Hañando Sosiegu den Lasonan Familiar

Hose tabata sa tokante famianan disfunshonal. El a kuminsá kaba ku su bisawelonan, Abraham i Sara. Ora Sara a realisá ku e tabata steril, el a konvensé Abraham pa bai serka su sirbiente Hagar. Tan pronto ku Hagar a sali na estado, e rivalidat a kuminsá. Kresiendo den e atmósfera akí, Ismael i Isaak a hiba e tenshon den nan propio famianan. Isaak a proponé pa faboresé Esau, i Jakob a pasa su bida tratando na gana e amor i rèspèt di su tata. Mas despues, Jakob a ser engañá pa kasa ku dos ruman muhé ku no tabata bai bon ku otro i tabata kompetí ku otro a traves di un kareda di haña yu, asta nan a reklutá nan sirbientenan pa haña e yunan di Jakob.

Repasá e insidente detayá den Génesis 34. Ki tipo di impakto emoshonal i relashonal tur e insidentenan akí lo tabatin riba e famia den su totalidat i tambe riba e hóben Hose?

E rivalidat entre e mamanan opviamente a ekstendé na e yunan, ku a krese dispuesto pa bringa. Komo adultonan hóben, e rumannan mayó di Hose ya kaba a masakrá tur e hòmbernan den e stat di Sikem. E ruman mas grandi, Ruben, tabata desplegá dominio i desafio na su tata ansiano dor di drumi ku Bilha, sirbiente di Raquel i mama di diferente di e yunan di Jakob (Gen. 35:22). Mientrastantu, ruman di Hose, Juda, a konfundí su nuera biuda ku un prostituta i a terminá hañando yu ohochi kuné (Génesis 38).

Jakob a añadí mas gasolin na e kandela di tur e tenshon familiar akí dor di su faboritismo opvio pa ku Hose ora el a dun'é un túnika di hopi koló (Gen. 37:3). Si hamas tabatin un famia disfunshonal, e famia di e patriarka por a kompetí kuné.

Dikon bo ta kere ku Abraham, Isaak, i Jakob tur ta figurá komo héroenan di fe den Hebreonan 11:17–22 ora bo konsiderá nan relashonnan familiar desordená?

E kampionnan di fe di Dios hopi biaha no ta alkansá e ekspektativanan di nan mes i di Dios. E hòmbernan akí ta registrá den Hebreonan 11 no pa motibu di nan relashonnan familiar desordená sino apesar di nan. Nan a siña, hopi biaha na malu, tokante fe, amor, i konfiansa den Dios miéntras nan tabata lucha ku e problemanan familiar akí.

Hose ta hiba doló, relashonnan kompliká, i ansiedat kuné miéntras e ta biaha pa Egipto, kaminda nan lo bend'é komo esklabo. Esaki no tabata un biahe di sosiegu miéntras e tabata fòrsa pa kontené e lágrimanan.

"Mientrastantu, Hose ku su sekuestradónan tabata riba kaminda pa Egipto. Ora e karavana tabata biaha den direkshon sùit, direkshon pa e fronteranan di Kánaan, e mucha hòmber por a diserní riba distansia e serunan entre kua e tèntnan di su tata tabata situá. El a yora amargamente ora el a pensa riba e tata amoroso ei den su soledat i aflikshon. Atrobe el a rekordá e esena na Dotan. El a mira su rumannan rabiá i a sinti nan miradanan furioso dirigí riba dje. E palabranan iritante i insultante ku kua nan a kontestá su súplikanan angustioso tabata resonando den su oreanan. Ku un kurason temblando el a wak padilanti na e futuro. Ki un kambio den situashon, for di e yu tiernamente kerí na e esklabo despresiá i desampará! So i sin amigu, kiko lo tabata su destino den e tera straño na kua e ta bayendo? Pa un tempu Hose a entregá su mes na teror i tristesa inkontrolabel. ...

Despues su pensamentunan a bira na e Dios di su tata. Den su infansia el a ser siña pa stima i tem'É. Hopi biaha den tènt di su tata el a skucha e storia di e vishon ku Jakob a mira miéntras ku e tabata hui for di su hogar siendo un eksiliado i un fugitivo. ... Awor tur e lèsnan presioso ei a bini bibu su dilanti. Hose tabata kere ku e Dios di su tatanan lo tabata su Dios. E ora ei i einan el a entregá su mes kompletamente na Señor, i el a resa ku e Wardadó di Israel lo ta ku n'e den e tera di su eksilio." - Ellen G. White, Patriarchs and Prophets, p. 213, 214 (kursivo suplí).

Algun kultura ta enfatisá e ròl di komunidat riba e individuo, miéntras otro kulturanan ta inkliná pa enfatisá e ròl di e individuo riba e komunidat. Miéntras nos ta haña un balansa entre e dos akí den Skritura, tin klaramente un yamada na kompromiso tantu personal komo kolektivo na Dios. Hose ta kuminsá na hañá sosiegu den su relashonnan dor di tuma un desishon personal pa sigui Dios.

Kiko e siguiente versíkulonan ta siñá nos tokante kompromiso personal? (Deut. 4:29, Hos. 24:15, 1 Kron. 16:11, Salmo 14:2, Prov. 8:10, Isa. 55:6).

Pa hañá sosiegu, nos kada un mester tuma un desishon personal pa sigui Dios. Asta si nos antepasadonan tabata gigantenan spiritual, e fe i spiritualidat akí no ta ser transmití genetikamente. Kòrda, Dios tin solamente yu, no ñetu.

Si Hose a konsiderá kualke speransa di skapa i hañá su kaminda bèk pa kas, nan a ser frustrá ora el a yega Egipto, kaminda Hose ta ser rebendé na un famia prominente. Génesis 39:1 ta bisa nos ku "Potifar, un ofisial di Fárao, kapitan di guardia, a kumpr’é for e ismaelitanan" (NKJV). Di ripiente e hóben a ser pushá den un idioma i kultura nobo i straño.

Nos famianan i relashonnan serkano ta esensial den desaroyo di nos estima propio. Hose a krese keriendo ku e tabata algu speshal, e yu hòmber mayó di e esposa di mas stimá (Gen. 29:18). E tabata definitivamente e faborito di su tata, i e úniko ku un bunita túnika di hopi koló (Gen. 37:3,4).

Pero ken e tabata awor? Un esklabo, un hende ku por a ser kumpra òf bendé segun boluntat. Wak kon rápido henter su situashon a kambia. Wak kon rápidamente bida ta parse di a bira kontra dje.

Enbèrdat, Hose ta siñá e lès ku nos tur tin ku siñá. Si nos ta dependiente riba otronan pa bisa nos kiko nos ta bal, e ora ei nos lo ta den hopi problema i teriblemente konfundí, pasobra no ta tur hende ta bai apresiá ken nos ta òf kon nos ta. En kambio, nos mester hañá nos balor propio den loke Dios ta pensa di nos, kon Dios ta mira nos, i no den e ròlnan ku nos tin aktualmente.

Kon Dios ta mira kada un di nos? (Isa. 43:1; Mal. 3:17; Juan 1:12; Juan 15:15; Rom. 8:14; 1 Juan 3:1,2).

Dios ta mira kada unu di nos ku brel ku a ser hasí skur ku grasia. E ta mira un potensial, bunitesa, i talento ku nos ni sikiera por imaginá. Finalmente, E tabata prepará pa muri pa nos, asina ku nos por a haña e oportunidat pa bira tur loke nos a ser kreá pa ta. Aunke e ta mustra nos nos pekaminosidat i e gran preis ku el a kosta pa redimí nos for di dje, e Krus ta mustra nos tambe nos gran balor pa Dios. Apesar di loke otronan ta pensa di nos òf asta loke nos ta pensa di nos mes, Dios ta stima nos i ta buska pa redimí nos di no solamente e poder di pikánan awor, sino di e morto eterno ku nan ta trese.

E pregunta klave, e ora ei, ta semper mesun kos: Kon nos ta respondé riba e realidat di e amor di Dios, manera ta ser revelá den Hesu-Kristu?

Inisialmente e storia di Hose na Egipto ta dal un buèlta positivo. Hose a konfia su mes na Dios, i Dios ta bendishoná Hose, ku ta elevá na halturanan ku e lo no a imaginá den kas di Potifar.

Den ki formanan práktiko e bendishonnan di Dios por ser mirá den bida di Hose? Kon e relashonnan interpersonal di Hose ta? Lesa Génesis 39:1–6.

Aunke tabata parse ku Hose tabata bai masha bon ku Potifar, i su relashonnan entre e personal den e kas i den e kampo ta parse di ta kana suave, problema ta desaroyando. Un hende den kas ta inkietu.

Ki problema di relashon Hose ta enfrentando? Kon e ta skohe pa maneh'é? Lesa Génesis 39:7–10.

Hose tin un problema ku esposa di Potifar. Kisas nos mester reformul'é ku: e esposa di Potifar tin un problema. E ta wak otronan komo "kosnan" ku por ser manipulá i usá. E ke "usa" Hose. Hose ta ser deskribí komo "atraktivo den forma i aparensia" (Gen. 39:6, NKJV). Beibel masha poko biaha ta menshoná e rasgonan físiko di hende, pasobra Dios “no ta mira manera hende ta mira; pasobra hende ta wak e aparensia eksterior, ma Señor ta wak e kurason" (1 Sam. 16:7, NKJV). Den e kaso aki e bon aparensia di Hose ta parse di ta mas un opstákulo ku un yudansa den su búskeda di puresa i fieldat na e prinsipionan di Dios.

Apesar di e insistensia di e muhé malbado akí, Hose ta hasi algu aparentemente kontraprodusente. E ta apliká prinsipionan bíbliko na tur relashon, den e kaso akí e esposa di Potifar. Prinsipionan bíbliko pa relashonnan no ta antikuá, manera kualke hende (kua ta tur hende) ku a sufri e konsekuensianan di piká por afirmá.

E narativo bíbliko ta mustra ku esaki no ta un tentashon di un biaha so. E esposa di Potifar a persiguié bes tras bes (Gen. 39:10). Hose a trata na splika su motivashon pa su desishon (Gen. 39:8,9) pero parse ku esaki no a funshoná.

Hose ta realisá ku e no por kontrolá e eskohonan di otronan. E ta disidí, sinembargo, pa biba, stima, i trata esnan rònt di dje den un forma ku lo honra Dios. Hose a siña biba den e presensia di Dios. E konosementu akí a yud'é resistí tentashon.

Manera nos sa ora nos lesa e storia (Gen. 39:11–20), Hose a sufri pa motibu di su desishon basá riba prinsipio. Hose ta ser tirá den prizòn. Komo propiedat di Potifar, Hose por a ser matá den e akto, sin niun pregunta. Potifar opviamente no a kere su esposa pero mester a protegé su reputashon dor di tuma akshon. I sinembargo, apesar di e sirkunstansianan horibel, Skritura ta bisa: "Señor tabata ku Hose" (Gen. 39:21).

Bida riba planeta tera no ta hustu. E bon no semper ta ser rekompensá, i malu no semper ta ser kastigá inmediatamente. Sinembargo, tin algun bon notisia: Hose por haña sosiegu, asta den prizòn, pasobra Dios ta kuné. Den prizòn e por a meditá riba e inhustisia di su situashon, halá tras, i asta bandoná dor di Dios.

Kiko Hose a hasi miéntras e tabata den prizòn? Kon el a relashoná ku esnan rònt di dje? Lesa Génesis 39:21–40:22.

Den prizòn, Hose ta traha ku loke ta real, no loke ta ideal. E ta hasi kontaktonan; e ta yuda otronan, aunke relashonnan den prizòn tabata leu for di e ideal ku e lo a deseá. I Hose no tin ripara di pidi pa yudansa i hasi su mes vulnerabel. E ta pidi yudansa di e kopero ora e ta interpretá su soño.

Kiko ta e perspektiva general di relashonnan ku Pablo ta presentá den Efesionan 6:1-13?

Nos relashonnan ta reflekshonnan den miniatura di e gran kontroversia entre Dios i Satanas ku ta ras a lo largu di siglonan. Esaki ta nifiká, anto, ku no tin relashonnan perfekto. Tur relashon mester tin dinamikonan di kresementu, i Satanas tin un interes personal den usa tur nos relashonnan, spesialmente esnan di mas serka di nos, na su bentaha pa asina heridá i frustra e boluntat di Dios pa nos bida. Nos por ta gradesidu ku nos no a ser lagá pa bringa e batayanan akí riba nos mes. E Palabra di Dios ta pone prinsipionan pa nos relashonnan. Su promesa pa duna nos sabiduria (Santiago 1:5) ta ekstendé tambe na nos relashonnan. I meskos ku E tabata ku Hose, E ta primintí di ta ku nos ora nos relashonnan resultá kompliká.