Simia di Abraham

"Pasobra bo ta un pueblo santu pa SEÑOR bo Dios; SEÑOR bo Dios a skohe bo, for [ariba] di tur e pueblonan ku tin riba superfisie di tera, pa ta un pueblo spesial pa Su mes." (Deut. 7:6).

No tin duda tokante esaki: Señor a skohe spesífikamente e pueblo hebreo pa ta Su representantenan spesial riba tera. E palabra tradusí "spesial" den e versíkulo aki riba, segullah, por nifiká "propiedat balorá" òf "tesoro pekuliar". E punto krusial pa kòrda, tambe, ta ku e eskoho aki tabata totalmente e akto di Dios, un ekspreshon di Su grasia. Nada a ser hañá den e hendenan mes ku a hasi nan meresé e grasia akí. No por tabatin, pasobra grasia ta algu ku ta bin inmeresí.

Lesa Ezekiel 16:8. Kon esei ta yuda splika Señor su skohementu di Israel?

"Dikon Israel a ser skohé pa Yahweh? Esei tabata inkomprendibel. E tabata un grupo chikí di hende sin gran kultura òf prestigio. E no tabata poseé ningun kualidat personal spesial ku lo a hustifiká un eskoho asina. E elekshon tabata e akto di Dios so … . E kousa apsoluto pa e eskoho ei ta sintá den e misterio di amor divino. Sinembargo, e echo ta ku Dios tabata stima Israel i a skoh’é, honrando ku esei Su promesa na e tatanan ... . El a ser skohí a base di e amor di Yahweh p'e. El a ser liberá di sklabitut na Egipto pa medio di un manifestashon di e poder di Yahweh. Lag’é kapta e gran echonan akí i e lo a realisá ku e tabata enbèrdat un pueblo santu i spesialmente tesorá. Kualke tendensia di su parti, sinembargo, pa someté un status nobel asina tabata repugnante den ekstremo.” — J. A. Thompson, Deuteronomy (London: Inter-Varsity Press, 1974), p. 130, 131.

Di akuerdo ku e plan divino, e israelitanan mester tabata tantu un rasa real komo di saserdosio. Den un mundu malbado nan mester tabata reinan, moral i spiritual, den e echo ku nan mester a prevalesé riba e esfera di piká. Komo saserdotenan, nan mester a hala serka Señor den orashon, den alabansa, i den sakrifisio. Komo mediadónan entre Dios i e pagano, nan mester a sirbi komo instruktornan, predikadónan, i profetanan, i mester tabata ehèmpelnan di un bida santu, eksponentenan di shelu di berdadero religion.

E promesa ku un tera lo a ser duná na e pueblo di Dios, Israel, a ser duná promé na Abraham i despues ripití na Isaak i Jakob. E palabranan di José na su kama di morto a ripití e promesa (Gen. 50:24). Dios a informá Abraham, sinembargo, ku "kuatershen aña" lo a pasa promé ku e simia di Abraham lo a tuma e poseshon di e tera (Gen. 15:13, 16). Kumplimentu di e promesa a kuminsá den e dianan di Moises i Josue. Moises a ripití e mandato divino: "Mira, mi a pone e tera boso dilanti; drenta i tuma poseshon di e tera” (Deut. 1:8, RSV).

Lesa Deuteronomio 28:1,15. Kiko ta impliká den e palabranan akí? En breve, e tera lo a ser duná na Israel komo parti di e pakto. Un pakto ta impliká obligashonnan. Ki obligashonnan Israel tabatin?

E promé parti di Deuteronomio 28 ta splika e bendishonnan ku Israel lo a risibí si nan a sigui e boluntat di Dios. E otro sekshon di e kapítulo ta trata ku e maldishonnan ku lo a kai riba nan si nan no a hasi esaki. E maldishonnan akí a ser "pa gran parti, aunke no kompletamente, okashoná dor di simplemente duna piká su espasio pa obra su propio resultadonan di maldat ... . 'Pasobra esun ku sembra pa su mes karni lo kosechá korupshon for di e karni' (Gal. 6:8). Meskos ku awa, kua, lagá pa su kuenta, lo no stòp di kore te ora el a yega na su nivel; meskos ku un oloshi, kua, lagá pa su kuenta, lo no stòp di kana te ora su bateria kaba kompletamente; manera palu, kua, lagá pa krese, no por hasi nada otro si no duna su fruta apropiá; asina piká tin un nivel pa buska, un kurso pa kore, un fruta pa madurá, i 'e fin di tur e kosnan ei ta morto' (Rom. 6:21).” — The Pulpit Commentary: Deuteronomy, H. D. M. Spence and Joseph S.Exell, eds. (Peabody, MA: Hendrickson Publishers, 1890), tomo 3, p. 439.

Apesar di tur e promesanan di tera, e promesanan ei no tabata inkondishonal. Nan a bin komo parti di un pakto. Israel mester a kumpli ku su parti di e kombenio; si no, e promesanan por a ser anulá. Señor a bisa bon kla, mas ku un biaha, ku si nan a desobedesé, e tera lo a ser tumá for di nan. Lesa Levítiko 26:27-33. Ta difísil pa imaginá kon Señor por tabata mas eksplísito ku Su palabranan.

"Sinembargo, nan no a obedesé ni a inkliná nan orea, ma kada un a kana segun e kapricho di su mes kurason malbado. P'esei Mi lo trese riba nan tur e palabranan di e aliansa aki, ku mi a ordená nan pa kumpli kuné, ma nan no a kumpli kuné." (Jer. 11:8).

Wak e teksto aki riba. Señor ta bisa ku E lo trese riba nan "tur e palabranan di e aliansa akí". Sinembargo, E ta papiando tokante algu malu! Aunke nos tin tendensia di pensa di e aliansa komo ofresiendo nos solamente kosnan bon, tin e otro banda. E prinsipio akí a ser mirá ku Noe. Dios a ofresé Noe algu maravioso, preservashon for di destrukshon, pero Noe mester a obedesé pa asina risibí e bendishon di e grasia di Dios. Si e no a obedesé, e otro banda di e aliansa lo sigui.

Kompará e teksto aki riba ku Génesis 6:5, enkuanto di e mundu promé ku Diluvio. Kiko ta e paralelismo? Kiko e versíkulonan akí ta bisa tokante kon importante ta pa nos kontrolá nos pensamentunan?

Desafortunadamente, e historia di Israel nashonal tabata pa mayoria parti, un patronchi ripití di apostasia, siguí pa huisionan divino, repentimentu, i un periodo di obediensia. Solamente pa un tempu kòrtiku, bou di David i Salomon, Israel a kontrolá e ekstenshon kompletu di e teritorio primintí.

Wak e tekstonan akí di Jeremías enkuanto di e apostasia di Israel. "Nan ta bisa, ‘Si un esposo diborsiá su esposa, i e esposa bai lag'é i bira esposa di otro hòmber, su esposo lo bolbe serka dje atrobe? E tera ei lo no keda kompletamente kontaminá? Ma abo ta un prostituta ku hopi amante, i tòg bo ta bolbe serka Mi," SEÑOR ta deklará ... Manera un muhé traishonero ta bandoná su esposo, asina abo, O kas di Israel, a traishoná Mi,’ SEÑOR ta deklará" (Jer. 3:1,20).

Esaki ta trese algu dilanti ku nos a toka anteriormente: e pakto ku Dios ke ku nos no ta meramente un akuerdo legal friu hasí entre dos hende di negoshi tratando na sera e mihó dil pa nan mes. E relashon di pakto ta un kompromiso, unu mes serio i sagrado ku matrimonio, kua ta pa ki rason Dios ta usa e imágennan ku E ta usa.

E punto ta ku e apostasia di Israel no tabatin su rais den desobedensia sino den un relashon personal kibrá ku Señor, un kiebro ku a resultá den desobedensia ku finalmente a trese kastigu riba nan.

Apesar di e siklo ripití di apostasia, huisionan divino, i repentimentu, ki speransa ta ser hañá den e tekstonan akí?

Isa. 4:3

Mik. 4:6-7

Sof. 3:12-13

Aunke e plan di Dios pa Israel antiguo a ser ruiná pa desobedensia, nunka el a ser frustrá kompletamente. Meimei di e yerba shimaron, algun flor ainda tabata krese. Hopi di e profetanan di Tèstamènt Bieu ta papia di e remanente fiel akí, kende Dios lo a reuní huntu na Su mes manera un bukèt bunita.

E propósito di Dios den krea i preservá un remanente fiel tabata e mesun ku e tabatin pa henter Israel, pa usa nan komo su instrumentonan divinamente apuntá pa deklará "Mi gloria meimei di e nashonnan" (Isa. 66:19, RSV). Pa medio di esaki, otronan lo a uni ku e fielnan pa "adorá e Rei, e SEÑOR di ehérsitonan" (Zak. 14:16, RSV). Pues, no importá kon malu e situashon a bira, semper Dios tin algun hende fiel ku, apesar di apostasia denter di e filanan di e pueblo skohí di Dios, a mantené nan mes yamada i elekshon sigur (2 Pe. 1:10). En breve, kual tabata sea e frakaso di e nashon komo un totalidat, nan tabatin ainda esnan ku tabata trata na warda, lo mihó ku nan tabata por, nan parti di e pakto (lesa, por ehèmpel 1 Reinan 19:14-18). I aunke, kisas, nan a sufri huntu ku nan nashon komo un totalidat (manera eksilio for di e tera), e promesa di pakto final i konklusivo lo ta di nan, esun di bida eterno.

Lesa Juan 10:27-28. Kiko Hesus ta bisando ei? Apliká Su palabranan, i e promesanan den nan, na e situashon enkuanto di e apostasia den Israel antiguo. Kon e palabranan akí ta yuda splika e eksistensia di un remanente fiel?

Loke sea e fayonan i e frakasonan di Israel antiguo, Señor no tabata kla ku e plan di krea un pueblo fiel pa sirbiE. De echo, Tèstamènt Bieu tabata wak padilanti na un tempu kaminda Señor lo a krea un Israel spiritual, un kurpa fiel di kreyentenan, hudiu i pagano, ku lo a kontinuá ku e trabou di prediká e evangelio na e mundu. Bonbiní na e iglesia tempran.

Lesa Galationan 3:26-29.

1. Ki promesa Pablo ta papiando di dje den versíkulo 29?



2. Kiko ta e elemento klave ku ta hasi un persona un eredero di e promesanan akí? (Gal. 3:26).



3. Dikon Pablo ta tumbando distinshonnan di género, nashonalidat, i status sosial?



4. Kiko ta nifiká pa ta "un den Kristu"?



5. Lesa Romanonan 4:16,17. Kon e versíkulonan akí ta yuda nos komprondé loke Pablo ta bisando den Galationan 3:26-29?

Komo yu di Abraham, Kristu a bira, den un sentido spesial, eredero di e promesanan di pakto. Pa medio di boutismo nos ta atkerí relashon familiar ku Kristu i a traves di djE e derecho pa partisipá den e promesanan hasí na Abraham. Pues, tur loke ku Dios a primintí Abraham ta ser hañá den Kristu, i e promesanan ta bira di nos, no pa motibu di nashonalidat, rasa, òf género sino pa medio di grasia, kua Dios ta drama riba nos pa medio di fe.

"E regalo na Abraham i su simia tabata inkluí no puramente e tera di Kanaan, sino henter e tera. Asina e apòstel ta bisa: 'E promesa, ku e lo a bira e eredero di mundu, no tabata na Abraham, òf na su simia, dor di e lei, ma dor di e hustisia di fe'. Romanonan 4:13. I Beibel ta siña klaramente ku e promesanan hasí na Abraham mester ser kumplí a traves di Kristu. ... [Kreyentenan ta bira] erederonan di 'un erensia ku ta inkoruptibel i sin mancha i ku no ta marchitá' [1 Pedro 1:4], e tera liberá for di e maldishon di piká."-Ellen G. White, Patriarkanan i Profetanan, p. 170. E promesa akí lo ser kumplí literalmente ora e santunan biba riba e tera nobo pa semper i semper huntu ku Kristu (Dan. 7:27).