Renasementu di Planeta Tera

Lesa Isaias 65:17-25. Ki tipo di restourashon Señor ta primintí aki?

Dios ta primintí un kreashon nobo, kuminsando ku e palabranan: "Pasobra Mi ta na punto di krea shelunan nobo i un tera nobo; e kosnan anterior lo no ser rekordá òf bin na mente" (Isa. 65:17, NRSV). Den e profesia remarkabel akí, Señor ta primintí di "krea Herusalèm komo un goso, i su pueblo komo un delisia" (Isa. 65:18, NRSV). Den e siudat lo no tin mas yoramentu (Isa. 65:19). Hende normalmente lo biba konsiderablemente mas largu ku un siglo promé ku nan muri (Isa. 65:20). Nan obra i yunan lo keda pa nan disfrutá (Isa. 65:21-23). Dios lo kontestá nan asta promé ku nan yama (Isa. 65:24).

Pa bunita ku e ta, dikon esaki no ta un kuadro di nos restourashon final, nos speransa final?

Te asina leu nos tin un kuadro di bida largu i trankil den e Tera Primintí. Pero apesar ku hende ta biba mas largu, ainda nan ta muri. Unda e transformashon radikal di naturalesa ta ku nos ta spera ku e kreashon di "shelunan nobo" i un "tera nobo"? E siguiente versíkulo ta bisa nos: "E lobo i e lamchi di karné lo kome huntu, e leon lo kome yerba seku manera e bue; ma e kolebra, su kuminda lo ta stòf di tera! Nan lo no hasi daño òf destruí riba henter Mi seru santu, Señor ta bisa" (Isa. 65:25, NRSV).

Pa karnívoronan manera leon bira vegetariano ta rekerí muchu mas ku un klas di kushina vegetariano. E ta rekerí un rekreashon pa restourá e mundu na su estado ideal, manera e tabata promé ku piká den Eden a introdusí morto.

Aki den Isaias 65, Dios ta presentá e kreashon di "shelunan nobo" i un "tera nobo" komo un proseso, un serie di pasonan, ku ta kuminsá ku e rekreashon di Herusalèm. Kompará lsaias 11, kaminda e Mesias lo a trese hustisia (Isa. 11:1-5). Despues, finalmente, lo tin pas riba e "seru santu" mundial di Dios; e imágennan usá den Isaias 11 ta similar na loke ta ser hañá den Isaias 65: "E lobo lo biba huntu ku e lamchi di karné ... i e leon lo kome yerba seku manera e bue ..." (Isa. 11:6,7, NRSV). Aunke e "seru santu" di Señor lo a kuminsá ku Seru Sion na Herusalèm, e tabata solamente un prekursor, un símbolo, di loke Dios ta primintí di hasi, finalmente, den un mundu nobo ku Su pueblo redimí.

Lesa Isaias 66:1-19. Teniendo den mente e tempu den kua Isaias a skirbi, kiko ta e mensahe básiko ku e ta dunando aki?

A traves di e profeta, Dios ta reiterá e apelashon i atvertensia ku ta penetrá den e buki: Dios lo salba i restourá esnan humilde, ku ta tembla dilanti di Su palabra (Isa. 66:2,5). Manera den lsaias 40:1, lo E konsolá nan (Isa. 66:13). Pero E lo destruí esnan ku rebeldiá kontra djE. Esakinan ta inkluí hipókritanan di ritual, ken nan sakrifisionan E ta rechasá (Isa. 66:3,4; kompará Isa. 1:10-15,) komo tambe esnan ku ta odia i ta rechasá esnan fiel di djE (Isa. 66:5). Tambe nan ta inkluí esnan ku ta praktiká abominashonnan pagano (Isa. 66:17) manera esnan ku tabata ser praktiká den e tèmpel na Herusalèm (Ezek. 8:7-12).

Wak Isaias 66:3. Kiko e tekst aki ta bisando? Ki prinsipionan spiritual ta ser revelá aki? Kon e mesun idea lo por ser ekspresá, pero den konteksto di kristianismo i adorashon kontemporáneo?

Kon Dios ta sirbi komo un magnet pa hala nashonnan na E mes? Isa. 66:18,19.

Despues di e destrukshon di Su enemigunan (Isa. 66:14-17), Dios ta revelá Su gloria pa asina E bira un magnet pa hala hende na Herusalèm (kompará Isa. 2:2-4). E ta establesé un "señal" entre nan, ku no ta ser spesifiká aki pero aparentemente ta referí na e señal ku a ser menshoná pa último bia pa Isaias: Dios ta duna Su pueblo goso i pas i ta restourá nan tera (Isa. 55:12,13). Ora E revelá Su gloria dor di restourá Su pueblo despues di destrukshon, esaki ta un señal di Su fabor restourá, meskos ku El a duna Noe e señal di e regenbog despues di e Diluvio (Gen. 9:13-17).

Lesa Isaias 66:5. Kiko ta nifiká pa tembla pa Su Palabra? Dikon Señor ke pa nos tembla pa Su Palabra? Si bo no tembla, kiko esei lo por bisa tokante e kondishon di bo kurason?

Kiko ta nifikashon di sobrebibientenan ku ta trese hende di e nashonnan komo un ofrenda na Señor? Isa. 66:19,20.

Dios ta manda sobrebibientenan di Su destrukshon te na e finnan di tera, na e hendenan ku no sa tokante Dios, "i nan lo deklará Mi gloria meimei di e nashonnan" (Isa. 66:19, NRSV). Esaki ta un di e deklarashonnan di mas kla den Tèstamènt Bieu di e tema di obra mishonero. Den otro palabra, no solamente hende mester ser halá na e nashon hebreo, pero algun di e hendenan hebreo lo bai na otro nashonnan i siña nan tokante e Dios berdadero, un paradigma ku ta eksplísito den Tèstamènt Nobo. Aunke ku tabatin obra mishonero hudiu entre e tempu di regreso for di eksilio i e tempu di Kristu (Mat. 23:15), e promé kristiannan a plama e evangelio rápidamente i na gran eskala (Kol. 1:23).

Meskos ku e israelitanan tabata trese ofrendanan di maishi na Señor den Su tèmpel, asina e mishoneronan lo a trese un ofrenda na djE. Pero nan ofrenda lo tabata "tur boso rumannan for di tur e nashonnan" (Isa. 66:20, NRSV). Meskos ku ofrendanan di maishi tabata regalonan na Dios ku no tabata ser matá, esnan kombertí ku tabata ser tresé na Señor lo a ser presentá na djE komo "sakrifisionan bibu" (kompará Rom. 12:1). Pa e idea ku hende por a ser presentá komo un tipo di ofrenda na Dios, nota e dedikashon muchu mas promé di levitanan "komo un ofrenda di zoyamentu di e israelitanan, pa nan por a hasi e sirbishi di Señor" (Num. 8:11, NRSV).

Kiko ta nifikashon di e promesa di Dios pa "tuma algun di nan komo saserdote i komo levita" (Isa. 66:21, NRSV)?

E"nan" den versíkulo 21 ta referí na "boso parientenan for di tur e nashonnan" (NRSV) den e versíkulo anterior. Esakinan ta paganonan, algun di nan ku Dios lo a skohe komo lidernan di adorashon, huntu ku e saserdotenan i e levitanan. Esaki ta un kambio revolushonario. Anteriormente Dios a outorisá solamente desendientenan di Aaron pa sirbi komo saserdote i solamente otro miembronan di e tribu di Levi pa yuda nan. Paganonan no por bira desendientenan di Aaron òf Levi literalmente, pero Dios lo a outorisá algun pa sirbi den e kapasidatnan akí, kua anteriormente a ser prohibí asta pa mayoria hudiu.

Lesa 1 Pedro 2:9, 10. Na ken Pedro ta skirbiendo? Kiko e ta bisando? Ki mensahe e tin pa kada un di nos, komo miembronan di un "nashon santu" awe? Nos ta hasiendo mihó ku e pueblo original (Eks. 19:6)?

E israelitanan tabata "un reino saserdotal i un nashon santu" (Eks. 19:6, NRSV), ku saserdotenan spesial apartá pa representá nan komo lidernan di adorashon. Pero den futuro, algun pagano lo a bira lidernan di adorashon (Isa. 66:21).

Kon e kambio akí lo a afektá e komunidat renobá di fe? Lesa Mat. 28:19; Echonan 26:20; Gal. 3:28; Kol. 3:11; 1 Tim. 3:16.

Den e "órden mundial nobo" di Dios, paganonan no solamente lo a uni ku e pueblo di Dios, nan lo tabata partnernan igual ku hudiunan den un komunidat di fe kombiná ku lo tabata un "saserdosio real". Por lo tantu, e distinshon entre hudiu- i paganonan lo a bira práktikamente irelevante.

Ki ora e profesia di Isaias a keda kumplí?

Pablo, e mishonero na e paganonan, a proklamá: "No tin ni hudiu òf griego mas, ... pasobra boso tur ta un den Kristu Hesus. I si boso ta pertenesé na Kristu, e ora ei boso ta desendientenan di Abraham, erederonan segun e promesa" (Gal. 3:28,29, NRSV).

Bira erederonan di e promesa i, por lo tantu, un "saserdosio real" eksaltá, no tabata un mandato pa elitismo arogante, sino un enkargo pa uni ku e hudiunan den proklamashon di "e aktonan poderoso di Esun kende a yama boso for di skuridat den Su lus maravioso" (1 Pe. 2:9, NRSV; kompará Isa. 66:19).

E elevashon di e paganonan no a duna e hudiunan e derechi pa keha ku Dios tabata inhustu ora El a duna nan e mesun rekompensa.Tampoko el a duna e paganonan e derechi pa trata nan rumannan hudiu ku falta di rèspèt, meskos ku trahadónan kontratá mas mas lat den dia no mester menospresiá esnan kontratá mas trempan (lesa Mat. 20:1-16). E hudiunan a ser " konfiá ku e orákulonan di Dios" promé (Rom. 3:2, NRSV) komo e kanal di revelashon di Dios. Pablo a skirbi na e paganonan: "Ma si algun di e ramanan a ser kibrá kitá afó, i abo, un palu di oleifi shimaron, a ser di ènter na nan lugá pa kompartí e rais riku di e palu di oleifi, no broma riba e ramanan" (Rom. 11:17,18, NRSV).

Meimei di tur e bon notisianan, dikon e Mesias, manera ta ser deskribí den Isaias 61, ta proklamá e vengansa di Dios? Ki ora e profesia akí ta ser kumpli?

Lesa Isaias 66:22. Kiko e teksto ak ta bisando nos? Ki speransa nos por haña ei?.

Un di e promesanan di mas maravioso den Isaias ta ser hañá den lsaias 66:22. Les’é kuidadosamente. Den e shelunan nobo i e tera nobo, nos desendensia i nos nòmber lo permanesé, pa semper. No mas kitamentu, kòrtamentu, implantashon, rankamentu, òf eliminashon di rais. Nos tin aki un promesa di bida eterno den un mundu hasí nobo, un mundu sin piká, sin morto, sin sufrimentu, un shelu nobo i un tera nobo, e kumplimentu final i kompleto di nos fe kristian, e konsumashon di loke Kristu a logra pa nos na e krus.

Dikon tin lunanan nobo huntu ku e sabatnan den e representashon di e shelunan nobo i e tera nobo manera ta ser presentá den Isaias 66:23?

Aunke tin un kantidat di diferente manera pa wak e teksto difísil akí, un aserkamentu ta esaki: Dios a krea e Sabat promé ku e sistema di sakrifisio tabata eksistí (Gen. 2:2,3). Asina, aunke Sabatnan tabata ser honrá pa e sistema ritual, nan no ta dependiente riba dje. Por lo tantu, nan ta sigui sin interupshon durante henter e periodo di restourashon, te den e tera nobo. No tin indikashon den Beibel ku lunanan nobo tabata dianan legítimo di adorashon apart for di e sistema di sakrifisio. Pero kisas nan lo ta dianan di adorashon (pero no nesesariamente dianan di sosiegu manera e Sabatnan semanal) den e tera nobo, posiblemente en konekshon ku e siklo mensual di e palu di bida (Rev. 22:2).

Kualke sea e nifikashon spesífiko di Isaias 66:23 por ta, e punto krusial ta parse di ta ku e pueblo di Dios lo ta adorando E a lo largu di henter eternidat.

Dikon Isaias ta terminá ku e esena negativo di hendenan salbá mirando e kadavernan di esnan rebelde destruí pa Dios a (Isa. 66:24)?

Komo un atvertensia gráfiko pa e hendenan di su tempu, Isaias ta resumí e kontraste entre fiel sobrebibientenan di e destrukshon babilóniko i rebeldenan, ku lo a ser destruí. Esaki no ta un tormenta eterno, e rebeldenan ta morto, matá pa "kandela", un destrukshon ku no a ser pagá te ora el a hasi su trabou pa asina e re-kreashon di Herusalèm por a kuminsá.

E atvertensia di Isaias ta mustra na un kumplimentu final profetisá pa e buki di Revelashon: destrukshon di pekadornan, Satanas, i morto den un lago di kandela (Revelashon 20), despues di kua lo tin "un shelu nobo i un tera nobo", un "Herusalèm nobo" santu, i no mas yoramentu òf doló, "pasobra e promé kosnan a pasa” (Rev. 21:1-4, NRSV; kompará Isa. 65:17-19), un eksistensia nobo, ku bida eterno pa tur ku a ser redimí for di tera.