Hesus, e Sakrifisio Perfekto

Hebreonan 9:15 ta splika ku e morto di Hesus komo un sakrifisio tabatin e propósito di proveé "redenshon di e transgreshonnan ku a ser kometé bou di e promé aliansa", pa e pueblo di Dios por a "risibí e promesa di e erensia eterno" (NASB).

Den e antiguo Serkano Oriente, un aliansa entre dos persona òf nashon tabata un asuntu serio. E tabata enbolbí un interkambio di promesanan bou di huramentu. E tabata impliká e suposishon ku e diosnan lo a kastigá esnan ku a kibra e huramentu. Hopi biaha, e aliansanan akí tabata ser ratifiká pa medio di e sakrifisio di un animal.

Por ehèmpel, ora Dios a hasi un aliansa ku Abraham, e seremonia tabata enbolbí kòrtamentu di animalnan na mitar (Gen. 15:6–21). E partisipantenan tabata kana entre e partinan komo un rekonosementu ku e animalnan ei tabata representá e destino di e parti ku a kibra e aliansa. Ta signifikante ku solamente Dios tabata kana entre e animalnan, pa e propósito di komuniká na Abraham ku E lo no kibra Su promesa.

Kompará Génesis 15:6–21 i Jeremias 34:8–22. Kiko e tekstonan akí ta siña tokante e aliansa?

E aliansa ku Dios a duna Israel akseso na e Tera Primintí komo nan erensia. E tabata enbolbí, sinembargo, un sèt di mandamentu i e sprengumentu di sanger riba un altar. E sprengumentu akí tabata impliká e destino di e partido ku a kibra e aliansa. Ta p’esei Hebreonan ta bisa ku "sin dramamentu di sanger no tin apsolushon [di piká]" (Hebr. 9:22, tradukshon literal).

Ora Israel a kibra e aliansa, Dios a enfrentá un dilema doloroso. E aliansa tabata demandá morto di e infraktornan, pero Dios tabata stima Su pueblo. Si Dios lo a simplemente wak otro banda òf ninga di kastigá e infraktornan, Su mandamentunan nunka lo ser apliká, i e mundu akí lo baha bai den un káos.

E Yu di Dios, sinembargo, a ofresé Su mes komo un Supstituto. El a muri na nos lugá pa nos "por risibí e erensia eterno primintí" (Hebr. 9:15,26, ESV; Rom. 3:21–26). Es desir, E tabata bai defendé e santidat di Su lei miéntras na mes momento salba esnan ku a kibra e lei ei. I E por a hasi esaki solamente a traves di e krus.

E morto di Hesus a proveé pordon, òf apsolushon, di nos pikánan. E apsolushon di nos pikánan, sinembargo, ta enbolbí muchu mas ku kanselashon di e kastigu pa nos transgreshon di e aliansa. E ta enbolbí otro elementonan mes importante. Ta p'esei e sistema di sakrifisio israelita tabatin sinku diferente tipo di sakrifisio. Kada un tabata nesesario pa ekspresá e rikesa di e nifikashon di e krus di Kristu.

Lesa Efesionan 3:14–19. Kiko tabata e petishon di orashon di Pablo na fabor di e kreyentenan?

E ofrenda di holokousto (òf ofrenda kimá) tabata rekerí pa henter e animal ser konsumí riba e altar (Levítiko 1). E tabata representá Hesus, kende Su bida a ser konsumí pa nos. Ekspiashon tabata rekerí Hesus Su kompromiso total ku nos. Aunke E tabata igual ku Dios, Hesus a "hasi Su mes bashí, dor di tuma forma di un sirbidó" (Fil. 2:5–8, ESV).

E ofrenda di maishi tabata un regalo di gratitut pa Dios Su provishon di sostenementu pa Su pueblo (Levítiko 2). Tambe e ta representá Hesus, "e pan di bida" (Juan 6:35,48), a traves di ken nos tin bida eterno.

E ofrenda di pas òf kompañerismo tabata impliká un kuminda komunitario ku amigunan i famia pa selebrá e bienestar proveé pa Dios (Levítiko 3). E tabata representá Kristu, kende Su sakrifisio a proveé pas pa nos (Isa. 53:5, Rom. 5:1, Efe. 2:14). Tambe e ta enfatisá ku nos mester partisipá den e sakrifisio di Hesus dor di kome di Su karni i bebe di Su sanger (Juan 6:51–56).

E ofrenda di piká òf purifikashon tabata proveé ekspiashon pa pikánan (Lev.4:1–5:13). E sakrifisio akí tabata enfatisá e ròl di e sanger di e animal, kua tabata representá su bida, pa proveé redenshon di pikánan (Lev. 17:11) i tabata mustra padilanti na e sanger di Hesus kende ta redimí nos di nos pikánan (Mat. 26:28, Rom. 3:25, Hebr. 9:14).

E ofrenda di kulpa òf reparashon (Lev. 5:14–6:7) tabata proveé pordon den kasonan kaminda reparashon òf restitushon tabata posibel. E ta bisa nos ku e pordon di Dios no ta libra nos di e responsabilidat di proveé reparashon òf restitushon, kaminda ta posibel, na esnan ku nos a hasi daño.

E sakrifisionan di santuario ta siña nos ku e eksperensia di salbashon ta mas ku simplemente aseptá Hesus komo nos Supstituto. Tambe nos tin ku "alimentá" riba djE, kompartí Su benefishinan ku otronan, i proveé reparashon na esnan ku nos a hasi daño.

Lesa Hebreonan 7:27 i Hebreonan 10:10. Kon e sakrifisio di Hesus ta ser deskribí den e pasashinan akí?

E saserdotenan levítiko, ku tabata "hopi den kantidat, pasobra nan tabata ser impedí pa morto di kontinuá den funshon" (Hebr. 7:23, ESV), ta ser kontrastá ku Hesus, Kende ta biba pa semper i tin un saserdosio eterno (Hebr. 7:24,25). Saserdotenan levítiko “diariamente” (Hebr. 7:27) i “tur aña” (Hebr. 9:25) tabata ofresé regalonan i sakrifisionan "ku no por perfekshoná e konsenshi di e adoradó (Hebr. 9:9, ESV; Hebr. 10:1–4).

Sinembargo, Hesus a ofresé Su mes "un bia pa semper" un "solo ofrenda" (Hebr. 10:10,12–14, ESV) ku ta limpia nos konsenshi (Hebr. 9:14, Hebr. 10:1–10) i ta kita piká (Hebr. 9:26). E sakrifisio di Hesus ta superior na e sakrifisio di animalnan pasobra Hesus tabata e Yu di Dios (Hebr. 7:26–28), Kende a kumpli perfektamente ku e boluntat di Dios (Hebr. 10:5–10).

E deskripshon di e sakrifisio di Hesus, ku a tuma lugá "un bia pa semper" tin vários implikashon importante.

Na promé lugá, e sakrifisio di Hesus ta perfektamente efektivo i nunka lo por ser surpasá. E sakrifisionan di e saserdotenan levítiko tabata ser ripití pasobra nan no tabata efektivo; di otro manera "nan lo no a stòp di ser ofresé, ya ku e adoradónan, unabes ku nan a ser purifiká, lo no tabatin ningun konsiensia di piká mas?" (Hebr. 10:2, ESV).

Na di dos lugá, tur e diferente tiponan di sakrifisio di Tèstamènt Bieu a haña nan kumplimentu na e krus. Por lo tantu, Hesus no solamente ta limpia nos di piká (Hebr. 9:14), tambe E ta proveé santifikashon (Hebr. 10:10–14) dor di kita piká for di nos bida (Hebr. 9:26). Promé ku e saserdotenan por a aserká Dios den e santuario i ministrá na fabor di otro sernan humano, nan mester a ser purifiká i santifiká, òf konsagrá (Levítiko 8,9). E sakrifisio di Hesus ta limpia nos i konsagrá nos (Hebr. 10:10–14) pa asina nos por aserká Dios ku konfiansa (Hebr. 10:19–23) i sirbiE komo "un saserdosio real" (Hebr. 9:14, 1 Pe. 2:9).

Finalmente, e sakrifisio di Hesus ta proveé tambe nutrishon pa nos bida spiritual. E ta proveé un ehèmpel ku nos mester opservá i sigui. Pues, Hebreonan ta invitá nos pa fiha nos bista riba Hesus, spesialmente e eventonan di e krus, i sigui Su direkshon (Hebr. 12:1–4, Hebr. 13:12,13).

Lesa Hebreonan 9:22–28. Kiko e pasashi akí ta bisa tokante e obra di Kristu den e santuario selestial?

E idea ku e santuario selestial mester di purifikashon tin sentido den konteksto di e santuario di Tèstamènt Bieu. E santuario ta un símbolo di e gobièrnu di Dios (1 Sam. 4:4, 2 Sam. 6:2), i e manera ku Dios ta trata ku e piká di Su pueblo ta afektá e persepshon públiko di e hustisia di Su gobièrnu (Salmo 97:2). Komo gobernante, Dios ta e Hues di Su pueblo, i ta ser sperá di ta hustu, vindikando esun inosente i kondenando esun kulpabel. Pues, ora Dios pordoná e pekador, E ta karga responsabilidat hudisial. E santuario, ku ta representá e karakter i atministrashon di Dios, ta kontaminá. Esaki ta splika dikon Dios ta karga nos pikánan ora E pordoná (Eks. 34:7, Num. 14:17-19, e hebreo original "pordoná" [nose'] den e versíkulonan akí ta nifiká "karga, soportá").

E sistema di sakrifisionan den e santuario israelita tabata ilustrá e punto akí. Ora un persona tabata buska pordon, e tabata trese un animal komo un sakrifisio na su fabor, e tabata konfesá su pikánan riba dje, i tabata mat'é. E sanger di e animal tabata ser huntá riba e kachunan di e altar òf di sprengu dilanti di e velo den e tèmpel den e promé apartamentu. Asina, e piká tabata ser transferí simbólikamente den e santuario. Dios tabata tuma e pikánan di e pueblo i tabata karga nan E mes.

Den e sistema israelita, purifikashon di òf ekspiashon pa piká tabata tuma lugá den dos fase. Durante aña, pekadornan repentí tabata trese sakrifisionan na e santuario, ku tabata limpia nan di nan piká pero tabata transferí e piká na e santuario, na Dios Mes. Na final di aña, riba e Dia di Ekspiashon, kua tabata e dia di huisio, Dios tabata purifiká e santuario, kitando Su responsabilidat hudisial dor di transferí e pikánan for di e santuario na e kabritu machu, Azazel, ku tabata representá Satanas (Lev. 16:15-22).

E sistema di dos fase akí, representá pa e dos departamentunan den e santuario terenal, ku tabata un patronchi di e santuario selestial (Eks. 25:9, Hebr. 8:5), tabata permití Dios mustra miserikòrdia i hustisia na mes momento. Esnan ku tabata konfesá nan pikánan durante aña tabata demostrá lealtat na Dios dor di warda un sosiegu solèm i aflihiendo nan mes riba e Dia di Ekspiashon (Lev. 16:29-31). Esnan ku no a demostrá lealtat lo a ser "kòrtá kitá afó" (Lev. 23:27-32).

Lesa Romanonan 3:21-26; Romanonan 1:16,17; i Romanonan 5:8. Kiko Redenshon den e Krus pa pordon di nos pikánan ta revelá tokante Dios?

E pordon di nos pikánan ta impliká dos fase den e mediashon di Hesus den e dos departamentunan di e santuario selestial. Na promé lugá, Hesus a kita nos pikánan i a karga nan E mes riba e krus pa asina proveé pordon na tur hende ku kere den djE (Echonan 2:38, Echonan 5:31). Riba e krus Hesus a gana e derechi pa pordoná kualke hende ku kere den djE pasobra El a karga nan piká. Tambe El a inougurá un aliansa nobo, kua ta permitiE pone e lei di Dios den kurason di kreyentenan pa medio di Spiritu Santu (Hebr, 8:10-12, Ezek. 36:25-27).

Un segundo fase den e ministerio di Hesus ta konsistí di un huisio, e huisio pre Atvènt, kua ainda tabata futuro for di e punto di bista di Hebreonan (Hebr. 2:1-4; Hebr. 6:2; Hebr. 9:27,28; Hebr. 10:25). E huisio akí ta kuminsá ku e pueblo di Dios i ta ser deskribí den Daniel 7:9-27, Mateo 22:1-14, i Revelashon 14:7. Su propósito ta pa mustra e hustisia di Dios dor di pordoná Su pueblo. Den e huisio akí e registronan di nan bida lo ta habrí pa e universo mira. Dios lo mustra loke a sosodé den kurason di kreyentenan i kon nan a brasa Hesus komo nan Salbador i a aseptá Su Spiritu den nan bida.

Papiando di e huisio akí, Ellen G. White a skirbi: "Hende no por enfrentá e akusashonnan su mes. Den su pañanan manchá di piká, konfesando su kulpabilidat, e ta para dilanti di Dios. Pero Hesus nos Abogado ta presentá un súplika efikas na fabor di tur ku, pa medio di arepentimentu i fe, a konfia e wardamentu di nan alma na djE. E ta pleita nan kaso i ta vense nan akusadó pa medio di e argumentonan poderoso di Kalvario. Su obediensia perfekto na e lei di Dios, asta te na e morto di e krus, a dun'E tur poder den shelu i riba tera, i E ta reklamá di Su Tata miserikòrdia i rekonsiliashon pa hende kulpabel. ... Pero miéntras nos mester realisá nos kondishon pekaminoso, nos mester dependé riba Kristu komo nos hustisia, nos santifikashon, i nos redenshon. Nos no por kontestá e akusashonnan di Satanas kontra nos. Kristu so por hasi un interseshon efikas na nos fabor. E ta kapas pa silensiá e akusadó ku argumentonan fundá no riba nos méritonan, sino riba di esnan di djE mes.” — Testimonies for the Church, tomo 5, p. 471, 472.