Kòrda, No Lubidá

E promé biaha ku e palabra "kòrda" ta aparesé den Beibel ta den Génesis 9, kaminda, despues di e diluvio mundial, Señor a bisa Noe ku E lo a pone e regenbog den shelu komo un señal di Su aliansa ku henter tera, ku nunka mas E lo a destruí henter e tera ku un diluvio.

Lesa Génesis 9:8-17. Kon e palabra "kòrda" ta ser usá aki, i kiko nos por siña tokante su uso pa kon nos mester kòrda loke Dios a hasi pa nos?

Naturalmente, Dios no tin mester di e regenbog pa kòrda riba Su promesa i Su aliansa. El a simplemente papia den lenguahe ku sernan humano por a komprondé. Di tur forma, e regenbog ta pa nos, komo sernan humano, rekordá e promesa i aliansa di Dios di no destruí e mundu atrobe pa medio di awa. Ku otro palabra, e regenbog tabata pa yuda hende kòrda riba e aliansa spesial akí ku Dios a sera; kada biaha ku e regenbog aparesé, e pueblo di Dios lo a kòrda, no solamente e huisio di Dios riba mundu pa su piká sino tambe Su amor pa e mundu i Su promesa di no inund’é atrobe.

Por lo tantu, nos ta mira aki e importansia di e idea di rekordá: rekordá e promesanan di Dios, rekordá e atvertensianan di Dios, rekordá e akshon di Dios den mundu.

E regenbog den shelu ta bira ainda mas importante awe ora, basá riba kontinuidat di e leinan di naturalesa, hopi sientífiko ta rechasá e idea ku a yega di tin un diluvio mundial, pa kuminsá. Kon fasinante ku Ellen G. White a skirbi ku promé ku e diluvio a bin, hopi hende tabatin e mesun idea ku e kontinuidat di e leinan di naturalesa tabata deskartá e posibilidat ku un diluvio mundial hamas por a tuma lugá. El a skirbi ku e hòmbernan sabí tabata argumentá ku e naturalesa su "leinan ta asina firme establesé ku Dios Mes no por a kambia nan.” — Patriarchs and Prophets, p. 97. Asina, promé ku e Diluvio, hende tabata argumentá, basá riba e leinan di naturalesa, ku e lo no por a sosodé; despues di Diluvio, hende ta argumentá, basá riba e leinan di naturalesa, ku e no a sosodé nunka, pa kuminsá.

Sinembargo, Dios den Su Palabra a bisa nos tokante e Diluvio i a duna e mundu un señal, no solamente di e Diluvio, sino di Su promesa pa no trese un atrobe. Por lo tantu, si nos ta kòrda kiko e regenbog ta nifiká, nos por tin e siguransa, skirbí den shelu ku e kolónan bunita akí, ku Dios Su Palabra ta sigur. I si nos por konfia Su Palabra riba e promesa akí, dikon no konfia Su Palabra riba tur loke E ta bisa nos tambe?

Den Deuteronomio 4, nos a lesa e amonestashonnan maravioso ku Señor a duna Su pueblo a traves di Moises enkuanto di nan gran privilegionan komo e pueblo skohí di Dios. El a redimí nan for di Egipto "pa medio di pruebanan, a traves di señalnan, a traves di maravianan, pa medio di guera, pa medio di un man poderoso i un brasa ekstendé, i pa medio di terornan grandi, di akuerdo ku tur loke SEÑOR boso Dios a hasi pa boso na Egipto dilanti di boso wowo" (Deut. 4:34, NKJV). Ku otro palabra, no solamente Dios a hasi algu grandi pa bo, El a hasié den formanan ku mester yuda bo kòrda. i nunka lubidá, ki gran kosnan El a hasi pa bo.

Lesa Deuteronomio 4:32-39. Kiko Señor tabata bisando nan pa kòrda, i dikon tabata asina importante pa nan kòrda e kosnan akí?

Moises ta mustra e pueblo bèk a traves di henter historia, asta te na e kreashon mes, i ta puntra nan, di forma retóriko, si kualke kos den henter historia a yega di ser hasí manera a ser hasí pa nan. De echo, e ta bisa nan pa puntra; esta, pa studia pa nan mes i wak si kualke kos manera loke nan a eksperensiá a yega di sosodé promé. Dor di hasi nan un par di pregunta, Moises tabata tratando na laga nan realisá pa nan mes kiko Señor a hasi pa nan, i pues, finalmente, kon gradesidu na djE nan mester ta pa Su aktonan poderoso den nan bida.

Sentral na e aktonan akí tabatin e liberashon for di Egipto i despues, kisas den algun formanan ainda mas asombroso, Su papiamentu ku nan na Sinaí, kua a permití nan skucha "Su palabranan for di meimei di e kandela".

Lesa Deuteronomio 4:40. Ki konklushon, anto, Moises tabata ke pa e pueblo saka for di e palabranan akí tokante loke Dios a hasi pa nan?

Señor no a hasi tur e kosnan ei sin ningun propósito. El a redimí Su pueblo, kumpliendo ku Su parti di e aliansa ku El a establesé ku nan. Nan a ser librá for di Egipto, na punto di drenta e Tera Primintí. Dios a hasi Su parti; awor nan tabata ser yamá pa hasi di nan, kua tabata, simplemente, obedesé.

Lesa Deuteronomio 4:9,23. Kiko Señor ta bisando nan pa hasi aki, i dikon e amonestashon aki ta asina importante pa e nashon?

Dos verbo ta dominá na kuminsamentu di tur dos e versíkulonan akí: "tene kuidou" i "lubidá". Loke Señor ta bisando nan ta: tene kuidou pa bo no lubidá. Es desir, no lubidá loke Señor a hasi pa bo ni e aliansa ku El a sera ku bo.

E verbo "tene kuidou", smr (kua ta ser usá tambe den un forma diferente den Deuteronomio 4:9, tradusí "warda bo mes"), ta bin dilanti den henter Tèstamènt Bieu, i e ta nifiká “tene kuidou,” “vigilá”, “preservá”, òf "protehá”. Kuriosamente, e promé biaha ku e ta aparesé den Skritura ta asta promé ku piká, ora Señor a bisa Adam pa "kuida" e hòfi ku El a dun'é (Gen. 2:15).

Awor, sinembargo, Señor ta bisa e pueblo, kada un individualmente (e verbo ta den forma singular), pa warda nan mes, pa nan no lubidá. Esaki no ta "lubidá" asina tantu den sentido di pèrdida di memoria (aunke ku tempu i den e generashonnan nobo esei por a bin) sino mas den sentido di ta indiferente tokante nan obligashonnan di e aliansa. Es desir, nan mester tabata konsiente tokante ken nan tabata i kiko esei tabata nifiká den términonan di kon nan mester a biba dilanti di Dios, dilanti di otro hebreonan, dilanti di e estranheronan entre nan, i dilanti di e nashonnan rondó di nan.

Lesa atrobe Deuteronomio 4:9 (lesa tambe Deut. 6:7 i Deut. 11:19), pero focus riba e último partí, tokante siña nan na nan yunan i nietunan. Kiko esaki lo tabatin di aber ku yuda nan pa no lubidá?

No ta un konsidensia ku nèt despues ku Moises ta bisa nan pa no lubidá, pa no laga e kosnan akí "kita for di bo kurason", e ta bisa nan pa siña e kosnan akí na e siguiente generashon i na e generashon despues. No solamente nan yunan mester a tende tokante e kosnan akí, sino kisas ainda mas importante, dor di konta i bolbe konta e storianan di loke Dios a hasi pa nan, e pueblo lo no a lubidá kiko e kosnan ei tabata. Por lo tantu, ki mihó manera pa preservá konosementu di loke ku Señor a hasi pa Su pueblo skohí?

Un ekslider di iglesia, ku a traha na Konferensia General di Atventistanan di e di Shete Dia pa di 34 aña, a konta un storia tokante kon, hopi aña promé, e i su esposa, despues di a aterisá na un aeropuerto, a pèrdè un maleta. "Einan mes," el a bisa, "banda di e faha ku ta transportá e ekipahe i den públiko, nos a hinka rudia i a hasi orashon, pidiendo Señor pa nos haña nos ekipahe pèrdí bèk." Despues el a bisa ku, hopi aña despues, e mesun kos a sosodé: nan a yega aeropuerto, pero un maleta no a yega. El a konta kiko a sosodé despues. "No preokupá," el a bisa su esposa, "seguro lo kubrié."

Ku e storia akí den mente, lesa Deuteronomio 8:7-18. Ki atvertensia Señor ta dunando Su pueblo aki, i kiko e mester nifiká pa nos tambe awe?

Wak kiko nan fieldat na Señor lo a trese pa nan. No solamente nan lo a poseé un tera maravioso i riku, "un tera den kua lo bo kome pan sin skarsedat, den kua lo bo no falta nada” (Deut. 8:9, NKJV), pero nan lo ta sumamente bendishoná den e tera ei: tounan i oro i plata i kasnan bunita. Es desir, nan lo a haña tur e komodidatnan material ku e bida aki ta brinda.

Ma e ora ei, kiko? Nan lo a enfrentá e peliger ku semper ta kompañá rikesa i prosperidat físiko, esun di lubidá ku tabata solamente Señor "kende ta duna bo poder pa haña rikesa" (Deut. 8:18, NKJV).

Kisas no na prinsipio, pero segun e añanan ta pasa i nan tin tur e komodidatnan material ku nan tin mester, nan lo lubidá nan pasado, lubidá kon Señor a guia nan a traves di "e gran i teribel desierto ei" (Deut. 1:19, NKJV), i, di bèrdat, pensa ku tabata nan propio inteligensia i talentonan ku a permití nan pa ta asina eksitoso.

Esaki ta presis loke Señor tabata atvirtiendo nan pa no hasi (i desafortunadamente, spesialmente ora hende lesa e profetanan posterior, esaki ta eksaktamente loke a sosodé ku nan).

Por lo tantu, meimei di e prosperidat akí, Moises ta bisa nan pa kòrda ku tabata Señor so kende a hasi esaki pa nan i pa no ser engañá pa e bendishonnan material ku El a duna nan. Siglonan despues, Hesus Mes a atvertí, den e parabel di e sembradó, tokante "e engaño di rikesa" (Marko 4:19).

Lesa Deuteronomio 5:15; Deuteronomio 6:12; Deuteronomio 15:15; Deuteronomio 16:3,12; i Deuteronomio 24:18,22. Kiko spesífikamente Señor no tabata kier pa nan lubidá nunka, i dikon?/span>

Manera nos a mira, den henter Tèstamènt Bieu, Señor konstantemente tabata trese e mente di e pueblo bèk na e Eksodo, nan liberashon milagroso, di parti di Dios, for di Egipto. Te na e dia di awe, míles di añanan despues, hudiunan praktikante ta warda e selebrashon di Pasku, un konmemorativo di loke Señor a hasi pa nan. "I lo sosodé ku ora boso yega na e tera ku SEÑOR lo duna boso, manera El a primintí, ku boso lo mantené e sirbishi akí. I lo sosodé ku, ora boso yunan bisa boso: 'Kiko boso ke men ku e sirbishi akí?' ku boso lo bisa: 'Ta e sakrifisio di Pasku di SEÑOR, Kende a pasa riba e kasnan di e yunan di Israel na Egipto ora ku El a mata e egipsionan i a libra nos kasnan’” (Eks. 12:25-27, NKJV).

Pa e iglesia awe, e Pasku ta un símbolo di e liberashon ku a ser ofresé na nos den Kristu: "Pasobra enbèrdat Kristu, nos Pasku, a ser sakrifiká pa nos" (1 Kor. 5:7, NKJV).

Lesa Efesionan 2:8-13. Kiko a ser bisá na e kreyentenan pagano akí pa nan kòrda? Kon e ta paralelo na loke a ser bisá na e hebreonan den Deuteronomio pa nan kòrda tambe?

Pablo tabata ke pa e hendenan akí kòrda loke Dios a hasi pa nan den Kristu, for di kiko El a salba nan, i kiko nan tabatin awor pa motibu di e grasia di Dios na nan. Manera ku e yunan di Israel, no tabata nada den òf di nan mes ku tabata meresé e aprobashon di Dios. En kambio, tabata solamente e grasia di Dios, duná na nan, apesar ku nan tabata "strañeronan di e aliansanan di promesa", ku a hasi nan loke nan tabata den Kristu Hesus.

Sea nos ta hudiunan den desierto, kristiannan na Efeso, òf Atventistanan di e di Shete Dia kualke kaminda den mundu, kon krusial ta pa nos kòrda semper, i no lubidá, kiko Dios a hasi pa nos den Kristu. Nada straño, anto, ku nos tin e palabranan akí: "Lo tabata bon pa nos pasa un ora di reflekshon kada dia den kontemplashon di e bida di Kristu. Nos lo mester tum’é punto pa punto, i laga e imaginashon gara kada esena, spesialmente esnan final. Miéntras nos ta reflekshoná riba Su gran sakrifisio pa nos, nos konfiansa den djE lo ta mas konstante, nos amor lo ser rebibá, i nos lo ta mas profundamente saturá ku Su Spiritu.” — Ellen G. White, The Desire of Ages, p. 83.