Sosiegu, Relashonnan, i Sanashon

Finalmente, kosnan tabata move den e direkshon korekto pa Hose, na gran eskala. No solamente e ta sali for di prizòn, sino e ta ser nombrá promé minister di Egipto despues di interpretá e soñonan Fárao (Génesis 41). E ta kasa i tin dos yu di su mes (Gen. 41:50–52). E mangasinanan di Egipto ta yen, i e hamber pronostiká a kuminsá. I despues, un dia, e rumannan di Hose a aparesé na Egipto.

Lesa e promé enkuentro entre Hose i su rumannan den Génesis 42:7-20. Dikon e kòmplòt elaborá? Kiko Hose tabata tratando na hasi ku e promé reunion akí?

Hose tabatin e poder i por a tuma su revancha riba su rumannan sin tabatin ku hustifiká su mes. Pero, mas bien ku revancha, Hose ta preokupá pa e miembronan di su famia na kas. E ta preokupá pa su tata. E tabata na bida ainda, òf un famia disfunshonal a bira un famia sin un patriarka? I ke tal di su ruman Benjamin? Komo e delisia i goso di su tata, Benjamin awor tabata den e mesun posishon ku Hose tabata. E rumannan a transferí nan yalusí peligroso na Benjamín? Hose awor ta den un posishon pa kuida pa e hendenan vulnerabel ei den su famia, i esei e ta hasi.

Praktiká prinsipionan bíbliko den nos relashonnan lo no nifiká ku hamas nos por òf mester aseptá abuzu. Kada un di nos ta presioso den bista di Dios. Hesus a paga e preis máksimo riba e krus pa kada un di nos.

Dikon Hesus ta tuma abuzu òf negligensia di otronan asina personalmente? Lesa Mateo 25:41-46.

Nos tur a ser kumprá pa medio di e sanger di Hesus, i legalmente nos tur ta di djE. Kualke hende ku ta abusivo ta atakando e propiedat di Hesus.

Abuzu seksual òf violensia emoshonal òf físiko nunka mester ta parti di dinámika familiar. Esaki no ta solamente asuntu priva familiar ku mester ser resolvé internamente. Esaki lo tin mester di yudansa i intervenshon eksterno. Si abo òf un hende den bo famia ta ser abuzá, por fabor, buska yudansa di un profeshonal di konfiansa.

Hose a pordoná su rumannan. Nos no sa eksaktamente ki ora Hose a pordoná nan, pero tabata opviamente hopi tempu promé ku nan a aparesé. Hose probablemente nunka lo a prosperá na Egipto si e no a pordoná pasobra, mas probablemente, e rabia i amargura lo a destruí su alma i daña su relashon ku Señor.

Vários estudio di sobrebibientenan di tragedia ku a ser imponé riba nan dor di otronan a enfatisá e echo ku pa víktimanan di e sufrimentu di mas horibel, pordon tabata un faktor klave pa haña sanashon i komponé nan bida atrobe. Sin pordon, nos ta keda víktima. Pordon tin mas di aber ku nos mes ku e persona òf personanan ku a hasi nos daño.

Aunke Hose a pordoná su rumannan, e no ta dispuesto pa laga e relashonnan familiar kuminsá bèk kaminda el a laga nan; es desir, na e pos seku na Dotan. E mester mira si algu a kambia.

Kiko Hose a skucha? Lesa Génesis 42:21-24. Kiko e ta haña sa tokante su rumannan?

Tur komunikashon a tuma lugá pa medio di un intérprete, i asina e rumannan di Hose ta inkonsiente ku e por komprondé nan. Hose ta tende e konfeshon di su rumannan. E rumannan a pensa ku dor di deshasí di Hose, nan lo tabata liber di e echo ku e ta reportá na nan tata. Nan a pensa ku nan lo no tabatin ku soportá su soñonan òf mir'é deleitá den e ròl di ta e faborito di nan tata. Pero na lugá di haña deskanso, nan a ser tormentá pa un konsenshi kulpabel tur e añanan akí. Nan akshon a hiba na inkietut i un miedu paralisadó di e kastigu di Dios. Hose realmente ta sinti duele pa nan sufrimentu. E ta yora pa nan.

Hose sa ku e hamber lo dura ainda vários aña mas, i asina e ta insistí pa nan trese Benjamin bèk ku nan e siguiente biaha ku nan bini pa kumpra maishi (Gen. 42:20). Tambe e ta mantené Simeon komo rehen (Gen. 42:24).

Despues di a mira ku Benjamin ta bibu ainda, e ta organisá un fiesta den kua e ta demostrá opviamente faboritismo na Benjamin (Gen. 43:34) pa mira si e patronchinan bieu di yalusí tabata vigente ainda. E rumannan no ta mustra niun señal di ta yalurs, pero Hose sa kon astuto nan por ta. Despues di tur kos, nan a gaña henter un stat (Gen. 34:13), i siguramente e ta imaginá su mes ku nan mester a gaña nan propio tata tokante su destino (Gen. 37:31-34). Asina, e ta inventá un prueba mas grandi. (Lesa Génesis 44.)

Pordon a ser definí komo e disponibilidat pa bandoná bo derechi pa resentimentu, kondenashon, i revancha pa ku un ofensor òf grupo ku ta aktua inhustamente. Dr. Marilyn Armour, un terapista familiar ku a traha ku sobrebibientenan di Holokousto pa averiguá kiko e sobrebibientenan akí a hasi pa duna sentido na loke a pasa ku nan, ta skirbi: "Henter e idea di pordon ta un akto intenshonal dor di e víktima. E no ta algu ku ta simplemente sosodé".

Pordon no ta nifiká ku lo no tin konsekuensianan. Pordon no ta nifiká laga un abuzador kontinuá ku su patronchinan abusivo. Pordon ta nifiká, en kambio, ku nos ta entregá nos resentimentu i nos deseo pa revancha na Dios. Si no, e rabia, e amargura, e resentimentu, i e odio lo hasi loke sea e persona òf personanan a hasi nos ainda mas pió.

Kiko pordoná otronan ta hasi pa nos? Konsiderá Mateo 18:21-35.

Sin duda, un di e klavenan pa siñá pordoná ta komprondé loke nos a ser pordoná den Kristu. Nos tur a hasi piká, no solamente kontra otro hende sino kontra Dios tambe.

Tur piká ta, enbèrdat, un piká kontra nos Señor i Hasidó; i sinembargo, den Hesus, nos por reklamá pordon total pa tur e pikánan ei, no pasobra nos meresé, nos no meresé, sino solamente pa motibu di e grasia di Dios pa ku nos. Unabes nos por komprondé e bèrdat sagrado ei, unabes nos por hasi e pordon ei di nos mes, unabes ku nos por eksperensiá pa nos mes e realidat di e pordon di Dios, nos por kuminsá laga bai i pordoná otronan. Nos ta pordoná no pasobra otronan meres’é, sino pasobra e ta loke nos a risibí di Dios i loke nos mes mester. I ademas, kuantu biaha nos tambe meresé pordon?

Manera nos a mira tambe, Hose a ofresé un di dos chèns pa e relashonnan familiar. No tin renkor aki; niun baimentu bèk na kosnan ku a sosodé den pasado.

Ta kasi imposibel pa kuminsá atrobe den un famia ora kada un di nos a bira ekspertonan den siña kon pa hasi daño na otro mihó. Pero no ta asina Hose ta reakshoná. Ta parse ku e ke pone e pasado nan tras i sigui padilanti ku amor i aseptashon. Si Hose tabatin un aktitut diferente, e storia aki lo tabatin un final diferente, unu no asina felis.

Pa por pordoná, mi mester atmití ku mi a ser heridá. Esaki por ta difísil pa hasi, ya ku tin biaha nos ta mas inkliná pa trata na dera nos sintimentunan mas bien ku superá nan.

Rekonosé sintimentunan no kristian di resentimentu i asta rabia dilanti di Dios ta bon. Nos ta mira esaki ekspresá hopi biaha den e Salmonan. Mi por sinti mi liber pa bisa Dios ku mi no a gusta loke a sosodé òf kon mi a ser tratá i ku e ta hasi mi tristu òf rabiá òf tur dos.

Den e storia di Hose, nos ta mir'é yora ora e ta mira su rumannan atrobe i rebibá algun di e sintimentunan di su pasado.

Kiko e deklarashon di Hesus riba e krus ta bisa nos tokante e momentu di pordon? Lesa Lukas 23:34.

Hesus no a warda pa nos pidi pordon promé. Nos no mester warda pa nos ofensor pidi pordon. Nos por pordoná otronan sin ku nan aseptá nos pordon.

Kiko Lukas 6:28 i Mateo 5:44 ta siñá nos tokante kon relashoná ku esnan ku ta hasi nos daño?

Pordon, meskos ku amor, ta kuminsá ku un eskoho mas bien ku un sintimentu. Nos por hasi e eskoho pa pordoná, asta si nos emoshonnan kisas no ta di akuerdo ku e desishon akí. Dios sa ku den nos propio forsa e eskoho akí ta imposibel, pero "ku Dios tur kos ta posibel" (Marko 10:27). Ta p'esei nos ta ser bisá pa hasi orashon pa esnan ku a hasi nos daño. Den algun kaso, e persona akí kisas a muri kaba, pero ainda nos por hasi orashon pa e habilidat pa pordon'é.

Sin duda, pordon no semper ta fásil. E doló i e daño hasí na nos por ta devastador, lagando nos heridá, mankaron, kibrá. Sanashon lo bin, si nos permitié, pero teniendo na amargura i rabia i resentimentu lo hasi sanashon muchu mas difísil, si e ta posibel mes.

E Krus ta e mihó ehèmpel di loke a kosta Dios Mes pa pordoná nos. Si Señor por pasa dor di esei pa nos, aunke E tabata sa ku asina hopi, sinembargo, lo a rechas'É, e ora ei seguramente nos tambe por siñá pordoná.

E famia di Hose por fin ta yega Egipto. No tin mas sekretunan skondí den e famia. Su rumannan mester a atmití di a bende Hose ora nan a splika nan tata ku e yu ku el a pensa ku a ser matá tabata awor promé minister di Egipto.

Miéntras kisas no semper ta posibel òf sabí pa restourá relashonnan, esaki no ta nifiká ku nos no por pordoná. Nos lo no ta kapas pa brasa i yora ku nos ofensor, pero kisas nos lo ke ekspresá nos pordon sea verbalmente òf pa medio di un karta. I despues ta ora pa laga bai di doló te na e ekstremo ku nos por. Kisas algun doló lo keda semper, pero por lo ménos nos por ta riba e kaminda pa sanashon.

Lesa Génesis 50:15-21. Di kiko Hose su rumannan tabata preokupá, i dikon nan lo tabata preokupá pa esei? Kiko e miedu akí ta bisa tokante nan mes?

E rumannan di Hose tabata bibando na Egipto pa diesshete aña (Gen.47:28), i tòg, ora Jakob a muri, nan tabatin miedu ku Hose lo a tuma su revancha. Nan a bolbe realisá kuantu daño nan a kousa Hose. Hose ta sigurá nan di su pordon atrobe, awor despues di morto di nan tata. E rekordatorio akí probablemente tabata bon pa Hose, komo tambe pa su rumannan.

Si e herida ta profundo, probablemente nos tin ku pordoná hopi biaha. Ora rekuerdonan di e malu bin na mente, nos tin ku bai serka Dios inmediatamente den orashon i hasi e eskoho pa pordoná atrobe.

Lesa Génesis 50:20. Kon e versíkulo aki ta yuda splika, a lo ménos parsialmente, e disponibilidat di Hose pa pordoná e piká di su rumannan kontra dje ?

Hose tabata kere firmemente ku su bida tabata parti di e plan grandi di Dios pa yuda salba e mundu konosí e tempu ei di hamber, i despues yuda su famia kumpli ku e promesa di Dios di bira un gran nashon. Sabiendo ku Dios a anulá e plannan malbado di su rumannan pa produsí bon, a yuda Hose pordoná.