Deskanso di Sabat

Di tur e Dies Mandamentunan, solamente e di kuater ta kuminsá ku e verbo "Rekordá." E no ta, "Rekordá, lo bo no hòrta," òf "Rekordá, lo bo no kudishá." Tin solamente "Rekordá e dia di Sabat. ..."

E idea di "rekordá" ta enserá historia, ta enserá ku algu a sosodé den pasado ku nos mester, bon, kòrda. Ora ku nos kòrda, nos ta hasi konekshonnan ku pasado, i "Rekordá e dia di Sabat, pa santifik'é" ta marka un liña règt bèk na e siman mes di Kreashon.

Lesa Génesis 1:26,27 i Génesis 9:6. Kiko e versíkulonan akí ta siña nos tokante kon speshal nos komo sernan humano ta, i kon radikalmente diferente nos ta for di e sobrá di e kreashon terenal di Dios? I, tambe, dikon ta asina importante pa nos komprondé e distinshon akí?

Ora ku nos rekordá kreashon, nos ta kòrda ku nos ta kreá den e imágen di Dios, algu ku no a ser bisá riba algu otro ku ta ser deskribí den e storia di Kreashon. Ta opvio ku, komo sernan humano, nos ta radikalmente diferente for di kualke otro kriatura riba e planeta, no importá kuantu DNA nos ta kompartí en komun ku algun otro animalnan. I, kontrali na e mitologia popular, nos no ta meramente makakunan avansá òf vershonnan altamente desaroyá di algun mamífero prehistóriko. Komo humano, trahá den e imágen di Dios, nos ta úniko entre tur loke Dios a krea riba e mundu akí.

Kon e storia di Kreashon ta rekordá nos di nos relashon ku e kreashon? Génesis 2:15,19.

Realisando ku Dios a krea nos mundu tambe, ta rekordá nos di nos responsabilidat pa ku kreashon. Nos mester "tin dominio" riba kreashon. Tin dominio no ta nifiká eksplot'é. Nos mester goberná manera e regentenan di Dios. Nos mester interaktuá ku e mundu natural manera Dios lo a hasié.

Si, piká a mancha i brua tur kos, pero e mundu akí, ainda ta e kreashon di Dios, i nada ta duna nos e derechi pa eksplot'é, spesialmente na e desbentaha di otro sernan humano, kua asina hopi biaha ta e kaso.

Manera nos a mira anteriormente, e Sabat ta apuntá na algu mas ku solamente e dianan di kreashon. E di dos biaha ku nos ta skucha e Dies Mandamentunan, Moises ta repasando e 40 aña di Israel den e desierto. E biaha aki, e frase introdusiendo e rason pa warda e Sabat santu no ta tokante kreashon sino mas bien tokante liberashon for di sklabitut na Egipto (Deut. 5:12-15).

I ounke, awe, nos no ta esklabonan na Egipto, nos tur por enfrentá un otro klase di sklabitut, unu ku, den algun manera, por ta igual di opresivo.

Ki otro maneranan di sklabitut nos ta enfrentá awe? Lesa Génesis 4:7, Hebreonan 12:1, i 2 Pedro 2:19.

Sabat ta e selebrashon di libertat for di tur e kosnan ku ta mantené nos den sklabitut. Riba Sabat, nos ta ser rekordá ku tin libertat for di piká, no den nos propio poder sino den e poder di Dios, kua ta ser ofresé na nos pa medio di fe. Tambe nos ta ser rekordá ku esaki ta un libertat ku nos no a meresé. E primogénitonan di e Israelitanan a ser salbá pa medio di e sanger di e lamchi ku a ser huntá na e koseinnan di e porta e anochi promé ku nan Eksodo for di Egipto (Eksodo 12). Nos tambe, a ser salbá pa medio di e sanger di e Lamchi, i awor mester kana den e libertat ku ta di nos den Kristu Hesus.

Lesa Romanonan 6:1-7. Kiko Pablo ta bisando aki ku por ser konektá ku loke a ser duná na nos den e Sabat?

Den e fraseologia berdadero di Deuteronomio 5:15, “I kòrda ku bo tabata esklabo na tera di Egipto i ku Señor bo Dios a saka bo for di ayanan pa medio di un man poderoso i un brasa ekstendé" (NKJV), e pueblo tabata ser rekordá un bes mas, ku tabata e obra i poder di Dios na nan fabor ku a salba nan. Kuantu mas nos, komo Kristiannan, mester realisá ku ta solamente e obra i poder di Kristu na nos fabor a salba nos for di piká?

E mandato akí ta bisa nos pa deskansá den e salbashon ku Dios a gana pa nos pa medio di Su man poderoso. Nos ta ser liberá for di nos propio esfuersonan pa hustisia ora nos kòrda ku Dios ta Kreador i ku nos por konfiÉ pa re-kreá nos tambe i liberá nos aworakí for di e sklabitut di piká si nos ta dispuesto na lag'É obra den nos.

Lesa Eksodo 19:6. Kiko e teksto akí ta bisa nos tokante e status di Israel antiguo? (Lesa tambe 1 Ped. 2:9.)

Israel a ser saká for di Egipto pa ta e pueblo di pakto di Dios, e nashon a traves di kua, si nan a permanesé fiel, e evangelio lo a ser plamá den henter mundu. Sin niun duda, nan tabata e opheto di e kuidou i preokupashon speshal di Dios, nan a ser konsedé privilegionan speshal, i na e mes momentu, duná responsabilidatnan speshal.

Lesa Eksodo 23:12. Kiko mas ta pasando aki? Kiko e teksto aki ta siña nos tokante kon Dios ta mira otronan ademas di e Israelitanan mes?

E universalidat di e Sabat ta algu ku hopi hende ta pasa por alto. E eror di mas komun, klaramente, ta ku e tabata solamente pa Hudiunan, un eror ku ta ser eksponé den e promé dos kapítulonan di Génesis. Despues di tur kos, Dios a krea tur hende; asina ta, ku tur hende mester rekordá e dia di Sabat.

Ounke nos mester tene semper den mente kiko e Sabat ta representá pa nos, nos mester kòrda, tambe, kiko e lo mester bisa nos tokante otronan. Den un sentido, nos deskanso i relashon ku nos Kreador i Redentor lo kondusí nos outomátikamente na mira otronan den un lus nobo, mira nan komo sernan kreá dor di e mesun Dios ku nos, stimá dor di e mesun Dios ku ta stima nos i ku a muri pa nan komo tambe pa nos. Manera nos a mira (Eks. 20:10, Deut. 5:14), e sirbidónan, e strañeronan, asta e animalnan mester ser duná un deskanso di Sabat.

Ku asta e strañero denter di nan portanan, es desir asta esnan ku (ainda) no ta partisipá di e promesanan di pakto duná na Israel, ku asta nan mester gosa di e deskanso di Sabat ta bisa hopi. Sernan humano, asta animalnan, nunka mester ser utilisá, abusá, probechá di nan. Tur siman, e pueblo Hebreo (i nos tambe) mester ser rekordá di un manera poderoso di djis kuantu nos tin en komun ku otro hende, i asta si nos ta gosa di bendishonnan i privilegionan ku otronan no tin, nos mester kòrda ku ainda nos ta parti di e mesun famia humano, i p'esei nos mester trata otronan ku rèspèt i dignidat.

Den e mundu di Tèstamènt Nobo, e lidernan religioso tabata warda e Sabat ku un abilidat i efisiensia spesial. Nan a establesé un dozeinnan di prohibishon i regla pa yuda warda e Sabat santu.

Esaki tabata inkluí un prohibishon kontra mara òf lòs kualke kos, separá dos kabuya, paga un kandela, transportá un opheto entre un lugá privá i e lugá públiko, òf transportá algu pa mas ku un distansia spesífiko den e lugá públiko.

Ki akusashon a ser presentá kontra Hesus den Juan 5:7-16?

Ignorando kompletamente e milager maravioso ku Hesus a ehekutá i e libertat for di malesa ku El a duna e hòmber akí, e lidernan tabata opseshoná ku e hòmber kurá tabata karga su kama den públiko riba Sabat. Na lugá di mira kon e "Señor di Sabat" (Marko 2:28, NKJV) a utilisá e dia speshal akí, e lidernan tabata intenshoná riba mantené nan propio reglanan i regulashonnan. Nos mester ta kuidadoso pa den nos propio manera i den nos propio konteksto nos no kometé erornan similar.

Kon Isaias 58:12-14 ta resumí e agènda di Dios pa wardamentu di Sabat?

Dios no ke adorashon bashí òf silensio piadoso. E ke mira Su pueblo enbolbí ku otro hende, spesialmente esnan oprimí i marginá.

Isaias a hasi esaki masha kla den Isaias 58:13,14: "Si riba dia di sabat bo warda bo pia di hasi bo mes gana riba Mi dia santu, i si bo yama dia di sabat un delisia, e dia santu di Señor onorabel, i si bo onr’E dor di bandoná bo mes kamindanan, dor di no buska bo mes plaser, ni papia bo mes palabra, e ora ei lo bo tin delisia den Señor, i lo Mi hasi bo kore riba e halturanan di tera; i alimentá bo ku e erensia di bo tata Jakob. Boka di Señor a papia" (Isa. 58:13,14, NKJV).

Buska nos mes "plaser" (Isa. 58:13, NKJV òf nos "propio interes," manera e tradukshon NRSV ta tradusí aki) ta ekivalente na "trapa e Sabat" (NRSV). Agèndanan humano no ta parti di e Sabat ideal di Dios. Mas bien, nos ta ser invitá pa ta atento na esnan ku ta lucha, ku ta prisionero, ku tin hamber i ta sunú, i ta kana den skuridat i ken nan nòmbernan niun hende ta parse di ta kòrda. Mas ku kualke otro dia di siman, Sabat mester saka nos for di nos mes i nos propio egoismo i hasi nos pensa mas riba otronan i nesesidatnan di otronan ku solamente riba nos mes i nos nesesidatnan.

Durante Segunda Guera Mundial, Inglatera tabata spera un invashon inminente dor di ehérsito Aleman. Preparashonnan a ser hasí pa defendé e isla mas mihó posibel. Fortifikashonnan èkstra a ser instalá kantu di e playanan. Klaro ku kamindanan lo a ofresé e enemigu rutanan mas rápido pa nan ophetivonan, i konsekuentemente, blokeonan a ser instalá na puntanan stratégiko. Outoridatnan Ingles e ora ei a hasi algu straño. Pa frena i konfundí e enemigu, señalnan di e via di trein i di tráfiko a ser kitá. Markanan grabá riba piedra òf riba edifisionan no por a ser kitá, pero nan a ser kubrí ku semènt.

Señalnan ta signifikante. Nan ta sirbi komo markadónan i guianan. Den e era promé ku GPS, nos tur tabatin mapanan i tabata buska señalnan.

Di kiko e Sabat ta un señal? Lesa Eksodo 31:13,16,17. Den ki maneranan nos por apliká loke e ta bisa aki na nos mes, awe, hendenan ku ta kere den e eternidat di e lei di Dios?

Ounke e palabranan akí a ser papiá spesífikamente pa Israel antiguo, nos ku ta di Kristu ta "simia di Abraham, i erederonan segun promesa" (Gal. 3:29), i e Sabat awe ta permanesé un señal entre Dios i Su pueblo. Eksodo 31 ta mustra ku e Sabat ta un señal di e pakto perpetuo (òf eterno) di Dios (Eks. 31:16,17). E señal akí ta yuda nos "konosé" nos Kreador, nos Redentor, i nos Santifikadó. E ta komo un bandera ku ta ser hisá kada shete dia i ta funshoná manera algu pa yuda nos kòrda, desde ku nos tin e tendensia di lubidá.

E Sabat di Dios ta un rekordatorio konstante di nos orígennan, nos liberashon, nos destino, i nos responsabilidat pa esnan marginá. De echo, e Sabat ta asina importante ku na lugá di nos bai serka dje, e ta bini serka nos, tur siman i sin eksepshon, un rekordatorio perpetuo di ken nos ta, ken a traha nos, kiko E ta hasiendo pa nos, i kiko finalmente lo E hasi pa nos ora E traha shelunan nobo i un tera nobo.

Un Dios santu ta invitá Su sosionan di pakto humano pa konsiderá e ritmo ku ta goberná loke realmente ta konta, e relashon di salbashon entre e Kreador i Redentor i Su kreashon ku a dual. Tur siman, i ku e forsa i outoridat ku ta bini for di Dios, nos ta ser mandá pa drenta den e deskanso ku a ser duná libremente den Kristu Hesus, "e outor i kumplidó di nos fe, Kende, pa motibu di e goso poné Su dilanti, a soportá e krus" (Heb. 12:2, NKJV).