Lès 6 * 30 di yanüari - 5 di febrüari

Hungando Dios

Sabat Atardi

Lesa pa e siman aki:

Isaias 13, Isa. 13:2-22, Isaias 14, Isaias 24-27.

Versíkulo di Memoria:

“Mira, esaki ta nos Dios; nos a spera riba djE, i E lo salba nos. Esaki ta Señor; nos a spera riba djE; nos lo ta kontentu i regosihá den Su salbashon” (Isaias 25:9, NKJV).

Despues ku un pastor a prediká un sermón di búskeda riba orguyo, un muhé ku a tende e sermón a ward'é i a bis'é ku e tabata den hopi angustia di mente, i ku e lo ke a konfesá un gran piká E pastor a puntr'é kiko e piká tabata.

"El a kontestá: 'E piká di orguyo, pasobra mi a sinta un ora dilanti di mi spil algun dia pasá atmirando mi bunitesa.'

'O,' e pastor a kontestá, 'esei no tabata un piká di orguyo, esei tabata un piká di imaginashon!’” — C. E. MaCartney, kompilá pa Paul Lee Tan, Encyclopedia of 7700 Illustrations: Signs of the Times, p. 1100.

For di tempu ku piká a nase den kurason di un angel poderoso, orguyo no a respetá e límitenan di realidat (den angel òf hende). Ningun kaminda e problema akí ta ser mirá pió ku den esnan ku ta karisiá orguyo spiritual, un rasgo mas bien tristu den sernan asina korumpí ku nan salbashon por ser hañá solamente den e obranan di un otro na nan fabor.

E siman akí, entre otro kosnan, nos lo tira un bista riba e orígen di orguyo i eksaltashon propio.

* Studia e lès di e siman aki pa prepará pa Sabat, 6 di febrüari.

Djadumingu31 di yanüari

Kondena riba e Nashonnan (Isaias 13)

Isaias 13 tin un título ku ta nombra Isaias komo e outor (kompará Isa. 1:1, Isa. 2:1); ta parse tambe ku e ta kuminsá un sekshon nobo di su buki. Kapítulonan 13-23 ta kontené orákulonan di huisio kontra vários nashon. Laga nos tira un bista.

Dikon e profesianan kontra e nashonnan ta kuminsá ku Babilonia?



Isaias 10:5-34 ya a anunsiá huisio kontra Asiria, kua tabata mustra e peliger di mas grandi den tempu di Isaias. Miéntras Isaias 14:24-27 brevemente ta reiterá e plan di Señor pa kibra Asiria, kapítulonan 13-23 ta trata prinsipalmente ku otro menasanan, Babilonia siendo esun di mas importante.

Dotá ku un patrimonio kultural, religioso i polítiko riku i antiguo, mas despues Babilonia a surgi komo e superpoder ku a konkistá i a eksiliá Huda. Pero for di perspektiva humano di tempu di Isaias, lo no tabata fásilmente evidente ku Babilonia lo a menasá e pueblo di Dios. Durante di hopi di e ministerio di Isaias, Asiria a dominá Babilonia. For di 728 promé ku Kristu, ora Tiglat-pileser III a kapturá Babilonia i a ser proklamá rei di Babilonia bou di e nòmber di trono Pulu (òf Pul; lesa 2 Reinan 15:19; 1 Kron. 5:26), reinan asirio a bolbe kapturá Babilonia vários bia (710 P.K., 702 P.K., 689 P.K., i 648 P.K.). Babilonia, sinembargo, finalmente lo a bira e gran superpoder den e region, e poder ku lo a destruí e reino di Hudea.

Lesa Isaias 13. Nota kon fuerte e lenguahe ta. Dikon un Dios di amor ta hasi e kosnan akí, òf ta permití e kosnan akí pasa? Siguramente algun hende inosente lo sufri tambe, no ta bèrdat (Isa. 13:16)? Kon nos ta komprondé e akshon akí dor di Dios? Kiko e tekstonan akí, i tur e tekstonan den Beibel ku ta papia tokante di e rabia i furia di Dios kontra piká i maldat, ta bisa nos tokante e enorme naturalesa di piká i maldat? E solo echo ku un Dios di amor lo a respondé di e manera ei no ta sufisiente evidensia pa mustra nos kon malu piká ta? Nos mester kòrda ku esaki ta Hesus ku ta ekspresando e atvertensianan a traves di Isaias, e mesun Hesus ku a pordoná, kura, supliká ku i a amonestá pekadornan pa repentí. Den bo propio mente, kon bo a yega na komprondé e aspekto akí di e karakter di un Dios di amor? Hasi bo mes e pregunta akí tambe: E rabia akí no por a originá realmente for di Su amor? Si ta asina, kon asina? Òf, wak e for di un otro perspektiva, esun di e Krus, kaminda Hesus Mes, kargando e pikánan di mundu, a sufri pió ku kualke otro hende hamas a sufri, asta esnan "inosente" ei ku a sufri pa motibu di e pikánan di e nashon. Kon e sufrimentu di Kristu riba e krus ta yuda kontestá e preguntanan difísil akí?

Djaluna1 di febrüari

E Difunto Gran Siudat di Babilonia (Isa. 13:2-22)

Na aña 626 P.K. e Nabopolasar kaldeo a restourá e gloria babilóniko hasiendo su mes rei na Babilonia, kuminsando e dinastia neo-babilóniko, i partisipando (ku Media) den e derota di Asiria. Su yu hòmber Nabukodonosor II, tabata e rei ku a konkistá i a eksiliá Huda.

Kon e siudat di Babilonia a terminá finalmente? Lesa Daniel 5.



Na aña 539 P.K., ora Siro e Persa a kapturá Babilonia for di e imperio di Medo-Persia (lesa Daniel 5), e siudat a pèrdè su independensia pa semper. Na aña 482 P.K., Xerxes I brutalmente a reprimí un revolushon di Babilonia kontra e gobièrnu di Persia. El a kita e estatua di Marduk, e dios prinsipal, i aparentemente a daña algun lugá fortifiká i tèmpel.

Alexander e Grandi a kapturá Babilonia for di e persanan na aña 331 P.K. sin un pelea. Apesar di su soño kòrtiku pa hasi Babilonia su kapital oriental, e siudat a dekaí durante di vários siglo. Pa aña 198 despues di Kristu e romano, Septimus Severus, a haña Babilonia kompletamente desolá. Pues, e gran siudat a yega na un fin pa motibu di abandono. Awe algun habitante irakí ta biba riba partinan di e sitio antiguo, pero nan no a rekonstruí e siudat komo tal.

E destino di Babilonia, deskribí den Isaias 13, ta libra e desendientenan di Jacob, kende a ser oprimí pa Babilonia (Isa. 14:4-6). E evento ku a logra esaki tabata e konkista di Babilonia dor di Siro na aña 539 P.K. Aunke e no a destruí e siudat, esaki tabata e prinsipio di e fin pa Babilonia, i nunka mas el a menasá e pueblo di Dios.

Isaias 13 ta dramatisá e kaida di Babilonia komo un huisio divino. E guereronan ku ta kapturá e siudat ta e agentenan di Dios (Isa. 13:2-5). E tempu di huisio ta ser yamá "e dia di Señor" (Isa. 13:6, 9), i e rabia di Dios ta asina poderoso ku e ta afektá e streanan, solo, luna, shelunan, i tera (Isa. 13:10,13).

Kompará Huesnan 5, kaminda e kantika di Debora i Barak ta deskribí Señor marchando pa dilanti ku temblamentu di tera i ku áwaseru for di e shelunan (Huesnan 5:4). Huesnan 5:20,21 ta deskribí e elementonan di naturalesa, inkluyendo streanan, komo bringando kontra e opresor strañero.

Imaginá bo ku un hende ku ta bibando na Babilonia na haltura di su gloria lo por a lesa e palabranan akí di lsaias 13, partikularmente Isaias 13:19-22. Ki bobo i imposibel nan lo a parse! Ki otro profesianan, ku no a kumpli ainda, ta parse bobo i imposibel pa nos awor aki? Dikon lo tabata bobo i imposibel, sinembargo, pa deskartá nan komo imposibel?

Djamars2 di febrüari

Kaida di e Seru “Rei” (Isaias 14)

Komo reakshon riba e kaida di Babilonia (Isaias 13), ku ta libra e pueblo di Dios (Isa. 14:1-3), Isaias 14:4-23 ta pronunsiá un chèrchi figurativo (lesa tambe Mik. 2:4, Hab. 2:6) kontra e rei di Babilonia. E ta poétiko, no intenshoná pa ta literal, opviamente, komo ku e ta deskribí reinan morto saludando nan kolega nobo den e esfera di morto (Isa. 14:9,10), kaminda insekto i bichi ta su kama (Isa. 14:11). Esaki simplemente ta e forma dramátiko di Señor di bisa e rei arogante ku e lo ser rebahá, meskos ku otro monarkanan orguyoso promé kuné; e no ta un komentario riba e estado di e mortonan!

Kon Isaias 14:12-14 lo por a ser apliká na un rei di Babilonia?



Reinan di Babilonia no tabata sufri di falta di estima propio (Daniel 4,5). Pero pa aspirá pa ta "meskos ku e Haltísimo" (Isa. 14:14) lo tabata mas ayá di asta e ego di mas eksagerá. Miéntras reinan tabata bisa di tin konekshonnan fuerte ku e diosnan, nan tabata supordiná na nan. Esaki tabata ser demostrá dramátikamente tur aña riba e di sinku dia di e Festival di Aña Nobo Babilóniko, den kua e rei tabata ser rekerí pa kita su insiña leal promé ku e aserká e estatua di Marduk pa asina su monarkia por a ser re-afirmá. E idea di kita asta un dios inferior for di su lugá lo a ser konsiderá komo algu loko i di suisidio.

Manera den Isaias 14, Ezekiel 28 ta identifiká un arogansia ku ta desafiá shelu ku e gobernante di un siudat. Aki tambe, e deskripshon ta bai mas ayá di un monarka terenal, i Dios Su sentro di interes ta bin den un enfoke mas skèrpi: E monarka orguyoso tabata den e Hòfi di Eden, un kerubin ungí, kubridó, òf guardian, riba e seru santu di Dios, perfekto for di dia ku el a ser kreá te ora ku piká a ser hañá den dje, saká afó pa Dios, i ku finalmente lo ser destruí pa kandela (Ezek. 28:12-18). Apliká na kualkier ser humano, e términonan spesífiko di e retórika akí ta asina figurativo ku nan por ta asta insignifikante. Pero Revelashon 12:7-9 sí ta konta di un ser poderoso ku a ser tirá for di shelu huntu ku su angelnan: "Satanas, e gañadó di henter e mundu" (Rev. 12:9, NRSV), ku a gaña Eva den Eden (Génesis 3).

Satanas tin un imaginashon orguyoso: "... bo a bisa: ‘Mi ta un dios; mi ta sinta riba e asiento di e diosnan, den kurason di e lamannan’, sinembargo, bo ta un mortal, i no un dios" (Ezek. 28:2, NRSV). Su morto lo proba ku e no ta un dios. Diferente for di Kristu, Satanas lo peresé den kurason di un laman di kandela (Rev. 20:10), pa nunka mas e persiguí e universo atrobe.

Kompará lsaias 14:13,14 ku Mateo 11:29, Juan 13:5, i Filipensenan 2:5-8. Kiko e kontraste akí ta bisa nos tokante di e karakter di Dios kontrali na e karakter di Satanas? Kiko e kontraste akí ta bisa nos tokante di kon Señor ta mira orguyo, arogansia i e deseo pa superioridat?

Djárason3 di febrüari

Porta di Shelu (Isaias 13,14)

Den Isaias 14 un burla kontra Satanas, e "Strea di Mardugá (den KJV, ‘Lucifer’), yu hòmber di Mainta" (Isa. 14:12, NRSV) ku a kai, ta ser mesklá den un burla kontra e rei di Babilonia. Dikon? Kompará Revelashon 12:1-9, kaminda un dragon identifiká komo Satanas (Rev. 12:9) ta trata na destruí un yu asina ku e nase. Den Revelashon 12:5 e yu klaramente ta Kristu. Pero tabata Rei Herodes ku a trata na mata Hesus komo un mucha chikitu (Mateo 2). E dragon ta tantu Satanas komo e poder romano representá pa Herodes, pasobra Satanas ta traha a traves di agentenan humano. Di forma similar, Satanas tabata e poder tras di e rei di Babilonia i e prens di Tiro.

Dikon "Babilonia" mas despues ta referí na Roma (1 Pe. 5:13) i na un poder malbado den e buki di Revelashon (Rev. 14:8; 16:19; Rev. 17:5; Rev. 18:2,10, 21)?



Meskos ku Babilonia literal, Roma i e "Babilonia" di Revelashon ta podernan orguyoso i implakabel ku ta oprimí e pueblo di Dios. Wak spesialmente Revelashon 17:6, pasobra e ta "burachi ku e sanger di e santunan" (NRSV). Nan ta rebeldiá kontra Dios, un idea impliká den e nòmber "Babilonia" mes. Den e lenguahe babilóniko, e nòmber ta bab ili, kua ta nifiká: "e porta di dios(nan)", refiriendo na e lugá di akseso na e esfera divino. Kompará Génesis 11, kaminda hendenan a konstruí e toren di Babel (Babilonia) pa asina pa medio di nan propio poder nan por a subi yega na e nivel divino di inmunidat di kualke responsabilidat na Dios.

Ora Jacob a spièrta for di un soño den kua el a mira un trapi konektando shelu i tera, el a sklama: "Esaki no ta nada otro sino e kas di Dios, i esaki ta e porta di shelu" (Gen. 28:17, NRSV). Nota ku e "kas di Dios" ta "e porta di shelu"; es desir, e kaminda di akseso na e esfera divino. Jacob a yama e lugá "Betel", ku ta nifiká "kas di Dios".

E "porta di shelu" na Betel i e " porta di dios(nan)" na Babilonia tabata kamindanan kontrali pa alkansá e esfera divino. E trapi di Jacob a originá den shelu, revelá for di ariba pa Dios. Pero Babilonia, ku su torennan i tèmpelnan rektangular, a ser konstruí pa sernan humano di abou bai ariba. E kamindanan kontrali akí ta representá kamindanan kontrali na salbashon: grasia inisiá divinamente versus obranan humano. Tur berdadero religion ta basá riba e modelo humilde di Betel: "Pasobra pa grasia boso a ser salbá pa medio di fe" (Efe. 2:8,9, NRSV). Tur "religion" falsu, inkluyendo legalismo i humanismo "sekular", ta basá riba e modelo orguyoso di Babilonia. Pa e kontraste entre e dos aserkamentunan, wak e parabel di Hesus di e fariseo i e publikano (Lukas 18:9-14).

Asta despues di a pasa algun aña den un monasterio di Zen, e kompositor di kantika kanadense Leonard Cohen a bisa un entrevistadó: "Mi no ta salbá". Den konteksto di e estudio di awe, kiko bo ta kere su problema tabata? Kiko e mester tabata sa tokante salbashon?

Djaweps4 di febrüari

Triunfo Final di Sion (Isaias 24 - 27)

Despues di orákulonan kontra nashonnan individual den Isaias 13-23, Isaias 24-27 ta deskribí riba un eskala mundial e derota klimátiko di e enemigunan di Dios i e liberashon di Su pueblo.

Dikon e deskripshon di lsaias di e desolashon di tera (Isaias 24) ta parse e deskripshon di Juan di eventonan konektá ku 1.000 aña ku ta sigui e segundo binida di Kristu (Revelashon 20)?



Manera den lsaias 13-14, aspektonan di Babilonia literal ta apliká na podernan mas despues, i e "rei di Babilonia" ta representá fushon di gobernantenan humano ku e outor intelektual nan tras, Satanas mes. Pues, un mensahe ku Babilonia a kai (Isa. 21:9) por ser ripití na un tempu mas despues (Rev. 14:8, Rev. 18:2), i Satanas ta ser destruí finalmente despues di e segundo binida di Kristu (Rev. 20:10). Miéntras e destrukshon di Babilonia literal tabata un "dia (di huisio) di Señor" (Isa. 13:6,9), un otro "dia grandi i teribel di Señor" (Joel 2:31, Mal. 4:5; kompará Sof 1:7) ta na kaminda.

Di forma similar, den Isaias 24 e vishon di e profeta ta alkansá kondishonnan ku kua e ta konosí te na e tempu ora ku "luna lo ser konfundí, i solo bergonsá, pasobra e Señor di ehérsitonan lo reina riba Seru Sion i na Herusalèm" (Isa. 24:23, NRSV). Isaias indudablemente a pensa ku e vishon tabata apliká na e Herusalèm ku e tabata konosé, pero e buki di Revelashon ta splika ku realmente e lo ser kumplí den e Herusalèm Nobo (Rev. 21:2). "I e stat no tin mester di solo òf luna pa bria riba dje, pasobra e gloria di Dios ta su lus, i su lampi ta e Lamchi" (Rev. 21:23, NRSV).

Dios realmente ta destruí e malbadonan?



Lesa Isaias 28:21, kaminda e obra di destrukshon di Dios ta Su "obra" straño (NRSV). E ta straño p’E, pasobra E no ke hasié, pero e ta, sinembargo, un obra, òf un akto. Ta bèrdat ku piká ta karga e simianan di destrukshon propio (Santiago 1:15). Pero pasobra Dios tin poder final riba bida i morto, i E ta determiná e tempu, lugá i manera di destrukshon final (Revelashon 20), no tin sentido pa argumentá ku E ta terminá e maldishon di piká finalmente den un forma pasivo, dor di simplemente permitiendo kousa i efekto tuma su rumbo natural.

Loke nos ta mira den lsaias 24-27 ta loke nos ta mira reflehá den henter Beibel, kua ta no importá e sufrimentu, doló i desolashon awor, na final Dios i bondat lo triunfá riba maldat. Kiko, e ora ei, ta e úniko kos ku nos por hasi si nos mes ke ta parti di e viktoria final ei? Prov. 3:5-7; Rom. 10:9.

Djabièrnè5 di febrüari

Pa mas Estudio:

“Ta pa medio di kondishonnan nos ta risibí salbashon? Nunka nos ta bini na Kristu pa medio di kondishonnan. I si nos bini na Kristu, e ora ei kiko ta e kondishon? E kondishon ta ku dor di fe bibu nos ta dependé kompletamente i totalmente riba e méritonan di e sanger di e Salbador krusifiká i resusitá. Ora nos hasi esei, e ora ei nos ta hasi e obranan di hustisia. Pero ora Dios ta yamando e pekador den nos mundu, i ta invit'é, no tin kondishon einan; e ta hala bin pa motibu di e invitashon di Kristu, i no ta asina ku, Awor bo tin ku respondé pa asina bini na Dios. E pekador ta bini, i miéntras e ta bini i ta mira Kristu elevá riba e krus ei di Kalvario, ku Dios a impreshoná riba su mente, tin un amor mas ayá ku kualke kos ku ta ser imaginá ku el a tene duru na dje."- Ellen G. White, Manuscript Releases, tomo 6, p. 32.

Preguntanan di Diskushon:

Resúmen:

Isaias a mira ku despues di Asiria, Babilonia lo a konkistá Huda. Pero tambe el a mira ku apesar di gobernantenan superhumano di e skuridat di e mundu akí (Efe. 6:12) obrando a traves di e enemigunan humano di Dios i presumiendo di hunga Dios, Señor definitivamente lo a prevalesé i trese pas eterno na nos planeta problemátiko.