E Resurekshon di Moises

Bes tras bes, asta meimei di nan apostasia i peregrinashonnan den desierto, Dios tabata proveé milagrosamente pa e yunan di Israel. Es desir, maske nan no tabata meresé (i hopi bia a keda asina) e grasia di Dios tabata basha riba nan. Nos tambe, awendia, ta reseptornan di Su grasia, maske kuantu nos tampoko meres’é. Despues di tur kos, e lo no tabata grasia si nos tabata meres’é, bèrdat?

I, ademas di e abundansia di kuminda ku Señor a proveé milagrosamente pa nan den desierto, un otro manifestashon di Su grasia tabata e awa, sin kua nan lo a peresé rápidamente, spesialmente den un desierto seku, kayente, i desolá. Papiando tokante e eksperensia ei, Pablo a skirbi: "I tur a bebe e mesun bibida spiritual. Pasobra nan tabata bebe for di e Baranka spiritual ei ku tabata sigui nan, i e Baranka ei tabata Kristu" (1 Kor. 10:4, NKJV)

.

Ellen G. White a agregá tambe ku "Unda den nan peregrinashon ku nan tabata ke awa, einan, for di e spletnan di e baranka e tabata brota sali banda di nan kampamentu.” — Patriarchs and Prophets, p. 411.

Lesa Numbernan 20:1-13. Kiko a sosodé aki, i kon nos ta komprondé e kastigu di Señor pa Moises pa motibu di loke el a hasi?

Di un banda, no ta difísil pa mira i komprondé e frustrashon di Moises. Despues di tur loke Dios a hasi pa nan, e señalnan i e maravianan i liberashon milagroso, ata nan aki, finalmente, na e fronteranan di e Tera Primintí. I despues, kiko? Di ripiente, nan tin falta di awa, i asina nan ta kuminsá konspirá kontra Moises i Aaron. Tabata ku Dios lo no por a proveé awa pa nan awor, manera El a hasi pa nan asina tantu bia promé? naturalmente ku nò; E tabata por, i tabata bai hasié atrobe.

Sinembargo, wak e palabranan di Moises ora el a dal e baranka, asta dos bia. "Tende awor, boso rebeldenan! Nos mester saka awa pa boso for di e baranka akí?" (Num. 20:10, NKJV). Bo por a tende e rabia den su bos, pasobra e ta kuminsá ku yama nan "rebeldenan".

E problema no tabata asina tantu e rabia riba su mes, kua tabata sufisiente malu pero komprendibel, ma ora el a bisa "Nos mester saka awa pa boso for di e baranka akí?"manera kos ku e òf kualke ser humano por a saka awa for di un baranka. Den su rabia, el a parse di a lubidá na e momento ei ku tabata solamente e poder di Dios, obrando meimei di nan, ku por a hasi un milager asina. E, mas ku tur hende, mester tabata sa esei.

Lesa Numbernan 20:12,13 atrobe. Ki rason spesífiko Señor a duna Moises pa kua e no por krusa pa motibu di loke el a hasi? Lesa tambe Deuteronomio 31:2 i Deuteronomio 34:4.

Di akuerdo ku e teksto akí, e piká di Moises tabata impliká mas ku solamente su propio intento pa tuma e lugá di Dios, kua tabata sufisiente malu. El a demostrá tambe un falta di fe, kua, pa un hende manera Moises, lo tabata imperdonabel. Despues di tur kos, esaki tabata e hòmber ku, for di e mata ku tabata kima (Eks. 3:2-16) en adelante, tabatin un eksperensia ku Dios diferente for di mayoria otro hende, i tòg, di akuerdo ku e teksto Moises no a "kere Mi" (NKJV), esta, Moises a demostrá un falta di fe den loke Señor a bisa, i komo resultado el a faya di "santifiká Mi", dilanti di e yunan di Israel. Ku otro palabra, si Moises a mantené su kalma i hasi loke ta korekto dor di mustra su propio fe i konfiansa den Dios meimei di nan apostasia, e lo a glorifiká Señor dilanti di e pueblo i tabata, atrobe, un ehèmpel pa nan di kon fe i obediensia berdadero tabata.

Tuma nota tambe, kon Moises a desobedesé loke Señor a bis'é spesífikamente pa hasi.

Lesa Numbernan 20:8. Kiko Señor a bisa Moises pa hasi, pero kiko Moises a hasi en kambio (Num. 20:9-11)?

Den versíkulo nuebe Moises ta kue e bara manera Señor a orden'é. Te asina leu, no tabatin nada robes ku esei. Pero na versíkulo 10, na lugá di papia ku e baranka, for di kua awa lo a brota komo un ekspreshon asombroso di e poder di Dios, Moises a dal e, no un sino dos bia. Sí, dal un baranka i laga awa sali for di dje tabata milagroso, pero seguramente no mes milagroso ku simplemente papia kuné i mira e mesun kos sosodé.

Sigur, na promé bista kisas por tabata parse ku e huisio di Dios riba Moises tabata ekstremo: despues di tur loke Moises a pasa aden, despues di tur kos, e no tabata bai ser permití pa krusa drenta e Tera Primintí. Pa tur e tempu ku e storia akí a ser kontá, hende a puntra nan mes dikon, pa motibu di un akto imprudente, e lo a ser ningá loke e tabata antisipá asina tantu tempu.

Pober Moises! Despues di a yega asina leu, di a pasa den asina tantu kos, solamente pa keda for di kumplimentu di e promesa hasí na Abram hopi siglo promé: "Na bo desendientenan lo Mi duna e tera aki" (Gen. 12:7, NKJV).

Lesa Deuteronomio 34:1-12. Kiko a sosodé ku Moises, i kiko Señor a bisa di dje ku a mustra ki un hòmber spesial e tabata?

"Den soledat Moises a repasá su bida di instabilidat- i difikultatnan desde ku el a bira lomba pa e onornan di korte i for di un posibel reinado na Egipto, pa purba su suèltu ku e pueblo skohí di Dios. El a rekordá tur e añanan largu den desierto ku e tounan di Jetro, e aparishon di e Angel den e mata ku tabata kimando, i su propio yamada pa libra Israel. El a bolbe kontemplá e milagernan di e poder di Dios realisá na fabor di e pueblo skohí, i Su miserikòrdia yen di pasenshi durante nan añanan di peregrinashon i rebelion. Apesar di tur loke Dios a hasi pa nan, apesar di su mes orashonnan i trabounan, solamente dos di tur e adultonan den e ehérsito enorme ku a bandoná Egipto a ser hañá asina fiel ku nan por a drenta e Tera Primintí. Miéntras Moises tabata repasá e resultado di su trabounan, su bida di prueba i sakrifisio tabata parse di ta kasi enbano.” — Ellen G. White, Patriarchs and Prophets, p. 471, 472.

Deuteronomio 34:4 ta bisa algu hopi interesante. "Esaki ta e tera di kua Mi a hura di duna Abraham, Isaak i Jakob, bisando: 'Lo Mi dun'é na bo desendientenan.’ ” Señor tabata usando un lenguahe kasi literal di loke El a bisa bes tras bes na e patriarkanan i na nan yunan, tokante duna nan e tera akí. Awor E tabata ripitiendo e na Moises.

Tambe Señor a bisa ku "Mi a laga bo mir'é ku bo wowonan, ma lo bo no krusa bai aya" (Deut. 34:4, NKJV, énfasis añadí). No tin ningun forma ku Moises, pará kaminda e tabata, por a mira ku bista normal, tur loke Señor tabata mustr'é, for di Moab te na Dan te na Neftalí, etcetera. Ellen G. White tabata kla: e tabata un revelashon sobrenatural, no solamente di e tera, sino di kon lo e tabata despues ku nan a tuma posishon di dje.

Den un sentido, kasi por a parse manera kos ku Señor tabata tentando Moises, hasiendo hopi kla: Lo bo por tabata einan, si solamente bo a obedesé Mi manera lo bo mester a hasi, òf algu asina. En kambio, Señor tabata mustrando Moises ku apesar di tur kos, asta apesar di e eror di Moises, Dios tabata bai ta fiel na e promesanan di e pakto ku El a hasi ku e tatanan i ku Israel mes. Manera nos lo mira, tambe, Señor tabatin asta algu mihó reservá pa Su sirbidó fiel pero defektuoso.

"Asina Moises, e sirbidó di SEÑOR, a muri aya na tera di Moab, di akuerdo ku e palabra di SEÑOR. I El a der'é den un vaye na tera di Moab, enfrente di Bet peor; ma ningun hende konosé su graf te na e dia di awe" (Deut. 34:5,6, NKJV). Por lo tantu, ku e par di versíkulonan akí, Moises, asina sentral den bida di Israel, un hòmber ken su eskritonan ta sigui ta bibu, no solamente na Israel sino asta den iglesia i den e sinagoga awendia, tambe, a muri.

Moises a muri, a ser derá, e pueblo a tene luto, i esei tabata tur kos. Seguramente, e prinsipio di e palabranan den Revelashon ta apliká aki: "Bendishoná ta e mortonan ku muri den Señor di awor en adelante. 'Sí,' e Spiritu ta bisa, ‘ku nan por sosegá di nan trabounan, i nan obranan ta sigui huntu ku nan' " (Rev. 14:13, NKJV).

Sinembargo, e morto di Moises no tabata e kapítulo final di e storia di bida di Moises.

Lesa Hudas 9. Kiko ta pasando aki, i kon e teksto akí ta yuda splika e aparishon di Moises mas despues den Tèstamènt Nobo?

Aunke a duna nos solamente un persepshon, ki un esena inkreibel ta ser deskribí aki. Miguel, Kristu Mes, a diskutí ku diabel tokante e kurpa di Moises. Diskutí riba dje kon? No tin duda ku Moises tabata un pekador; enbèrdat, su último piká konosí, e tumamentu di gloria, ku tabata di Dios, riba su mes, tabata e mes tipo di piká, "Lo mi subi ariba di e halturanan di e nubianan, lo mi ta meskos ku e Haltísimo" (Isa. 14:14, NKJV) ku, na promé lugá, a pone ku Lucifer mes ser tirá for di shelu. E disputa riba e kurpa di Moises mester tabata pasobra Kristu awor tabata reklamando e resurekshon primintí pa Moises.

Pero kon Kristu por a hasi esei pa un pekador, Moises, un hende ku a violá Su lei? E kontesta, naturalmente, por tabata solamente e krus. Meskos ku tur e sakrifisionan di animal tabata mustra padilanti na e morto di Kristu, asina opviamente einan Señor awor, mirando padilanti na e krus, a ordená pa e kurpa di Moises ser resusitá. "Komo konsekuensia di piká Moises a kai bou di e poder di Satanas. Pa su propio méritonan e tabata koutivo legalmente di morto; pero el a ser lantá pa bida inmortal, manteniendo su título den nòmber di e Redentor. Moises a sali for di e graf glorifiká, i a subi huntu ku Su Libertador na e Stat di Dios.” — Ellen G. White, Patriarchs and Prophets, p. 479.

Ku e lus adishonal di Tèstamènt Nobo, e eksklushon di Moises for di e Tera Primintí no ta parse un kastigu mashá, despues di tur kos. Na lugá di un Kanaan terenal i mas despues un Herusalèm terenal (kua pa henter su historia ku ta konosí, tabata un lugá di guera, konkista, i sufrimentu), "e Herusalèm selestial" (Hebr. 12:22) ta, asta awor, su hogar. Un lugá di biba muchu mas mihó, sigur!

Moises tabata e promé ehèmpel konosí den Beibel di resurekshon di e mortonan. Enok a ser hibá shelu sin a mira morto (Gén. 5:24), i Elias tambe (2 Reinan 2:11), pero te asina leu ku e registro skirbí ta bai, Moises tabata esun di promé ku a ser resusitá pa bida eterno.

Kuantu tempu Moises a drumi den tera nos no sa, pero te asina leu ku tabata konserní e, no tabata importá. El a sera su wowonan ora el a muri, i sea tabata tres ora òf 300 aña, p’e tabata mesun kos. E ta mesun kos tambe pa tur e mortonan a lo largu di historia; nan eksperensia, a lo ménos pa loke ta trata ser morto, lo no ta diferente for di esun di Moises. Nos ta sera nos wowonan ora nos muri, i e siguiente kos ku nos sa ta sea e Segundo Binida di Hesus òf, desafortunadamente, e huisio final (lesa Rev. 20:7-15).

Lesa 1 Korintionan 15:13-22. Ki gran promesa ta ser hañá aki, i dikon e palabranan di Pablo tin sentido solamente si nos komprondé ku e mortonan ta drumi den Kristu te na e resurekshon?

Sin e speransa di resurekshon, nos no tin niun speransa mes. E resurekshon di Kristu ta garantia di esun di nos; despues di a " hasi purifikashon pa nos pikánan" (Hebr. 1:3) riba e krus komo nos Lamchi di sakrifisio, Kristu a muri i a lanta for di morto, i pa motibu di Su resurekshon nos tin garantia di esun di nos, ku Moises siendo e promé ehèmpel di un ser humano kaí lantá for di morto. Pa motibu di loke Kristu lo a hasi, Moises a ser resusitá; i pa motibu di loke Kristu a hasi, nos tambe lo ser resusitá.

Pues, den Moises nos por haña un ehèmpel di salbashon pa fe, un fe hasí manifesto den un bida di fieldat i konfiansa den Dios, asta si el a tambaliá na final. I den henter e buki di Deuteronomio, nos por mira Moises tratando na yama e pueblo di Dios na un fieldat similar, un reakshon similar na e grasia duná na nan manera el a ser duná na nos, nos tambe, ku ta na e fronteranan di e Tera Primintí.