Inkieto i Rebelde

Israel mester a sinti su mes intrankil i infelis ora nan a bai for di Sinai riba nan kaminda pa Kánaan. Mas ku un aña a pasa for di dia nan a bandoná Egipto (Num. 1:1). Nan tabata kla pa drenta e Tera Primintí. Nan a ser kontá i organisá. Nan a testiguá demostrashonnan inkreibel di fabor divino i señalnan kla di e presensia di Dios. Sinembargo, e promé lugá despues di nan partida for di Sinai a haña nan ta keha.

Lesa Numbernan 11:1-15. Di kiko e israelitanan ta kehando?

E israelitanan ta anhelá pa e karni, e kònkòmbernan, e milonnan, e preinan, e siboyonan, i e konofló di Egipto. “Ken lo duna nos karni? Nos ta kòrda e piská ku nos tabata kome pòrnada na Egipto, e kònkòmbernan, e milonnan, e preinan, e siboyonan, i e konofló; ma awor henter nos ser a seka; no tin nada ètòl eksepto e mana akí dilanti di nos wowonan!” (Num. 11:4-6, NKJV). Tambe nan mester a sufri di memoria selektivo severo ora nan tabata rekordá e kuminda i a lubidá e sklabitut i privashon inkreibel (kompará ku Eksodo 1).

Nan a ser alimentá pa e mana di Dios pa mas ku un aña; sinembargo, nan tabata sinti nan mes intrankil i tabata ke algu mas. Asta Moises ta ser afektá. Trata na guia un grupo di hendenan intrankil no ta fásil. Pero Moises sa na ken akudí. “Dikon Bo a aflihí Bo sirbidó? I dikon mi no a haña grasia den Bo bista, ku Bo a pone e karga di tur e hendenan akí riba mi?” (Num. 11:11, NKJV).

Kon Dios ta reakshoná riba e kehonan? Lesa Numbernan 11:16-33.

Dios no ta surdu pa nos nesesidatnan ora nos ta sinti nos mes intrankil. Den kaso di Israel, El a duna nan patrushi pa satisfasé nan hamber pa karni. Pero no tabata realmente karni loke Israel tabata ke. Ora nos ta infelis i intrankil i rabiá, loke nos ta rabiá p’e ta hopi bia djis e detonador, no e kousa di e konflikto. Nos ta bringa pasobra tin algu mas profundo robes, ku ta afektando nos relashonnan básiko. Israel a rebeldiá kontra e guiansa di Dios, algu ku nos tur mester ta kuidadoso kuné, no importá nos situashon i konteksto inmediato, pasobra e ta mas fásil pa hasi di loke nos ta pensa.

Lesa Num. 12:1-3. Pa kiko Mirian i Aaron ta disgustá?

Evidentemente, Miriam i Aaron tabata infelis tokante e esposa kusita di Moises. Zipporah tabata un strañero ku a bin di Madian (lesa Eks. 3:1). Asta entre e “élite” di Israel, ta revelá nos naturalesa kaí, i no den un forma masha plasentero tampoko. (E ta kualke momento?)

E teksto bíbliko, sinembargo, ta mustra klaramente ku esaki ta un preteksto. E enfoke prinsipal di nan keho ta tokante e don profétiko. Den e kapítulo anterior Dios a bisa Moises pa nombra setenta di e ansianonan di Israel ku lo a yuda Moises karga e karga atministrativo di liderazgo (Num. 11:16,17,24,25). Aaron i Miriam tabata hungando ròlnan klave di liderazgo tambe (Eks. 4:13-15, Mikeas 6:4), ma awor nan tabata sinti nan mes menasá pa e desaroyo di liderazgo nobo i a bisa: “Enbèrdat SEÑOR a papia solamente pa medio di Moises? E no a papia pa medio di nos tambe?” (Num. 12:2, NKJV).

Kon Dios a respondé riba e keho akí? Lesa Numbernan 12:4-13. Dikon bo ta kere ku Dios a respondé di forma asina desisivo?

E kontesta di Dios ta inmediato i no ta laga espasio pa interpretashon. E don profétiko no ta un arma usá pa ehersé mas poder. Moises tabata bon prepará pa liderazgo pasobra el a siña kon ekstremadamente dependiente e tabata riba Dios.

E echo ku ta menshoná Miriam promé ku Aaron den versíkulo 1 ta sugerí ku e por tabata e instigadó di e atake riba Moises. Na e momento akí, Aaron ta sirbiendo kaba komo sumo saserdote di Israel. Si el a wòrdu aflihí ku lepra, e lo no por a drenta den e tabernakel i ministrá na fabor di e pueblo. E kastigu di Dios pa Miriam ku lepra temporal ta komuniká di manera bibu Su disgustu ku nan tur dos i ta yuda logra e kambio di aktitut ku e famia akí tin mester. E súplika di Aaron p’e ta afirmá ku e tambe tabata enbolbí (Num. 12:11), i awor, na lugá di krítika i inkietut, nos ta mira Aaron suplikando pa Miriam, i nos ta mira Moises intersediendo na su fabor (Num. 12:11-13). Esaki ta e aktitut ku Dios ke mira den Su pueblo. E ta tende, i E ta kura Miriam.

E historia ta kuminsá ku un nota positivo. E israelitanan finalmente a alkansá e fronteranan di Kánaan, i nan a manda 12 spion pa eksplorá e tera. Nan informe ta ekstraordinario.

Lesa e informe di e spionnan den Numbernan 13:27-33. Na ki punto e espektativanan di e israelitanan a frustra

Apesar di e intervenshon di Caleb, e bosnan di e inkrédulonan i skèptikonan ta prevalesé. Israel no a disponé pa konkistá loke Dios a primintí nan. Inkieto di kurason, nan a skohe pa yora i murmurá riba marcha i grita pa viktoria.

Ora nos tin un kurason agitá, nos ta lucha pa kana pa medio di fe. Inkietut, sinembargo, ta afektá no solamente nos emoshonnan. Sientífikonan ta bisa nos ku tin un liña stret di kousa i efekto entre muchu tiki sosiegu (inkluyendo falta di soño) i mal eskohonan, ku ta resultá den obesidat, adikshonnan, i mas agitashon i infelisidat.

Lesa Numbernan 14:1-10. Kiko a sosodé despues?

Kosnan ta bai di malu pa pió. E súplika desesperá di Caleb: “solamente no rebeldiá kontra SEÑOR” (Num. 14:9, NKJV), ta keda neglishá, i henter e asamblea ta prepará pa piedra nan lidernan. Inkietut ta hiba na rebelion, i rebelion finalmente ta hiba na morto.

“E spionnan infiel tabatin bos duru ora nan a denunsiá Caleb i Hosue, i e gritu a ser halsá pa piedra nan. E multitut loko a piki proyektilnan pa nan mata e hòmbernan fiel ei. Nan a kore duru bai dilanti ku gritunan di lokura, ora di ripiente e piedranan a kai for di nan mannan, un silensio a kai riba nan, i nan tabata tembla di miedu. Dios a intervení pa impedí nan propósito asesino. E gloria di Su presensia, manera un lus ardiente, a iluminá e tabernakel. Henter e pueblo a kontemplá e señal di Señor. Un mas poderoso ku nan a revelá Su mes, i niun a riska sigui ku nan resistensia. E spionnan ku a trese e mal informe a hinka rudia terorisá, i ku rosea wantá aden nan a buska nan tèntnan.” — Ellen G. White, Patriarchs and Prohets, p. 390.

Nèt e momento ei, e gloria di Señor ta manifestá su mes públikamente. Ora nos lesa e storia den Numbernan 14, ta parse manera henter e esena a ser di fris, i awor nos ta skucha den privá e kombersashon di Dios ku Moises. Dios ta rekonosé ku aunke e piedranan ta intenshoná pa Moises i Caleb i Hosue, finalmente e rebelion ta dirigí kontra Dios Mes.

Ki oportunidat Dios ta ofresiendo Moises en bista di e rebelion akí? Lesa Numbernan 14:11, 12.

Dios ta ofresiendo pa destruí e israelitanan i traha henter un nashon nobo ku Moises komo tata di nan tur.

Kon Moises ta respondé riba e rebelion habrí akí, no simplemente kontra dje sino kontra Dios? (Num. 14:13-19).

Esaki ta e momento ku nos por mira e hòmber berdadero di Dios. E kontesta di Moises, di fris den tempu, ta antisipá e Mediadó ku, mas di 1.400 aña despues, lo a hasi orashon pa Su disipelnan den nan aflikshon (Juan 17). Enbèrdat, den loke Moises a hasi aki, hopi teólogo i studiantenan di Beibel a mira un ehèmpel di loke Hesus ta hasi pa nos. Nan kulpa, nos kulpa, ni sikiera ta ser kuestioná. I, sinembargo, Moises ta supliká, bisando: “di akuerdo ku e grandesa di Bo miserikòrdia” (Num. 14:19, NKJV), por fabor, pordoná e hendenan akí. I meskos ku Señor a hasi e tempu ei pa motibu di e interseshon di Moises, asina E ta hasi pa nos pa motibu di Hesus, pa motibu di Su morto i resurekshon i interseshon pa nos.

Por lo tantu, Moises ta supliká: “Pordoná e inikidat di e pueblo akí, mi ta resa, di akuerdo ku e grandesa di Bo miserikòrdia, meskos ku Bo a pordoná e pueblo akí, for di Egipto te ku awor” (Num. 14:19, NKJV). Grasia ta kombatí rebelion i intrankilidat na su rais. Pordon ta ofresé komienso nobo.

Sinembargo, tin kostonan. Grasia nunka por ta barata. Aunke pordoná, e pueblo lo enfrentá e konsekuensianan di nan rebelionnan, i e generashon ei lo no drenta den e tera primintí (Num. 14:20-23).

Sí, Dios lo sostené nan pa 38 mas aña den desierto. E lo alimentá nan. E lo papia ku nan for di e santuario. E lo ta banda di nan den desierto. Pero despues nan lo muri, i un generashon nobo lo tin ku hisa e batuta i haña sosiegu den e Tera Primintí.

E ta zona manera huisio; sinembargo, e ta realmente grasia. Kon e generashon akí lo por a konkistá e siudatnan-estado poderoso di Kánaan si ainda nan no a siña konfi’E? Kon nan lo tabata un lus pa e nashonnan ora nan mes tabata trompekando den skuridat?

Ki similaridatnan bo ta mira den e peregrinashon di Israel den desierto i e pueblo di Dios ku ta biba djis promé ku e Segundo Binida di Hesus? (See 1 Kor. 10:1-11.)

A lo largu di historia, e pueblo di Dios tabata dual den desierto miéntras nan tabata buska e Tera Primintí. E desierto akí tin hopi kara. Aktualmente, e ta parse un barikada di media infinito, e pitunan konstante di mensahenan ku ta drenta, i e bochincha profundo di entretenimentu interminabel. E ta purba bende nos pornografia komo amor i materialismo komo e kontesta riba nos problemanan. Si nos por tabata djis un tiki mas fet, un tiki mas hóben, un tiki mas próspero, un tiki mas sèksi, esei lo a solushoná tur nos problemanan.

Meskos ku e israelitanan, nos ta intrankil den nos búskeda pa pas, i asina tantu bia nos ta busk’é den e lugánan robes.

Kon e israelitanan a reakshoná riba e huisio di Dios den Numbernan 14:39-45?

E reakshon di Israel riba e huisio divino ta típiko. “Nos a peka”, nan a bisa. “Nos lo subi bai na e lugá ku Señor a primintí” (Num. 14:40, NKJV).

Kompromiso mitar-mitar ta manera un bakuna mal atministrá, e no ta funshoná. Awendia, dòkternan ta rekomendá un bakuna di Hepatitis B mesora despues di nasementu denter di e promé 24 ora di bida. Esei ta un bon komienso. Sinembargo, despues di e promé dósis ei, si no atministrá dos òf tres bakuna di refuerso na e momento adekuá i den e dósisnan apropiá, e ora ei no tin niun protekshon kontra Hepatitis B.

E buèlta rebelde di Israel, informá den e último versíkulonan di Numbernan 14, ta resultá den morto i desapunto ora e israelitanan awor ta nenga di aseptá e direkshonnan nobo di Dios i ku kapricho ta lansa un atake sin e arka di aliansa òf e liderazgo di Moises.

Presunshon ta kostoso; presunshon ta hiba na morto. Hopi bia, miedu ta alimentá presunshon. Pasobra nos tin miedu di algu, nos ta tuma desishonnan ku despues nos ta lamentá.