Kiko a Sosodé?

“Na prinsipio Dios a krea shelu i tera” (Gen. 1:1).

Un sientífiko a kaba di duna un konferensia riba e órbitanan di e planetanan rònt di solo, i e órbita di solo rònt di e sentro di e galaksia, ora un dama di edat, bistí ku sapatunan di tènis pretu, a lanta i a bisa ku tera tabata un disko plat ku ta sinta riba lomba di un turtuga. E sientífiko, chansando, a puntra riba kiko e turtuga ei tabata sinta, i el a kontestá ku e tabata sinta riba un otro turtuga. “Señora,” e sientífiko a sigui hasi wega, “e ora ei, riba kiko e turtuga ei ta sinta?” El a kontestá: “Un otro turtuga”, pero promé ku e sientífiko por a puntra riba kiko e turtuga ei tabata sinta, el a sagudí su dede den su kara i a hou: “Spar bo rosea, mi yu, ta turtuganan te abou.”

Aunke e ta bunita, e storia ei ta trata ku e tema di mas krusial di eksistensia humano, e naturalesa di e universo mes. Kiko e mundu akí, ku nos ta haña nos mes aden sin eskoho di nos mes, ta? Dikon nos ta aki? Kon nos a yega aki? I na unda nos tur ta bai finalmente?

Esakinan ta e preguntanan di mas básiko i fundamental ku hende por a hasi, pasobra nos komprondementu di ken nos ta i kon nos a yega aki lo impaktá nos komprondementu di kon nos ta biba i kon nos ta aktua miéntras nos ta aki.

Buska e siguiente tekstonan: Gen. 1:1; Salmo 100:3; Isa. 40:28; Echonan 17:26; Efe. 3:9; Hebr. 1:2, 10. Kon kada un, den su mes manera, ta kontestá algun di e preguntanan aki riba? Kiko ta esun punto ku nan tur tin en komun?

Loke ta interesante tokante Génesis 1:1 (òf asta e otro tekstonan) ta ku Señor no ta trata na proba ku E ta e Kreador. No tin argumentonan elaborá pa demostrá esei. En kambio, e ta ser simplemente i klaramente deklará, sin ningun intento pa hustifiká, splika, òf prob’é. Sea nos ta asept’é pa medio di fe, òf nos no ta. De echo, fe ta e úniko manera ku nos por asept’é, pa un simpel rason: niun di nos tabata aki pa mira e proseso mes di e Kreashon. E lo tabata, en realidat, un imposibilidat lógiko pa nos pa tabata ei na nos propio kreashon. Asta sekularistanan, kualke sea e punto di bista di orígennan ku nan tin, mester tuma e punto di bista ei riba fe pa e mesun rason ku nos komo kreashonistanan mester hasi: niun di nos tabata ei pa mira e evento.

Beibel ta deklará ku Dios a krea humanidat, hòmber i muhé, “den Su propio imágen" (Gen. 1:27, NKJV). Basá riba e idea akí, kontestá e siguiente preguntanan:

1. Kiko ta nifiká ku Dios a krea nos den Su propio imágen? Den ki formanan nos ta “den Su propio imágen” (NKJV)?


2. Di akuerdo ku e relato di Génesis, Señor a traha kualke otro kos mas “den Su propio imágen” (NKJV) ademas di humanidat? Si no t’asina, kiko esei ta bisa nos tokante nos status úniko, kontrali na e restu di e kreashon terenal? Ki lèsnan nos por saka for di e kontraste akí?


3. Kiko mas por ser hañá den e relato di kreashon di humanidat ku ta apartá e rasa for di kualke kos mas ku Señor a krea? Lesa Gen. 2:7,18-25.

Aunke nos mester papia di Dios den terminologia humano, nos no mester lubidá ku E ta un Ser spiritual (Juan 4:24), ku ta poseé karakterístikanan divino. Tur loke nos por bisa ta ku den nos naturalesa físiko, mental i spiritual, nos ta reflehá den algun manera nos Kreador divino, maske kuantu ta keda tokante djE ku ainda ta, a lo ménos pa nos, lorá den misterio. Beibel ta enfatisá, sinembargo, e aspektonan spiritual i mental di nos mente. E aspektonan akí nos por desaroyá i mehorá. Ta e singularidat di e mente humano ku ta hasi un relashon nutritivo ku Dios posibel, algu ku kualke kos den e kreashon terenal di Dios ta parse inkapas pa hasi.

Nota tambe e relato úniko di kon Dios a traha hende muhé. Tantu hòmber komo muhé ta kompartí e privilegio di ser trahá den imágen di Dios. Den nan kreashon, no tin niun indisio di inferioridat di un na e otro. Dios Mes a traha nan tur dos for di e mesun material. Dios a traha tur dos igual for di komienso i a pone nan huntu den un relashon spesial kunE. Tur dos tabatin e mesun oportunidat pa desaroyá nan karakter duná di Dios den un forma ku lo a trese gloria na djE.

“Dios Mes a duna Adam un kompañero. El a proveé ‘un partner p’e’, un yudadó ku ta korespondé na dje, un ku tabata pas pa ta su kompañero, i un ku por tabata un kuné den amor i simpatia. Eva a ser kreá for di un repchi tumá for di e banda di Adam, ku ta nifiká ku e no mester a kontrol’é komo e kabes, ni ser trapá bou di su pia komo un inferior, sino para na su banda komo un igual, ser stimá i protehá dor di dje.” — Ellen G. White, Patriarchs and Prophets, p. 46.

Nota e promé palabranan di Dios papiá na humanidat, a lo ménos manera nan ta aparesé den Skritura. E ta mustra nan nan abilidat pa prokreá, pa reprodusí mas di nan propio tipo. Tambe e ta mustra nan e tera mes, e kreashon, i E ta bisa nan pa yen’é, pa domin’é, i pa tin superioridat riba dje. E ta mustra nan tambe e matanan ku nan por kome. Den poko palabra, di akuerdo ku Beibel, e promé palabranan di Dios na hòmber i muhé ta trata spesífikamente ku nan interakshon i relashon ku e mundu físiko.

Kiko Génesis 1:28-29 ta bisa nos tokante kon Dios ta mira e mundu material? Nan ta impliká ku tin algu malu den kosnan material i nos plaser di nan? Ki lèsnan nos por siña for di e promé esenanan akí den historia humano tokanta kon nos mester relashoná ku e kreashon mes?

Tambe, ku e palabranan akí, Dios ta dal e promé pasonan den direkshon di un relashon ku humanidat. E ta papia ku nan, ta duna nan mandatonan, ta bisa nan kiko pa hasi. Tin un responsabilidat implísito den palabranan tambe. Dios a pidi nan pa ta shon riba e kreashon maravioso ku E Mes a traha.

Génesis 1:28 ta bisa ku Dios a bendishoná Adam i Eva. Kiko esei ta nifiká? Ki tipo di relashon esaki ta impliká entre nan i nan Kreador?

Dios a dirigí su mes na Adam i Eva komo sernan inteligente ku por a reakshoná riba Su amabilidat i drenta den komunion i kompañerismo kunE. Tambe, komo kriatura-yunan, Adam i Eva tabata dependiente riba e bendishon i kuido di nan Kreador-Tata. El a proveé tur loke nan tabatin mester. Nan no a hasi nada pa meresé loke El a duna nan. Nan tabata puru resipientenan di algu ku nan no a gana.

“I Señor Dios a ordená e hòmber, bisando: ‘Di tur palu di e hòfi bo por kome libremente, ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur’” (Gen. 2:16, 17).

E tèst akí a proveé Adam i Eva ku un oportunidat pa ehersé nan boluntat liber. Tambe el a desafiá nan pa respondé positivamente òf negativamente na nan relashon ku e Kreador. E ta demostrá tambe ku Dios a traha nan sernan moral liber. Despues di tur kos, si nan no tabatin e oportunidat pa desobedesé, dikon Señor lo a ni preokupá pa spièrta nan, na promé lugá, kontra desobediensia?

“Tur kos ku a presedé den e kapítulo akí a traha e kaminda pa e klímaks akí [Gen. 2:16, 17]. E futuro di e rasa ta sentrá riba e solo prohibishon akí. Hende no mester ser konfundí pa un multiplisidat di asuntu. Solamente un ordenansa divino mester ser tené den mente. Dor di asina limitá e kantidat di mandatonan na unu, Yaweh ta duna muestra di Su miserikòrdia. Ademas, pa indiká ku esun mandamentu akí no ta doloroso, Señor ta pon’é kontra e trasfondo di un pèrmit amplio: ‘for di kualke palu di e hòfi bo por kome libremente .’ ” — H. C. Leupold, Exposition of Genesis (Columbus, OH: Wartburg Press, 1942), tomo 1, p. 127.

Dor di yama Adam i Eva pa obedesé Su boluntat, Dios tabata bisando: Ami ta boso Kreador, i Mi a traha boso den Mi imágen. Boso bida ta ser sostené dor i Mi, pasobra dor di Mi boso ta move i biba i tin boso ser. Mi a proveé tur kos pa boso bienestar i felisidat (sostenementu, hogar, kompañerismo humano) i a establesé boso komo gobernante di e mundu akí bou di Mi. Si boso ta dispuesto pa afirmá e relashon akí ku Mi pasobra boso ta stima Mi, e ora ei lo Mi ta boso Dios, i boso lo ta Mi yunan. I boso por afirmá e relashon akí i e konfiansa implísito den dje dor di simplemente obedesé e mandato spesífiko akí.

Al final, nos relashon ku Dios por ta efektivo i duradero solamente si nos skohe libremente pa aseptá Su boluntat. Rechasá Su boluntat ta, básikamente, reklamá independensia di djE. E ta indiká ku nos ta kere ku nos no tin mester di djE. Esei ta un eskoho ku ta resultá den konosementu di malu, i malu ta hiba na isolashon, soledat, frustrashon, i morto.

Nos tin tendensia di kere hendenan ku nos konosé i outomátikamente deskonfiá esnan ku nos no konosé. Eva, di naturalesa, lo a deskonfiá Satanas. Ademas, kualke atake direkto kontra Dios lo a hasié defensivo. Ki pasonan, anto, Satanas a tuma pa evitá e defensanan natural di Eva? (Gen. 3:1-6).

“Deplorabel manera e transgreshon di Eva tabata i tenso manera e tabata ku potensial aflikshon pa e famia humano, su eskoho no nesesariamente a envolví e rasa den e kastigu pa su transgreshon. Tabata e eskoho deliberá di Adam, den komprondementu total di un mandato ekspresá di Dios, mas bien ku di esun di Eva, ku a hasi piká i morto e destino inevitabel di humanidat. Eva a ser engañá; Adam no .” — The SDA Bible Commentary, tomo 1, p. 231.

Komo resultado di e transgreshon evidente akí i indiferensia na e mandato di Dios, e relashon entre Dios i humanidat awor ta kibrá. El a kambia di kompañerismo habrí ku Dios na hui den miedu for di Su presensia (Gen. 3:8-10). Isolashon i separashon ta remplasá kompañerismo i komunion. Piká a aparesé, i tur su resultadonan mahos a sigui. A ménos ku algun a ser hasí, humanidat tabata bayendo rumbo pa ruina eterno.

Meimei di e tragedia akí, ki palabranan di speransa i promesa Dios a papia? (Lesa Gen. 3:15.)

E palabranan sorprendente di Dios di speransa profétiko ta papia di un hostilidat divinamente ordená entre e kolebra i e muhé, entre su Simia i su simia. E ta haña kulminá den e aparensia viktorioso di un Simia representativo di e simia di e muhé ku ta duna un sla mortal na kabes di Satanas, miéntras e lo tabata solamente kapas di heridá hilchi di e Mesias.

Den nan impotensia total, Adam i Eva tabata bai haña speransa for di e promesa Mesiániko akí, speransa ku lo a transformá nan eksistensia, pasobra e speransa akí tabata duná pa Dios i sostené pa Dios. E promesa akí di e Mesias i di viktoria final, aunke el a ser deklará vagamente na e momentu ei, a lanta e skuridat den kua e echo di a peka a pone nan.