Laga Amor di Ruman Kontinuá

Lesa Hebreonan 13:1,2; Romanonan 12:13; 1 Timoteo 3:2; Tito 1:8; i 1 Pedro 4:9. Kiko tabata e ròl di hospitalidat den e iglesia primitivo?

Kristianismo tabata un movementu den tránsito ku hopi bia tabata dependé riba e hospitalidat di tantu kristiannan komo no kristiannan. E instrukshon pa “no lubidá” di mustra hospitalidat probablemente no ta simplemente referí na e fayo di pensa riba hospedá un hende sino na neglishá deliberadamente.

Pablo no tin den mente hospitalidat solamente pa e rumannan kreyente. E ta kòrda su lesadónan ku, dor di entretené strañeronan algun, sin sa, a entretené angelnan (Hebr. 13:2). Probablemente e tabatin den mente e bishita di e tres hòmbernan na Abraham i Sara (Gen. 18:2-15). Ofresiendo hospitalidat ta impliká kompartí poseshonnan ku un otro persona i sufriendo huntu ku otronan, kua ta loke Hesus a hasi pa nos (Hebr. 2:10-18).

Amor di ruman pa ku esnan den prizòn tabata impliká no simplemente ku kreyentenan tabata rekordá prizoneronan den nan orashonnan sino tambe dor di proveé alivio pa medio di material i sosten emoshonal. Tabatin un riesgo di negligensia intenshonal di prizoneronan. Esnan ku tabata proveé material i sosten emoshonal na esnan kondená pa sosiedat tabata identifiká nan mes ku nan. Den sierto sentido nan tabata bira “sosionan” ku nan i tabata hasi nan mes vulnerabel na abuzu sosial (Hebr. 10:32-34).

E reprenshon di Pablo ta usa imágennan i lenguahe pa kurashá e lesadónan enkuanto di e prizoneronan. Na promé lugá, e outor ta rekordá e sosten di e mes lesadónan pa nan rumannan enkarselá den pasado. Nan a bira “kompañeronan” òf “sosionan” di esnan ku a ser “eksponé públikamente pa reproche i aflikshon” (Hebr. 10:33, ESV). Na di dos lugá, e lenguahe di “maltrato” ta eko e ehèmpel di Moises, ku a skohe “mas bien pa ser maltratá huntu ku e pueblo di Dios ku gosa di e plasernan temporal di piká” (Hebr. 11:25, ESV). Finalmente, Pablo ta registrá e ideal di amor fraternal. E ta kòrda e lesadónan ku nan “tambe ta den e kurpa” (Hebr. 13:3, ESV). Nan ta kompartí e mesun kondishon humano i mester trata otronan manera nan lo a gusta pa ser tratá si nan tabata den e mesun sirkunstansianan; es desir, den prizòn. E hendenan mester, anto, proveé material i sosten emoshonal na prizoneronan, mustrando nan ku nan no tabata bandoná.

Lesa Hebreonan 13:4,5; Lukas 16:10-18; 1 Korintionan 5:1; Efesionan 5:3-5; i Kolosensenan 3:5. Ki dos maldatnan ta relashoná ku otro den e pasashinan akí?

Pablo ta spièrta e lesadónan kontra inmoralidat seksual i kudishi pasobra nan tabata dos gran menasa pa amor fraternal. De echo, outornan di Tèstamènt Nobo i moralistanan antiguo a nota un konekshon entre nan.

E yamada di Pablo pa honra matrimonio tabata impliká evitashon di kualke kos ku lo a rebah’é. E evitashon akí tabata inkluí apstené tantu di violashon di e voto matrimonial komo di divorsionan inhustifiká (kompará ku Mat. 19:9). E spièrtamentu pa mantené e kama di matrimonio puru ta referí na evitá profanashon di matrimonio a traves di relashonnan seksual pafó di matrimonio. E ekspreshon “fornikadónan” ta referí den Tèstamènt Nobo na tur forma di inmoralidat seksual (1 Kor. 5:9-11; 1 Kor. 6:9,10; Efe. 5:5; 1 Tim. 1:9, 10; Rev. 21:8; Rev. 22:15). Ademas, sosiedat greko-romano tabata floho den nan relashonnan seksual tanten ku nan tabata diskreto. Pablo ta spièrta, sinembargo, ku Dios lo husga adúlteronan. Kreyentenan no mester laga konvenshonnan sosial establesé nan propio normanan étiko.

“Amor pa plaka” tabata un di e kategorianan prinsipal di bisionan den e mundu greko-romano. De echo, den un otro karta Pablo a referí na “amor pa plaka” komo e fuente di tur maldat (1 Tim. 6:10).

E defensa kontra e bisio akí ta un aktitut ku Pablo ta enkurashá den vários epístola. Na promé lugá, nan mester “ta kontentu” ku e kosnan ku nan tabatin (tambe 2 Kor. 9:8; Fil. 4:11,12). Ademas, kristiannan mester kere i brasa e promesa di Dios ku Dios nunka lo no a “bandoná nan ni laga nan desampará” (Hebr. 13:5). E promesa akí a ser duná na diferente lugá i momento na Su pueblo i ta disponibel pa nos awe (Gen. 28:15; Deut. 31:6,8; Hos. 1:5; 1 Kron. 28:20). Kreyentenan, anto, ta ser invitá pa respondé na e promesa di Dios ku e palabranan di Salmo 118:6 (ESV): “Señor ta na mi banda; lo mi no tin miedu. Kiko hende por hasi mi?” E referensia akí na Salmo 118 ta apropiá pasobra e salmista a ekspresá aki su konfiansa den Dios, apesar di e sufrimentu kousá na dje dor di inkrédulonan.

Kompará Hebreonan 13:7-17. Kua mester ta nos relashon ku nos lidernan?

Hebreonan 13:7-17 ta kontené un spièrtamentu pa respetá i obedesé e lidernan di e kongregashon. E ta kuminsá ku un invitashon pa “kòrda riba” e lidernan ei di pasado ku a papia e palabra di Dios ku nan, i e ta sera ku un yamada pa “obedesé” e lidernan den presente (Hebr. 13:17). E lidernan di pasado ta probablemente esnan ku a prediká e palabra pa promé bia i a funda e kongregashon. E yamada pa “kòrda riba” nan no ta simplemente referí na un ehersisio mental di rekolekshon ni na un tributo eksterno honrando nan. Pablo ta splika ku nan mester “kòrda riba” nan dor di konsiderá e resultado di nan kondukta i dor di imitá nan fe.

Pa Pablo, e akto di mas grandi di rekuerdo i alabansa ta imitashon. Di e manera akí, Palo a añadí e lidernan fundadó di e kongregashon na e lista di héroenan fiel ku kreyentenan mester konsiderá kuidadosamente. E lista akí ta inkluí e héroenan di fe di Hebreonan 11, i Hesus, e ehèmpel kumplidó di fe, den Hebreonan 12. E outor ademas ta nota ku Hesus ta “e mesun ayera i awe i pa semper” (Hebr. 13:8, ESV). E ta para den kontraste total ku maestronan falsu ku ta kambia ku tempu i ku nan siñansanan ta bira “variá” i “straño” (Hebr. 13:9, NKJV).

E yamada pa kòrda riba e lidernan den Hebreonan 13:7 ta ser ripití den palabranan mas fuerte na final di e sekshon. Kreyentenan ta ser spièrtá pa obedesé e lidernan, pasobra nan ta paga atenshon na nan alma. E lidernan akí ta ser deskribí aki komo pastornan ku ta na enkargo di e bienestar spiritual di e kongregashon, nan tou, i ku lo duna kuenta na Dios pa nan estado spiritual (wak tambe 1 Pe. 5:1-4, 1 Kor. 3:10-15). Sin duda, tambe, e idea lo mester apliká na tur nos lidernan di iglesia, komo tambe na tur nivel di e denominashon aktual.

E konteksto ta sugerí tambe ku e lidernan akí ta sup pastornan ku ta sirbi bou di Hesus, “e gran Wardadó di e karnénan” (Hebr. 13:20). E kombinashon di kuido i fieldat di e lidernan i obediensia òf konfiansa di e miembronan lo resultá den goso. Esaki por nifiká ku e lidernan lo ta kapas di sirbi e kongregashon ku “goso”, òf ku nan lo duna kuenta di e kongregashon na Dios ku goso i no ku tristesa.

Kompará Hebreonan 13:9; Hebreonan 2:9; Hebreonan 4:16; i Hebreonan 6:19,20. Unda grasia ta ser optené? Kon nos kurason ta ser fortalesé?

E relashon entre siñansanan falsu i kuminda, ku Hebreonan 13:9 ta menshoná brevemente, probablemente no ta referí na e distinshon entre kumindanan puru i impuru.

Dikon?

Na promé lugá, Pablo no ta parse di ta preokupá den e epístola ku e distinshon entre kumindanan puru i impuru. Nos sa di Echonan 15 ku e iglesia kristian primitivo a afirmá tantu ku kreyentenan ta salbá pa grasia (Echonan 15:7-11) komo ku nan mester sigui warda algun regulashonnan di kuminda (Echonan 15:19,20). E distinshon entre kuminda puru i impuru i otro regulashonnan bíbliko no ta kontrali na grasia. De echo, Pablo ta argumentá ku e aliansa nobo a pone e lei den e kurason (Hebr. 8:10-12). Loke e outor ta hasi bon kla, sinembargo, ta ku sakrifisionan di animal i e mediashon saserdotal levítiko den e santuario a ser remplasá pa e sakrifisio superior i mediashon saserdotal di Hesus (Hebr. 8:4,5; Hebr. 10:1-18).

Na di dos lugá, e konteksto ta sugerí ku Pablo no ta kritikando e oudiensia pa apstené di sierto alimento sino pa partisipá di nan ku e speransa di, di algun manera, optené grasia òf mérito (Hebr. 13:9). Probablemente e ta spièrtando kontra partisipá den ritual hudiu òf kumindanan litúrgiko ku tabata ser selebrá komo un ekstenshon di e sakrifisionan di animal den tèmpel i ku ta ser suponé di proveé benefishinan spiritual, òf grasia. Pero grasia no ta ser mediá a traves di e kumindanan akí; grasia ta bini solamente pa medio di sakrifisio i mediashon saserdotal di Hesu-Kristu. Kreyentenan “tin un altar” (Hebr. 13:10), e krus di Kristu, for di kua nan por kome (Juan 6:47-58).

Den Hebreonan, “grasia” ta bini di e trono di Dios (Hebr. 4:16). E grasia akí, mediá dor di Kristu, ta un “anker”, “sigur i firme”, ku ta ser mará na e trono mes di Dios (Hebr. 6:19,20; kompará ku 4:16). Ta e grasia akí ku nos ta risibí pa medio di e sakrifisio di Kristu, ku ta proveé stabilidat i siguridat na nos kurason. Ora e kurason a ser “establesé” di e manera akí, e lo no ser “hibá” pa doktrinanan nobo (Hebr. 13:9), ni e lo no “desviá” for di Dios (Hebr. 2:1, NKJV).

Kompará Hebreonan 13:10-14, Marko 8:34, Mateo 10:38, Lukas 14:27, i Galationan 2:20. Kiko ta nifiká pa bai serka Hesus pafó di e kampamentu?

E lugá pafó di e porta tabata esun di mas impuru di henter e kampamentu. E kurpanan di e animalnan di sakrifisio tabata ser kimá aya (Lev. 4:12). Leprosonan tambe tabata ser ekskluí di e kampamentu (Lev. 13:46) i blasfemadónan i otro kriminalnan tabata ser ehekutá aya (Lev. 24:10-16,23; 1 Reinan 21:13; Echonan 7:58). E regulashonnan akí tabata presuponé ku e presensia di Dios tabata denter di e kampamentu. Tur loke tabata impuru tabata ser tirá pafó pasobra Dios no tabata dispuesto pa mira ningun kos “impuru” òf “indesente” den dje (Num. 5:3, Deut. 23:14).

Hesus a sufri riba e krus pafó di Herusalèm (Juan 19:17-20). Esaki ta enfatisá e bèrgwensa ku a ser tirá riba djE (Hebr. 12:2). El a ser kondená ofisialmente komo un ku a “blasfemá e Nòmber” i, pa e motibu ei, a ser repudiá pa Israel i ehekutá pafó di e muraya (Marko 14:63,64; wak Lev. 24:11,16). Hesus a ser tirá pafó di e kampamentu komo un kos “bergonsoso”, “impuru”, òf “indesente” (Hebr. 12:2). Pablo, sinembargo, ta spièrta kreyentenan pa sigui Hesus pafó di e porta, soportando e bèrgwensa ku El a soportá (Hebr. 12:2; wak Hebr. 13:13). Esaki tabata tambe e kaminda ku Moises a sigui, ku a skohe pa karga “e reproche di Kristu”, na lugá di e tesoronan di Egipto (Hebr. 11:26).

Paradóhikamente, sinembargo, Hebreonan ta sugerí ku e presensia di Dios awor ta pafó di e kampamentu. E akshon di sigui Hesus pafó di e kampamentu no ta nifiká solamente “karga Su reproche”, òf bèrgwensa, sino tambe sali “padilanti na djE” (Hebr. 13:13, NKJV) meskos ku e israelitanan ei ku “tabata buska Señor” a bai “pafó di e kampamentu” den desierto ora Moises a kita e tènt di Dios for di e kampamentu despues di e kontroversia di e bisé di oro (Eks. 33:7. NKJV). E relato akí ta sugerí ku e rechaso di Hesus dor di inkrédulonan tabata impliká tambe rechaso di Dios, manera Israel a hasi den e apostasia di e bisé di oro (Eksodo 32,33). Por lo tantu, e kaminda di sufrimentu i bèrgwensa ta tambe e kaminda na Dios.

Pablo ta invitá lesadónan pa sigui Hesus komo “e outor i kumplidó” di nan fe (Hebr. 12:2), invitando nan implísitamente tambe pa konsiderá nan sufrimentunan aktual komo un disiplina breve ku lo produsí “e fruta pasífiko di hustisia” (Hebr. 12:11). Nan ta lagando un siudat òf kampamentu korumpí atras en buska di “e siudat benidero” kende su arkitekto ta Dios (Hebr. 13:14, ESV; Hebr. 11:10,16).