“Konsolá Mi Pueblo”

Den Isaias 40:1, 2, Dios ta konsolá Su pueblo. Nan tempu di kastigu a terminá finalmente. Ki kastigu esei ta?

E kastigu akí, atministrá pa Asiria, ta e bara di e furia di Dios (Isaias 10), for di kua Dios a libra Huda dor di destruí e ehérsito di Senakerib na 701 P.K. (Isaias 37)? Òf e kastigu atministrá pa Babilonia, kua lo a saka biennan i hende for di Huda pasobra Hezekias a desplegá su rikesa na e mensaheronan di Merodak-Baladan (Isaias 39, NRSV)?

"Asiria" i "asirio(nan)" ta ser menshoná 43 biaha for di Isaias 7:17 te na 38:6, pero e nashon akí ta aparesé solamente un biaha den restu di Isaias, kaminda Isaias 52:4 ta referí na opreshon den pasado a traves di Egipto i despues a traves di "e asirio". Den e último parti di Isaias, liberashon for di eksilio na Babilonia ta ser menshoná (Isa. 43:14; Isa. 47:1; Isa. 48:14,20), i ta Siro, e persa ku a konkistá Babilonia na 539 P.K., ku mester libra e eksiliadonan di Huda (Isa. 44:28; Isa. 45:1; Isa. 45:13).

Isaias 1-39 ta enfatisá eventonan ku a hiba na e liberashon for di e asirionan na aña 701 promé ku Kristu, pero na kuminsamentu di kapítulo 40, e buki ta avansá un siglo i mei te na e fin di Babilonia, na aña 539 promé ku Kristu, i e regreso di e hudiunan djis despues.

E tema di regreso for di Babilonia ta konektá ku kualke kos promé den Isaias? Si ta asina, kiko?

Isaias 39 ta sirbi komo un transishon na e siguiente kapítulonan predisiendo un koutiverio babilóniko, a lo ménos pa algun di e desendientenan di Hezekias (Isa. 39:6,7). Ademas, e orákulonan di Isaias 13,14 i 21 ta predesí e kaida di Babilonia i e libertat ku esaki lo a trese pa e pueblo di Dios: "Pero Señor lo tin kompashon di Jacob i lo skohe Israel atrobe, i lo establesé nan den nan mes tera. ... Ora Señor a duna bo sosiegu di bo doló i turbulensia i e sirbishi duru ku kua bo a ser hasí pa sirbi, lo bo entoná e proverbio akí kontra e rei di Babilonia" (Isa. 14:1-4, NRSV). Nota e konekshon djaserka ku Isaias 40:1,2, kaminda Dios ta primintí Su pueblo ku tin un fin na nan sufrimentu.

Kon e pueblo di Dios ta risibí konsuelo? Isa. 40:1-8.

Un mensahero anónimo ta anunsiá ku Dios ta biniendo pa revelá Su gloria (Isa. 40:3-5). Un otro bos ta proklamá ku aunke sernan humano ta pasahero manera vegetashon, "e palabra di nos Dios lo permanesé pa semper" (Isa. 40:8, NRSV).

Despues di e eksilio, e pueblo di Dios ta gana bèk loke nan a risibí na Seru Sinai i ku despues a rechasá a lo largu di henter nan apostasia, pa kua nan a ser kastigá: e presensia di Dios i Su palabra. Esaki ta e ingredientenan básiko di e pakto di Dios ku Israel, kua a ser konsagrá na Su santuario meimei di nan (Éks. 25:8,16). Pasobra nan a violá Su palabra, Dios a bandoná Su tèmpel (Ezekiel 9-11), pero E ta biniendo bèk. Su presensia i Su Palabra eternamente konfiabel ta trese konsuelo, liberashon i speransa.

Ki preparashon ta nesesario pa e binida di Señor? Isa. 40:3-5.

No ta kumbiniente pa un rei ser sakudí pa un kaminda iregular. Asina, su binida ta ser presedé pa trabou riba kaminda. Mas ainda pa e Rei di reinan! Su binida, aparentemente for di ost, kaminda E tabata den eksilio huntu ku Su pueblo komo un santuario pa nan (Ezek. 11:16), lo a rekerí reorganisashon importante di e tereno. Konstrukshon di un super kaminda grandi literal i nivelá a traves di e serunan brutu na ost di Herusalèm lo tabata spantoso, asta ku dinamit i buldozer. Dios ta e Úniko ku por hasi e trabou; ta E ta kambia "e lugánan brutu den suela nivelá" (Isa. 42:16, NRSV). Pero E no tin mester di un kaminda literal pa transportashon pasobra E tin un garoshi aéreo di kerubin (Ezekiel1,9-11).

Tèstamènt Nobo ta apliká eskplísitamente e profesia di Isaias na e trabou riba kaminda spiritual pa medio di e predikashon di Juan Boutista (Mat. 3:3). Su mensahe tabata: “Repentí, pasobra e reino di shelu a yega serka' "(Mat. 3:2, NRSV) i e boutismo ku e tabata ehekutá tabata "di repentimentu pa pordon di pikánan" (Marko 1:4, NRSV). Asina, e trabou riba kaminda tabata arepentimentu, disposishon pa bira for di piká, pa asina risibí e konsuelo di e pordon i presensia di Dios.

Jeremias 31:31-34 a proklamá e mesun mensahe spiritual ku sufisiente tempu pa e eksiliadonan di Huda komprondé e naturalesa spiritual di trabou riba kaminda pa Dios. Den e pasashi akí, Señor ta primintí esnan ku ta dispuesto un komienso nobo: un "pakto nobo" den kua E ta pone Su lei den nan kurason i ta komprometé pa ta nan Dios. Nan konos'É i Su karakter, pasobra El a pordoná nan.

Ki tipo di evento ta ser deskribí den Isaias 40:9 -11?

Mas despues den Isaias ta aparesé un mensahero maskulino ku bon notisia pa Herusalèm (Isa. 41:27; Isa. 52:7). Pero den Isaias 40:9 e mensahero pa proklamá "Ata bo Dios aki!" (NRSV) for di un seru ta femenino, un echo asentuá den hebreo.

Den Salmo 68, David ta alabá Dios pasobra E ta "duna esun desolá un hogar pa biba aden; E ta saka e koutivonan na prosperidat" (Sal. 68:6, NRSV). Aunke aki e palabranan akí ta apliká na e Eksodo for di sklabitut na egipsio, Isaias ta usa e mesun ideanan ku referensia na proklamashon di un segundo "Eksodo": e regreso for di koutiverio babilóniko.

Mientrastantu, e Tèstamènt Nobo ta apliká Isaias 40:3-5 na Juan Boutista, kende a prepará e kaminda pa Kristu, e Palabra eterno kende a bira e presensia di Señor den karni meimei di Su pueblo (Juan 1:14).

Asta mas promé ku Juan, otronan tabata papia tokante e bon notisia di Su binida. Entre e promé di esakinan tabatin e ansianonan Simeon i Ana, kende a topa ku beibi Hesus ora El a ser dediká den e tèmpel (Lukas 2:25-38). Meskos ku e mensaheronan di Isaias, nan tabata hòmber i muhé. Simeon tabata wak padilanti na e konsolashon/konsuelo di Israel den forma di e Mesias (Lukas 2:25, 26).

Den lus di e profesia di Isaias, e no ta parse di ta un koinsidensia ku Ana, un profeta muhé, tabata esun promé ku públikamente a anunsiá na e seru di tèmpel na e pueblo di Herusalèm ku Señor a bini: "Na e momentu ei el a bin, i a kuminsá alabá Dios i papia tokante e yu ku tur esnan ku tabata spera e redenshon di Herusalèm" (Lukas 2:38, NRSV). Esaki tabata e nasementu di evangelismo kristian manera nos konos'é: proklamashon di e evangelio, e bon notisia, ku Hesukristu a bini pa trese salbashon. Despues, Kristu a konfia na un otro muhé, Maria Magdalena, e promé notisia di Su resurekshon triunfante (Juan 20:17,18), e akto ku a sigurá ku Su mishon di evangelio na planeta Tera a ser kumplí. Karni ta manera yerba, pero e Palabra divino ku a bira karni ta eterno (lesa Isa. 40:6-8)!

Kon Isaias 40 ta desaroyá e temanan di e miserikòrdia i poder di Dios?

Den henter e kapítulo akí, e miserikòrdia i poder di Dios ta ser inkorporá (wak aki bou), i asta mesklá huntu, pasobra nan tur dos ta nesesario pa asina Dios por salba Su pueblo. E ke salba nan, pasobra E ta miserikòrdioso; E ta kapas pa salba nan, pasobra E ta poderoso.

• Miserikòrdia (Isa. 40:1-5): konsuelo, binida di Señor pa libra.
• Poder (Isa. 40:3-8): gloria, permanensia versus debilidat humano.
• Miserikòrdia (Isa. 40:9-11): bon notisia di liberashon, Wardadó di Su pueblo.
• Poder (Isa. 40:12-26): inkomparabel Kreador.
• Miserikòrdia (Isa. 40:27-31): komo Kreador, E ta duna poder na esnan debil.

Despues di a introdusí e poder di Dios den términonan di Su gloria i permanensia (Isa. 40:3-8), Isaias ta elaborá riba Su poder i sabiduria superior, kua ta hasi tera i su habitantenan parse insignifikante (Isa. 40:12-17). Aki e estilo di Isaias, ku preguntanan retóriko i analogianan bibu refiriendo na tera i su partinan, ta zona manera e kontesta di Dios na Job (Job 38-41).

Kiko ta e kontesta riba e pregunta retóriko di Isaias: "Ku ken, anto, lo bo kompará Dios" (Isa. 40:18, NRSV)?

Pa Isaias, meskos ku pa Job, e kontesta ta evidente: niun hende. Dios ta inkomparabel. Pero Isaias ta duna atenshon na su pregunta i ta referí na e kontesta ku hopi pueblo antiguo a impliká pa medio di nan akshonnan, kua ta ku Dios ta manera un ídolo (Isa. 40:19,20).

Na e nashon akí Isaias ta respondé. E ta mustra un lokura kaba pa usa un ídolo komo komparashon ku Dios, pero solamente pa ta sigur ku hende ta kapta e punto, e ta elaborá riba e singularidat di Dios i ta presentá e argumento inkontestabel ku E ta e santu Kreador (Isa. 40:21-26).

Kon versíkulo 27 ta revelá e aktitut di e hendenan ku Isaias a dirigí su mensahe na dje? Den ki forma nos ta kulpabel di tin e mesun aktitut?

E propósito di e mensahe di Dios ta pa konsolá hende ku tin mester di dje! Meskos ku Job, nan sufrimentu a hasi nan konfundí i deskurashá enkuanto di Su karakter.

Idolatria ta destruí un relashon úniko i íntimo ku Dios remplasando E ku algu otro (Eks. 20:4,5; Isa. 42:8). Asina, profetanan ta referí na idolatria komo "adulterio" spiritual (Jer. 3:6-9; Ezek. 16:15-19).

Lesa Isaias 41:29. Kon Isaias ta karakterisá ídolonan? Kon bo ta komprondé loke e ta bisando ei tokante nan? Dikon e ta un deskripshon asina presis di kualkier ídolo, no importá kiko e ta?

Idólatranan antiguo tabata kere ku nan tabata adorá sernan divino poderoso a traves di imágennan òf símbolonan di nan. Adorashon di un ídolo ku ta representá un otro dios ta kibra e promé mandamentu: "Lo bo no mag tin otro diosnan Mi dilanti" (Éks. 20:3, NRSV). Pero si un ídolo ta intenshoná pa representá e berdadero Dios, manera e bisé di oro tabata (Eks. 32:4,5), Señor ta rechas'é komo un imágen di Su mes, pasobra niun hende sa kon pa represent'É (Deut. 4:15-19), i nada por representá Su inkomparabel gloria i grandesa. Por lo tantu, un ídolo mes ta funshoná komo un otro dios, i adorando esaki ta kibra e promé i e di dos mandamentu.

E pueblo di Dios no tin mester di ídolo, pasobra nan tin Su presensia Shekina real huntu ku nan den Su santuario. Adorá un ídolo ta remplasá i, por lo tantu, ninga Su presensia real.

Ki tipo di idolatria nos ta enfrentá komo iglesia awe? Idolatria ta aparesé den formanan mas sutil den iglesia awe? Si ta asina, kon?

"Hopi hende ku ta karga e nòmber di kristiannan ta sirbiendo otro diosnan banda di Señor. Nos Kreador ta demandá nos deboshon supremo, nos promé lealtat. Kualkier kos ku tin tendensia di disminuí nos amor pa Dios, òf interferí ku e servisio debí na djE, ta bira asina un ídolo". - Ellen G. White Comments, The SDA Bible Commentary, tomo 2, p. 1011-1012.

Nos sa for di eskritonan antiguo ku idolatria tabata atraktivo, pasobra e tabata trata di materialismo. Usando maneranan di adorá ku hende por a relashoná kuné, idólatranan tabata honra forsanan ku nan tabata kere por a duna nan fertilidat i prosperidat. E tabata un religion di ayudo-propio. E ta zona konosí?

Djis promé ku Señor bini atrobe, ku Su kaminda prepará pa e trabounan riba kaminda di un último mensahe di rekonsiliashon di Elias (Malakias 4), e eskoho lo ta meskos ku den e dianan di Isaias: Lo bo adorá e Kreador, òf lo bo adorá algu otro (Revelashon 13,14), pasobra al final, semper nos ta adorá algu.