E Kreashon

Lesa Salmo 100: 1–3. Kiko ta e reakshon humano riba e kreashon di Dios, i dikon?

Den Génesis 1, e promé mensahe di e relato di Kreashon ta “Dios”. Nos ta tend’é kaba den e tradukshon: “Na prinsipio Dios” (Gen. 1:1). Den e promé frase (Gen. 1:1), ta pone e palabra “Dios” meimei di e versíkulo i ta enfatis’é pa medio di e asento di mas fuerte den e kantamentu tradishonal litúrgiko pa asina enfatisá e importansia di Dios. E teksto di Kreashon ta kuminsá, anto, ku un énfasis riba Dios, e outor di Kreashon.

E buki di Génesis ta kuminsá, de fakto, ku dos diferente presentashon di Dios. E promé relato di Kreashon (Gen. 1:1–2:4) ta presentá Dios komo infinitamente leu for di hende, e Dios trasendente, Elohim, kende su nòmber ta papia tokante e soberania di Dios. E nòmber Elohim ta indiká superioridat i fortalesa, i e uso di e forma plural di e palabra Elohim ta ekspresá e idea di mahestat i trasendensia.

E di dos relato di Kreashon (Gen. 2:4–25) ta presentá Dios komo serka i personal, e Dios omnipresente YHWH, kende su nòmber, hopi hende ta kere, ta indiká serkania i relashon. E teksto di Kreashon komo un totalidat ta, anto, un apelashon implísito pa adorá Dios; na promé lugá, pa ta konsiente di e grandesa i poder infinito di Dios, i na mes momento pa rekonosé nos dependensia riba djE pasobra El a krea nos “i no nos, nos mes” (Salmo 100:3). Ta p’esei hopi di e salmonan ta asosiá adorashon hopi bia ku Kreashon (Salmo 95:1–6; Salmo 139:13, 14 [kompará ku Rev. 14:7]).

E punto di bista dòbel akí di un Dios kende ta tantu mahestuoso komo poderoso, i kende ta tambe serka, amoroso, i den un relashon ku nos, ta kontené un punto importante tokante kon nos mester aserká Dios den adorashon. Temor i reverensia ta bai huntu ku goso i e seguransa di e proksimidat, pordon, i amor di Dios (lesa Salmo 2:11). Asta e sekuensia di e dos presentashonnan di Dios ta signifikante: e eksperensia di e proksimidat di Dios i e intimidat di Su presensia ta sigui e eksperensia di e distansia di Dios. Solamente ora nos a realisá ku Dios ta grandi, nos lo ta kapas pa apresiá Su grasia i disfrutá, ku temblamentu, di Su presensia maravioso i amoroso den nos bida.

Lesa Génesis 1:4,10,12,18,21,25,31, i Génesis 2:1–3. Kiko ta nifikashon di e refran “e tabata bon” den e promé relato di Kreashon? Kiko ta e lès impliká ku e konklushon di Kreashon ta kontené (Gen. 2:1–3)?

Na kada stap di e relato di Kreashon, Dios ta evaluá Su trabou komo tov, “bon”. Generalmente hende ta komprondé ku e athetivo akí ta nifiká ku e obra di Kreashon di Dios tabata eksitoso i ku e opservashon di Dios ku “e tabata bon” ta nifiká ku “el a funshoná”. E lus tabata iluminando (Gen. 1:4). E matanan tabata produsiendo fruta (Gen. 1:12) etcetera.

Pero e palabra akí tabata referí na mas ku e efisiensia di un funshon. Ta usa e palabra hebreo tov den Beibel tambe pa ekspresá un apresio estétiko di algu bunita (Gen. 24:16). Ta us’é tambe den kontraste ku maldat (Gen. 2:9), kua ta asosiá ku morto (Gen. 2:17).

E frase “e tabata bon” ta nifiká ku e kreashon tabata funshonando bon, ku e tabata bunita i perfekto, i ku no tabatin maldat den dje. Mundu “ainda no” tabata manera nos mundu, afektá pa piká i morto, un idea afirmá den e introdukshon na e di dos relato di Kreashon (lesa Gen. 2:5).

E deskripshon akí di e Kreashon ta kontradesí radikalmente e teorianan di evolushon, kua enfátikamente ta deklará ku e mundu a forma su mes di forma progresivo a traves di un sekuensia di susesonan kasual, kuminsando for di un kondishon inferior te na unu superior.

Kontrali na esei, e outor bíbliko ta afirmá ku Dios, intenshonalmente i di ripiente, a krea e mundu (Gen. 1:1). No tabatin nada di kasualidat òf insigur tokante esei. E mundu no a aparesé di su mes sino solamente komo resultado di e boluntat i palabra di Dios (Gen. 1:3). E verbo bara’, “krea”, tradusí den Génesis 1 komo na prinsipio Dios “a krea” e shelunan i tera, ta presentá solamente ku Dios komo su suheto, i e ta indiká un akshon apruto: Dios a papia, i tabata asina.

E teksto di Kreashon ta informá nos ku Dios a hasi “tur kos” e ora ei (Gen. 1:31), i di akuerdo ku e Kreador Mes, El a husga tur “masha bon” (Gen. 1:31). Génesis 1:1 ta deklará e evento mes, e kreashon di shelu i tera; i Génesis 2:1 ta deklará ku e evento a terminá. I tur tabata kompletá, inkluyendo e Sabat, den shete dia.

Lesa Génesis 2:2, 3 i Eksodo 20:8–11. Dikon e Sabat di e di shete dia ta relashoná ku Kreashon? Kon e konekshon akí ta impaktá e forma kon nos ta warda e Sabat?

Ta presisamente pasobra “Dios a terminá” Su trabounan di Kreashon ku El a instituí e Sabat. E Sabat di e di shete dia ta, por lo tantu, e ekspreshon di nos fe ku Dios a terminá Su trabou e ora ei, i ku EL a hañ’é “masha bon”. Pa warda e Sabat ta pa uni ku Dios den rekonosementu di e balor i bunitesa di Su kreashon.

Nos por sosegá di nos trabounan meskos ku Dios a sosegá di esnan di djE. Wardamentu di Sabat ta nifiká bisa sí na e kreashon “masha bon” di Dios, kua ta inkluí nos kurpa físiko. Kontrali na algun kreensia antiguo (i moderno), nada den Skritura, Tèstamènt Bieu òf Nobo, ta difamá e kurpa komo malu. Esei ta un konsepto pagano, no unu bíbliko. En kambio, wardadónan di Sabat ta gradesidu pa e kreashon di Dios, kua ta inkluí nan propio karni, i ta p’esei nan por disfrutá di e Kreashon i dikon nan ta kuid’é.

E Sabat, kua ta marka e promé “fin” di historia humano, ta tambe un señal di speransa pa humanidat ku ta sufri i pa e kehamentu di e mundu. Ta interesante ku e frase “a kaba ku e trabou” ta bolbe aparesé na final di konstrukshon di e santuario (Eks. 40:33), i atrobe na final di konstrukshon di e tèmpel di Salomon (1 Reinan 7:40,51), tur dos lugá kaminda a siña e lès di e evangelio i salbashon.

Despues di e Kaida, e Sabat, na final di siman, ta mustra na e milager di salbashon, kua lo tuma lugá solamente a traves di e milager di un kreashon nobo (Isa. 65:17, Rev. 21:1). E Sabat ta un señal na final di nos siman humano ku e sufrimentu i pruebanan di e mundu akí lo tin un final tambe.

Ta p’esei Hesus a skohe e Sabat komo e dia di mas apropiá pa kura esnan malu (Lukas 13:13–16). Kontrali na kualke tradishon ku e lidernan tabata pegá den dje, pa medio di e kurashonnan di Sabat Hesus a mustra e hendenan, i nos, na e momento ora tur doló, tur sufrimentu, tur morto, lo pasa bai, kua ta e konklushon final na e proseso di salbashon. P’esei, kada Sabat ta mustra nos na e speransa di redenshon.

E kreashon di hende ta e último akto di Kreashon di Dios, a lo ménos den e relato di Génesis. Hende ta e kulminashon di henter e kreashon terestre, e propósito pa kua Dios a traha e tera.

Lesa Génesis 1:26–29 i Génesis 2:7. Kiko ta e konekshon entre e dos diferente vershonnan relashoná ku e kreashon di humanidat?

Ku Dios a krea hende den Su imágen ta un di e deklarashonnan di mas oudas di Beibel. Dios a krea solamente hende den Su imágen. Aunke “Dios a traha e bestianan di tera di akuerdo ku su sorto” (Gen. 1:25, NKJV), “Dios a krea hende den Su mes imágen” (Gen. 1:27, NKJV). A limitá e fórmula akí hopi bia na e naturalesa spiritual di hende, kua ta interpretá pa nifiká ku ta komprondé e “imágen di Dios” pa nifiká solamente e funshon atministrativo di representá Dios, òf e funshon spiritual di relashon ku Dios òf ku otro.

Miéntras e entendimentunan akí ta korekto, nan ta faya di konkluí e realidat físiko importante di e kreashon akí. Tur dos dimenshon ta, en realidat, inkluí den e dos palabranan “imágen” i “semehansa” deskribiendo e proseso akí den Génesis 1:26. Miéntras e palabra hebreo tselem, “imágen” ta referí na e forma konkreto di e kurpa físiko, e palabra demut, “semehansa”, ta referí na kualidatnan apstrakto ku ta komparabel ku e Persona divino.

P’esei, mester komprondé e noshon hebreo di e “imágen di Dios” den sentido holístiko di e perspektiva bíbliko di e naturalesa humano. E teksto bíbliko ta afirmá ku Dios a krea individuonan humano (hòmber i muhé) den Su imágen físikamente, komo tambe spiritualmente. Manera Ellen G. White ta komentá klaramente: “Ora Adam a sali for di man di e Kreador, e tabata karga, den su naturalesa físiko, mental, i spiritual, un semehansa na su Hasidó.”—Education, p. 15.

De fakto, e komprondementu holístiko akí di e imágen di Dios, inkluyendo e kurpa físiko, ta reafirmá den e otro relato di Kreashon, kua ta bisa ku “hende a bira un ser bibu” (Gen. 2:7, NKJV), literalmente, “un alma bibu” (nefesh), komo resultado di dos operashon divino: Dios “a forma” i Dios “a respirá”. Nota ku e “respirá” hopi bia ta referí na e dimenshon spiritual, pero tambe e ta konektá na e kapasidat biológiko di hala rosea, e parti di e hòmber ku Dios “a forma ... di stòf di tera”. E ta e “rosea di bida”; es desir, rosea (spiritual) i bida (físiko).

Mas despues Dios lo ehekutá un di tres operashon, e bia akí pa krea e muhé for di kurpa di e hòmber (Gen. 2:21,22), un manera pa enfatisá ku e muhé ta di e mesun naturalesa ku e hòmber.

Tan pronto ku Dios a krea e promé hòmber, El a ofres’é tres regalo: e Hòfi di Eden (Gen. 2:8), kuminda (Gen. 2:16), i e muhé (Gen 2:22).

Lesa Génesis 2:15–17. Kiko ta deber di hòmber pa ku kreashon i pa ku Dios? Kon e dos debernan akí ta relashoná ku otro?

E promé deber di hòmber enkuanto di e medioambiente natural den kua Dios a pon’é “pa kuida i ward’é” (Gen. 2:15, NKJV). E verbo ‘avad, “kuida”, ta referí na trabou. No ta sufisiente pa risibí un regalo. Nos mester traha riba dje i hasié fruktífero, un lès ku Hesus lo ripití den Su parabel di e talentonan (Mat. 25:14–30). E verbo shamar, “warda”, ta impliká e responsabilidat pa preservá loke bo a risibí.

E di dos deber ta konserní su kuminda. Nos tin ku kòrda ku Dios a dun’é na hende (lesa Gen. 1:29). Dios a bis’é tambe ku “bo por kome libremente” (Gen. 2:16, NKJV). Hende no a krea e palunan, ni e kuminda riba nan. Nan tabata un regalo, un regalo di grasia.

Pero aki tin un mandamentu tambe aki: nan mester a risibí i disfrutá di e regalo generoso di Dios “di tur palu” (NKJV). Komo parti di Su grasia, sinembargo, Dios ta añadí un restrikshon. Nan no mester a kome di un palu partikular. Disfrutá sin un restrikshon lo hiba na morto. E prinsipio akí tabata ei den e Hòfi di Eden i, den hopi forma, e mesun prinsipio ei ta eksistí awe.

E di tres deber di hòmber ta konserní e muhé, e di tres regalo di Dios: “hòmber lo bandoná su tata i mama i lo uni ku su esposa” (Gen. 2:24, NKJV). E deklarashon ekstraordinario akí ta un ekspreshon poderoso ku ta enfatisá responsabilidat humano pa ku e pakto matrimonial i e propósito di ta “un karni” (NKJV), ku ta nifiká un persona (kompará ku Mat. 19:7–9).

E rason ku ta e hòmber (i no e muhé) ku mester bandoná su mayornan por tin di aber ku e uso genériko bíbliko di e maskulino; pues, kisas, e mandamentu ta apliká na e muhé tambe. Di tur manera, e laso di matrimonio, aunke e ta un regalo di Dios, ta enserá responsabilidat humano unabes risibí e regalo, un responsabilidat ku ta riba tantu e hòmber komo e muhé pa kumpli fielmente.