Sirbi i Salba

Den Isaias 41:8 Dios ta papia di "Israel, Mi sirbidó," (NRSV) i den 42:1 e ta introdusí "Mi sirbidó." Ken e sirbidó aki ta?

Ta Israel/Jacob, e antepasado di e israelitanan? E nashon di Israel? E Mesias/Kristu, identifiká den Tèstamènt Nobo komo Hesus? Tin dos tipo di referensia na sirbidónan di Dios interkonektá a lo largu di Isaias 41-53. Un sirbidó ta ser yamá "Israel" òf "Jacob," manera den Isaias 41:8; Isa. 44:1,2,21; Isa. 45:4; Isa. 48:20. Pa motibu ku Dios ta dirigí Su mes na Israel/Jacob den tempu presente, ta evidente ku e, Jacob, ta representá e nashon ku ta desendé di dje. Esaki ta ser konfirmá pa e echo ku redenshon pa e "sirbidó Jacob" di Señor ta ser lográ na e momentu ku e mester sali for di Babilonia (Isa. 48:20).

Den otro momentunan, manera Isaias 42:1, Isaias 50:10, Isaias 52:13, Isaias 53:11, e sirbidó di Dios no ta ser menshoná. Ora e ta ser menshoná pa promé bia den Isaias 42:1, su identidat no ta evidente inmediatamente. Sinembargo, segun ku Isaias ta desaroyá su perfil den pasashinan mas despues, ta bira kla ku e ta un individuo ku ta restourá e tribunan di Jacob (Israel) na Dios (Isa. 49:5, 6) i ta muri den sakrifisio na fabor di pekadornan (Isa. 52:13-53:12; lesa tambe Isa. 49:5, 6). P'esei e no por ta mesun kos ku e nashon. Pues, ta evidente ku Isaias ta papia di dos sirbidó di Dios. Unu ta kolektivo (e nashon) i e otro ta individual.

Kiko ta e ròl di e nashon sirbidó? Isa. 41:8-20.

Dios ta sigurá Israel ku e nashon ainda ta e sirbidó di Señor: "Mi a skohe bo i no a tira bo afó" (Isa. 41:9, NRSV). E ora ei Dios ta duna Israel un di e promesanan di mas magnífiko den Beibel: "No teme, pasobra Mi ta ku bo, no tene miedu, pasobra Mi ta bo Dios; Lo Mi fortalesé bo, lo Mi yuda bo, lo Mi sostené bo ku Mi man drechi viktorioso (Isa. 41:10, NRSV). Aki i den e siguiente versíkulonan un di e ròlnan básiko di Israel ta pa konfia ku e Dios berdadero lo salba nan (manera rei Akaz no a hasi) mas bien ku konfia den otro diosnan i nan imágennan manera otro nashonnan ta hasi (Isa. 41:7, 21-24, 28, 29).

Kiko ta e ròl i karakter di e sirbidó sin nòmber di Dios, kende Dios ta skohe i riba ken E ta pone Su Spiritu? Isa. 42:1-7. Skohe e mihó kontesta òf kombinashon di kontesta:

1. E ta proveé hustisia pa e nashonnan.
2. E ta logra su metanan den silensio i suavemente, pero ku éksito.
3. E ta un maestro.
4. E ta sirbi komo un pakto entre Dios i e pueblo.
5. E ta duna lus/speransa dor di kura sieguedat i liberando prizoneronan.
6. Tur esnan aki riba.

Kon e ròl i karakter di e sirbidó akí ta kompará ku esun di e "spreit for di e tronkon di Jesse," riba kende tambe e Spiritu di Señor ta sosegá (Isaias 11)?

Meskos ku den Isaias 42, e gobernante davídiko di Isaias 11 ta aktua den harmonia ku Dios, proveyendo hustisia i liberashon pa esnan oprimí, komo tambe sabiduria i konosementu di Dios. Nos a haña sa ku e "spreit" i "rais"di Jesse ta e Mesias, e yu divino di Isaias 9:6, 7, kende tambe ta trese "pas pa e trono di David i su reino" ku "huisio i ku hustisia" (Isa. 9:7, NRSV). E sirbidó den Isaias 42 ta, opviamente, e Mesias.

Kon Tèstamènt Nobo ta identifiká e sirbidó di Isaias 42:1-7, ku ta proveé hustisia? Mat. 12:15-21.

Mateo 12 ta sita for di Isaias 42 i ta aplik’é na e ministerio di kurashon silensioso di Hesus, e Yu stimá di Dios, den ken E ta deleitá (Isa. 42:1; Mat. 3:16, 17; Mat. 17:5). Ta E kende Su ministerio ta restablesé e konekshon di pakto di Dios ku Su pueblo (Isa. 42:6; Dan. 9:27).

Hesus i Su disipelnan a optené hustisia pa hende librando nan di sufrimentu, ignoransia di Dios, i sklabitut na spiritunan malu, kousá pa e opreshon di Satanas (Lukas 10:19). Despues Hesus a muri pa ratifiká e "pakto nobo" (Mat. 26:28, NRSV) i pa optené hustisia pa e mundu sakando Satanas afó, e strañero ku a usurpá e posishon di “gobernante di e mundu akí" (Juan 12:31-33, NRSV).

Ki predikshon asombroso ta aparesé den Isaias 44:26-45:6?

E ministerio di Isaias a dura for di masoménos 745 promé ku Kristu te masoménos 685 promé ku Kristu. Despues di a menshoná un konkistador for di ost i for di nort (Isa. 41:2,3,25) i insinuando ku esaki mester tabata bon notisia pa Herúsalèm (Isa. 41:27) Isaias a predesí Siro ku presishon na nòmber i a deskribí su aktividatnan. Di bèrdat el a bini for di nort i ost di Babilonia i a konkist'é na aña 539 promé ku Kristu; el a sirbi Dios librando e hudiunan for di nan eksilio na Babilonia; i el a outorisá e rekonstrukshon di e tèmpel na Herúsalèm (lesa Esdras 1).

Pone e predikshon akí den perspektiva. Ya ku tin masoménos shentikuarentiseis aña for di tempu di e morto di Isaias te na e kaida di Babilonia, su profesia tabata un siglo i mei promé ku su tempu. Lo tabata manera George Washington predisiendo ku un hòmber yamá General Dwight Eisenhower lo a yuda libra Oropa na aña 1945!

Pasobra e akshonnan di Siro ta bon dokumentá for di un variedat di fuentenan antiguo, inkluso krónikanan babilóniko, su propio informe den e "Silinder di Siro", i Beibel (2 Kron. 36:22, 23; Esdras 1; Daniel 5; Dan. 6:28; Dan. 10:1), e eksaktitut di e profesia di Isaias ta fuera di diskushon. Esaki ta konfirmá e fe di hendenan ku ta kere ku berdadero profetanan ta risibí predikshonnan eksakto for di Dios, Kende konosé futuro hopi adelantá.

Dikon Dios ta yama Siro "Su ungí” (Isa. 45:1)?

E palabra hebreo pa "ungí" aki ta e palabra for di kua nos ta haña e palabra Mesias. Otro kaminda den Tèstamènt Bieu, e palabra aki por tabata referí na un sumo saserdote ungí (Lev. 4:3, 5, 16; Lev. 6:22), un rei israelita ungí (1 Sam. 16:6; 1 Sam. 24:6, 10; 2 Sam. 22:51), òf e Mesias, un futuro rei davídiko ideal i libertador (Salmo 2:2; Dan. 9:25, 26). For di perspektiva di Isaias, Siro tabata un futuro rei, mandá pa Dios pa libra Su pueblo. Pero e tabata un mesias pekuliar, pasobra e no tabata israelita. E lo a hasi algun kos ku e Mesias lo a hasi, manera derotá e enemigunan di Dios i libra su pueblo koutivo, pero e no por tabata meskos ku e Mesias, pasobra e no tabata desendiente di David.

Ora El a predesí Siro, Dios a prueba Su divinidat úniko demonstrando ku E so konosé futuro (Isa. 41:4, 21-23, 26-82; Isa. 44:26). Tambe el a dirigí Su mes na Siro: "Lo Mi duna bo e tesoronan di skuridat i rikesanan skondí den lugánan sekreto, pa asina bo sa ku ta Ami, Señor, e Dios di Israel, kende ta yama bo na bo nòmber" (Isa. 45:3, NRSV).

E echo ku Isaias a predesí Siro ku eksaktitut na nòmber ta molestiá hendenan ku no ta kere ku profetanan ta risibí predikshonnan for di Dios. Pa afrontá e situashon, nan ta aseptá e teoria ku un otro profeta, un "segundo Isaias", ku tabata biba den tempu di Siro, a skirbi Isaias 40-66. Por lo tantu, e buki di Isaias ta "di zag na dos”, e mesun destino tradishonalmente komprondé di a sosodé ku e profeta mes (lesa Hebr. 11:37).

No tin, sinembargo, testigu históriko di e eksistensia di un segundo "Isaias". Si di bèrdat el a eksistí, lo tabata straño ku Beibel no ta menshon’é, pasobra su mensahe ta profundamente importante, i su arte literario ta fenomenal. Ni sikiera e manuskrito di Beibel di mas bieu, e ròl di Isaias di Qumran, tin un interupshon entre Isaias 39 i 40 ku lo a indiká un transishon na e obra di un outor nobo.

E mensahe básiko di Isaias ta konsistente a lo largu di su buki: Konfia e berdadero Dios, inkluso Su Libertador mesiániko, mas bien ku otro podernan. Eruditonan korektamente ta enfatisá e kambio den enfoke for di e periodo asirio den Isaias 1-39 te na e periodo babilóniko den kapítulonan 40 en adelante. Pero nos a haña sa ku Isaias 13, 14 i 39 ya kaba ta premirá un koutiverio babilóniko. Ta bèrdat ku Isaias 1-39 ta enfatisá huisio i Isaias 40-66 ta enfatisá konsolashon. Pero den e kapítulonan anterior, konsuelo i siguransa divino ta abundante tambe, i pasashinan mas despues, manera Isaias 42:18-25, Isaias 43:22-28, i Isaias 48:1-11, ta papia di e huisio di Dios riba Huda pa a bandon'E. De echo, e predikshonnan di Isaias di futuro konsuelo ta impliká sufrimentu entretantu.

Aunke e nashon a enfrentá kalamidat teribel pa motibu di e pikánan di e pueblo, algun entre nan no a pèrdè speransa. Nan a tene duru na e promesanan di Dios, manera ta ser hañá den Levítiko 26:40-45. Lesa e versíkulonan kuidadosamente. Pone bo mes den lugá di e hebreonan ei ku tabata bibu despues di e derota di e nashon dor di Babilonia. Ki speransa lo bo por haña den e palabranan akí?

Ken ta e sirbidó di Dios den Isaias 49:1-12?

Dios ta yam'é i dun'é un nòmber promé ku e nase, ta hasi su boka manera un spada, i lo ser glorifiká den dje. Dios ta usa e sirbidó pa trese e nashon di Israel bèk na E mes, pa ta un lus di salbashon na henter mundu, pa ta un pakto, i pa libra prizoneronan. Tin hopi konvergensia entre e deskripshon akí i esun di Isaias 42, kaminda nos a identifiká e sirbidó komo e Mesias. Tèstamènt Nobo ta haña e atributonan di e sirbidó den Hesukristu, den tur dos binida: Mat. 1:21; Juan 8:12; Juan 9:5; Juan 17:1-5; Rev. 1:16; Rev. 2:16; Rev. 19:15.

Si e sirbidó akí ta e Mesias, dikon Dios ta yam'É "Israel" aki (Isa. 49:3)?

Anteriormente nos a topa esei den e sekshon akí di Isaias, e sirbidó di Dios "Israel/Jacob" ta referí na e nashon. Pero aki e nòmber "Israel" (sin un referensia paralelo na "Jacob") klaramente ta apliká na e sirbidó individual, ku ta restourá e nashon na Dios (Isa. 49:5). E sirbidó individual a bira e personifikashon òf representante ideal di e nashon di ken su frakaso a komprometé su uso di e nòmber "Israel" (Isa. 48:1).

Ki elemento nobo ta aparesé aki? Isa. 49:4, 7.

Aki tin e promé indikashon di e difikultat embolbí den e tarea di e sirbidó. E ta lamentá: "Mi a traha enbano, Mi a gasta Mi forsa pa nada i banidat" (Isa. 49:4, NRSV), un idea a eko den Daniel 9:26: "un ku ta ungí lo ser kòrtá kitá afó i lo no tin nada” (NRSV). Pero e ta tene duru na fe: "Sinembargo, siguramente, mi kousa ta ku Señor, i Mi rekompensa ta ku Mi Dios" (Isa. 49:4, NRSV). J. Alec Motyer ta opservá: Por lo tantu, Isaias a premirá un Sirbidó ku un naturalesa humano real, probá manera nos i probando su mes di ta e outor i perfekshonadó di e kaminda di fe, un fe real i personal ku ainda por bisa mi Dios ora nada no ta parse di ta bale la pena mas." - The Prophecy of Isaiah: An Introduction and Commentary (Downers Grove, Illinois: InterVarsity Press, 1993), p. 387.

Isaias 49:7 ta sorprendente. E sirbidó ta "altamente despresiá, detestá pa e nashonnan, e esklabo di gobernantenan”, ma Señor ta bis’é: “Reinan lo mira i lanta, prensnan, i nan lo bùig te na suela, pa motibu di Señor, Kende ta fiel, Esun Santu di Israel, Kende a skohe Bo" (NRSV).