Prens Nobel di Pas

Dikon Isaias 9:1 ta kuminsá ku e palabra (Ma/Sinembargo) ku ta indiká un kontraste na loke ta presed’é?

Isaias 8:21, 22 ta deskribí e kondishon sin speransa di esnan ku ta bira na lo okulto mas bien ku na e Dios berdadero: na unda ku nan wak, nan lo “mira solamente aflikshon i skuridat, e tiniebla di angustia; i nan lo ser tirá den skuridat denso” (Isa. 8:22, NRSV). En komparashon, lo yega un tempu ora “lo no tin tiniebla pa esnan ku tabata den angustia” (Isa. 9:1, NRSV). E hendenan di e region galileo ta ser distinguí aki komo esnan ku ta risibí e bendishon spesial di “un gran lus” (Isa. 9:2, NRSV). E nashon lo ser multipliká i regosihá pasobra Dios lo a kibra “e garoti di nan opresor” (Isa. 9:4, NRSV).

E region di Lago Galilea ta ser deskribí aki pasobra e tabata entre e promé teritorionan di Israel pa ser konkistá. Komo kontesta riba e petishon di Akaz pa yudansa, Tiglath-pileser III a tuma e regionnan di Galilea i Transhordania di Israel norteño, hiba algun di e hendenan koutivo, i a kambia e teritorionan den provinsianan asirio (2 Reinan 15:29). Asina, e mensahe di Isaias ta ku e promé ku a ser konkistá lo tabata e promé pa mira liberashon.

Ken Dios ta usa pa liberá Su pueblo? Isa. 9:6, 7.

Ki dia i kon e profesia di Isaias 9:1-5 a ser kumplí? Mat. 4:12-25.

No pa kasualidat e ministerio trempan di Hesus tabata den e region galileo, kaminda El a duna speransa dor di anunsiá e bon notisia di e reino di Dios i dor di sana hende, inkluyendo liberá demoniakonan for di sklabitut di kosnan okulto (Mat. 4:24).

Aki ta kaminda nos ta mira un ehèmpel perfekto kon Beibel ta tuma eventonan ku a tuma lugá den tempunan di Tèstamènt Bieu i ta usa nan pa prefigurá kosnan ku lo sosodé den tempunan di Tèstamènt Nobo. Señor a meskla imágennan di un époka ku esnan di un otro, manera den Mateo 24, ora Hesus a meskla e destrukshon di Herusalèm na A.D. 70 ku e destrukshon na fin di mundu.

Aki tin e di tres nasementu spesial den e buki di Isaias, siguiendo menshon di e nasementunan di Emanuel i Maher-shalal-hash-baz.

Kiko ta spesial tokante e Yu hañá den e versíkulonan akí? Isaias 9:6, 7.

Nota ku e Libertador tin vários nòmber/apodo ku ta deskribiE den vários manera. Den e Oriente Serkano antiguo, rei- i deidatnan tabatin multiple nòmber pa mustra nan grandesa.

E ta “maravioso”, meskos ku e Angel divino di Señor a deskribí Su propio nòmber na e tata di Samson komo “maravioso” (Huesnan 13:18, RSV; e mesun rais hebreo) i despues a subi na shelu den e vlam sakrifisial riba e altar di Manoa (Huesnan 13:20), asina prefigurando Su ofresementu di Su Mes mas di mil aña despues.

E ta ser referí na dje komo divino (“Dios Poderoso”) i e Kreador eterno (Tata Eterno”; lesa Lukas 3:38:” … Adam, yu di Dios”, NRSV).

E ta un Rei di e dinastia di David; Su reino di pas lo ta eterno.

Mirando e atributonan akí, ken so e Yu akí por ta? Lesa Lukas 2:8-14.

Algun hende a purba identifik’E ku Rei Hezekias, pero e deskripshon ta surpasá kualke ser humano ordinario. Solamente un persona ta pas: Hesu-kristu, e Yu divino di Dios i Kreador (Juan 1:1-3, 14; Kol. 1:15-17; Kol. 2:9; Hebr. 1:2), kende a nase na nos pa asina salba nos i duna nos pas. El a risibí tur outoridat den shelu i riba tera, i E ta ku nos semper (Mat. 28:18-20). Miéntras E ta retené Su divinidat, el a bira tambe humano pa tur tempu, semper kapas pa simpatisá ku nos debilidatnan (Hebr. 4:15). “Pa nos un yu a nase” … pa semper!

“Ora Kristu a bin na nos mundu, Satanas tabata riba tera, i tabata diskutí kada paso riba Su kaminda for di e pesebre te na Kalvario. Satanas a akusá Dios di a rekerí apnegashon di e angelnan, ora E Mes no tabata sa nada di loke e tabata nifiká, i ora E Mes no tabata hasi niun apnegashon pa otronan. Esaki tabata e akusashon ku Satanas a hasi kontra Dios den shelu; i despues ku esun malbado a ser ekspulsá for di shelu, e tabata akusá Dios konstantemente di tabata imponé servisio ku E Mes lo no tabata rindi. Kristu a bin na mundu pa konfrontá e akusashonnan falsu akí, i pa revelá e Tata.” — Ellen G. White, Selected Messages, tomo 1, p. 406, 407.

E sekshon akí ta splika Isaias 9:1-5, ku ta predesí liberashon pa e hendenan angustiá, den skuridat, ku a konfia den loke ta sobrenatural i a kai preso na konkista militar i opreshon: “e bara di nan opresor, bo a kibra manera riba e dia di Madian” (Isa. 9:4, NRSV).

Skrudiñá e sufrimentunan di e pueblo di Dios manera ta ser mustrá den e tekstonan aki riba. Kompará e maldishonnan den Levítiko 26:14-39. Dikon Dios a kastigá Su pueblo den fase mas bien ku tur di ripiente? Kiko esaki ta indiká tokante Su karakter i metanan?

Si Dios tabata ke a destruí Su pueblo, E por a duna nan mesora na e Asirionan. Pero E tin pasenshi, “i no ke pa ningun peresé, ma pa tur bin na arepentimentu” (2 Pe. 3:9, NRSV). Manera den e periodo di e “huesnan”, Dios a laga e pueblo di Huda i Israel eksperensiá algun resultado di nan bobedat pa asina nan por a komprondé loke nan tabata hasiendo i tin un oportunidat pa hasi un mihó eskoho. Ora nan a persistí den maldat i a hasi nan kurason duru kontra djE i e apelashonnan ku El a manda a traves di Su mensaheronan, El a retirá Su protekshon mas leu. Pero nan a sigui rebeldiá. E siklo akí a ser ripití den un spiral direkshon abou te ora no tabatin nada mas ku Dios por a hasi.

Skrudiñá Isaias 9:8-10:2. Di ki pikánan e hendenan ta kulpabel? Kontra ken nan a kometé nan? Ken ta kulpabel meimei di nan?

Loke nos ta mira aki, manera ta ser mirá a lo largu di Beibel, ta e realidat di boluntat liber. Dios a traha sernan humano liber (E mester a hasi esei; di otro manera, nunka nan no por a stim’E berdaderamente), i libertat ta envolví e opshon pa hasi malu. I aunke bes tras bes Dios ta trata na asombrá nos dor di revelá Su amor i karakter, E lo permití nos tambe pa enfrentá e fruta di nos desishonnan robes; es desir, doló, sufrimentu, miedu, difikultat, etcetera, tur pa asina yuda nos realisá presis kiko bira bai for di djE ta hiba na dje. I tòg, asta e ora ei, kuantu biaha e kosnan akí no ta pone hende pone nan piká un banda i bin serka Señor. Boluntat liber ta maravioso; nos no por tabata humano sin dje. Ai di esnan, sinembargo, ku us’é di forma robes.

Ken ta e “spreit” ku ta sali “for di e tronkon di Jesse” (NRSV) den Isaias 11:1? Lesa tambe Zak. 3:8; Zak. 6:12.

Isaias 11:1 ta sigui riba e simbolismo di un palu bashá abou den 10:33, 34. E “tronkon di Jesse” ta representá e idea ku e dinastia di David (yu di Jesse) lo a pèrdè su poder (Dan. 4:10-17, 20-26). Pero lo a lanta un “spreit/rama” for di e “tronkon” aparentemente kondená; es desir, un gobernante desendé for di David.

Dikon e gobernante davídiko nobo tambe ta ser yamá e “rais di Jesse” (Isa. 11:10)? Ki sentido e tin? Rev. 22:16.

E deskripshon ta pas solamente ku Hesukristu, ku ta tantu “e rais i e desendiente di David” (Rev. 22:16, NRSV). Kristu a bin for di e linahe di David (Lukas 3:23-31), ku a desendé di Adam, ku tabata e “yu di Dios” (Luke 3:38) den sentido ku Kristu a kre’é (lesa Juan 1:1-3,14). Asina, Kristu tabata antepasado di David, komo tambe su desendiente!

Den ki forma e gobernante davídiko nobo ta kambia e efektonan di piká i apostasia? Isaias 11.

E ta pensa i aktua den harmonia ku Señor, ta husga hustamente, ta kastigá e malbado, i ta uni un remanente fiel di Israel i Huda (kompará Isa. 10:20-22). Lo tin un monarkia fuerte i uní manera den e dianan di Rei David, ku a derotá e filisteonan i otro pueblonan. Pero e Gobernante Nobo lo ta mas grandi ku David den e echo ku E lo restourá pas asta te na e esensia di kreashon mes: Karnivornan lo no ta komedónan di karni mas, i nan lo konbibí huntu den trankilidat ku nan proi anterior (Isa. 11:6-9).

Isaias 11 ta papiando tokante solamente e promé binida di Kristu, solamente e Segundo, òf tur dos? Pasa dor di e profesia i skirbi kua tekstonan ta papia tokante kua binida.

Den Isaias 11, tur dos binida di Hesus ta ser presentá komo un kuadro. Nan ta konektá huntu, pasobra nan ta dos parti komo un totalidat, manera e dos bandanan di un superfisio plat. E plan di salbashon, pa ser kompletá, ta rekerí tur dos binida: Esun di Promé, ku ya a tuma lugá; i e Segundo, kua nos ta spera komo e kulminashon di tur nos speransanan komo Kristiannan.

Isaias 12 ta un salmo (kantika) kòrtiku di alabansa na Dios pa Su konsuelo miserikòrdioso i poderoso. E salmo, poné den boka di un miembro di e remanente restourá, ta kompará e liberashon primintí ku esun di e hebreonan den e Eksodo for di Egipto (lesa Isa. 11:16); e ta manera e kantika di Moises i e Israelitanan ora nan a ser salbá for di e ehérsito di Fárao na Laman Kòrá (lesa Eksodo 15).

Kompará e kantika akí den Isaias 12 ku Revelashon 15:2-4, e kantika di Moises i di e Lamchi. Pa kiko nan tur dos ta alabando Dios?

Isaias 12:2 ta yega serka di identifiká e Libertador benidero komo Hesus. E ta bisa ku “Dios ta mi salbashon” i “el a bira mi salbashon” (NRSV). E nòmber Hesus ta nifiká “Señor ta Salbashon” (kompará Mat. 1:21).

Kiko ta nifikashon di e idea, kontené den e nòmber di Hesus, ku Señor ta salbashon?

No solamente Señor ta otorgá salbashon (Isa. 12:2); E Mes ta salbashon. E Presensia di Esun Santu di Israel meimei di nos (Isa. 12:6) ta tur kos pa nos. Dios ta ku nos! No solamente Hesus a hasi milagernan; El “a bira karni i a biba meimei di nos” (Juan 1:14, NRSV, énfasis suplí). No solamente El a karga nos pikánan riba e krus; El a bira piká pa nos (2 Kor. 5:21). No solamente E ta hasi pas; E ta nos pas (Efe. 2:14).

Nada straño ku “e rais di Jesse lo para komo un señal pa e pueblonan” (Isa. 11:10, NRSV). Ora E ser halsá riba e krus, E ta hala tur hende serka djE mes (Juan 12:32, 33)! Un remanente lo bolbe na e “Dios poderoso” (Isa. 10:21, NRSV), kende ta e Yu nasé pa nos, e “Prens di Pas” (Isa. 9:6)!