i mentenan; esaki ta loke a duna nan adorashon nifikashon i bunitesa dilanti di Dios. Kada bes di nobo profetanan di Tèstamènt Bieu tabata kritiká hendenan ku tabata adorá Señor miéntras nan tabata envolví den korupshon i miéntras nan kurasonnan tabata leu for di djE.

Israel antiguo tabata rondoná pa hendenan hopi religioso, hendenan asina dediká na adorá i kalma nan diosnan ku nan lo a sakrifiká asta nan propio yunan na nan. Esei ta dedikashon, no ta bèrdat?

Por lo tantu, adorashon, adorashon berdadero di e Dios berdadero, tabata un parti importante di protehá e Hebreonan for di bira envolví den e idolatria i adorashon falsu ku tabata rondoná nan. I tòg, apesar di tur e spièrtamentunan, ainda nan a kai den e práktikanan idólatra ku nan a ser atvertí spesífikamente kontra dje.

Ke tal di nos awe? Dikon adorashon di e Dios berdadero, relatando tur loke ku El a hasi pa nos, lo tabata asina importante tambe, spesialmente en bista di e peligernan di idolatria moderno?

Lesa Marko 7:1 — 13. Ki prinsipio nos ta haña den versíkulonan 7 — 9 ku lo por apliká awe den e konteksto di edukashon kristian i e peliger di siñansa falsu, tumá for di mundu, ku lo por impaktá e praktiká di nos fe negativamente?

Hopi di e gran ideanan intelektual den mundu awe ta basá riba un bista naturalista di realidat. Hopi disiplina studiá den skol awe ta ser studiá for di e perspektiva ei, kua hopi biaha ta nifiká ku loke ta ser siñá lo ta kontradiktorio na Skritura. Nos por ser tentá pa adorá ideanan ku a ser sugerí, spekulá, i poné den praktiká. Tambe nos por reverensiá mentenan briante di filósofo-, sientífiko- i matemátikonan ku a marka e ideanan akí. E problema ta ku hopi biaha e ideanan aki por ta den konflikto ku Skritura, sinembargo, pasobra aktualmente nan ta ser siñá i keré di ta bèrdat, hende ta purba inkorporá nan den edukashon kristian. Sinembargo, e úniko forma ku esei por ser hasí ta pa komprometé e fe, kua hopi biaha ta nifiká trose i distorshoná e Skrituranan pa asina pone e Skrituranan kuadra ku ideanan aktual.