E Preis di Sosiegu

Riba un atardi dushi di primavera, Rei David inkietu tabata keiru riba dak di su palasio. E mester tabata huntu ku su ehérsito na e otro banda di Jordan. E mester tabata guiando e pueblo di Dios pa derota e amonitanan i finalmente trese pas na e reino.

No ta kaminda e mester tabata a habri porta pa tentashon pa David. Lesa e storia den 2 Samuel 11:1–5. Kiko a pasa, i kua gran piká David a kometé?

For di su dak, David a mira un "muhé masha bunita" bañando. Su impulsonan pekaminoso a poderá di dje e atardi ei, i el a drumi ku Betsabé, e esposa di un ofisial di ehérsito di konfiansa. Manera tur reinan di antigwedat, David tabatin poder apsoluto. Komo rei e no mester a sigui e reglanan ku tabata goberná tur otro hende. I, sinembargo, e storia doloroso di e famia di David despues di e momento akí ku a kambia historia ta kòrda nos riba e echo ku, asta komo rei, e no tabata riba e lei di Dios.

Enbèrdat, e lei tei komo un protekshon, un salbaguardia, i asta ora e rei a desviá for di dje, el a enfrentá konsekuensianan teribel. Tan pronto ku David a violá e límitenan di e lei di Dios, el a kuminsá sinti su efektonan riba tur aspekto di su bida. David a pensa ku su aventura pashoná a pasa sin ser ripará; sinembargo, Betsabé awor tabata na estado i su esposo hopi leu.

Lesa 2 Samuel 11:6-27. Kon David a trata na enkubrí su piká?

Asta e konspirashon di mas kompliká di David pa haña Urias bai kas serka su esposa Betsabé, a faya. Urias tabata un hòmber di reputashon estelar ku a respondé riba e insinuashonnan sutil di David: "E arka i Israel i Juda ta keda den tèntnan, i mi señor Joab i e sirbidónan di mi señor ta kampa den sabananan habrí. Lo mi bai mi kas anto pa kome i bebe, i pa drumi ku mi esposa?” (2 Sam. 11:11, NKJV). Finalmente un David desesperá ta rekurí na e asesinato di "remote-control" pa enkubrí su piká.

Meimei di un di e momentonan mas skur di bida di David tin bon notisia: Dios ta manda Su profeta. Natan i David tabata konosé otro bon. Anteriormente, Natan a konsehá David riba su plannan pa konstruí un tèmpel (2 Samuel 7). Awor, sinembargo, e profeta ta bin ku un tarea diferente pa ehekutá pa su rei.

Dikon bo ta kere ku Natan ta skohe pa konta un storia mas bien ku menshoná i bergonsá David inmediatamente? Lesa 2 Samuel 12:1–14.

Natan tabata sa kiko bisa, i el a bis'é den un forma ku David por a komprondé. El a konta un storia ku David, e anterior wardadó di karné, por a relashoná kuné. E tabata konosé e sentido di hustisia i integridat altamente desaroyá di David. Por lo tantu, den un sentido, bo por a bisa ku Natan a pone un trampa i ku David a kana kai stret den dje.

Ora ku David inkonsientemente ta pronunsiá su propio sentensia di morto, Natan ta bis'é: “Abo ta e hòmber” (2 Sam. 12:7, NKJV). Tin diferente forma di bisa "Abo ta e hòmber". Bo por grit'é, bo por akusá i hinka dede direktamente den kara di e otro persona, òf bo por ekspresá preokupashon i kuidou. E palabranan di Natan mester tabata mesklá ku grasia. Na e momento ei, David mester a sinti e doló ku Dios mester ta sinti ora ku un di Su yunan hòmber òf muhé konsientemente apartá for di Su boluntat. Algu a klek den mente di David. Algu a sker den su kurason.

Dikon David ta kontesta ku: "Mi a peka kontra SEÑOR" mas bien ku: "Mi a peka kontra Betsabé" òf "Mi ta un asesino" (2 Sam. 12:13; lesa tambe Salmo 51:4)?

David a rekonosé ku piká, ku ta hasi nos kurason inkietu, ta fundamentalmente un ofensa kontra Dios, e Kreador i Redentor. Nos ta hasi nos mes daño; nos ta afektá otronan. Nos ta trese deshonra na nos famianan òf iglesianan. Sinembargo, finalmente, nos ta hasi Dios daño i ta klaba un otro klabu den e palu brutu ku ta mustra den direkshon di shelu riba Golgota.

"E reproche di e profeta a toka kurason di David; konsenshi a ser spièrtá; su kulpa a aparesé den tur su atrosidat. Su alma a bùig den penitensia dilanti di Dios. Ku lepnan temblando el a bisa, 'Mi a peka kontra Señor'. Tur malu hasí na otronan ta ekstendé bèk for di esun heridá na Dios. David a kometé un piká grave, tantu na Urias komo Betsabé, i el a sinti esaki intensamente. Pero infinitamente mas grandi tabata su piká kontra Dios." — Ellen G. White, Patriarchs and Prophets, p. 722.

Despues ku David inkonsientemente a pronunsiá huisio riba su mes (2 Sam. 12:5,6), Natan ta konfront'é ku e gravedat di su piká. E kurason di David ta kibrá, i e ta konfesá su piká. Inmediatamente Natan ta sigur'é ku "SEÑOR tambe a pone bo piká un banda" (2 Sam. 12:13, NKJV) i ku e ta pordoná. No tin un periodo di espera riba e pordon di Dios. David no tin ku proba ku e ta realmente sinsero promé ku pordon ser ekstendé.

Sinembargo, Natan, ku ya a pronostiká e konsekuensianan di e piká di David den 2 Samuel 12:10–12, ta kontinuá i ta deklará ku e mucha ku ta bai nase lo muri.

Kiko ta nifiká ku Dios a kita e piká di David? El a djis lubidá tur loke a pasa? Tur hende simplemente ta lubidá riba dje? Lesa 2 Samuel 12:10-23 miéntras bo ta kontemplá e preguntanan akí.

David tambe mester a hasi su mes e preguntanan akí ora el a mira su mundu garná, e beibi morto, su famia den káos (e storianan di Amnon i Absalon ta dos bon ehèmpel di problemanan familiar di bida real), su futuro insigur. I, sinembargo, apesar di e konsekuensianan di su piká, kua a afektá hendenan inosente manera Urias i e beibi resien nasí, David tambe a kuminsá komprondé ku e grasia di Dios lo kubri esaki i ku un dia tur e konsekuensianan di piká lo ser eliminá. Mientrastantu, e por haña sosiegu pa su konsenshi trastorná den e grasia di Dios.

Kiko David ta sinti ku e mester realmente? Kiko e ta anhelá p'e? Lesa Salmo 51:1-6.

Ku Salmo 51, David ta rekonosé tur esaki públikamente segun ku e ta habri su kurason i konfesá su pikánan. E gritu di David pa miserikòrdia ta apelá na e amor infalibel di Dios i Su gran kompashon. E ta anhelá pa renobashon.

Ora ku nos konsiderá e preis di sosiegu den Hesus, nos mester rekonosé promé ku nos mester di yudansa eksterno; nos ta pekadornan i tin mester di un Salbador; nos ta rekonosé nos pikánan i ta sklama na Esun úniko ku por laba nos, limpia nos, i renobá nos. Ora nos hasi esaki, nos por haña kurashi: aki tin un adúltero, un manipuladó, un asesino, i un hende ku a violá por lo ménos sinku di e Dies Mandamentunan ku ta pidi yudansa, i ta reklamá e promesa di e pordon di Dios.

Despues ku David a konfesá su piká sin trata na hustifik’é òf pas’é por alto, e ta presentá un petishon na Dios. Kiko el a pidi Dios? Lesa Salmo 51:7-12.

E referensia di David pa purifik'é ku hisòp ta usa terminologia konosí pa tur israelita ku a yega di bishitá e santuario. Ora el a referí na e aktonan ritual di purifikashon deskribí den e Lei di Moises (Lev. 14:4), el a rekonosé e poder di un sakrifisio, e Sakrifisio, ku lo a bini den futuro pa kita e pikánan di mundu.

David tambe ta sigui pidi "goso" i "alegria". Mirando e gravedat di su piká, esaki no ta un poko tribí?

Kisas e por ta di yudansa pa skucha e paráfrasis akí: "Bisa mi ku mi ta pordoná pa asina mi por drenta e santuario atrobe kaminda mi por tende e goso i alegria di esnan ku ta adorá Bo".

Ora Adam i Eva a peka, nan a skonde for di e presensia di Dios (Gen. 3:8). Dikon bo ta kere ku e petishon di David, asta despues di su piká, ta asina diferente? Lesa Salmo 51:11,12.

David no ke pèrdè e konsiensia di biba den presensia di Dios. E ta realisá ku sin e Spiritu Santu, e ta sin poder. E sa ku, mes fásil ku el a slep den piká ku Betsabé, e por a slep den piká atrobe. Su konfiansa propio a kibra na pida pida.

David ta komprondé ku viktorianan futuro lo no bini for di dje; nan lo bini solamente for di Dios miéntras e ta dependé totalmente riba Dios.

E bida Kristian viktorioso no ta trata di nos. E ta trata di Hesus. Nos ta anhelá pa Su presensia; nos ta anhelá Su Spiritu; nos ke Su goso di salbashon. Nos ta rekonosé nos nesesidat pa renobashon i restourashon. Nos tin mester di Su sosiegu, un akto divino di re-kreashon. Sosiegu di kreashon no ta leu for di pordon. "Krea den mi un kurason limpi, o Dios, i renobá un spiritu firme den mi" (Salmo 51:10, NKJV) ta usa terminologia di kreashon. Den Tèstamènt Bieu solamente Dios por "krea" (bara’), i unabes nos a ser re-kreá, nos por sosegá.

Probablemente e kos di mas natural pa nos hasi ta despues di superá un frakaso bergonsoso i eksperensiá pordon ta trata na lubidá ku e evento hamas a tuma lugá. Rekuerdonan di frakaso por ta doloroso.

Kiko David ke hasi ku su eksperensia doloroso? Lesa Salmo 51:13-19.

Ora ku un kòmchi òf un vas presioso kai i kibrá na pida pida, normalmente nos ta suspirá i ta tira e pidanan kibrá afó. Na Hapon tin un arte tradishonal yama kintsugi, kua ta spesialisá den rekreá obranan di klei kibrá. Un metal presioso, manera oro líkido òf plata, ta ser usá pa leim e pidanan kibrá huntu i pa kombertí e opheto kibrá den algu di bunitesa i balor.

Kada bes ku Dios pordoná nos transgreshonnan i re-kreá nos atrobe, algu ta kambia. E pordon presioso di Dios ta leim nos pidanan kibrá huntu, i e frakturanan visibel por hala atenshon na Su grasia. Nos por bira e loutspikernan di Dios. "Mi lenga lo kanta duru di Bo hustisia" (Salmo 51:14, NKJV). Nos no ta purba drecha nos mes òf mehorá nos mes (asta gradualmente). Nos spiritunan kibrá, nos kurasonnan arepentí, ta sufisiente alabansa pa Dios, i nan ta rayonan di lus ku mundu por mira rondó di nos. Nos eksperensia di ser pordoná ta atraé otronan ku ta buskando pordon.

Ki relashon tin entre Salmo 51 i 1 Juan 1:9 ?

Promé Juan 1:9 ta un resúmen kòrtiku di Salmo 51. Miéntras David sa ku "Un kurason kibrá i repentí, esakinan, o Dios, lo Bo no despresiá" (Salmo 51:17, NKJV), Juan ta sigurá nos ku "Si nos konfesá nos pikánan, E ta fiel i hustu pa pordoná nos nos pikánan i limpia nos di tur inhustisia" (1 Juan 1:9, NKJV). Nos por konfia Dios riba Su palabra.

Atrobe, David no por a drecha e daño tremendo ku el a kometé a traves di su aktonan i ehèmpel na su famia. El a sufri e konsekuensianan di su desishonnan i akshonnan. I tòg, David tabata sa ku el a ser pordoná. E tabata sa ku e mester a konfia pa medio di fe ku un dia e berdadero Lamchi di Dios lo a bini i para na su lugá.