E Karta na e Hebreonan i na nos

Pa komprondé e sermon i apliká su mensahe na nos mes, nos mester komprondé e historia di e kongregashon i nan situashon ora nan a risibí e karta di e apòstel.

Lesa Hebreonan 2:3,4. Kiko tabata e eksperensia di e oudiensia di Hebreonan ora nan tabata resien kombertí?

E pasashi akí ta impliká ku e oudiensia di Hebreonan no a tende Hesus Mes prediká; en kambio, nan a risibí e evangelio for di otro evangelistanan ku a anunsiá na nan e notisia di “salbashon.”

Pablo ta bisa tambe ku e evangelistanan a “konfirmá” e mensahe na nan i ku Dios Mes a karga “testimonio tantu ku señalnan komo milagernan” (NKJV). Esaki ta nifiká ku Dios a proveé konfirmashon eksperimental di e evangelio pa medio di señalnan i otro aktonan poderoso, entre nan e distribushon di e “donnan di Spiritu Santu” (NKJV). Tèstamènt Nobo ta relatá ku señalnan manera kurashonnan milagroso, eksorsismo, i e dramamentu di donnan spiritual hopi bia tabata kompañá e predikamentu di e evangelio na lugánan nobo.

Na kuminsamentu di e iglesia kristian, Dios a drama Su Spiritu riba e apòstelnan na Herusalèm pa nan tabata kapas pa anunsiá e evangelio den idiomanan anteriormente deskonosí pa nan i pa ta kapas pa ehekutá milagernan (Echonan 2,3). Felipe a ehekutá milagernan similar na Samaria (Echonan 8), Pedro na Jope i Cesarea (Echonan 9,10), i Pablo a lo largu di su ministerio na Asia Menor i Oropa (Echonan 13-28). E aktonan poderoso akí tabata evidensia eksperimental ku a konfirmá e mensahe di “salbashon”, e establesimentu di e reino di Dios i un salbashon for di kondenashon i libertat for di podernan malu (Hebr. 12:25-29).

E Spiritu a duna kreyentenan kristian primitivo e konvikshon ku nan pikánan a ser pordoná; por lo tantu, nan no tabatin miedu di huisio, i komo resultado nan orashonnan tabata ku kurashi i konfidente, i nan eksperensia religioso tabata yen di goso (Echonan 2:37-47). E Spiritu a libra tambe esnan ku tabata sklabisá na podernan maligno, kua tabata evidensia konvisente di e superioridat di e poder di Dios riba e forsanan di maldat i a revelá ku e reino di Dios a ser establesé den nan bida.

Ora kreyentenan tabata konfesá nan fe den Kristu i tabata uni ku e iglesia, nan tabata pone un marka di límite ku tabata distinguí nan for di restu di sosiedat. Desafortunadamente, esaki a bira un fuente pa konflikto pasobra e tabata pasa implísitamente un huisio negativo riba nan komunidat i su balornan.

Lesa Hebreonan 10:32-34 i Hebreonan 13:3. Kiko tabata e eksperensia di e oudiensia di Hebreonan despues di nan kombershon?

Ta hopi probabel ku e lesadónan di Hebreonan tabata sufri verbalmente i físikamente na man di bandanan promové pa oponentenan (p.e. Echonan 16:19-22, Echonan 17:1-9). Nan a ser enkarselá tambe, i ta posibel ku nan a ser batí tambe, pasobra ofisialnan tabatin poder di outorisá kastigu i enkarselashon, hopi bia sin sigui normanan hudisial apropiá, miéntras nan tabata akumulá evidensia (p.e. Echonan 16:22,23).

Lesa Hebreonan 11:24-26 i 1 Pedro 4:14,16. Kon e eksperensianan di Moises i di e lesadónan di 1 Pedro ta yuda nos komprondé dikon kreyentenan kristian tabata ser persiguí?

“Karga e reproche di Kristu” simplemente tabata nifiká identifiká bo mes ku Kristu i soportá e bèrgwensa i abuzu ku e asosiashon akí tabata impliká. Enemistat públiko kontra kristiannan tabata resultado di nan kompromisonan religioso distintivo. Hende por sinti nan mes ofendí pa práktikanan religioso ku nan no ta komprondé òf pa hendenan ku nan estilo di bida i moral por a pone otronan sinti nan mes kulpabel òf bergonsá. Pa meimei di e promé siglo A.D., Tacitus tabata konsiderá ku kristiannan tabata kulpabel di “odio kontra humanidat.” — Alfred J. Church and William J. Brodribb, trans., The Complete Works of Tacitus, (New York: The Modern Library, 1942) Annals 15.44.1. Loke sea tabata e motibu eksakto pa e akusashon ei, siguramente falsu, hopi kristian primitivo, manera esnan na ken Pablo a skirbi e karta akí, tabata sufriendo pa nan fe.

E lesadónan di Hebreonan tabata eksitoso den mantené nan fe i kompromiso na Kristu, apesar di rechaso i persekushon. E konflikto, sinembargo, tabatin efekto a lo largu. Nan a bringa un bon pelea i a sali viktorioso ma tambe kansá.

Lesa Hebreonan 2:18; Hebreonan 3:12,13; Hebreonan 4:15; Hebreonan 10:25; Hebreonan 12:3,12,13; i Hebreonan 13:1-9,13. Kiko tabata algun di e desafionan ku e kreyentenan tabata enfrentando?

Hebreonan ta bisa nos ku e lesadónan a sigui eksperensiá difikultatnan. Atakenan verbal, i probablemente otro tiponan, kontra nan honor a sigui (Hebr. 13:13). Algun kreyente tabata den prizòn ainda (Hebr. 13:3), algu ku por a agotá e iglesia finansieramente i sikológikamente. Nan tabata kansá (Hebr. 12:12,13) i fásilmente por a “pèrdè kurashi” (Hebr. 12:3, NIV).

Ta normal entre personanan i komunidatnan ku despues ku e sensashon di viktoria a pasa, defensanan sikológiko i otro tiponan ta relahá, i nan ta bira mas vulnerabel na e kontra atake di nan enemigunan. E forsa ku un persona òf komunidat tabata mobilisá pa enfrentá un menasa inminente ta mas difísil pa spièrta un di dos bia.

Lesa 1 Reinan 19:1-4. Kiko a sosodé ku Elias?

“Ma un reakshon manera frekuentemente ta sigui fe haltu i éksito glorioso tabata primi riba Elias. E tabatin miedu ku e reforma ku a kuminsá riba Karmelo kisas no por ta duradero; i depreshon a poderá di dje. El a ser eksaltá na kabes di Pisga; awor e tabata den e vaye. Miéntras e tabata bou di inspirashon di e Todopoderoso, el a soportá e prueba di fe di mas severo; pero den e momento akí di deskurashamentu, ku e menasa di Jezabel zonando den su oreanan, i Satanas aparentemente prevalesiendo a traves di e konspirashon di e muhé malbado akí, el a pèrdè su gara riba Dios. El a ser eksaltá riba midí, i e reakshon tabata tremendo. Lubidando Dios, Elias a sigui hui, te ora el a haña su mes den un lugá desolá, su so.” — Ellen G. White, Prophets and Kings, p. 161, 162.

Kiko e apòstel a konsehá e lesadónan pa hasi ku bista riba nan situashon? Kiko nos por siña for di Hebreonan pa nos mes benefisio? Laga nos analisá kon Dios a yuda Elias rekuperá di su deskurashamentu.

Lesa 1 Reinan 19:5-18. Kiko Dios a hasi pa restourá e fe di Elias, Su sirbidó?

E storia di Dios Su trato ku Elias despues di Karmelo ta fasinante pasobra e ta mustra e kuido tierno i sabiduria ku kua Dios ta ministrá na esnan ku ta bou di angustia i ku ta lucha pa rekobrá fe. Dios a hasi vários kos pa Elias. Di promé, El a sòru pa su nesesidatnan físiko. El a proveé kuminda i a lag’é sosegá. Despues, den e kueba, El a reprend’é kariñosamente: “Kiko bo ta hasi aki, Elias?” (NKJV), i a yud’é haña un komprondementu mas profundo di kon E ta obra i ta kumpli ku Su propósitonan. Dios no tabata den e bientu, e temblor, òf e kandela, sino den un bos chikitu i ketu. Despues, Dios a duna Elias un trabou pa hasi i a trankilis’é.

Lesa Hebreonan 2:1, Hebreonan 3:12-14, Hebreonan 5:11-6:3, i Hebreonan 10:19-25. Kiko Pablo ta sugerí ku kreyentenan lo mester hasi?

A lo largu di Hebreonan nos por haña vários instrukshon ku e apòstel a duna e lesadónan pa yuda nan rekobrá nan forsa i fe original. Un aspekto ku Pablo ta enfatisá ta pa sòru pa e nesesidatnan físiko di nan kompañeronan kreyente. E ta sugerí ku nan mester praktiká hospitalidat i bishitá esnan den prizòn, kua tabata impliká proveé pa nan nesesidatnan. E apòstel ta atvertí e lesadónan pa ta generoso, kòrdando nan ku Dios lo no bandoná nan (Hebr. 13:1-6). Tambe Pablo a reprendé nan i a kurashá nan. El a spièrta nan pa no alehá nan mes” (Hebr. 2:1, ESV) gradualmente i pa no tin “un kurason malbado i inkrédulo” (Hebr. 3:12), i el a kurashá nan pa krese den nan komprondementu di e fe (Hebr. 5:11-6:3). Tambe el a remarká tokante e importansia di asistensia konsistente na reunionnan di iglesia (Hebr. 10:25). En resúmen, el a sugerí pa nan primi huntu, un kurashá otro, i promové amor i bon obranan, ma tambe el a halsa Hesus i Su ministerio den e santuario selestial na nan fabor (Hebr. 8:1,2; Hebr. 12:1-4).

Lesa Hebreonan 1:2; Hebreonan 9:26-28; Hebreonan 10:25,36-38; Hebreonan 12:25-28. Ki punto Pablo ta enfatisando aki, partikularmente enkuanto di tempu?

Tin un elemento hopi importante ku e apòstel ta enfatisá ku ta añadí urgensia na su spièrtamentu: e lesadónan ta bibando den e “último dianan” (Hebr. 1:2) i e promesanan ta na punto di ser kumplí (Hebr. 10:36-38). Ta interesante, manera nos lo mira, ku a lo largu di e dokumento Pablo ta kompará su oudiensia ku e generashon di den desierto ku a para nèt dilanti di e frontera di Kanaan, kla pa drenta den e Tera Primintí. El a kòrda nan: “Pasobra djis un tiki tempu mas, i E, kende ta bin, lo bin i lo no tarda” (Hebr. 10:37, NKJV). I despues el ta kurashá nan: “nos no ta di esnan ku ta retirá nan mes na perdishon, ma di esnan ku ta kere den e salbamentu di alma” (Hebr. 10:39, NKJV). E último spièrtamentu akí tabata kòrda e lesadónan, i nos, tokante e peligernan ku e pueblo di Dios a eksperensiá histórikamente nèt promé ku e kumplimentu di e promesanan di Dios.

E buki di Numbernan ta papia tokante e mesun kos akí. E registro bíbliko ta bisa ku dos bia, djis promé di a drenta e Tera Primintí, Israel a sufri derotanan importante. E promé bia, registrá den Numbernan 13 i 14, ta bisa nos tokante e dudanan ku vários lider a plama meimei di e kongregashon i a pone e fe di Israel faya. Komo resultado, e kongregashon a disidí di nombra un lider nobo i bai bèk Egipto, nèt na momento ku nan tabata na punto di drenta Kanaan.

E di dos bia, e Israelitanan a haña nan enbolbí ku sensualidat i adorashon falsu di Baal Peor (Numbernan 24,25). Miéntras Balaam no tabata kapas di trese un maldishon riba e israelitanan, Satanas a usa tentashonnan seksual pa hiba Israel den adorashon falsu i piká, i pa trese disgustu di Dios riba nan.

Pablo ta spièrta e lesadónan di Hebreonan kontra tur dos peliger. Di promé, e ta spièrta nan pa tene duru na konfeshon di nan fe i pa fiha nan bista riba Hesus (Hebr. 4:14, Hebr. 10:23, Hebr. 12:1-4). Di dos, e ta spièrta nan kontra inmoralidat i kudishi (Hebr. 13:4-6). Finalmente, e ta spièrta nan pa opservá i obedesé nan lidernan (Hebr. 13:7,17).